Te tahi aua no te feia e au i te mamoe i te fenua Navajo

HÓZHÓNÍ, “nehenehe” ïa na roto i te reo o te mau Inidia Navajo, e mea na reira te feia Navajo ia faataa i to ratou fenua. Mai te matahiti 1868 mai â, ua tufa te faatereraa a te mau Hau Amui no Marite e 62 000 kilometera tuea tuhaa fenua faahereherehia no te mau Navajo i te pae apatoerau hitia o te râ no Arizona, o tei haaati i te tuhaa fenua i piihia na poro e maha, i reira na hau e maha no Arizona, no Colorado, no New Mexico, e no Utah e tuati ai. I teie mahana, te faahereherehia ra te peho ra Monument Valley, tei tui te roo na roto i te mau hohoˈa Western, mai te hoê Aua o te Opu fetii Navajo, e te haere maira te mau ratere i reira no te mau vahi atoa o te ao nei. I roto i teie peho, e mau pǎpǎ ofai uteute anaˈe ïa e 300 metera te teitei o te tia ra na nia ˈˈe i te mau vahi papu medebara teitei. E tano ïa te parau Navajo ra “te area i rotopu i te mau mato” no taua peho ra.

Ua matauhia e e feia haehaa, farii maitai mahanahana mau, e mau fetii piri roa te nunaa Navajo. Te noho ra na 170 000 taata o taua fenua faahereherehia ra i roto iho â râ i te mau puhaparaa moemoe, e peu tumu hoi na ratou. Te faaamu noa ra vetahi i te mau mamoe e te noho ra ratou i roto i te mau fare iti raau tapoˈihia i te repo, tei piihia hogan. Ua tui te roo o te mau ohipa aravihi e te mau taoˈa rima î a te mau Navajo. E mea au-roa-hia ta ratou mau vauvau tahua e ta ratou mau ahu taoto, tei faanehenehehia e te mau reni aore ra e te mau hohoˈa tumu peni rau, tei ninohia i te huruhuru mamoe. Mea matau-maitai-atoa-hia te mau taoˈa faaunauna Navajo hamanihia i te ario anoihia e te ofai ninamu e te tahi atu mau taoˈa natura.

Te faataeraa i te parau apî maitai i te fenua Navajo

Hau atu i te 30 matahiti te maoro, ua haere te mau Ite no Iehova i te fenua Navajo eiaha no te mataitai noa, no te faatae atoa râ i te parau apî maitai o te Basileia o te Atua i te feia i taua vahi atea ra. (Mataio 24:14) Ua aratai te mau pionie tamau e te mau pionie taa ê Ite no Iehova i te ohipa pororaa. E rave rahi o ratou tei farii i te aniraa a te mau tiaau ratere e a te mau Ite no reira e haere i te mau vahi e hinaaro rahi ra i te tauturu. No roto mai vetahi i te mau amuiraa fatata, area vetahi ra, e tae noa ˈtu i te mau melo o te mau opu fetii Tumu taa ê no Marite, no ǒ mai ïa ratou i te mau vahi huru rau o te mau Hau Amui no Marite.

Ua faaau teie mau tane e mau vahine tei rave i te mau haapaeraa, i ta ratou taviniraa i ǒ nei mai te taviniraa mitionare. No te aha? Na mua roa, e mea fifi roa ia haapii i te mau reo tumu no te mea e mea fifi roa to ratou mau taˈiraa reo, mau faanahoraa, e mau parau. E no te mea atoa te tapea maite ra te feia tumu, i te pae rahi, i ta ratou mau tutuu i te pae haapaoraa, i te pae faanahoraa i te utuafare, e i te faaohiparaa i te fenua ei imiraa moni. Hau atu, mea varavara ia noaa mai te fare e te ohipa no te feia e ere i te Inidia, e mea fifi ïa no te feia tei haere atu ia faaea i reira. I te pae hopea, no te mea ua hamani-ino-hia teie mau taata e te feia uouo, e aamu roa hoi teie, papu maitai e ua ô mai i roto ia ratou te tahi huru manaˈo ino i te feia e ere i te Inidia.a

I te omuaraa, ia haere anaˈe te mau Ite na tera e tera fare ma te oomo i te pereue e te taamu arapoa, ua manaˈohia e e Momoni ratou e e rave rahi taata te ore e tatara i to ratou opani. I to ratou râ oomoraa i te ahu au noa, ua fariihia ratou, mea pinepine hoê hora te maoro aore ra hau atu. I teie nei, te farii ra te mau taata i te mau Ite no Iehova, noa ˈtu e te oomo faahou ra ratou i te pereue e te taamu arapoa i roto i te taviniraa.

E mea fifi mau atoa ia farerei i te feia e faaea ra i te fenua Navajo faahereherehia. E tia ia tere e rave rahi kilometera te atea na nia i te mau eˈa ofaifai, oneone, e te vari. Papu maitai e e faaino atu â te reira i te mau pereoo e mea rohirohi no te mau horopatete. E nehenehe atoa te mau pereoo e mau, ua ineine noa râ te mau horopatete i te tauturu ia tere faahou te mau pereoo. No te haere e farerei i te feia anaanatae, e faatere i te haapiiraa Bibilia a te hoê taata i to ˈna fare, aore ra no te afai i te tahi taata i te hoê putuputuraa kerisetiano, te titau pinepine ra ïa te reira e rave rahi hora no te haere e no te hoˈi mai. Ua ineine râ te mau Ite i te horoa ia ratou, o te haapapu ra ïa i to ratou here no te feia tumu.—A faaau e te Tesalonia 1, 2:8.

Mea au na to Navajo e tauaparau no nia i te Bibilia. Mea matauhia e e putuputu te utuafare taatoa—te mau tamarii, te mau metua, e te mau metua tupuna—no te faaroo i te parau o te tiaturiraa o te hoê fenua paradaiso a muri aˈe no te huitaata nei. I te aniraahia i te hoê taata Navajo e mai te aha te huru o te paradaiso no ˈna, ua pahono mai oia e, “Mea heeuri, e mea rahi te mamoe,” o te faaite ra ïa i to ratou here i te fenua e i ta ratou mau nǎnǎ. Mea au atoa na ratou te mau papai Bibilia, i te tahi mau taime, e horoa mai ratou i te mau poe, te mau tâpû puˈa, te mau punu û, e te tahi atu mau mea mai te reira te huru no te turu i te taviniraa o te Basileia. Ua noaa i te hoê pionie taa ê tau 200 tamatahitiraa i Te Pare Tiairaa e A ara mai na! i roto i te hoê matahiti, e e piti atoa tamatahitiraa i te hoê taata na nia i te puaahorofenua.

Te hamaniraa i te hoê “aua mamoe”

Ia tae anaˈe i te tau veavea, i reira te tiai mamoe Navajo e faahaere ai i ta ˈna nǎnǎ mamoe i te hoê aua. No te mea e tei pihai iho teie aua no te mau mamoe i te tau veavea tei maitihia i te vahi matie e te hoê vai puna maitai, e tauturu ïa te reira i te nǎnǎ ia oraora maitai. I roto i te hoê auraa taipe, e nehenehe e faaau te hoê Piha no te Basileia i taua aua ra—te hoê vahi faaamuraa i te pae varua e te hoê vai puna o te parau mau. E nehenehe te feia o te haere mai e ite i te maa i te pae varua o te faaoraora e o te haapaari ia ratou i te pae varua.

No te tahi taime, ua faatupuhia na te mau putuputuraa i roto i te hoê piha haapiiraa no Kayenta, i Arizona. I muri iho i te avaˈe Atete 1992 ra, tauturuhia e te mau hanere Ite no te mau hau huru rau, ua hamanihia te hoê Piha no te Basileia apî i Kayenta. Te faaite ra teie Piha no te Basileia e e rave rau atu â i taua fenua ra i te feia no reira e e tamau noa te ohipa pororaa. I rotopu i te tahi atu mau Piha no te Basileia e faaohipahia ra i teie tuhaa fenua rahi, te vai atoa ra i te mau oire no Tuba e no Chinle, tei roto hoi teie nau oire i te fenua faahereherehia, hoê i Keams Canyon i te fenua opu fetii Hopi i roto i te fenua faahereherehia Navajo, e e rave rau atu â i roto i te mau oire na te hiti o te fenua faahereherehia. Eaha te faahopearaa?

Te farii-rahi-raa i te poroi o te Basileia

I Kayenta, hau atu i te 12 taata no reira tei bapetizohia mai te hamaniraahia mai te Piha no te Basileia, tapao faaite ïa e te haamaitai ra Iehova i teie vahi haamoriraa mau. Te faaite ra teie piha e e faaea mai te mau Ite no Iehova e te tauturu atoa ra i te taata ia tiaturi i te parau apî maitai o te Basileia o ta ratou e poro ra. No hohora-noa-hia iho nei te oreroraa parau Bibilia huiraatira matamua i reira na roto i te reo Navajo. Ua oaoa na melo e 40 o te amuiraa i te farii 245 taata i te oreroraa parau no nia i te mau hopoia a te mau metua. Ma te mafatu mauruuru, ua haere mai te hoê utuafare e vau melo, e toru hora ia haere, e faaroo i teie oreroraa parau—a tahi ra ratou i haere ai i te hoê Piha no te Basileia.

Te tahi atu mauhaa faufaa ta Iehova i horoa mai, o te vea iti ïa E oaoa oe i te fenua e a muri noa ˈtu! na roto i te reo Navajo. Mea fifi roa te huriraahia te vea iti ra na roto i te reo Navajo, e reo fifi roa hoi. Hau atu i te 1 000 hora ta te feia huri i horoa amui no te ite papu e te horoa ra anei te vea iti ma te tia i te poroi o te Basileia. Mai to ˈna matararaa mai i te hopea matahiti 1995 ra, ua opere te mau Ite no reira e rave rahi tausani vea iti, e e rave rahi haapiiraa Bibilia tei faaterehia e te feia e imi ra i te parau mau.

Te faaohipa-rahi-hia ra te reo Navajo i roto i te taviniraa no te mea te haapii ra te feia poro i te Basileia i taua reo ra. Ua haamata te mau amuiraa o taua vahi ra i te faaohipa i te reo Navajo i roto i te Haapiiraa o te Taviniraa Teotaratia, e te faatupuhia ra te mau piha haapiiraa na roto i te reo Navajo no te haapii i te feia poro. Hau atu, te huri-atoa-hia ra te porotarama i te mau rururaa no reira na roto i te reo Navajo. Papu maitai e na roto i teie mau tutavaraa atoa, e rave rahi atu â feia i taua fenua faahereherehia ra o te farii mai.

Eiaha e haamoehia e i rotopu i te mau hotu o te Basileia i taua fenua Inidia faahereherehia ra, te vai ra te mau huru maitatai roa i te pae varua faatupuhia e to tatou mau taeae Navajo. E hitu matahiti te maoro, e afai na o Jimmy raua o Sandra i ta raua na tamarii e pae i te mau putuputuraa i te mau hebedoma atoa, 120 kilometera te atea ia haere. Te haamanaˈo maitai ra te utuafare ia himene anaˈe ratou i te mau himene o te Basileia e ia haapii amui ratou i te Bibilia i roto i to ratou mau tere roa. Ua turai te here e te itoito o teie mau metua no te parau mau i te mau tamarii ia pee i to raua hiˈoraa na roto i te riroraa ei feia arue pûpûhia no Iehova. Te tavini ra e maha o ratou i teie mahana ei mau pionie tamau, area o Jimmy ra, e matahiapo ïa o ˈna. No te faarahi atu â i te oaoa o teie utuafare, ua bapetizohia iho nei te tuahine o Jimmy ra o Elsie, te vahine matamua hoi e paraparau ra i te reo Navajo anaˈe.

Na roto i te mau tiai mamoe no reira e ta ratou mau nǎnǎ, te rahi atu â ra te hau o te mau pǎpǎ ofai e faaunauna ra i te fenua faahereherehia Navajo. Ua tohu te peropheta ra o Isaia e mea maoro i teie nei no nia ia Iehova e: “E faaamu oia i ta ˈna nǎnǎ mai te tiai mamoe ra; e haaputu oia i te mau fanauˈa rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.” (Isaia 40:11) Na roto i ta ˈna Tiai mamoe Maitai, o Iesu Mesia, te haaputuputu nei o Iehova i roto i ta ˈna aua i te pae varua te feia atoa i roto i te fenua faahereherehia Navajo e hinaaro ra e faaroo i te parau apî maitai o te Basileia e e fanaˈo i ta ˈna haamaitairaa mure ore.

[Nota i raro i te api]

[Hohoˈa i te api 24]

Te faaroo ra te hoê vahine tiai mamoe i te parau apî maitai