Te faatia ra te feia poro i te Basileia

Te tiamâraa mai i te mana o te mau demoni

UA FAATERE maoro na te peu tahutahu i te oraraa o te mau mirioni taata. Teie râ, e nehenehe e tiamâ mai! O te ohipa ïa i tupu i nia e rave rahi taata i te oire no tahito ra o Ephesia. Ia au i te aamu a te Bibilia, “e rave rahi hoi to te feia peu [“tahutahu,” MN] i hopoi mai i ta ratou mau buka, ua tutui ihora i te auahi . . . I te rahi hoi i te tupu te parau a [“Iehova,” MN] ra.”—Ohipa 19:19, 20.

Te tupu atoa ra te amuiraa kerisetiano i teie mahana i te rahi. Mai te ohipa i tupu i Ephesia, i rotopu i te feia tei riro mai ei feia faaroo, te vai ra te feia i rave na i te peu tahutahu. Na te hiˈoraa i muri nei i Zimbabwe e faataa ra i te reira.

E vahine matau-maitai-hia o Gogo (Mama ruau) Mthupha no to ˈna mana tahutahu. E haere mai te taata mai Zambia, mai Botswana, e mai Afirika Apatoa roa mai, e hiˈo ia ˈna no te rapaau ia ratou e ta ˈna iho mau raau i hamani. Ua haapii atoa o Gogo Mthupha ia vetahi ê e nafea ia riro ei n’anga, oia hoi ei tahuˈa. I te tahi mau taime, e pifao atoa oia i te taata!

I te hoê Sabati poipoi, ua farerei atu o Gogo Mthupha i te mau Ite no Iehova, o te poro haere ra na te mau fare. Ua fanaˈo roa oia i te hoê aparauraa e o ratou no nia i te parau tǎpǔ a te Bibilia no nia i te hoê ao apî parau-tia, e ao aita e mana ino aˈe. Ua rave oia i te buka ra E nehenehe oe e ora e a muri noa ˈtu i roto i te paradaiso i nia i te fenua nei e ua farii oia i te hoê haapiiraa Bibilia i to ˈna fare.a I muri iho noa e toru haapiiraa, ua haamata ˈtura oia i te haere i te mau putuputuraa.

Na roto i to ˈna tuatapaparaa i te Bibilia, ua haapii atura o Gogo Mthupha e to ˈna mana taa ê, no ǒ mai ïa i te mau varua iino o tei patoi i te mana arii o Iehova. (Petero 2, 2:4; Iuda 6) Ua haapii atoa oia e ua faaoti papu teie mau demoni i te faafariu ê mai i te mau taata atoa ta ratou e nehenehe, ia Iehova e i te haamoriraa viivii ore. I te mea e mea na roto i te tiaororaa i teie mau varua iino e ora ˈi oia, eaha ïa ta ˈna e rave?

Ua faaite o Gogo Mthupha i to ˈna hinaaro e faarue i ta ˈna mau taritoa e ta ˈna mau taoˈa tahutahu atoa. Te vai atoa ra to ˈna taupoo taa ê e “te mau tara puaatoro paraparau,” o ta ˈna i faaohipa i roto i ta ˈna mau faaoraraa tahuˈa. Ua hinaaro o Gogo Mthupha e faarue i teie mau huru tauihaa atoa ia nehenehe oia e tavini i te Atua mau hoê e te ora, o Iehova.

Teie râ, aita te tahi o to ˈna mau fetii i hinaaro no te mea na ˈna e turu ra ia ratou i te pae moni. Ua taparu ratou ia ˈna ia horoa mai na ratou taua mau tauihaa ra, e to ˈna mana maere ia nehenehe hoi ratou e fanaˈo noa i te moni. Aita râ o Gogo Mthupha i farii.

Ua tauturu te amuiraa a te mau Ite no Iehova no reira ia ˈna, e toru pute tei î i te mau tauihaa tahutahu o ta ˈna i tanina i te auahi. A paapaa noa ˈi ta ˈna mau tauihaa o te haamoriraa demoni i te auahi, ua na ô o Gogo Mthupha e: “A hiˈo na! Aita roa ˈtu tera tara e nehenehe e faaora ia ˈna iho.”

I muri iho, ua faataipe o Gogo Mthupha ma te oaoa i to ˈna pûpûraa ia ˈna no Iehova na roto i te bapetizoraa i roto i te pape. Eaha ïa ta ˈna imiraa moni i teie nei? O te hooraa ïa i te mau maa tupu. Oia, na roto i te mana o te Parau a te Atua, e nehenehe te hoê taata e tiamâ mai i te haamoriraa demoni. Te na ô ra o Gogo Mthupha e: “Aita vau i tiamâ aˈenei mai teie te huru.”

[Nota i raro i te api]