Te tupu noa ra anei te mau faaoraraa semeio?

“A TIATURI ia Iesu e ia ora oe!” Ua turai te mau poroi mai teie te huru ia Alexandre, e melo oia no te hoê ekalesia Evanelia, ia manaˈo e ia rave oia i te raau no te rapaau i to ˈna maˈi, tapao faaite ïa ua erehia oia i te faaroo. Ua tiaturi papu oia e na roto noa i to ˈna faaroo e tupu ai te faaoraraa semeio o ta ˈna i hinaaro. Ua putapû roa o Benedita, e vahine Katolika rahi oia, i to ˈna faarooraa e te ravehia ra te mau semeio faaoraraa i roto i te vahi moˈa no Aparecida do Norte, i te hau no São Paulo, i Beresilia. Ma te faahiti i te mau parau tahutahu ta to ˈna metua vahine fetii i haapii ia ˈna, ua pure o Benedita i to Matou Paretenia no Aparecida, i te Peata ra o Antoine, e i te tahi atu “mau peata” no te ani i te mana e faaora i te feia maˈi.

E au ra e, i te pae hopea atoa o te senekele 20, te tiaturi noa ra e rave rahi taata i te mau faaoraraa semeio—no te aha râ? Peneiaˈe te hepohepo nei vetahi no te mea aita te mau taote e nehenehe e tamǎrû i te maˈi, te oto, e te mauiui o te feia herehia e ratou, ta ratou mau tamarii iho â râ. Te manaˈo ra paha te feia e maˈi tupu tamau to ratou e, i te mea hoi e mea moni roa te mau rapaauraa no teie tau, e ere i te mea ino ia titau i te faaoraraa faaroo. Te ite nei vetahi mau taata i roto i te tele e te pûpû nei te mau ekalesia e te mau taata huru rau i te mau rapaauraa i te maˈi SIDA, te hepohepo, te mariri ai taata, te inoraa te upoo, te neˈiraa toto puai, e te tahi atu â mau maˈi e rave rahi. Noa ˈtu e te tiaturi nei ratou i teie mau parau aore ra aita, e huri tia ˈtu paha ratou i taua mau taata ra ei ravea hopea. Area vetahi ra o te tiaturi nei e o te mau varua iino te tumu o to ratou maˈi, te manaˈo ra paha ratou e aita ta te mau taote e mana no te tauturu mai ia ratou.

I te tahi aˈe pae, te vai ra te feia e patoi uˈana nei, e faahapa atoa nei, i te manaˈo e e nehenehe ta te “mau peata” i pohe aore ra ta te feia faaora e ora nei, e faatupu i te mau faaoraraa semeio. Ia au i te vea ra Jornal da Tarde, te manaˈo nei te taata ihiparuru i te tino ra o Dráusio Varella e, “te haavare nei” te tiaturiraa i te mau faaoraraa semeio “i te faaroo o te feia haapao ore e te feia hepohepo.” Te na ô faahou ra oia e: “Na roto i te tiaturiraa i te mau semeio, e rave rahi paha te haapae i te mau ravea rapaauraa maitatai no te pee i teie mau taata haavare.” E te faataa ra The New Encyclopædia Britannica e: “I mutaa iho, ua taaihia te mau faaoraraa matau-ore-hia i te mau vahi moˈa e i te mau peu faaroo, e te manaˈo nei te mau taote e te tumu o teie mau faaoraraa atoa, na te taata iho ïa i faatupu i roto i to ˈna feruriraa ia au i te mau huru tupuraa maitatai roa ˈˈe.” Noa ˈtu râ, e rave rahi teie e tiaturi nei e ua faaora-semeio-mau-hia ratou. Te manaˈo ra ratou e ua tupu mau â te faaoraraa!

Ua ite te feia tei tuatapapa i te Bibilia e ua faaora o Iesu Mesia i te feia maˈi e rave rahi taime, ua na reira oia na roto i te ‘mana o te Atua.’ (Luka 9:42, 43) Peneiaˈe te uiui nei ratou e, ‘Te ohipa ra e te faatupu noa ra anei te mana o te Atua i te mau faaoraraa semeio i teie mahana?’ Mai te peu e oia, no te aha ïa teie mau tamataraa e faaora i ore ai e horoa mai i te mau faahopearaa i tǎpǔhia? No te mea anei e e ere i te mea puai roa te faaroo o te taata maˈi, aore ra no te mea anei mea iti te ô ta ˈna i horoa? E mea tano anei no te hoê Kerisetiano ia titau i te hoê faaoraraa semeio mai te peu e te tupuhia ra oia i te hoê maˈi mauiui aore ra o te ore paha e ora? E eita anei te mau faaoraraa semeio papu mai ta Iesu i rave e tupu faahou? E ite outou i te mau pahonoraa o teie mau uiraa faufaa roa i roto i te tumu parau i muri nei.