E tia anei ia outou ia tiaturi i te fa-faahou-raa i roto i te hoê tino ê?
UA FAATUATI na te philosopho Heleni ra o Platon i te hereraa i te hoê taata e te manaˈo no te fa-faahou-raa. Ua tiaturi oia e, ia pohe anaˈe te tino, e haere atu te nephe pohe ore i roto i tei piihia na te “ao o te mau ata viivii ore.” Aita ïa to ˈna e tino faahou, e e faaea oia i reira tau taime a mataitai noa ˈi i te mau ata. E ia fa faahou anaˈe oia i muri iho i roto i te hoê tino ê, e haamanaˈo te nephe i roto i to ˈna hohonuraa, e e hiaai oia e hoˈi i roto i te ao o te mau ata. Ia au i te parau a Platon, e tupu te here i rotopu e piti taata, no te mea e e ite raua i roto i te taata i herehia, i te ata haviti mau o ta raua e haamanaˈo ra paha e e imi noa ra.
Te iteraa e nohea mai teie haapiiraa e eaha to ˈna niu
Te faataa ra te haapiiraa o te fa-faahou-raa e e mea pohe ore te nephe. No ǒ mai ïa te fa-faahou-raa i taua mau opu fetii ra aore ra taua mau nunaa ra tei tiaturi na e e mea pohe ore te nephe. No reira, te manaˈo nei vetahi e no ǒ mai teie haapiiraa ia Aiphiti no tahito ra. Te tiaturi nei vetahi atu e no ǒ mai ia Babulonia no tahito ra. No te haafaahiahia i te haapaoraa Babulonia, ua vauvau aˈera to ˈna mau tahuˈa i te haapiiraa no nia i te tauiraa te nephe i te tino. Mea na reira ïa to ratou parauraa e, ua fa faahou mai te mau tupuna hanahana i pohe na, i roto i te tino o te mau aito o ta ratou faaroo.
I Inidia râ te tiaturiraa i te fa-faahou-raa, i te uˈanaraa. Ua tamata te feia paari Hindu i te tatara i te mau fifi o te ino e o te mauiui o te taata na te ao nei. ‘Nafea teie mau tupuraa ia tuea e te parau no te hoê Poiete parau-tia?’ o ta ratou ïa i uiui. Ua tamata ratou i te faatitiaifaro i te tuea-ore-raa i rotopu i te parau-tia o te Atua e te mau ati manaˈo-ore-hia e te mau ohipa parau-tia ore o te ao nei. I muri aˈe, ua haamau aˈera ratou i “te ture o te karama,” te ture o te tumu e te faahopearaa—‘ta te taata e ueue ra, ta ˈna atoa ïa e ooti.’ Ua faataa ihora ratou i te tahi ‘tabula’ i reira e tapaohia ˈi te mau maitai e te mau hapa e ravehia i roto i te hoê oraraa, e o te haamauruuruhia aore ra o te faautuahia i roto i te oraraa i muri iho.
Te auraa o te taˈo ra “karama,” e “haerea” ïa. E fanaˈo te hoê Hindu i te hoê karama maitai, mai te peu e e auraro oia i te mau ture totiale e faaroo, e e karama ino to ˈna mai te peu e eita oia e auraro. Na to ˈna haerea, oia hoi karama, e faataa i to ˈna oraraa a muri aˈe i roto i te mau fanau-faahou-raa tataitahi atoa. Te na ô ra te philosopho ra o Nikhilananda e: “E fanauhia mai te mau taata atoa e te hoê huru haerea faataahia, tei faaineinehia ia au i ta ratou mau ohipa i rave i roto i to ratou mau oraraa na mua ˈtu, area to ratou huru pae tino ra, no ǒ mai ïa i to ratou tupuna. Na te taata iho [ïa] e hamani i to ˈna oraraa faataahia, na ˈna iho e aratai i te aveia o to ˈna oraraa.” Te fa hopea roa râ, o te tiamâraa mai ïa i teie ohuraa o te tauiraa i te tino e te tahoêraa ˈtu ia Baramana—te tumu mau hau aˈe. Te tiaturihia nei e e naeahia teie fa na roto i te tutavaraa ia noaa te hoê haerea totiale fariihia e te ite taa ê a te mau Hindu.
Te niu o te haapiiraa o te fa-faahou-raa, o te haapiiraa ïa o te pohe-ore-raa te nephe, e na te reira atoa e turu nei i te ture o te karama. E hiˈo anaˈe na e eaha ta te Parau faauruahia a te Atua, te Bibilia, e parau ra no nia i teie mau manaˈo.
E mea pohe ore anei te nephe?
No te pahono i teie nei uiraa, e hiˈopoa anaˈe na i te mana teitei aˈe i roto i teie nei tuhaa—te Parau faauruahia a te Poiete. I roto i te buka matamua o te Bibilia, te Genese, te haapii ra tatou i te auraa mau o te parau ra “nephe.” No nia i te poieteraa o te taata matamua ra o Adamu, te na ô ra te Bibilia e: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata [aore ra, “nephe”] ora.” (Genese 2:7) Oia mau, e ere te nephe i te tahi taoˈa no roto i te taata, o te taata iho râ. Te taˈo Hebera i faaohipahia i ǒ nei no te nephe, o neʹphesh ïa. Tau 700 taime teie taˈo e faahitihia ˈi i roto i te Bibilia, e eita roa ˈtu oia e faaohipahia no te tahi tuhaa taa ê e te tino ore i roto i te taata, no te tahi râ mea e nehenehe e fafahia e tei taaihia i te tino.—Ioba 6:7; Salamo 35:13; 107:9; 119:28.
Eaha te roohia i te nephe ia pohe anaˈe te taata? A hiˈo na eaha tei roohia ia Adamu i to ˈna poheraa. I te taime oia a hara ˈi, ua parau atu te Atua ia ˈna e: “E hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.” (Genese 3:19) A feruri na i te auraa o teie nei parau. Hou te Atua i poiete ai ia ˈna i te repo, aita o Adamu i vai na. I to ˈna poheraa, ua hoˈi atu o Adamu i taua huru o te vai-ore-raa ra.
No te faaohie noa, te haapii ra te Bibilia e, te pohe, e ere ïa te ora. I roto i te Koheleta 9:5, 10, te na ôhia ra e: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe i te fenua nei; ua aramoina hoi ratou. O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.”
Te auraa ra, eita ta te feia pohe e nehenehe e rave aore ra e ite i te hoê aˈe mea. Aita to ratou e manaˈo faahou, e eita atoa ratou e haamanaˈo i te hoê aˈe mea. Te na ô ra te papai salamo e: “Eiaha e tiaturi i te hui arii, e te taata atoa, aita hoi o ˈna e ora. Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.”—Salamo 146:3, 4.
Te faaite papu ra te Bibilia e, ia pohe anaˈe te taata, eita te nephe e haere i roto i te tino ê, e pohe râ oia. Te haapapu maitai ra te Bibilia e: “O te varua [aore ra, “nephe”] tei hara, oia iho te pohe.” (Ezekiela 18:4, 20, V.C.J.S.; Ohipa 3:23; Apokalupo 16:3) No reira, aita roa ˈtu te haapiiraa o te pohe-ore-raa te nephe—te niu mau o te haapiiraa o te fa-faahou-raa—e haapiihia ra i roto i te mau Papai. Mai te peu e aita ra, aita ïa to te fa-faahou-raa e niu. Eaha ïa te tumu o te mauiui ta tatou e ite nei i teie nei ao?
No te aha te taata e mauiui ai?
Te tumu matamua e mauiui ai te taata, o te huru tia ore ïa no ǒ mai i te taata hara ra o Adamu. “No te taata hoê ra i ô mai ai te [hara] i te ao nei, e no te [hara] hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12; MN) I te mea e e huaai tatou na Adamu, e roo-pauroa-hia tatou i te maˈi, te ruhiruhiaraa, e te pohe.—Salamo 41:1, 3; Philipi 2:25-27.
Hau atu, te na ô ra te ture morare hapa ore a te Poiete e: “Eiaha e vare, e ore te Atua e noaa i te haavare, o ta te taata e ueue ra, o ta ˈna â ïa e ooti mai. O te ueue i ta to ˈna ihora tino, o te pohe ta ˈna e noaa i te tino ra.” (Galatia 6:7, 8) No reira, e nehenehe te hoê oraraa tia ore e horoa mai i te hepoheporaa, i te mau hapûraa hinaaro-ore-hia, e i te mau maˈi purumu. “Te tumu matamua o te faito maere mau e 30 % o te mau mariri ai taata e haapohe nei i te taata [i te mau Hau Amui no Marite], o te peu puhipuhi avaava ïa, e te tahi atu tumu, o te huru oraraa, te mau peu amu maa iho â râ e te oreraa e faaetaeta i te tino,” o ta te hoê vea aivanaa (Scientific American) ïa e parau ra. Ua riro te tahi mau ati e haamauiui nei i te taata, ei faahopearaa no te rave-ino-raa te taata i te mau faufaa o te fenua nei.—A faaau e te Apokalupo 11:18.
Oia mau, o te taata iho te tumu o te rahiraa o to ˈna mau ati. I te mea râ e e ere te nephe i te mea pohe ore, eita te ture o ‘te ootiraa i ta oe i ueue ra’ e nehenehe e faaohipahia no te faatuati i te mauiui o te taata e te hoê karama—te mau ohipa i ravehia i roto i te tahi oraraa na mua ˈtu. “O te taata hoi i pohe ra, ua matara ïa oia i te [“hara,” MN],” o ta te Bibilia ïa e parau ra. (Roma 6:7, 23) No reira, eita te utua o te hara e amo-noa-hia i roto i te tahi atu oraraa i muri aˈe i te pohe.
Na te Diabolo ra o Satani atoa e faatupu nei i te mauiui rahi. Inaha, o Satani te faatere o teie nei ao. (Ioane 1, 5:19) E mai ta Iesu Mesia i tohu, ‘e ririhia [Ta ˈna mau pǐpǐ] e te taata atoa no to ˈna iˈoa.’ (Mataio 10:22) Ei faahopearaa, e pinepine te feia parau-tia i te faaruru rahi atu â i te fifi, i te feia iino.
I roto i teie nei ao, te tupu nei vetahi mau ohipa no te tahi mau tumu papu-ore-hia. E nehenehe hoi te taata horo vitiviti roa ˈˈe e topa e e erehia i te re. E nehenehe atoa te hoê nuu puai e pau i te hoê nuu haihai aˈe. E nehenehe te hoê taata paari e erehia i te ohipa e e roohia i te poia. E peneiaˈe, vetahi mau taata aravihi roa i te pae no te tapihooraa, no te tahi mau huru tupuraa, eita ta ratou e nehenehe e faaohipa i to ratou ite e no reira, e roohia ˈtu ratou i te veve. E nehenehe te mau taata maramarama e ririhia mai e te feia mana e no reira, e faahaehaahia ratou. Eaha hoi te tumu? “I te mea e e taime e e tupuraa manaˈo-ore-hia tei roohia ia ratou pauroa,” o ta te Arii paari ra o Solomona ïa e pahono ra.—Koheleta 9:11, MN.
Ua roo-aˈena-hia te taata i te mauiui hou te feia paari Hindu i tamata ˈi i te tatara i to ˈna tumu. E nehenehe anei râ e tiaturi i te hoê oraraa maitai aˈe no a muri aˈe? E eaha ta te Bibilia e tǎpǔ ra no te feia pohe?
Te hoê oraraa hau no a muri aˈe
Ua tǎpǔ te Poiete e fatata roa oia i te haamou i te totaiete o teie nei ao e vai nei i raro aˈe i te mana a Satani. (Maseli 2:21, 22; Daniela 2:44) E riro ïa te hoê totaiete taata parau-tia apî—“te fenua apî”—ei ohipa mau. (Petero 2, 3:13) I taua taime ra, “e ore hoi to reira e parau e, Ua paruparu vau i te maˈi.” (Isaia 33:24) E tae noa ˈtu i te oto o te pohe, e ore atoa ïa, no te mea e “na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.
No nia i te feia e ora ˈtu i roto i te ao apî i tǎpǔhia mai a te Atua, ua tohu te papai salamo e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) Hau atu, “e parahi [te feia mǎrû] i te fenua, e oaoa ratou i te rahi o te hau ra.”—Salamo 37:11.
Ua pohe o Mukundbhai, tei faahitihia i roto i te tumu parau na mua ˈtu, ma te ore e ite i te mau parau tǎpǔ faahiahia mau a te Atua. Tera râ, te vai nei to te mau mirioni taata tei pohe na ma te ore e ite i te Atua, te tiaturiraa e ara mai i roto i taua ao apî no te hau ra inaha, te tǎpǔ nei te Bibilia e: “E tia-faahou-raa to tei pohe, te feia parau-tia e te feia parau-tia ore.”—Ohipa 24:15; Luka 23:43.
I ǒ nei, no roto mai te taˈo ra “tia-faahou-raa” i te taˈo Heleni ra a·naʹsta·sis, oia hoi te auraa mau “te hoê tia-faahou-raa mai.” No reira, ia faatiahia mai te hoê taata, e faaorahia mai oia ia au i to ˈna oraraa hou oia a pohe ai.
E paari faito ore to te Poiete o te raˈi e o te fenua. (Ioba 12:13) E ere i te mea fifi no ˈna ia haamanaˈo i te oraraa o te feia i pohe. (A faaau e te Isaia 40:26.) E here rahi atoa to te Atua ra o Iehova. (Ioane 1, 4:8) No reira, e nehenehe oia e faaohipa i to ˈna haamanaˈoraa tia roa, eiaha no te faautua i te feia pohe no te ohipa ino o ta ratou i rave na mua ˈˈe, no te faaora faahou mai râ ia ratou i nia i te hoê fenua paradaiso, ma to ratou ihotaata hou ratou a pohe ai.
No te mau mirioni taata mai ia Mukundbhai, ia faatia-faahou-hia mai ratou, e farerei faahou ïa ratou i te feia i herehia e ratou. A feruri na râ e eaha te auraa no te feia e ora nei i teie nei tau. A rave na i te hiˈoraa o te tamaiti a Mukundbhai, tei noaa ia ˈna te ite o te parau mau faahiahia no nia i te Atua e ta ˈna mau opuaraa. Auê ïa tamǎrûraa no ˈna e, ia ite e aita to ˈna metua tane i mau i roto i te hoê ohuraa hopea ore o te mau fanau-faahou-raa, tei ati pauroa i te ino e te mauiui! Ua varea noa râ oia i roto i te pohe, e te tiai ra oia i te tia-faahou-raa. Auê te oaoa no ˈna e ia feruri e e nehenehe ta ˈna i te hoê mahana e tufa e to ˈna metua tane, i te mea o ta ˈna iho i haapii i roto i te Bibilia!
Te hinaaro nei te Atua “i te taata atoa ia ora, e ia noaa te ite i te parau mau.” (Timoteo 1, 2:3, 4) Teie te taime no te haapii e nafea outou, e te mau mirioni taata ê atu o tei rave aˈena i te hinaaro o te Atua, ia ora e a muri noa ˈtu i roto i te paradaiso i nia i te fenua nei.—Ioane 17:3.
[Parau iti faaôhia i te api 7]
“E taime e e tupuraa manaˈo-ore-hia tei roohia ia ratou pauroa.”—Koheleta 9:11, MN
[Tumu parau tarenihia i te api 6]
Te huru o te Atua e te ture o te Karama
Ua faataa o Mohandas K. Gandhi e: “Te ture o te Karama, eita ïa e nehenehe e tauihia e eita e nehenehe e apehia. Aita ïa e faufaa e ia ohipa mai te Atua. Ua haamau oia i teie nei ture e, i muri iho, ua otohe atura oia i muri.” Ua feaa o Gandhi no nia i teie tatararaa.
I te tahi aˈe pae, te faaite maira te parau tǎpǔ no nia i te tia-faahou-raa e, te anaanatae hohonu nei te Atua i ta ˈna poieteraa. No te faaora faahou mai i te hoê taata pohe i nia i te fenua tei riro ei paradaiso, e tia i te Atua ia ite e ia haamanaˈo i te mau mea atoa no nia i taua taata ra. Oia mau, te haapao nei te Atua ia tatou tataitahi.—Petero 1, 5:6, 7.
[Hohoˈa i te api 5]
Te huira Hindu o te oraraa
[Hohoˈa i te api 8]
Te haapii nei te Parau a te Atua i te tia-faahou-raa