Ua rave ratou i te hinaaro o Iehova

Ua haamaitaihia te faaroo o te mau metua

IA FANAUHIA mai te hoê tamarii tamaroa, e oaoaraa rahi ïa no te mau ati Iseraela. Te auraa, e tamau noa ïa te opu fetii e e vai noa te tuhaa fenua i roto i te utuafare. Teie râ, i te area matahiti 1593 hou to tatou tau, e au e ua riro te fanauraa mai i te hoê tamaroa ei ati, eiaha râ ei haamaitairaa no te mau ati Hebera. No te aha? No te mea ua faaue te Pharao no Aiphiti, no to ˈna mǎtaˈu e ia rahi oioi mai te huiraatira ati Iuda i te tuhaa fenua o ta ˈna e faatere ra, e ia haapohehia te mau aiû tamaroa fanau-apî-hia atoa.—Exodo 1:12, 15-22.

I roto i taua opuaraa ino ra e haapohe, ua fanau mai ta Amerama raua o Iokebeda, e mau ati Hebera faaipoipo raua, te hoê aiû tamaroa nehenehe. E mea ohie ia feruri e ua hau aˈe paha raua i te mǎtaˈu i te oaoa i to raua haamanaˈoraa i te faaueraa a Pharao. Tera râ, a hiˈo noa ˈi o Amerama raua o Iokebeda i ta raua aiû tamaroa, ua faaoti papu atura raua e eiaha e faarue ia ˈna, noa ˈtu eaha te mau faahopearaa.—Exodo 2:1, 2; 6:20.

Te ohiparaa ma te faaroo

Ua huna noa o Amerama raua o Iokebeda i ta raua aiû e toru avaˈe te maoro. (Exodo 2:2) E mea atâta hoi no raua, no te mea mea piri roa te mau faaearaa o te mau ati Hebera e to te mau ati Aiphiti. Te taata e tamata noa ˈtu i te ofati i te faaueraa a Pharao, e haapohehia ïa oia—e e pohe atoa te aiû. No reira, eaha ta teie nau metua paieti e nehenehe e rave ia ora mai ta raua aiû e raua iho?

Ua ohi atura o Iokebeda i te tahi mau ohi gima. E ota paari to te gima, mai te ofe ra, e e toru poro to to ˈna ata, meumeu mai te hoê rimarima. E naeahia paha ia ˈna e 6 metera te roa. Ua faaohipa to Aiphiti i teie raau tupu no te hamani i te papie, te mau peue, te mau iˈe, te mau tiaa, e te mau vaa mâmâ.

Ua rave atura o Iokebeda i te mau ata gima e hamani atura i te hoê ete aano maitai ia ô ta ˈna aiû i roto. E ua parai atura oia i te toruta e te tapau i nia iho i te ete ia ore te pape ia ô i roto. Tuu atura o Iokebeda i ta ˈna aiû i roto i te ete, e vaiiho atura i roto i te aihere i te hiti pape o te Nile.—Exodo 2:3.

Ua itehia te aiû

Ua tia noa o Miriama, te tamahine a Iokebeda, na pihai iho no te hiˈohiˈo e eaha te ohipa e tupu i muri iho. Haere maira te tamahine a Pharao i te Nile no te hopu i te pape.a Ua ite paha o Iokebeda e mea haere roa te tamahine hui arii ra na taua vahi ra o te Nile e, ua manaˈo paha oia e vaiiho i te ete i reira, ia ite-ohie-hia oia. Inaha, ua ite oioi atura te tamahine a Pharao i te ete i roto i te mau aihere, e ua tono atura oia i te hoê o ta ˈna mau tavini vahine no te haere e tii i te ete. I to ˈna iteraa ˈtu i te aiû i roto e taˈi noa ra, ua aroha roa ˈˈera oia ia ˈna. Ua ite oia e e aiû ati Hebera teie. Tera râ, nafea oia e nehenehe ai e haapohe i te hoê aiû nehenehe mai teie? Taa ê atu i to ˈna iho maitai, ua tiaturi paha te tamahine a Pharao i te haapiiraa matauhia a to Aiphiti, e e fariihia te hoê taata ia haere i nia i te raˈi, mai te peu e ua rave oia i te mau ohipa maitatai i roto i to ˈna oraraa.b—Exodo 2:5, 6.

Ua haafatata maira o Miriama, o te hiˈohiˈo maira na te atea mai, i pihai iho i te tamahine a Pharao. “E tii anei au i te tahi utau no te mau vahine ati Hebera, ei hii i tena na tamaiti ei tamaiti na oe?” o ta ˈna ïa i ani atu. Ua pahono maira te tamahine hui arii ra e: “A tii.” Horo atura o Miriama e tii i to ˈna mama. Aita i maoro, ua tia maira o Iokebeda i mua i te tamahine a Pharao. Na ô atura te tamahine hui arii e: “E hopoi oe e hii i teie nei tamaiti na ˈu, e na ˈu e hopoi atu i ta oe utua.” I taua taime ra paha to te tamahine a Pharao taaraa e o Iokebeda te metua vahine o te aiû.—Exodo 2:7-9.

Rave ihora o Iokebeda i ta ˈna aiû e tae noa ˈtu i to ˈna haamairiraa i te û.c E rave rahi taime faufaa roa ta ˈna i faaohipa no te haapii atu ia ˈna no nia i te Atua mau ra o Iehova. I muri iho, ua faahoˈi o Iokebeda i te tamarii i te tamahine a Pharao ra, o tei mairi i to ˈna iˈoa ra o Mose, oia hoi te auraa, “ume mai na raro i te pape.”—Exodo 2:10.

Te haapiiraa no tatou

Ua faaohipa rahi roa o Amerama raua o Iokebeda i te taime poto ta raua i fanaˈo no te haapii atu i ta raua tamaroa i te mau faaueraa tumu o te haamoriraa viivii ore. E tia atoa i te mau metua i teie tau ia na reira. Oia mau, te titauhia nei ratou ia na reira. “Te hahaere nei hoi” te Diabolo ra o Satani, “mai te liona uuru ra, i te imiraa i te taata e pau ia ˈna ra.” (Petero 1, 5:8) Te feia faufaa roa e mea au na ˈna e faahema, o te mau taurearea ïa—tamaroa e tamahine—o te nehenehe e riro mai ei mau tavini maitatai roa a Iehova. Aita oia e aroha i te mau taurearea! No reira te mau metua paari e haapii ai i ta ratou mau tamarii apî ia mǎtaˈu i te Atua mau ra o Iehova.—Maseli 22:6; Timoteo 2, 3:14, 15.

I roto i te Hebera 11:23, ua faatiahia te tutavaraa a Amerama raua o Iokebeda e huna i ta raua aiû i na avaˈe matamua e toru o to ˈna oraraa, mai te hoê ohipa faaroo. Ua faaite teie nau metua toopiti i mǎtaˈu i te Atua i to raua tiaturiraa i nia i te mana o Iehova e faaora, na roto i te oreraa e faarue i ta raua aiû, e ua haamaitaihia raua no te reira. E tia atoa ia tatou ia faaite i to tatou ati-maite-raa i te mau ture e te mau faaueraa tumu a Iehova, ma te tiaturi e noa ˈtu eaha te ohipa ta Iehova e faatia ia faaruru tatou, no to tatou iho ïa maitai e te oaoa mure ore i te pae hopea.—Roma 8:28.

[Nota i raro i te api]