Te faatia ra te feia poro i te Basileia
Te haaparareraa i te huero o te Basileia i te mau taime atoa
TE FAAITOITO ra te Parau a te Atua, te Bibilia, ia rohi i te rave i te ohipa. Ua parau te Arii ra o Solomona e: “Ei te poipoi a ueue ai ta oe huero, e ei te ahiahi eiaha e parahi noa, aore hoi oe i ite i tei tupu, teie e tera, e ia maitai apipiti atoa ra.”—Koheleta 11:6.
I te mau taime tano atoa, te ueue nei te mau Ite no Iehova i te “huero” na roto i te pororaa i te parau apî maitai o te Basileia o te Atua. I roto hau atu i te 230 fenua e mau motu, “e aore e mahana tuua ia ratou i te aˈo, e te haapii atu i te taata, e o Iesu â te Mesia.” (Ohipa 5:42) Te faaite nei te mau hiˈoraa i muri nei, e mea nafea te mau Ite no Iehova ‘ia ore e parahi noa’ i roto i te ohipa pororaa.
◻ I te Repubilita no Cap-Vert, ua haere atu te hoê Ite no Iehova na pihai iho i te hoê fare auri a ohipa noa ˈi oia i roto i te taviniraa. I roto i te aua o te fare auri, tei nia te tahi mau mau auri i te hoê tumu raau. Ma te hiˈopoa i te Ite i raro noa ˈˈe, ua ani te mau mau auri i te tahi mau vea. Ua taamu te Ite e rave rahi vea o Te Pare Tiairaa e te A ara mai na! i nia i te hoê ofai e ua taora ˈtu na nia i te patu o te fare auri. Ei faahopearaa o teie anaanatae matamua, ua haamatahia ïa 12 haapiiraa Bibilia. Ua pûpû e toru o te mau mau auri i to ratou oraraa no te Atua e ua tia ˈtu no te bapetizo ia ratou i roto i te pape. Ua tavini te hoê o teie mau mau auri ei taata poro ma te taime taatoa, aore ra ei pionie, hau atu i te hoê matahiti i teie nei. Mea nafea hoi ratou ia faatere i te mau ohipa taviniraa i roto i te fare auri? Na mua roa, ua vahihia te fare auri ei mau tuhaa fenua. I muri iho, ua operehia te tuhaa fenua i rotopu na Ite e toru e ua ohipa mai ratou i tera e tera piha tapearaa. Te haapao maite ra teie feia poro i te Basileia i te feia anaanatae, mai ta te mau Ite no Iehova ati aˈe te ao nei e rave ra—na roto i te mau hoˈi-faahou-raa e farerei. Te vai nei râ te hoê taa-ê-raa, o te pinepineraa ïa o te mau haapiiraa Bibilia e faaterehia. Maoti i te haapii i te Bibilia hoê aore ra e piti noa taime i te hebedoma i te area hoê hora, te haapii nei te tahi mau mau auri i te mau mahana atoa! Hau atu, ua faatia te raatira rahi o te fare auri ia faatere te mau Ite i te mau putuputuraa a te amuiraa atoa i roto i te fare auri.
◻ Ua fatu te hoê vahine no Potiti i te mau papai e rave rahi a te Taiete Watch Tower i muri iho i te poheraa o to ˈna mama ruau. I te mea e e ere oia i te Ite no Iehova, aita o ˈna i anaanatae i te tapea i teie mau buka. Tera râ, aita o ˈna i hinaaro i te faarue atu i te reira. I te hoê mahana, ua faaite o ˈna i te hoê Ite no Iehova, o tei farerei ia ˈna i roto i te pororaa i tera e tera fare, no nia i te vairaa buka. Ua ani maira te Ite ia ˈna e e manaˈo anei to ˈna no nia i te faufaaraa mau o te vairaa buka. Ua pahono atura teie vahine e: “Inaha hoi, aita vau i ite i te faufaaraa mau o te reira, nafea râ e itea mai ai ia ˈu?” Ua farii teie vahine i te hoê haapiiraa Bibilia, e aita i maoro, ua riro mai te vairaa buka a to ˈna mama ruau ei taoˈa faufaa roa na ˈna. I teie nei, e Ite no Iehova bapetizohia atoa oia. Hau atu, te haapii atoa ra ta ˈna tamahine e te hoê hoa piri o te utuafare, i te Bibilia. Auê ïa faturaa faufaa mau teie mau buka e!