Hoê “puea ite” i te fenua o te “Mouˈa o te Atua”

I NIA i te hoê hohoˈa o te fenua, mai te peu e na te pae miti outou i te haere i Afirika Tooa o te râ e e haere tia ˈtu i te pae hitia o te râ o te Ooa no Guinée, e titapou atu ai i te pae apatoa, e ite ïa outou ia Cameroun. Mai te peu e e titapou noa outou i apatoa na te pae miti, e tapae outou i te hoê anairaa rahi tahatai one ereere. No ǒ mai te one ereere i te mau paainaraa mouˈa auahi o te Mouˈa Cameroun.

E ite-maitai-hia teie mouˈa oeoe e 4 070 metera te teitei na taua vahi atoa ra. Ia topa anaˈe te mahana i nia i te mau vahi pahee o te Mouˈa Cameroun, e itehia te mau peni anaana maere mau—vareau, puatou, auro, e te uraura. Te faahoˈi ra te miti e te mau vahi vari i pihai iho mai i teie mau hihi penihia mai te hoê hiˈo ra, fatata roa e ore e itehia te taa-ê-raa i rotopu i te raˈi e te fenua. E mea ohie ia taa e no te aha te mau opu animiste o taua fenua ra i pii ai i te mouˈa ra Mongo Ma Loba, tei hurihia e “Pereoo o te mau atua,” aore ra mea pinepine aˈe e, “Mouˈa o te Atua.”

I te pae apatoa roa, te vai ra te mau tahatai one uouo e mau kilometera te atea, e te anairaa tumu haari. Taa ê noa ˈtu te pae miti haviti, ua poˈi te rahiraa o te fenua i te ururaau meumeu no te pae o te reni ropu o te fenua, e tae noa ˈtu i te mau otia fenua no Congo e Repubilita Afirika no Ropu e i te pae apatoerau no Nigeria e no Tchad i raro mai i te medebara Sahara. E vahi mouˈa te pae tooa o te râ o te fenua, o te faahaamanaˈo i te ratere i te mau vahi na Europa. No te ahuaraˈi veavea râ, eita e moehia ia outou e tei pihai iho roa outou i te reni ropu o te fenua. No te huru rau o to ˈna fenua, ua faataa e rave rahi buka no te feia mataitai i te fenua Cameroun mai te hoê hohoˈa nainai o te fenua Afirika. Na te mau pǔpǔ taata taa ê e na reo tumu e vetahi atu mau reo hau atu i te 220 i faaitoito atoa i teie manaˈo.

Ia haere outou e mataitai ia Cameroun, e haere paha outou i roto i te hoê o te mau hotela rarahi i te vahi tapearaa pahi no Douala, aore ra i te oire pu no Yaoundé. E nehenehe râ e erehia ia outou te ravea ia ite no nia i te oraraa o te mau taata, o na Ite no Iehova iho â râ hau atu i te 24 000, o tei rohi no te patu i te hoê “puea ite” ati aˈe teie fenua o te “Mouˈa o te Atua.”a No te aha e ore ai e haere na roto i te fenua no te farerei i te tahi o ratou? Papu maitai, e haamaitai-rahi-hia outou ia haere outou e mataitai i teie fenua no Afirika Tooa o te râ.

Na nia i te vaa, te pereoo tarahu no te fenua aihere, aore ra te pereoo tataahi?

Ia tuati anaˈe te Sanaga, te anavai roa roa ˈˈe i Cameroun, i te moana, e itehia te hoê fenua muriavai aano. No te neheneheraa e farerei i te mau taata atoa o teie tuhaa fenua rahi, ua tia i te mau Ite no Iehova ia tere pinepine na nia i te vaa. O te ohipa ïa e ravehia ra e na taata poro o te Basileia e iva i roto i te pǔpǔ haihai no Mbiako. Te faaea nei e piti o ratou e 25 kilometera te atea, i roto i te oire iti no Yoyo. Ia nehenehe raua e tae i Mbiako, e tia ia raua ia hoe puai, te tae nei iho â râ raua i te mau putuputuraa kerisetiano. A farerei ai oia i teie pǔpǔ, ua faaitoito ihora te hoê tiaau ratere e pata i te hohoˈa video Te mau Ite no Iehova—Te faanahonahoraa i muri mai i te iˈoa (beretane). Mea ohie aˈe ia parau i te rave. I roto i teie huru oire iti tahito, ihea roa ïa o ˈna e itea mai ai i te hoê matini ripene video, te hoê afata teata, e te uira no te pata i te hohoˈa?

I te hebedoma o to ˈna tere, ua haere vetahi feia poro e farerei i te orometua o te hoê ekalesia no reira. Ua maere ratou i to te orometua farii-maitai-raa mai ia ratou, e ua tauaparau ratou ma te anaanatae no nia i te Bibilia e o ˈna. I to ratou iteraa e matini ripene video ta te orometua, e te hoê matini horoa uira atoa, ua faaitoito atura te mau taeae i te ani ia ˈna e mai te peu e e nehenehe ta ratou e faaohipa i ta ˈna mau tauihaa. Ua farii te orometua e tauturu ia ratou, no to ˈna oaoa i te tauaparauraa no nia i te Bibilia na mua ˈtu. I te po mahana maa, 102 taata tei haere mai i te pataraa, te orometua e te rahiraa o te mau melo o ta ˈna ekalesia atoa. Ua afai atoa mai na Ite e piti no Yoyo e rave rahi taata anaanatae na nia e piti vaa. Aita ratou i haapeapea rahi roa ia hoe ma te faaruru i te opape puai. I muri aˈe i to ratou mataitairaa i te video, ua putapû roa e ua itoitohia ratou, e ua oaoa roa ratou i te riroraa ei melo no teie huru faanahonahoraa rahi e faariro ra i te faahanahanaraa ia Iehova ei fa.

No te haere i te mau vahi eita e tae e te vaa, e faaohipahia ïa te pereoo tarahu no te fenua aihere. E mea taata roa i te mau vahi tapearaa pereoo i reira teie mau pereoo tarahu no te fenua aihere e tiai ai i te mau horopatete. E ohie roa i te moe i rotopu i te feia hoo i te pape toetoe, i te meia, e te mau tuati pereoo. Te ohipa tuati pereoo, o te tautururaa ïa i te mau horopatete ia tauma i nia i te pereoo tarahu no te fenua aihere e tiai ra, o ta ratou e parau ra e ua “ineine i te haere.” Eiaha râ e tiaturi e ua ineine iho â. E tia i te mau horopatete ia tiai e mau hora, e te tahi mau taime e mau mahana atoa. Ia tomo roa anaˈe te pereoo i te horopatete e ia faanaho te taata faahoro i te mau otaa, te mau pute maa, e te tahi mau taime te mau moa e te mau puaaniho ora, i nia i te tafare o te pereoo, i reira ïa te pereoo rahi tarahu e tere ai na nia i te mau purumu apoopoo, e te repo puehu.

Ua rohirohi te hoê tavini ratere i teie huru utaraa taata, ua maiti o ˈna i te tahi atu ravea. Te tere nei o ˈna i teie nei na nia i te pereoo tataahi. Te na ô ra o ˈna e: “Mai to ˈu opuaraa e faaohipa i te hoê pereoo tataahi no te haere i tera e tera amuiraa, e tae noa iho â vau i te hora no te farerei ia ratou. Parau mau, e rave rahi hora paha te maoro, tera râ, eita ïa vau e tiai hoê aore ra e piti mahana i te pereoo tarahu no te fenua aihere. I te mau tau ûa, eita roa vetahi mau purumu e itehia no te mea ua pue te pape. E tia ïa ia outou ia tatara i to outou tiaa no te haere na roto i teie haapueraa vari e te pape. I te hoê mahana, ua marua te hoê o to ˈu na tiaa i roto i te opape e aita i iteahia mai e rave rahi hebedoma te maoro, na te tamahine a te hoê o te mau Ite i ite mai ma te manaˈo-ore-hia a ravaai noa ˈi oia! Te oaoa nei au i te neheneheraa e oomo faahou i teie e piti tiaa, i muri aˈe i te painu-haere-raa te hoê tiaa no te tahi taime e te iˈa. I te tahi taime e haere au i te mau vahi aita i poro-aˈenei-hia e te mau Ite no Iehova. E ani noa mai te feia no te oire iti e eaha ta ˈu i afai mai. No reira ïa vau e afai noa ˈi i te mau vea e te mau vea iti. I te mau taime atoa e faaea ˈi au, e pûpû vau i teie mau papai niuhia i nia i te Bibilia e e poro vau ma te haapoto. Te manaˈo nei au e e faatupu Iehova i teie mau huero o te parau mau.”

I roto roa i te fenua

Te tutava nei te mau Ite no Iehova i te tufa i te parau apî maitai o te Basileia na vetahi ê i ropu roa ia Cameroun, i roto i te mau oire iti i roto roa i te ururaau. Te titau ra te reira i te tutavaraa rahi, e mea tamahanahana râ te mau faahopearaa.

Ua haamata Marie, te hoê tavini ma te taime taatoa, i te hoê haapiiraa Bibilia e te hoê potii apî ra o Arlette. I te hopea o te haapiiraa matamua, ua ani Marie ia Arlette e e faahoˈi roa anei o ˈna ia Arlette i to ˈna fare, e peu matauhia te reira i teie vahi no Afirika. Tera râ, ua faataa te potii apî ra e eita ta ˈna e nehenehe e haere maitai no te mea te mauiui ra to ˈna avae. Ua haapê te avae o Arlette e te hoê utu e e tomo roa te utu ovahine i roto i te iˈo, i reira ïa e fefehia ˈi. Ua iriti mai Marie ma te taiâ ore i te mau utu atoa. I muri iho, ua faaroo atoa o ˈna e i te po, e hautihia teie potii e te mau demoni. Ua faataa Marie ma te faaoromai e nafea ia tuu i te tiaturi i nia ia Iehova, na roto iho â râ i te faahitiraa i to ˈna iˈoa ma te reo puai i roto i te pure.—Maseli 18:10.

Ua haere oioi Arlette i mua. I te omuaraa, aita to ˈna utuafare i patoi i ta ˈna haapiiraa no te mea te haere ra oia i mua ma te faahiahia i te pae tino e te pae feruriraa. I to ratou iteraa râ e te hinaaro ra o ˈna e riro ei Ite no Iehova, ua opani ratou ia ˈna ia tamau i te haapii. E toru hebedoma i muri iho, i to ˈna iteraa e ua hepohepo roa ta ˈna tamahine, ua haere atura te metua vahine o Arlette e farerei ia Marie e ua ani atu ia ˈna ia faahaere faahou â i te haapiiraa.

I te taeraa i te taime no te haere i te hoê tairururaa haaati, ua aufau Marie i te hoê taata faahoro pereoo tarahu no te afai ia Arlette e piti mahana te maoro. Aita râ te taata faahoro i hinaaro e haere roa e tii ia Arlette i to ˈna fare, ua manaˈo oia e mea ino roa te eˈa e tae atu ai i nia i te purumu. Ua afai mai ïa Marie i te potii i te pae purumu. Ua haamaitai mau â Iehova i teie mau tutavaraa. I teie mahana, te haere nei Arlette i te mau putuputuraa atoa a te amuiraa. No te tautururaa ia ˈna, te haere noa ra Marie ma te tuutuu ore e tii ia ˈna. Te haere nei raua toopiti na raro e 75 minuti te maoro. I te mea e e haamata te putuputuraa o te sabati i te hora 8 e te afa i te poipoi, e tia ïa ia Marie ia faarue i te fare i te hora 6 e te afa; e tae iho â raua i te hora tia. Te manaˈo nei Arlette e fatata oia i te faataipe i to ˈna pûpûraa ia ˈna na roto i te bapetizoraa i roto i te pape. Te na ô nei Marie e: “O tei ore i ite ia ˈna i te haamataraa i te haapii, eita ïa o ˈna e manaˈo e ua taui oia. Te haamauruuru rahi nei au ia Iehova no to ˈna haamaitairaa mai ia ˈna.” Ua riro mau â o Marie ei hiˈoraa maitai no te here faatusia.

I nia roa i Apatoerau

Mea rahi te mau mea taa ê e te mau mea maere i te pae apatoerau no Cameroun. I te tau ûa, e riro oia ei tiapai aua ruperupe. I te tau paˈurâ, e mǎrô te aihere. I te avatea, e mea puai roa te mahana e e mea fifi ia ite i te vahi mǎrǔmǎrǔ, e tapiri atu te mau mamoe i pihai iho i te mau patu fare hamanihia e te vari uteute. I rotopu i te one e te aihere mǎrô, te mau mea matie anaˈe e toe ra, o te tahi mau rauere ïa o te mau tumu raau baobab. Noa ˈtu e e ere ratou i te mea aano roa mai te tahi atu mau tumu raau rarahi i roto i te ururaau i te reni ropu o te fenua, e mea pautuutu noa râ ratou. Te faahohoˈa maitai ra to ratou neheneheraa e faaruru i te ahuaraˈi fifi i te puai e te itoito o te tahi mau Ite tei haere e faaea i roto i teie tuhaa fenua no te faaanaana i te maramarama o te parau mau.

Ua faataa-ê-hia vetahi mau amuiraa i roto i teie tuhaa fenua mai te 500 e tae atu i te 800 kilometera te atea, e mea puai mau te manaˈo moemoe. Te vai nei râ te anaanatae rahi. Te haere mai nei vetahi mau Ite no te tahi atu mau tuhaa fenua i ǒ nei no te tauturu. No te aravihi i roto i te taviniraa, e tia ia ratou ia haapii i te reo Foufouldé e paraparauhia ra i reira.

Ua opua te hoê Ite no Garoua i te haere e poro i roto i to ˈna oire iti tumu no te tahi mahana, 160 kilometera te atea. Ua ite oia i te tahi anaanatae, no te moni rahi râ o te faurao, aita oia i nehenehe e hoˈi tamau. Tau hebedoma i muri iho, ua tae mai ta te Ite te hoê rata a te hoê taata anaanatae, tei taparu ia ˈna ia haere mai e farerei faahou ia ˈna. No te mea aita ta ˈna e moni no te aufau i te titeti, aita oia i haere. A feruri na i te maere o te Ite, i te haereraa mai taua taata ra i to ˈna fare i Garoua no te faaara ia ˈna e hoê ahuru taata i roto i te oire iti e tiai maira ia ˈna!

I roto i te tahi atu oire iti, i pihai iho i te otia o Tchad, ua faanaho te hoê pǔpǔ e 50 taata anaanatae i ta ratou iho haapiiraa Bibilia. Ua imi ratou i te ravea ia haere e toru o ratou i te mau putuputuraa i te amuiraa piri roa ˈˈe no Tchad. Ia hoˈi mai ratou, na ratou ïa e faatere i te haapiiraa Bibilia e te pǔpǔ taatoa. Te tano maitai ra te mau parau a Iesu i ǒ nei: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.”—Mataio 9:37, 38.

Te pororaa na te mau oire

I muri aˈe e rave rahi matahiti e aita e papai, ua noaa ohie mai te mau vea ra Te Pare Tiairaa e A ara mai na! i Cameroun e piti matahiti i teie nei. I to te mau taata e rave rahi taioraa i teie mau vea no te taime matamua, ua tae rahi to ratou aau e ua anaanatae. Ua vaiiho te hoê pionie taa ê apî e ta ˈna vahine tonohia i roto i te hoê o te mau oire, e 86 vea i ta raua pororaa matamua i te poipoi i roto i ta raua tuhaa fenua apî. Ua vaiiho vetahi feia poro hau atu i te 250 vea i roto hoê noa avaˈe! Eaha te taviri o to ratou manuïaraa? Te pûpûraa i te mau vea na te mau taata atoa.

Te tuu nei te hoê Ite e rave ra i te ohipa i roto i te hoê piha e tomo noa mai te taata, i te mau vea i te vahi e itehia ˈtu. Ua hiˈo te hoê vahine i te mau vea, aita râ i rave. Ua ite te Ite i to ˈna anaanatae, e ua pûpû oia i te hoê vea na ˈna, o ta ˈna ïa i farii. Ua maere roa oia i te hoˈiraa mai teie vahine i te mahana i muri iho. Aita o ˈna i hinaaro noa e aufau i te vea ta ˈna i rave, ua ani râ o ˈna hau atu â. No te aha? No te mea ua maferahia o ˈna, ua maiti o ˈna i te vea no nia i taua tumu parau ra. Ua taio e ua taio faahou o ˈna i te mau aˈoraa i horoahia i te po taatoa. I to ˈna tamahanahana-rahi-raahia, ua hinaaro o ˈna e ite hau atu â no nia i te mau Ite no Iehova.

E nehenehe atoa ta te mau tamarii e apiti i roto i te haaparareraa i te poroi o te tiaturiraa a te Bibilia. I to te hoê orometua haapii aniraa i te hoê tamahine Ite e ono matahiti, ia himene i te hoê himene katolika, aita oia i farii, ma te parau e e Ite no Iehova o ˈna. Ua ani atura te orometua haapii ia ˈna i muri iho ia himene i te hoê himene a ta ˈna iho haapaoraa ia nehenehe oia e horoa i te hoê nota na ˈna. Ua maiti aˈera o ˈna i te himene ra “Te parau tǎpǔ a te Atua no te hoê Paradaiso” i mau aau ia ˈna. Ua ui atura te orometua haapii ia ˈna e, na ô atura: “Ua faahiti oe i te paradaiso i roto i ta oe himene. Teihea roa taua paradaiso ra?” Ua faataa ˈtura te tamahine ra i te opuaraa a te Atua e fatata maira e haamau i te Paradaiso i nia i te fenua nei. Ua maere oia i ta ˈna pahonoraa, ua ani atura oia i te mau metua i te buka ta te tamahine e haapii ra. Ua ineine oia i te horoa i te hoê nota na ˈna no nia i teie buka, eiaha râ no nia i te mea ta ˈna e haapii ra i roto i te mau tuhaa no nia i te haapaoraa. Ua parau atura te mau metua i te orometua haapii e ia hinaaro oia e horoa i te hoê nota tano na ˈna, e tia ia ˈna ia haapii na mua. Ua haamatahia ˈtura te hoê haapiiraa Bibilia e o ˈna.

Te faanahoraa i te hoê tere?

I roto e rave rahi vahi o te ao nei i teie mahana, aita te mau taata e tâuˈa ra i te parau apî o te Basileia. Aita ratou e anaanatae ra i te Atua e i te Bibilia atoa. Te mǎtaˈu nei vetahi e eita ratou e farii i te tahi taata ê e haere mai i to ratou fare. Ua riro te reira ei tautooraa no te mau Ite no Iehova i roto i ta ratou taviniraa. Auê râ ïa te taa-ê-raa i Cameroun!

Mea au roa te pororaa na te mau fare i ǒ nei. Maoti i te patoto atu, e peu matauhia ia tuô e, “Kong, kong, kong.” E faaroohia mai roto mai i te hoê reo ia pahono mai e, “O vai tera?” i reira ïa matou e faaite atu ai e e mau Ite no Iehova matou. Mea matauhia, e faaue te mau metua i ta ratou mau tamarii ia haere e tii i te mau parahiraa e ia tuu i te vahi mǎrǔmǎrǔ i raro aˈe i te hoê tumu raau, te hoê tumu vi paha. E fanaˈohia te hoê taime au no te faataa e eaha te Basileia o te Atua e eaha ta ˈna e rave no te faatiamâ mai te huitaata nei i te mau huru tupuraa iino.

I muri aˈe i te hoê tauaparauraa mai teie te huru, ua faaite tahaa mai te hoê vahine i to ˈna manaˈo, i te na ôraa e: “Te hepohepo nei au i te iteraa e aita te parau mau o ta ˈu e imi nei e vai ra i roto i te haapaoraa i reira vau i te fanauraahia e i te paariraa mai. Te haamauruuru nei au i te Atua i to ˈna faaiteraa mai ia ˈu i te parau mau. E diakono vahine au i roto i ta ˈu ekalesia. E vai te tii o te Paretenia ra o Maria e hoê hebedoma te maoro i roto i te fare o te diakono tataitahi, ia nehenehe ratou tataitahi e faaite atu ia ˈna i ta ratou mau aniraa. No ˈu nei, ua ani noa vau ia Maria ia tauturu mai ia ite au i te parau mau. I teie nei, na te Atua i faaite mai e aita te parau mau ia Maria ra. Te haamauruuru nei au ia Iehova.”

Ia hinaaro noa ˈtu outou ia tae i te hoê mahana e ite i te oaoa rahi e nehenehe e fanaˈohia i roto i te pororaa i te parau apî maitai o te Basileia o te Atua, no te aha e ore ai e tere i teie tuhaa fenua no Afirika Tooa o te râ? Hau atu i te ite atu i te “hoê hohoˈa nainai o Afirika” na nia i te vaa anei, te pereoo tarahu no te fenua aihere, aore ra te pereoo tataahi, e turu atoa outou i te “puea ite” e patuhia ra i te fenua o te “Mouˈa o te Atua.”

[Nota i raro i te api]

[Faaiteraa i te fatu o te hohoˈa i te api 22]

Map: Mountain High Maps® Copyright © 1995 Digital Wisdom, Inc.