A haapii atu mai te tamarii-rii-raa mai â
TE FAAITE ra te mau maimiraa no teie nei tau e “e pahono te mau aiû i roto i te opu ia faaroo ratou i te mau reo.” “Ua itea mai” i te feia maimi no te Fare haapiiraa Tuatoru no Caroline Apatoerau [Hau amui no Marite] “e i muri aˈe i to te mau metua vahine taioraa ˈtu no ta ratou tamarii i roto i te opu, ua pahono te mau aiû fanau apî i te taio-faahou-raahia teie mau tuhaa,” o ta te vea ra Winnipeg Free Press ïa e parau ra. E nehenehe te taio-haapuai-raa te mau vahine ia hapû ratou, e riro ei ravea no te haapii atu i te mau faufaa morare maitatai i roto i te tamarii. Te na ô ra te Bibilia e ‘mai to ˈna tamarii-rii-raa mai â to Timoteo iteraa i te parau moˈa i papaihia.’ (Timoteo 2, 3:14, 15) Oia mau, ua papu i to ˈna metua vahine e to ˈna tupuna vahine te faufaa o te haapiiraa ia ˈna mai to ˈna tamarii-rii-raa mai â, e eita e ore ua taio atoa raua ma te haapuai.
O te taioraa “te aravihi puai roa ˈˈe i roto i te oraraa ta tatou e nehenehe e fanaˈo i roto i to tatou totaiete i teie mahana,” o ta te taata papai ra o Jim Trelease ïa e parau ra. E haamaitaihia te aravihi no te paraparauraa e te haaputuraa i te parau na roto i te taioraa haapuai.
E mea maitai ia haamata i te taio haapuai i te taime iho a haamata ˈi outou i te paraparau i ta outou aiû. Noa ˈtu e eita ta outou tamarii i roto i te opu aore ra ta outou aiû fanau apî e papu i ta outou parau i te omuaraa, e mea hoona te mau haamaitairaa e noaa mai a muri aˈe. Te na ô ra te Maseli 22:6 e: “E haapii i te tamaiti i tana eˈa ia haere ra; e ia paari oia ra, e ore e faarue i taua eˈa ra.”
Eaha te mea e tano e te maitai atoa ta outou e nehenehe e taio atu? A taio haapuai i te Bibilia i ta outou tamarii i te mau mahana atoa. A taio atoa i te tahi atu mau papai tano roa, mai te mau buka ra Faaroo i te Orometua Rahi, Ta ˈu Buka Aamu Bibilia, Te taata rahi roa ˈˈe i ora aˈenei, e te mau tumu parau no roto i te mau vea ra Te Pare Tiairaa e A ara mai na!
Oia mau, e titau teie tutavaraa ta outou e rave, i te taime, tera râ, e taime haamâuˈa-maitai-hia. E ravea papu no te faaite e te haapao ra e te here ra outou i ta outou tamarii.