E nehenehe e noaa mai “te aau o te liona ra”

I TE tahi mau taime e faaohipa te Bibilia i te liona ei taipe no te itoito e te tiaturi. Ua faataahia te mau taata mǎtaˈu ore e te itoito mai te mea e ua noaa ia ratou i “te aau o te liona ra,” e ua parauhia no te mau taata parau-tia e ua riro ratou “mai te liona ra i te mǎtaˈu ore.” (Samuela 2, 17:10; Maseli 28:1) Ia faatihaehaehia iho â râ oia, e faaite te liona e roo tano to ˈna ei “puai rahi i te mau manu [animala] atoa.”—Maseli 30:30.

To te mǎtaˈu ore o te liona ta te Atua ra o Iehova e faaau nei i to ˈna hinaaro e paruru i to ˈna nunaa. Te na ô ra te Isaia 31:4, 5 e: “Mai te liona e ûa ra, e te liona apî, i nia iho i ta ˈna ra maa: putuputu noâ mai te mau tiai mamoe e rave rahi e rave ia ˈna, e ore râ oia e mǎtaˈu i to ratou reo, e ore hoi e horuhoru i to ratou tamumu-noa-raa; oia atoa Iehova sabaota ra, e pou, e aro ei tia i te mouˈa Ziona . . . Te faatiaraa ia ora; e te haereraa ˈtu i mua ei tia ia ˈna ra.” No reira, te haapapu nei Iehova i ta ˈna mau tavini no nia i to ˈna haapao-maite-raa, i mua iho â râ i te ati.

Te faaau nei te Bibilia i te enemi rahi roa ˈˈe o te huitaata nei, te Diabolo ra o Satani, mai te hoê liona uuru, taehae. No te ape e ia ore e pau ia ˈna, te na ôhia ra i roto i te mau Papai e: “E haapao maitai, e faaitoito.” (Petero 1, 5:8) Te ravea no te rave i te reira, o te aperaa ïa i te pohe taoto i te pae varua. No reira ua parau Iesu e: “E ara râ ia outou, o te teimaha outou i te rahi o te maa e te taero, e te peapea teie nei ao.” (Luka 21:34-36) E, e nehenehe te vai-ara-noa-raa i te pae varua i roto i teie mau “anotau hopea” e horoa i “te aau o te liona ra,” te hoê o te ‘ore e mǎtaˈu, e mau to ˈna aau i te tiaturiraa ia Iehova.’—Timoteo 2, 3:1; Salamo 112:7, 8.