“E ite maitai atu outou i te taata mai te reira te huru”
E ERE i te mea maitai te mau mea atoa i roto i te amuiraa no Korinetia. Te vai ra te peu taiata hairiiri, e te mau amahamaharaa i rotopu i te mau taeae. Ua farerei vetahi i te mau fifi ino roa i nia ia ratou iho aore ra e mau uiraa ta ratou o tei titau i te tahi pahonoraa. Ua horo vetahi mau taeae i te tahi e te tahi i te haavaraa; ua patoi atoa vetahi i te tia-faahou-raa.
Ua matara atoa mai vetahi mau uiraa faufaa roa. E tia anei i te feia i roto i te mau utuafare tei amahamaha i te pae faaroo e faaea noa i pihai iho i to ratou mau hoa faaipoipo aita i roto i te parau mau, aore ra e tia anei ia ratou ia faataa? Eaha te tiaraa o te mau tuahine i roto i te amuiraa? Mea tano anei ia amu i te maa tei pûpûhia na te mau idolo? Nafea e tia ia faaterehia te mau putuputuraa, oia atoa te oroa Amuraa maa Ahiahi a te Fatu?—Korinetia 1, 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.
Peneiaˈe no to ratou haapeapea i te maitai o to ratou mau taeae i roto i teie huru tupuraa hepohepo i te pae varua, ua haere atura Ahaiko, Phoratunato, e Setephano i Ephesia no te farerei ia Paulo. Taa ê noa ˈtu i te afairaa ˈtu i te mau parau apî peapea, mea papu e ua horoa atoa ratou i te hoê rata a te amuiraa ia Paulo ra e mau uiraa to roto no nia i teie mau tumu parau. (Korinetia 1, 7:1; 16:17) Parau mau, e ere teie na taeae e toru anaˈe tei haapeapea i te huru tupuraa. Inaha, ua faaroo aˈena Paulo i te mau parau apî no ǒ mai i “to te fetii o Heloe” no nia i te mârôraa i vai i rotopu i te mau melo o te amuiraa. (Korinetia 1, 1:11) Papu maitai, ua tauturu te faatiaraa a te mau vea ia Paulo ia taa maitai oia i te huru tupuraa, no te faaoti e eaha te aˈoraa e pûpû atu, e nafea ia pahono i te mau uiraa i matara. E au ra e te rata ta tatou i matau i teie mahana oia hoi te Korinetia Hoê, o te pahonoraa ïa a Paulo, o tei arataihia e te varua moˈa o te Atua. Na Ahaiko, Phoratunato, e Setephano paha i afai i te rata.
O vai râ o Ahaiko, o Phoratunato, e o Setephano? Eaha ta tatou e nehenehe e haapii na roto i te tuatapaparaa i ta te mau Papai e parau ra no nia ia ratou?
Te fetii o Setephano
O te fetii o Setephano te “oho matamua” o te taviniraa a Paulo i te mataeinaa Roma no Ahaia, i Heleni Apatoa, fatata i te matahiti 50 o to tatou tau, e na Paulo iho i bapetizo ia ratou. E au ra e ua faariro Paulo ia ratou ei hiˈoraa, ei fetii e mana papu e te paari no Korinetia. Ua haapopou o ˈna ma te mahanahana ia ratou no ta ratou ohipa no te amuiraa: “Te aˈo atu nei au ia outou, e au mau taeae, (e ite atu outou i te fetii o Setephano ra, o te oho matamua ïa ratou i Ahaia na, e ua haamataro ratou i te tauturu i te feia moˈa.) Ia auraro maite outou i te reira, e te feia atoa i au mai, tei rave atoa i te ohipa ra.” (Korinetia 1, 1:16; 16:15, 16) Aita i faaitehia e o vai râ te “fetii” o Setephano. Te auraa o te parau ra fetii oia hoi te mau melo o te utuafare, te mau tavini atoa râ aore ra te feia rave ohipa. I te mea hoi e o Ahaiko te iˈoa Latino matauhia o te hoê tavini, e Phoratunato e iˈoa matauhia ïa o te hoê taata tiamâ, te manaˈo ra vetahi feia tuatapapa e peneiaˈe e melo raua toopiti atoa no te hoê â fetii.
Noa ˈtu râ, ua faariro Paulo i te fetii o Setephano ei hiˈoraa maitai. Ua “haamataro ratou [to ˈna mau melo] i te tauturu i te feia moˈa.” Ua tia i te utuafare o Setephano ia ite e e ohipa te tia ia ravehia no te maitai o te amuiraa e ia farii ma te aau mahora i teie tauturu mai te hoê hopoia na te taata tataitahi. Papu maitai, ua tia ia faaitehia te turu i te pae morare e te mauruuru no to ratou hinaaroraa e horoa i teie huru tauturu i te feia moˈa.
“Ua haamahanahana mai ratou i tau aau e to outou atoa”
Noa ˈtu e ua haapeapea Paulo no nia i te huru tupuraa i Korinetia, ua riro râ te taeraa mai na vea e toru ei faaitoitoraa ia ˈna. Te na ô ra Paulo e: “Te oaoa nei au ia Setephano i tae mai, e ia Phoratunato, e ia Ahaiko: no te mea ua tia tei toe ia outou na ia ratou. E ua haamahanahana mai ratou i tau aau e to outou atoa.” (Korinetia 1, 16:17, 18) Ua riro paha to ˈna hiˈopoaraa i te huru tupuraa i Korinetia, to ˈna faarue-tino-raa ˈtu i to Korinetia ei tumu haapeapearaa na Paulo, i teie nei râ, na te taeraa mai o te feia ta ratou i tono i mono i te ereraa o te amuiraa taatoa. Maoti ta ratou faatiaraa i taa maitai ai ia Paulo i te taatoaraa o te huru tupuraa e i ore ai vetahi o to ˈna mau mǎtaˈu. E ere paha te mau mea i te mea ino roa mai ta ˈna i manaˈo na.
Ia au i te manaˈo o Paulo, e ere te hopoia a na taata e toru no te tamahanahana-noa-raa i to ˈna feruriraa, ua riro atoa râ ei faaitoitoraa i te feruriraa o te amuiraa no Korinetia. Papu maitai, ua riro te reira ei tamǎrûraa no ratou i to ratou iteraa e ua faataa maitai te feia i tonohia ia ratou ra i te mau tuhaa atoa o te huru tupuraa ia Paulo e e hoˈi mai ratou e ta ˈna aˈoraa.
No reira, ua haapopouhia Setephano, e to ˈna na hoa e piti no ta ratou ohipa i rave no to Korinetia. Ua faahiahia Paulo i teie mau taata e i to ratou hoˈiraa ua tia ia ratou ia horoa i te aratairaa no te amuiraa no Korinetia tei amahamaha. Te faaitoito ra te aposetolo i te mau taeae e: “Ia auraro maite outou i te reira, e te feia atoa i au mai, tei rave atoa i te ohipa ra. . . . E ite maitai atu outou i te taata mai te reira te huru.” (Korinetia 1, 16:16, 18) Te faaite maitai ra teie mau faaitoitoraa i te taiva ore taatoa o teie mau taata noa ˈtu te mau fifi i roto i te amuiraa. E tia mau â ia poiherehia teie mau huru taata.—Philipi 2:29.
Mau faahopearaa maitatai o te ohipa-amui-raa ma te haapao maitai
Papu maitai, te horoa maira te ohipa-amui-raa e te faanahonahoraa a Iehova e to ˈna mau tia i te mau faahopearaa maitatai. I to Paulo papairaa i te piti o te rata tei matauhia i teie mahana mai te Korinetia Piti, i muri noa ˈˈe i te rata matamua, ua maitai aˈena te mau mea i roto i te amuiraa. Ua faatupu te ohipa tamau e te faaoromai a te mau taeae, mai ia Ahaiko, ia Phoratunato e ia Setephano, e te haereraa mai o Tito e farerei ia ratou, i te hoê faahopearaa maitai.—Korinetia 2, 7:8-15; a faaau e te Ohipa 16:4, 5.
E nehenehe atoa te mau melo o te mau amuiraa no teie tau a te nunaa a Iehova e faufaahia i te reira, na roto i te feruri-hohonu-raa i nia i te hiˈoraa poto o teie mau taata haapao maitai i faahitihia i roto i te mau Papai. Ei hiˈoraa, a feruri na e te tupu ra te hoê fifi i roto i te amuiraa i to outou vahi o te ore e afaro oioi no te tahi mau tumu e te haapeapea ra te mau taeae. Eaha te tia ia ravehia? A pee i te hiˈoraa o Setephano, o Phoratunato, e o Ahaiko, aita ratou i otohe i ta ratou hopoia e faaara ia Paulo i te huru tupuraa e i muri iho, ma te tiaturi, a vaiiho e na Iehova e faaafaro i te mau mea. Aita roa ˈtu ratou i vaiiho noa ˈˈe i to ratou itoito no te parau-tia ia turai ia ratou ia ohipa o ratou anaˈe iho aore ra ia “riri . . . ia Iehova.”—Maseli 19:3.
O Iesu Mesia te upoo o te mau amuiraa, e i te taime au ta ˈna i faataa, mai tei tupu na i Korinetia, e ohipa mau â oia no te faaafaro i te mau fifi atoa o te haamǎtaˈu ra i to ratou maitairaa i te pae varua e to ratou hau. (Ephesia 1:22; Apokalupo 1:12, 13, 20; 2:1-4) I teie area taime, ia pee tatou i te hiˈoraa maitai i vaiihohia mai e Setephano, Phoratunato, e Ahaiko e ia tamau tatou i te tauturu i to tatou mau taeae, e turu atoa ïa tatou ma te taiva ore i te amuiraa, ma te faaitoito i to tatou mau taeae, e ma te “faaaraara ˈtu ai ia rahi te aroha, o te rave i te mau ohipa maitatai.”—Hebera 10:24, 25.