Te faatia ra te feia poro i te Basileia

Te mana o te Parau a te Atua no te faataui

NA ROTO i ta ˈna iho faaiteraa, ua riro na oia ei “faaino hoi i mutaa iho, e te hamani ino, e te hauti.” (Timoteo 1, 1:13) Ua taui râ oia! No te tauiraa rahi o te aposetolo Paulo, ua nehenehe oia e parau i muri iho e: “Ei pee mai outou ia ˈu mai ia ˈu atoa e pee i te Mesia nei.”—Korinetia 1, 11:1.

I teie nei mahana, te faatupu nei tau hanere tausani feia haamori aau rotahi i te ao atoa nei i teie mau tauiraa. Na te aha hoi e tauturu ia ratou ia rave i te reira? Te haapii nei ratou i te Parau a te Atua e te faaohipa nei i te reira i roto i to ratou oraraa. Te haapapu ra te ohipa i tupu e e mana to te Parau a te Atua no te faataui.

I Slovenia ua ora noa e piti hoa faaipoipohia ruhiruhia i rapaeau i te hoê oire iti. E 60 matahiti to te tane o Jože e e fifi rahi to ˈna e te inu-hua-raa i te ava. Teie râ, ua aupuru oia i ta ˈna vahine tei maˈihia, o Ljudmila. I te hoê mahana, ua haere maira e piti feia poro o te Basileia e farerei ia Jože. Ua titau manihini oia i na piti Ite i roto i to ˈna fare, i reira to raua farereiraa i ta ˈna vahine. Ia faaroo oia i te poroi o te Basileia, ua tahe te roimata oaoa o Ljudmila. Ua oaoa atoa o Jože i te mea o ta ˈna i faaroo e ua ani e rave rahi uiraa. I muri aˈe i te vaiihoraahia te tahi mau papai bibilia i na hoa faaipoipohia, ua reva ˈtura te mau Ite.

Hoê avaˈe i muri iho, ua nehenehe na Ite e piti e hoˈi, e ua ite raua i te buka ra E nehenehe oe e ora e a muri noa ˈtu i roto i te paradaiso i nia i te fenua nei i nia i te airaa maa. I te aniraahia e nohea te roaaraa mai ia ˈna, ua parau Jože e: “Ua ite au i te hoê poroi i nia i te api hopea o te mau vea o ta orua i vaiiho mai ia ˈu. No reira, ua papai atu vau i ta outou amaa i Zagreb e ia haponohia mai te buka.” No to ˈna anaanatae, ua titau-manihini-hia oia ia haere i te oroa Haamanaˈoraa i te poheraa o te Mesia e faatupuhia i te Piha no te Basileia. Auê ia te mau Ite i te oaoa i to ˈna haereraa mai!

I muri aˈe, ua haamatahia te hoê haapiiraa bibilia, e ua haere maitai oia i mua. Ei hiˈoraa, i te taime a faaitehia ˈi ia Jože i roto i te Bibilia e “eiaha roa oe e hamani i te idolo tarai no oe, . . . e piˈo i raro ia ratou, eiaha hoi e tavini ia ratou,” ua haaputu oioi oia i te mau hohoˈa faaroo e vai ra i roto i te fare, to roto atoa te mau hohoˈa moˈa, e ua faarue oia ia ratou.—Exodo 20:4, 5.

Ua haamâhahia to Jože hiaai i te parau mau i te pae varua. Teie râ hoi, ua vai tamau noa ta ˈna hiaai e inu hua i te ava. Fatata e 18 matahiti, ua inu oia 7 litera uaina i te mahana. No to ˈna fifi i te pae o te inu-hua-raa i te ava, aita oia i tâuˈa rahi i to ˈna huru faaneheneheraa. I muri aˈe râ i to ˈna haapiiraa i te manaˈo o te Atua no nia i te inu-hua-raa i te ava, ua faaoti oia e taui.

Ua tutava oia i te haapaiuma i to ˈna fifi i te pae o te inu-hua-raa ma te haere mǎrû noa, ma te hiˈopoa tamau i te rahiraa uaina o ta ˈna e inu i te mahana. I muri aˈe aita oia i faatîtî-faahou-hia e te uaina. I roto i ta ˈna mau haapiiraa bibilia, ua haapii atoa oia e te titauhia ra i te mau kerisetiano mau ia atuatu i te vai-mâ-raa o te tino. No reira, ua horoa oia i te moni i te mau Ite e ua parau e: “A haere e a hoo i te ahu e titauhia ia hinaaro vau e tia ˈtu i te mau putuputuraa kerisetiano e i roto i te tuhaa taviniraa!” Ua hoˈi maira te mau Ite e te ahu no roto, te mau totini, te mau tiaa, te mau ahu oomo, te mau pereue, te mau taamu arapoa, e te hoê pute.

I muri aˈe i to ˈna haapiiraa i te Bibilia hoê matahiti, ua nehenehe o Jože e o Ljudmila e apee i te mau Ite i roto i te ohipa pororaa i tera e tera fare. E toru avaˈe i muri iho, ua faataipe raua i to raua pûpûraa no te Atua na roto i te bapetizoraa i roto i te pape i te hoê tairururaa mataeinaa a te mau Ite no Iehova. Noa ˈtu te matahiti ruhiruhia e te maˈi, ua apiti noa Jože i roto i te pororaa i te parau apî maitai e i muri iho, tae roa ˈtu i to ˈna poheraa i te avaˈe me no te matahiti 1995, ua tavini oia ma te haapao maitai ei tavini tauturu i roto i te amuiraa. Te horoa nei te mau hotu maitatai i faahotuhia i roto i te oraraa o teie tane haehaa e ta ˈna vahine i te faaiteraa i te mana o te Parau a te Atua no te faataui!