“E haamaitai ia Iehova”
“O tei huti i te aho ra ia haamaitai anaˈe ïa ia Iehova.”—SALAMO 150:6.
1, 2. (a) I teihea huru faito te tupu-maitai-raa te faaroo kerisetiano mau i te senekele matamua? (b) Eaha te faaararaa matamua i horoahia e te mau aposetolo? (c) Nafea te ohipa apotata i te tupuraa mai?
UA FAANAHO o Iesu i ta ˈna mau pǐpǐ ei amuiraa kerisetiano, o tei tupu maitai hoi i te senekele matamua ra. Noa ˈtu te patoiraa uˈana i te pae faaroo, o te “evanelia nei . . . tei faaite-haere-hia i te taata atoa i raro aˈe i teie nei raˈi.” (Kolosa 1:23) I muri aˈe râ i te poheraa o te mau aposetolo a Iesu Mesia, ua faatupu o Satani ma te haavarevare i te ohipa apotata.
2 Ua horoa te mau aposetolo i te faaararaa matamua o taua ohipa ra. Ei hiˈoraa, ua parau o Paulo i te mau matahiapo no Ephesia: “E teie nei, e ara ia outou iho, e te nǎnǎ atoa i faarirohia ˈi outou e te [v]arua [moˈa] ei episekopo i nia ihora, ia faaamu hoi outou i te ekalesia o te Atua, o ta ˈna i hoo i to ˈna ihora toto. Ua ite hoi au, ia reva ê atu vau e ô mai ai te urî taehae roa i roto ia outou na, e ore e faaherehere i te nǎnǎ. E tia mai hoi te taata i roto ia outou iho, e parau mai i te parau piˈo, ia peehia ratou e te pǐpǐ.” (Ohipa 20:28-30; a hiˈo atoa Petero 2, 2:1-3; Ioane 1, 2:18, 19.) No reira, i te maharaa o te senekele, ua haamata aˈera te haapaoraa kerisetiano apotata i te amui e i te apiti atu i te Hau emepera roma. Tau senekele i muri iho, ua faatere ihora te Hau emepera roma moˈa, na roto i te taairaa i te pâpa no Roma, i nia i te hoê tuhaa rahi o te huitaata. I muri aˈe, ua orure te haapaoraa porotetani no te Reforomatio i te uˈanaraa o te ino a te Ekalesia katolika, aita râ hoi i haamau faahou i te faaroo kerisetiano mau.
3. (a) I anafea e mea nafea te pororaahia te parau apî maitai i te mau taata atoa? (b) Eaha te mau tiairaa niuhia i nia i te Bibilia tei tupu i te matahiti 1914?
3 Tera râ, a piri noa mai ai te hopea o te senekele 19, ua rave faahou te hoê pǔpǔ taata e haapii ra i te Bibilia ma te aau rotahi, i te pororaa e ua naea roa ‘te taata atoa i raro aˈe i teie nei raˈi, i te tiaturiraa o te parau apî maitai.’ Na roto i to ratou haapiiraa i te mau parau tohu a te Bibilia, ua faaite atea teie pǔpǔ hau atu i te 30 matahiti na mua ˈˈe e ua riro te matahiti 1914 ei tapao o te hopea o te ‘tau faataahia o te mau etene,’ te hoê area taime ‘e hitu tau,’ aore ra e 2 520 matahiti, tei haamata na roto i te haamouraahia o Ierusalema i te matahiti 607 hou to tatou nei tau. (Luka 21:24; Daniela 4:16) Na roto i te tupuraa ta ratou mau tiairaa, ua haapapu te matahiti 1914 e e tauiraa tei tupu i roto i te mau ohipa a te taata i nia i te fenua nei. I nia atoa i te raˈi, ua tupu te mau ohipa faahiahia. I taua taime ra, ua haaparahi te Arii mure ore i to ˈna Arii hoa ohipa, o Iesu Mesia, i nia i te hoê terono i te raˈi ra, ei faaineineraa no te faaore i te mau ino atoa i nia i te fenua taatoa e no te haamau faahou i te Paradaiso.—Salamo 2:6, 8, 9; 110:1, 2, 5.
A turu i te Arii Mesia!
4. Nafea to Iesu oraraa ia au i te auraa o to ˈna iˈoa ra Mihaela?
4 I te matahiti 1914, ua haamata taua Arii Mesia ra o Iesu i te ohipa. I roto i te Bibilia, te pii-atoa-hia ra oia o Mihaela, teie te auraa “O vai mai te Atua ra?,” no te mea te opua papu ra oia i te faatia i te tiaraa mana arii o Iehova. Mai tei faaitehia i roto i te Apokalupo 12:7-12, ua faataa te aposetolo Ioane na roto i te hoê orama e eaha te tupu: “E e tamaˈi tei nia i te raˈi: O Mihaela e ta ˈna ra mau melahi tamaˈi atura i te teni; e ua tamaˈi maira te teni e ta ˈna ra mau melahi. Aore râ i riro te re ia ratou; e aore roa ˈtura o ratou e parahiraa i nia i te raˈi. Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae.” Te hoê toparaa puai mau!
5, 6. (a) I muri aˈe i te matahiti 1914, eaha te faaiteraa puai tei faaroohia mai te raˈi mai? (b) Nafea te Mataio 24:3-13 i te tuatiraa ˈtu i te reira?
5 Ua faaroohia ˈtura te hoê reo puai i nia i te raˈi i te na ôraa e: “Teie mai nei te ora, e te puai, e te basileia o to tatou Atua, e te mana o ta ˈna ra Mesia: ua hurihia hoi te tihotiho i to tatou mau taeae i raro, o tei tihotiho ia ratou i mua i te aro o to tatou Atua i te rui e te ao. Pohe atura râ oia ia ratou [te mau kerisetiano haapao maitai] i te toto o te Arenio [Iesu Mesia], e i te parau ta ratou i faaite ra, aore hoi ratou i nounou i to ratou iho ora ua faaoromai râ e tae noa ˈtu i te pohe.” E faaoraraa te reira no te feia haapao maitai tei faaohipa i te faaroo i roto i te tusia hoo faufaa roa o Iesu.—Maseli 10:2; Petero 2, 2:9.
6 Te na ô faahou ra te reo puai i nia i te raˈi e: “E teie nei, a oaoa, e te mau raˈi ra e, e o outou atoa hoi o tei parahi i reira ra. E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” Ua ite-maitai-hia hoi te “ati” i tohuhia no teie fenua na roto i te mau tamaˈi o te ao nei, te oˈe, te maˈi, te mau aueueraa fenua, e te vahavaharaa i te ture tei tairi i te fenua i teie senekele. Mai ta te Mataio 24:3-13 e faatia ra, ua tohu o Iesu e e tuhaa te reira no ‘te tapao o te hopea o te faanahoraa o te mau mea nei.’ Ia au i te parau tohu, mai te matahiti 1914 mai â, ua roohia te huitaata i te ati i nia i te fenua nei tei ore i tupu aˈenei i roto i te aamu taatoa o te taata.
7. No te aha te mau Ite no Iehova e poro ai ma te ru?
7 I roto i teie tau ati rahi a Satani, e nehenehe anei te huitaata e ite i te tiaturiraa no a muri aˈe? Eaha hoi e ore ai, inaha te parau ra te Mataio 12:21 no nia ia Iesu, e: “E e tiaturi atoa te mau Etene i to ˈna ra iˈoa”! Aita te mau huru tupuraa mauiui i rotopu i te mau etene e faaite noa ra i ‘te tapao o te hopea o te faanahoraa o te mau mea nei,’ te faaite atoa nei râ oia i te ‘tapao o te vairaa mai o Iesu’ ei Arii o te Basileia Mesia i te raˈi ra. No nia i taua Basileia ra, te parau faahou ra o Iesu e: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) O vai te nunaa i nia i te fenua nei e poro haere ra i te tiaturiraa faahiahia o te faatereraa a te Basileia o te Atua? Te mau Ite no Iehova! Ma te ru, te poro nei ratou i mua i te taata e i tera e tera fare e ua fatata roa te Basileia o te parau-tia e o te hau a te Atua i te faatere i te mau ohipa o te fenua. Te apiti ra anei outou i roto i teie taviniraa? Aita ˈtu e haamaitairaa rahi aˈe!—Timoteo 2, 4:2, 5.
Nafea “te hopea” e tae mai ai?
8, 9. (a) Nafea te haavaraa i te haamataraa i nia “i te utuafare o te Atua”? (b) Nafea te amuiraa faaroo kerisetiano i te ofatiraa i te Parau a te Atua?
8 Tei roto te huitaata nei i te hoê tau haavaraa. Ua faaitehia mai i roto i te Petero 1, 4:17 e ua haamata taua haavaraa ra i nia “i te utuafare o te Atua”—te hoê haavaraa o te mau faanahonahoraa faahua kerisetiano, o tei rahi roa i te “anotau hopea nei” na roto i te haapoheraa o te Tamaˈi Rahi Matamua i te mau matahiti 1914-18. Nafea te amuiraa faaroo kerisetiano i topa ˈi i roto i teie haavaraa? E hiˈo na tatou i te tiaraa o te mau ekalesia o tei turu i te mau tamaˈi mai te matahiti 1914 mai â. Aita anei te mau upoo faatere haapaoraa i viivii i “te toto ora o te feia haehaa hara ore ra” o ta ratou i poro na i nia i te mau reni pupuhiraa?—Ieremia 2:34.
9 Ia au i te Mataio 26:52, ua parau o Iesu e: “O te rave hoi i te ˈoˈe ra, e pohe ïa i te ˈoˈe.” E parau mau roa te reira i roto i te mau tamaˈi o teie senekele! Ua faaitoito te mau upoo faatere haapaoraa i te feia apî ia haapohe i te tahi atu feia apî, te feia atoa e hoê â haapaoraa ta ratou—ua haapohe te katolika i te katolika e te porotetani i te porotetani. Ua faateiteihia te here aiˈa i nia ˈˈe i te Atua e te Mesia. Aita i maoro aˈenei, i roto i te tahi mau fenua no Afirika, ua tuuhia te mau taairaa o te mau opu na mua ˈˈe i te mau faaueraa tumu bibilia. I Rwanda, i reira e katolika te rahiraa o te mau taata, ua haamouhia afa mirioni taata na roto i te haavîraa uˈana a te mau opu. Ua faˈi te pâpa i roto i te vea a te Vaticana ra L’Osservatore Romano e: “E haamouraa taatoa teie i te nunaa, e te mea peapea roa ˈtu â, o te mau katolika te tumu.”—A faaau e te Isaia 59:2, 3; Mika 4:3, 5.
10. Eaha te haavaraa ta Iehova e faatupu i nia i te mau haapaoraa hape?
10 Eaha te manaˈo o te Arii mure ore no nia i te mau haapaoraa e faaitoito ra i te mau taata ia haapohe i te tahi e te tahi aore ra o te hiˈo noa ra ma te ore e patoi, a taparahi noa ˈi to ratou mau melo i te tahi atu mau melo? No nia ia Babulonia Rahi, te hau emepera o te haapaoraa hape, te parau maira te Apokalupo 18:21, 24, e: “Ua rave ihora te hoê melahi puai i te tahi ofai rahi mai te ofai mule te huru, e ua taora taue atura i raro i te tai, na ô aˈera, Mai te reira atoa te oire rahi ra o Babulonia i te huri-uˈana-hia i raro, e e ore roa e itea-faahou-hia ˈtu. E tei roto ia ˈna te toto o te mau peropheta e to te feia moˈa i te itearaahia, e to te feia atoa i taparahihia i teie nei ao.”
11. Eaha te mau ohipa riaria e ravehia ra i roto i te amuiraa faaroo kerisetiano?
11 Ia au i te parau tohu a te Bibilia, ua tupu te mau ohipa riaria mau i roto i te amuiraa faaroo kerisetiano. (A faaau e te Ieremia 5:30, 31; 23:14.) I roto i te hoê faito rahi, no te mea ua faatiatia-noa-hia e te mau upoo faatere haapaoraa, ua viiviihia ta ratou mau nǎnǎ i te peu taiata. I te mau Hau Amui no Marite, tei manaˈohia e e nunaa kerisetiano, fatata te afaraa o te mau faaipoiporaa atoa e hope ïa na roto i te faataaraa. Ua rahi roa te peu mahu e te mau potii apî tei hapû i roto i te mau melo o te ekalesia. Te hamani ino nei te mau perepitero i te mau tamarii i te pae taatiraa—e na roto e rave rahi hiˈoraa. I roto i te faaotiraa a te tiribuna tei haava i teie mau hororaa, e nehenehe te Ekalesia katolika i te mau Hau Amui no Marite e faautuahia i te aufau hoê miria dala marite i roto hoê ahuru matahiti. Aita te amuiraa faaroo kerisetiano i tâuˈa i te faaararaa a te aposetolo Paulo i roto i te Korinetia 1, 6:9, 10: “Eaha! aita outou i ite e e ore te feia parau-tia ore e parahi i te basileia o te Atua? Eiaha e vare; e ore hoi te taiata, e te haamori idolo, e te faaturi, e te mahu, e te paia, e te eiâ, e te nounou taoˈa, e te taero ava, e te faaino, e te haru e ore anaˈe ïa e parahi i te basileia o te Atua.”
12. (a) Nafea te Arii mure ore e ohipa ˈi i nia ia Babulonia Rahi? (b) Taa ê atu i te amuiraa faaroo kerisetiano, no teihea tumu e himene ai te nunaa a te Atua i te himene “Haleluia”?
12 Fatata roa, e faatupu te Arii mure ore, o Iehova, na roto i te arai o ta ˈna Tenerara Rahi i nia i te raˈi, o Iesu Mesia, i te ati rahi. Na mua, e roohia te amuiraa faaroo kerisetiano e te tahi atu mau amaa o Babulonia Rahi i te haavaraa a Iehova. (Apokalupo 17:16, 17) Na ratou iho e faaite e eita e tia ia horoa na ratou i te faaoraraa ta Iehova e faatae mai na roto i te tusia hoo o Iesu. Ua haavahavaha ratou i te iˈoa moˈa o te Atua. (A faaau e te Ezekiela 39:7.) Auê ïa faaoooraa rahi hoi ia himene ratou e “Haleluia” i roto i ta ratou mau fare pure rarahi unauna! Ua faaore ratou i te iˈoa faufaa o Iehova i roto i te mau tatararaa a ta ratou Bibilia, tera râ e au ra e ua moehia ia ratou e te auraa o “Haleluia,” teie ïa, “Haamaitai ia Ia”—“Ia,” o te hoê ïa haapotoraa o te iˈoa “Iehova.” Ma te tano maitai, te faatia ra te Apokalupo 19:1-6 e e fatata te mau pǔpǔ himene “Haleluia” i te himene no te faahanahana i te haavaraa a te Atua i nia ia Babulonia Rahi.
13, 14. (a) Eaha te mau ohipa faufaa i tupu i muri iho? (b) Eaha te faahopearaa oaoa no te feia e mǎtaˈu ra i te Atua?
13 I muri iho e “tae” mai ai o Iesu no te faahiti e no te faatupu i te haavaraa i nia i te mau nunaa e te mau taata. Ua tohu o ˈna iho e: “Ia tae maira te Tamaiti a te taata [Iesu Mesia] ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono [haavaraa] hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui. Ei reira te arii e parau aˈe ai i tei tana rima atau ra, A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra.” (Mataio 25:31-34) Area te pǔpǔ puaaniho ra, te na ô ra te irava 46 e “e rave i te pohe mure ore, area te feia parau-tia ra, o te rave ïa i te ora mure ore.”
14 Te faataa ra te buka Apokalupo a te Bibilia e nafea te “Arii o te mau arii, e te Fatu o te mau fatu ra,” to tatou Fatu i te raˈi ra, o Iesu Mesia, e faahoro ai i te puaahorofenua no te tamaˈi i Aramagedo, ma te haamou i te mau tuhaa politita e te hoo taoˈa a te faanahonahoraa a Satani. Mea na reira ïa te Mesia e haaparare ai i “te riri o te Atua Puai hope ra” i nia i te tuhaa taatoa a Satani e vai ra i te fenua nei. I te mea hoi e “mou [teie] mau mea tahito ra,” e tomo te feia e mǎtaˈu ra i te Atua i roto i te ao apî hanahana e na te Atua “e horoi i to ratou roimata atoa.”—Apokalupo 19:11-16; 21:3-5.
Te hoê tau e arue ia Ia
15, 16. (a) No te aha e mea faufaa no tatou ia haapao maitai i te parau tohu a Iehova? (b) Eaha te tia ia tatou ia rave no te ora o ta te mau peropheta e te mau aposetolo hoi i faaite, e eaha te auraa o te reira no te mau nahoa taata i teie mahana?
15 Ua piri roa mai taua mahana haavaraa ra! Mea faufaa ïa no tatou ia haapao maitai i te parau tohu a te Arii mure ore. I te feia e tararapu noâ ra i roto i te mau haapiiraa e te mau peu matauhia a te haapaoraa hape, te na ô ra te hoê reo no te raˈi mai e: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe.” Tera râ, ihea te mau taata e horo ai? E hoê anaˈe parau mau, e hoê anaˈe ïa haapaoraa mau. (Apokalupo 18:4; Ioane 8:31, 32; 14:6; 17:3) E roaa noa to tatou ora mure ore na roto i te iteraa i taua haapaoraa ra e te auraroraa i to ˈna Atua. Te aratai nei te Bibilia ia tatou ia ˈna ra, i roto i te Salamo 83:18, e na ô ra e: “O Iehova to oe iˈoa, e o oe anaˈe tei Teitei i te fenua atoa nei.”
16 Teie râ, te titau nei tatou hau atu i te ite-noa-raa i te iˈoa o te Arii mure ore. Te titau nei tatou i te haapii i te Bibilia e no nia i to ˈna mau huru maitatai e ta ˈna mau opuaraa. I muri aˈe, e tia ia tatou ia rave i to ˈna hinaaro i teie tau, mai tei parauhia i roto i te Roma 10:9-13. Ua faahiti te aposetolo Paulo i te mau peropheta i faauruahia e teie hoi ta ˈna faaotiraa: “O te tiaoro atoa hoi i te iˈoa o Iehova ra, e hope roa ïa i te ora.” (Ioela 2:32; Zephania 3:9) I te ora? E, no te mau nahoa rahi i teie mahana o te faatupu ra i te faaroo i roto i te tusia ta Iehova i faanaho na roto i te Mesia o te faaorahia ia tae anaˈe mai te ati rahi, ia haavahia te ao ino a Satani.—Apokalupo 7:9, 10, 14.
17. Eaha te tiaturiraa faahiahia e tia ia turai ia tatou ia amui i roto i te himeneraa i te himene a Mose e a te Arenio?
17 Eaha te hinaaro o te Atua no te feia e tiaturi ra e e ora mai ratou? Ia amui atoa ïa tatou i roto i te himeneraa i te himene a Mose e a te Arenio, ma te arue i te Arii mure ore no ta ˈna re i mua nei. E na reira tatou ma te faaite i ta ˈna mau opuaraa hanahana ia vetahi ê. A haere noa ˈi tatou i mua i roto i te maramaramaraa o te Bibilia, e pûpû tatou i to tatou ora no te Arii mure ore. E nehenehe to tatou ora mure ore e roaa mai mai ta teie Arii puai e parau ra, i roto i te Isaia 65:17, 18: “Inaha, te hamani nei au i te raˈi apî [te Basileia o Iesu Mesia] e te fenua apî [te hoê totaiete taata apî parau-tia], e ore hoi tei mutaaihora e manaˈohia, e ore e faatupu-faahou-hia i roto i te aau: e oaoa râ outou e ouˈauˈa noa i te oaoa e a muri noa ˈtu, i ta ˈu e rave nei.”
18, 19. (a) E turai te mau parau a Davida i roto i te Salamo 145 ia tatou ia rave i te aha? (b) Eaha ta tatou e nehenehe e tiai ma te tiaturi no ǒ mai ia Iehova ra?
18 Ua faataa te papai salamo ra o Davida i te Arii mure ore na roto i teie mau parau: “E rahi Iehova, e ia haamaitai-rahi-hia; oia â ïa, e ore to ˈna rahi e itea ia imi.” (Salamo 145:3) Eita to ˈna rahi e roaa ia imihia mai te mau otia o te reva e te mure-ore-raa! (Roma 11:33) A tamau noa ˈi tatou i roto i te ite no nia i to tatou Poiete e te hoo ta ˈna i horoa mai na roto i ta ˈna Tamaiti, o Iesu Mesia, e hinaaro tatou e arue rahi atu â i to tatou Arii mure ore. E hinaaro tatou e ohipa mai ta te Salamo 145:11-13 e faataa ra: “E parau ratou i te hanahana o to oe ra basileia; e faatia noa hoi i ta oe ra mau ravea puai. I te faaiteraa i te tamarii a te taata nei i to ˈna ra mana, e te hanahana e te mana o to ˈna ra basileia. O to oe ra basileia, e basileia mure ore ïa, e to oe ra mana, e tae ïa i te mau ui atoa ra.”
19 E nehenehe tatou e tiai ma te tiaturi e e faatupu to tatou Atua i te parau ra: “Te heheu nei oe i to rima, e te haamâha nei i te hiaai o te mau mea ora atoa nei.” E aratai te Arii mure ore ia tatou ma te here na roto atu i te hopea o teie mau mahana hopea, no te mea ua haapapu mai o Davida ia tatou e: “Te tiai nei Iehova i te feia i hinaaro ia ˈna; area te feia paieti ore ra, e haamouhia ïa e ana.”—Salamo 145:16, 20.
20. Nafea outou ia pahono i te titauraa a te Arii mure ore, tei faahitihia i roto i na salamo hopea e pae?
20 Te haamata ra e te faahope ra na salamo hopea e pae i roto i te Bibilia na roto i te hoê titauraa “Halelu Ia.” No reira, te titau maira te Salamo 146 ia tatou e: “E haamaitai ia Iehova. A haamaitai ia Iehova, e tau [nephe, MN]. E haamaitai au ia Iehova, oi vai aˈe to ˈu ora; e himene au i tau Atua oi vai aˈe au nei.” E pahono anei outou i taua tiaororaa ra? Mea papu e e hinaaro outou e arue ia ˈna! Ia vai atoa mai outou i rotopu i te feia i faaitehia i roto i te Salamo 148:12, 13: “Te mau taata apî, e te mau paretenia; te mau taata paari, e te mau tamarii ra: o te reira te haamaitai i te iˈoa o Iehova; to ˈna anaˈe ra hoi te iˈoa ia faateitei: tei nia ê to ˈna hanahana i te fenua nei e te mau raˈi atoa ra.” Ia pahono tatou i taua titauraa ra ma te mafatu taatoa: “E haamaitai ia Iehova.” Ma te tahoê, ia arue tatou i te Arii mure ore e tia ˈi!
Eaha ta outou pahonoraa?
◻ Eaha te mau faaararaa matamua a te mau aposetolo a Iesu?
◻ I te omuaraa o te matahiti 1914, eaha te mau ohipa faufaa tei tupu?
◻ Eaha te mau haavaraa ta Iehova e fatata i te faatupu?
◻ No te aha e teie te taime faufaa roa ˈˈe no te arue i te Arii mure ore?
[Tumu parau tarenihia i te api 19]
Teie tau arepurepu
E rave rahi taata tei ite e ua haamata te hoê tau arepurepu i te omua-roa-raa o te senekele 20. Ei hiˈoraa, i roto i te api matamua o te buka ra Pandaemonium, i papaihia e Daniel Patrick Moynihan, melo no te apooraa rahi marite, i neneihia i te matahiti 1993 ra, te tapao ra te hoê tuatapaparaa no nia i “te ati rahi o te matahiti 1914” e: “Ua tae mai te tamaˈi e ua taui te ao nei—ma te taatoa. I teie mahana, e vau noa hau e vai ra i nia i te fenua nei, tei vai na i te matahiti 1914 ra e aita ta ratou huru faatereraa i faatauihia e te haavîraa uˈana mai taua tau mai â ra. . . . No nia i na hau e 170 e vai ra i to tatou nei tau, mea apî roa vetahi no te farerei i te arepurepuraa i tupu aˈenei.” Oia mau, ua ite te anotau mai te matahiti 1914 mai â e rave rahi ati!
Ua nenei-atoa-hia i te matahiti 1993 te buka ra Out of Control—Global Turmoil on the Eve of the Twenty-First Century. O Zbigniew Brzezinski te taata papai, e raatira tahito oia no te Apooraa no te ino ore no te hau o te mau Hau Amui no Marite. Te papai nei oia e: “Ua haapopouhia te aroraa o te piti ahururaa o te senekele na roto e rave rahi aparauraa mai te haamataraa mau o te Tau Feruriraa. . . . Ma te taa ê roa i ta ˈna mau parau tǎpǔ, ua riro te senekele piti ahuru ei senekele faataheraa rahi aˈe i te toto o te huitaata e te î i te feiiraa, te hoê senekele o te mau ohipa maamaa e te mehameha a te feia politita e te mau taparahiraa taata riaria mau. Ua faanahohia te ohipa ino i te hoê faito tei ore i tupu aˈenei, ua faanahohia te taparahi-pohe-raa ia au i te manaˈo e ua î te fenua i te taata. Mea riaria roa te taa-ê-raa i rotopu i te puai i te pae aivanaa no te ohipa maitai e te ino i te pae politita tei uˈana mau. Aita roa te taparahi-pohe-raa i te taata i parare aˈenei i nia i te fenua taatoa na mua ˈtu i roto i te aamu, aita roa te reira i haapohe aˈenei e rave rahi feia na mua ˈtu, aita roa te haamouraa i te taata i tamau noa na roto i teie huru tutavaraa rahi tuutuu ore no nia i teie mau huru maamaa i ravehia ma te teoteo, i tupu aˈenei na mua ˈtu.” E parau mau roa te reira!
[Hohoˈa i te api 17]
Ua huri mai o Mihaela ia Satani e ta ˈna nuu i nia i te fenua i muri aˈe i te haamauraa o te Basileia i te matahiti 1914