E arue anaˈe i te Arii mure ore!
“O Iehova te arii e a muri noa ˈtu.”—SALAMO 10:16.
1. Eaha te mau uiraa e matara mai no nia i te mure-ore-raa?
TE MURE-ORE-RAA—eaha ta outou e parau no nia i te reira? Te manaˈo ra anei outou e nehenehe mau â te taime e tamau noa e a muri noa ˈtu? Oia mau, aita e feaaraa e e roa ˈtu â te taime e a muri noa ˈtu ia hoˈihia i te matamua ra. No te aha ïa eita te taime e nehenehe e roa ˈtu â i mua nei e a muri noa ˈtu? Inaha, te faahiti ra te Bibilia i te Atua e ua aruehia oia “mai tahito mai â e a muri noa ˈtu.” (Salamo 41:13) Eaha te auraa o teie parau? E nehenehe tatou e taa i te auraa mai te peu e e faahiti tatou i te hoê tumu parau i taaihia—te reva.
2, 3. (a) Eaha ta te reva e nehenehe e tauturu mai ia tatou ia taa no nia i te mure-ore-raa? (b) No te aha tatou e hinaaro ai e haamori i te Arii mure ore?
2 Eaha te aanoraa o te reva? Te vai ra anei te tahi taotiaraa i te reira? A 400 matahiti i teie nei, ua manaˈohia e to tatou fenua te pu o te ao taatoa. I taua anotau ra, ua hamani te taata ra o Galileo i te hiˈo fetia, ua nehenehe atura te raˈi e hiˈohia i roto i to ˈna aanoraa. I teie nei, e nehenehe ïa o Galileo e hiˈo e rave rahi atu â mau fetia e e faaite e te ohu ra te fenua e te tahi atu mau palaneta ma te haaati i te mahana. Aita te Maoroaheiata parauhia Voie Lactée i hiˈo-faahou-hia mai te hoê mea mauouo. Ua faaite-papu-hia e e haapueraa fetia oia, fatata hoê hanere miria te numera. Eita roa ˈtu tatou e nehenehe e taio i taua mau rahiraa fetia ra, noa ˈtu e e taio tatou i roto i to tatou oraraa taatoa. I muri aˈe, ua itehia mai te mau miria haapueraa fetia e te feia tuatapapa i te reva teitei. Aita e hopearaa i roto i te reva, noa ˈtu eaha te atea-roa-raa ta te mau hiˈo fetia puai roa ˈˈe e nehenehe e hiˈopoa. E au ra e aita to te reva e otia. Mai te reira atoa te huru no te mure-ore-raa—aita to ˈna e otia.
3 E au ra e eita to tatou roro taata paruparu e taa i te auraa o te mure-ore-raa. Te vai nei râ te tahi Taata o te taa maitai ra i te reira. E nehenehe ta ˈna e taio, oia mau, e e horoa atoa i te iˈoa no te mau mirioni miria fetia aita e hopearaa i roto i to ratou mau miria haapueraa fetia! Teie Ta ˈna e parau ra e: “A nânâ na i to outou mata i nia; a hiˈo ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai. Aitâ oe i ite, aitâ oe i faaroo, e e parahiraa mure ore to te Atua, to Iehova, o tei hamani i te fenua e tae noa ˈtu i te hopea ra; e ore hoi oia e matapouri, e ore te rohirohi; e to ˈna ite, e ore e noaa ˈtu ia titau!” (Isaia 40:26, 28) Auê ïa Atua faahiahia e! Papu maitai, o ˈna te Atua ta tatou e hinaaro e haamori!
“Arii e a muri noa ˈtu”
4. (a) Mea nafea to Davida faaiteraa i to ˈna faahiahia no te Arii mure ore? (b) Eaha te faaotiraa ta te hoê o te mau aivanaa rahi roa ˈˈe o te aamu i horoa no nia i te tumu o te reva teitei?
4 I roto i te Salamo 10:16, te parau nei o Davida no nia i te Atua, te Poiete e: “O Iehova te arii e a muri noa ˈtu.” E i roto i te Salamo 29:10, te parau faahou ra oia e: “Te parahi ra Iehova ei arii, e a muri noa ˈtu.” Oia, o Iehova te Arii mure ore! Hau atu, te haapapu ra o Davida e teie Arii e faateiteihia ra, o ˈna te Taata opua e te Poiete o te mau mea atoa ta tatou e ite ra i roto i te reva, ma te parau i roto i te Salamo 19:1 e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” Fatata e 2 700 matahiti i muri iho, ua faaite te aivanaa tuiroo ra o Sir Isaac Newton e hoê â manaˈo to ˈna e to Davida, i to ˈna papairaa e: “Ua tupu teie faanahoraa nehenehe roa ˈˈe o te mau mahana, te mau palaneta e te mau fetia ave na roto noa i te opuaraa e te mana hope o te hoê taata puai e te maramarama.”
5. Eaha ta Isaia e ta Paulo i papai no nia i te Pu o te paari?
5 E tia hoi te reira ia faahaehaa ia tatou ia ite e e ora noa te Arii Mana hope ra o Iehova e a muri noa ˈtu, “inaha hoi te raˈi nei, e te raˈi teitei roa ra, e ore . . . e mau i reira”, e vai hoi e a muri noa ˈtu! (Arii 1, 8:27) Ua faataahia o Iehova i roto i te Isaia 45:18 mai “tei hamani i te mau raˈi ra; . . . tei rave i te fenua e na ˈna i hamani,” o ˈna te Pu o te paari hau aˈe i te rahi i ta te mau taata e nehenehe e imi hohonu. Ua parau o Iehova, mai tei haapapuhia i roto i te Korinetia 1, 1:19: “E faaore au i te paari o te feia paari, e e faariro vau i te ite o te feia i ite ra ei mea faufaa ore.” Ua parau faahou te aposetolo Paulo i roto i te irava 20 e: “Teihea te taata paari? teihea te papai parau? teihea te taata mârô i te parau o teie nei ao? e ere anei ua faariro te Atua i te paari o teie nei ao ei maamaa?” Oia mau, mai ta Paulo i parau faahou, i roto i te pene 3, irava 19, “te paari hoi o teie nei ao, e mea maamaa ïa i te Atua.”
6. Eaha ta te Koheleta 3:11 e faaite ra no nia i “te manaˈo o te tau otia ore”?
6 E tuhaa te mau mea i roto i te raˈi no te poieteraa ta te arii ra o Solomona i faahiti e: “Ua faanehenehe [te Atua] i te mau mea atoa i te tau mau ra. E ua tuu oia i te manaˈo o te tau otia ore i roto i to ratou mafatu, ia ore te mau taata ia ite i te ohipa a te Atua mau mai te matamua mai e tae noa ˈtu i te hopea.” (Koheleta 3:11, MN) Oia mau, ua haamauhia i roto i te mafatu o te taata ia tamata i te taa i te auraa o “te manaˈo o te tau otia ore” oia hoi, te mure-ore-raa. E roaa anei râ ia ˈna taua huru ite ra?
Te tiaturiraa faahiahia roa o te oraraa
7, 8. (a) Eaha te tiaturiraa faahiahia roa o te oraraa no te huitaata nei, e nafea e fanaˈo ai i te reira? (b) No te aha e tia ia tatou ia oaoa e e tamau noa te haapiiraa no ǒ mai i te Atua ra e a muri noa ˈtu?
7 Teie ta Iesu Mesia i parau i roto i te pure ta ˈna i faatae ia Iehova ra: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Nafea e roaa mai ai ia tatou taua huru ite ra? Mea faufaa ia haapii tatou i te Parau a te Atua, te Bibilia Moˈa. Mea na reira ïa e roaa mai ai te ite papu no nia i te mau opuaraa rarahi a te Atua, e te faanahoraa atoa i ravehia na roto i ta ˈna Tamaiti no te hoê oraraa mure ore i nia i te hoê fenua e faarirohia ei paradaiso. Te reira “te ora mau” i faahitihia i roto i te Timoteo 1, 6:19 (MN). E tuea maitai te reira e ta te Ephesia 3:11 e faataa ra mai “te opua na ˈna mai te matamua mai â, [ta te Atua] i opua i te Mesia ra i to tatou Fatu ia Iesu.”
8 Oia, e nehenehe te ora mure ore e roaa ia tatou te feia hara, na roto i te haapiiraa no ǒ mai i te Atua e te faaroo i roto i te tusia hoo o Iesu. Ehia maororaa teie haapiiraa e tamau noa ˈi? E tamau noa oia e a muri noa ˈtu a haapii-riirii-noa-hia ˈi te huitaata nei i roto i te paari o to tatou Poiete. Aita e otia to te paari o Iehova. Ma te farii i te reira, ua parau te aposetolo Paulo e: “Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e!” (Roma 11:33) Oia mau, ua tano maitai e te pii ra te Timoteo 1, 1:17 ia Iehova ‘te Arii mure ore’!
Te paari o Iehova ia poiete
9, 10. (a) Eaha te mau ohipa rarahi ta Iehova i rave no te faaineineraa i te fenua ei ô na ˈna no te huitaata? (b) Nafea i itehia ˈi te paari rahi o Iehova i roto i te mau mea ta ˈna i poiete? (A hiˈo i te tumu parau tarenihia.)
9 A hiˈo na i te tufaa faahiahia ta te Arii mure ore i horoa mai na tatou te mau taata. Te parau maira te Salamo 115:16 e: “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei.” Aita anei outou e manaˈo ra e e tiaturiraa faahiahia mau teie? Oia! E te haafaufaa rahi ra tatou i te ite-atea-raa faahiahia o to tatou Poiete i to ˈna faaineineraa i te fenua ei nohoraa no tatou!—Salamo 107:8.
10 Ua haamauhia te mau faanahonahoraa maere mau i nia i te fenua i te roaraa e ono “mahana” poieteraa i faaitehia i roto i te Genese pene 1, te roaraa o te mahana tataitahi, e rave rahi tausani matahiti ïa. I te pae hopea, ua tapoˈi teie mau poieteraa a te Atua i te fenua taatoa nei i te aihere matie, te mau uru raau rarahi, e te mau tiare ua rau te ǔ. Ua î hoi i te mau rahiraa mea ora nehenehe o te moana, te mau aere manu e maurere haere ra ma te au, e te hoê haapueraa huru rau o te mau animala rata e te taehae, ia fanau te mau animala atoa “ma to ratou ra huru.” I muri noa ˈˈe i te faataaraa i te poieteraa o te tane e te vahine, te faatia ra te Genese 1:31 e: “Hiˈo aˈera te Atua i te mau mea atoa ta ˈna i hamani, e inaha, e mea maitai roa.” Auê ïa vahi nohoraa ruperupe mau tei haaati na i taua nau taata matamua ra! I roto i teie mau mea atoa i poietehia, aita anei tatou e ite ra i te paari, te ite-atea-raa, e te aupuru o te hoê Poiete here?—Isaia 45:11, 12, 18.
11. Nafea to Solomona faahanahanaraa i te paari o Iehova ia poiete?
11 O Solomona te hoê o tei faahiahia i te paari o te Arii mure ore. Ua huti tamau oia i te ara-maite-raa i nia i te paari o te Poiete. (Maseli 1:1, 2; 2:1, 6; 3:13-18) Te haapapu ra o Solomona ia tatou e “te fenua nei te vai noa nei â ïa.” Ua haafaufaa oia i te mau mea nehenehe e rave rahi o te poieteraa, e te tuhaa atoa e ravehia ra e te mau ata o te ûa na roto i te faahaumǎrûraa i to tatou fenua. No reira, ua papai oia e: “Te tahe nei te mau pape atoa nei i raro i te tai, aita râ te tai i manii ê noa ˈtu: te vahi no reira mai te pape ra, te hoˈi faahou nei ratou i taua vahi mau ra.” (Koheleta 1:4, 7) No reira, i muri aˈe te ûa e te mau tahora pape e faahaumǎrû ai i te fenua, e faaohipa-faahou-hia te mau pape o te mau moana no te riro ei ata. Eaha te huru o teie fenua, e eaha te huru o to tatou oraraa ahiri e aita teie tamâraa e teie faaohipa-faahou-raa o te pape?
12, 13. Nafea tatou ia faaite e te haafaufaa nei tatou i te poieteraa a te Atua?
12 Ia haapapuhia to tatou haafaufaaraa i te aifaitoraa e vai ra i roto i te poieteraa maoti te mau ohipa, mai ta te arii ra o Solomona i tapao i roto i te mau parau hopea a te Koheleta: “E faaroo na tatou i te faaotiraa o taua mau parau nei: o te Atua te mǎtaˈu atu, e haapao hoi i ta ˈna parau; o ta te taata atoa ïa e ati noa ˈˈe; e hopoi atoa te Atua i te mau parau atoa i te haavaraa, e te mau mea moe atoa ra, te maitai e te ino atoa ra.” (Koheleta 12:13, 14) E tia ia tatou ia mǎtaˈu i te rave i te tahi ohipa e au-ore-hia e te Atua. Tera râ, e tia ia tatou ia imi i te auraro ia ˈna ma te mǎtaˈu faatura.
13 Oia mau, te hinaaro nei tatou e arue i te Arii mure ore no ta ˈna mau ohipa poieteraa hanahana! Te na ô ra te Salamo 104:24 e: “Aita te huru rau o ta oe ra ohipa, e Iehova! e mau ravea paari anaˈe â ta oe! Ua î te fenua nei i ta oe ra taoˈa.” Ma te oaoa, ia farii tatou i te irava hopea o teie salamo ma te parau ia tatou iho e ia vetahi ê e: “E haamaitai ia Iehova, e tau [nephe, MN] e! Halelu Ia.”
Te poieteraa faahiahia roa i nia i te fenua
14. I roto i teihea mau huru i hau ê ai te taata i poietehia e te Atua i te mau animala?
14 Mea maitai roa te poieteraa taatoa a Iehova. O tatou râ—te taata—te poieteraa faahiahia roa ˈˈe e vai ra i nia i te fenua nei. Ua poietehia o Adamu e i muri iho o Eva, i te onoraa o te mahana poieteraa faufaa roa ˈˈe a Iehova—te hoê poieteraa tei hau aˈe i te faufaa i to te iˈa, te mau manu, e te mau animala! E paari feruri-ore-hia hoi to te rahiraa o ratou, ua horoahia te ravea i te huitaata nei no te feruri, te hoê haava manaˈo o te nehenehe e faataa i te mea tia e te mea hape, te ite e opua no a muri aˈe, e te hoê hinaaro mai te fanauraahia mai no te haamori. Mea nafea te reira i te tupuraa mai? E ere ïa na roto mai i te mau animala taehae, ua poietehia râ te taata ia au i te hohoˈa o te Atua. No reira, o te taata anaˈe te nehenehe e faaite i te mau huru maitatai o to tatou Poiete, o tei faahohoˈa ia ˈna iho ia “Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau.”—Exodo 34:6.
15. No te aha e tia ia tatou ia arue ia Iehova ma te haehaa?
15 Ia arue e ia haamauruuru tatou ia Iehova no te hohoˈa haviti o to tatou tino. E tere to tatou toto, mea faufaa hoi no te ora, i roto i te tino i te mau 60 tetoni atoa. Mai ta te Deuteronomi 12:23 e parau ra, “o te ora hoi te toto”—to tatou ora—e mea faufaa roa i mua i te aro o te Atua. Mea faahiahia roa te mau ivi paari, te iˈo amui mǎrû, e te hoê faanahoraa o te tereraa uaua e ohipa oioi noa, e te hoê roro tei hau aˈe i te faahiahia i te roro o te mau animala atoa e te mau ite aravihi o te ore roa e roaahia e te hoê matini roro uira rahi mai te hoê fare tahua rarahi roa. Aita anei te reira e faahaehaa ra ia outou? Oia. (Maseli 22:4) E a hiˈo atoa na i teie mau mea: E nehenehe to tatou mau mahaha, te aratona, te arero, te mau niho, e te vaha e ohipa ia nehenehe te taata e paraparau na roto i te mau tausani reo. Ua papai o Davida i te hoê himene tano maitai na Iehova, ma te parau e: “E haamaitai au ia oe, ua taa ê hoi to ˈu hamaniraahia: e mea maerehia ta oe mau ohipa, e Iehova, eita hoi e moe ia ˈu.” (Salamo 139:14) E apiti anaˈe na ia Davida i roto i te arueraa ma te aau mehara ia Iehova, to tatou Poiete e Atua faahiahia mau!
16. Eaha te himene ta te hoê taata hauti upaupa tuiroo i papai no te arue ia Iehova, e i teihea titauraa puai tatou e pahono ai?
16 Ei arueraa ia Iehova, te na ô ra te buka iti o te hoê darama faaroo himenehia no te senekele 18 a Joseph Haydn e: “A haamauruuru Ia ˈna, outou paatoa, mea maere mau Ta ˈna mau ohipa! A himene i To ˈna tura, a himene i To ˈna hanahana, a haamaitai e a faateitei i To ˈna Iˈoa! E vai noa mai te arueraa a Iehova e a muri noa ˈtu, Amene, Amene!” Hau atu râ i te nehenehe, o te mau parau faauruahia ïa i faahiti-pinepine-hia i roto i te mau Salamo, mai te titauraa i faataehia e maha taime i roto i te 107raa o te Salamo: “Ia haamaitai hoi ratou ia Iehova i to ˈna ra aroha, e te ohipa ravea taa ê na ˈna i te tamarii a te taata nei.” Te apiti ra anei outou i roto i taua arueraa ra? E tia ia outou, no te mea no ǒ mai te mau mea nehenehe mau atoa ia Iehova ra, te Arii mure ore.
Te tahi atu â mau ohipa puai
17. Nafea ‘te himene a Mose e a te Arenio’ i te faateiteiraa ia Iehova?
17 I te roaraa e ono tausani matahiti i mairi aˈenei, ua haamau te Arii mure ore i te mau ohipa matamua puai. I roto i te buka hopea o te Bibilia, i roto i te Apokalupo 15:3, 4, te taiohia ra no nia i te feia i nia i te raˈi i upootia i nia i te mau enemi demoni, e: “Te himene ra ratou i te himene a te tavini o te Atua ra a Mose, e te himene a te Arenio ra, i te na ôraa e, E ohipa rahi e te faahiahia ta oe, e te Fatu [Iehova] ra, e te Atua Mana hope ra e; e haerea tia e te parau mau ta oe, e te Arii o te feia moˈa ra e. O vai hoi te ore e mǎtaˈu ia oe, e te Fatu [Iehova] e, e te faahanahana i to oe iˈoa? o oe anaˈe hoi tei maitai roa: e hope atoa te mau fenua i te tae mai i mua i to aro ra a haamori ai: ua faaitehia ta oe ra mau utua tia.” No te aha i piihia ˈi ‘te himene a Mose e a te Arenio’? E hiˈo mai ïa tatou.
18. Eaha te ohipa rahi tei faahaamanaˈohia i roto i te himene faahitihia i roto i te Exodo pene 15?
18 Fatata e 3 500 matahiti i teie nei, a pohe ai te nuu puai a Pharao i roto i te Miti Uteute, ua arue te mau Iseraela ia Iehova ma te aau mehara na roto i te himene. Te taio nei tatou i roto i te Exodo 15:1, 18 e: “Ua himene ihora Mose e te tamarii a Iseraela i teie nei himene ia Iehova, e ua parau aˈera, na ô aˈera, E himene au ia Iehova, ua teitei hanahana roa hoi oia: o te puaahorofenua e o tei parahi i nia iho tei hurihia e ana i raro i te tai. Ei ia Iehova te hau e a muri noa ˈtu.” Ua ite-papu-hia te mau ture parau-tia a te Arii mure ore i to ˈna haavaraa e haapoheraa i te mau enemi i patoi i to ˈna tiaraa mana arii.
19, 20. (a) No te aha Iehova i faanaho ai i te nunaa Iseraela? (b) Nafea to te Arenio e to vetahi ê pahonoraa i te pariraa a Satani?
19 No te aha te reira i riro ai ei mea faufaa? No te mea i roto i te ô i Edene ra to te Ophi haavarevare aratairaa i to tatou nau metua matamua i roto i te hara. Ua tupu ihora te hara i faataehia i nia i te huitaata taatoa. Rave oioi ihora râ te Arii mure ore i te mau faanahoraa, ia au i ta ˈna opuaraa matamua, e tiahi i to ˈna mau enemi atoa e vai ra i nia i te tuhaa o te fenua e e haamau faahou i te huru oraraa paradaiso. Ua faanaho te Arii mure ore i te nunaa o Iseraela e ua horoa ˈtu i ta ˈna Ture no te faaite atea e nafea o ˈna e rave faaoti ai i te reira.—Galatia 3:24.
20 I te pae hopea râ, ua topa o Iseraela iho i roto i te taivaraa, e ua rahi roa teie huru tupuraa peapea i te taime a horoa ˈi to ˈna mau aratai i te Tamaiti otahi a te Atua i te feia no Roma ra, no te hamani ino e no te haapohe ia ˈna. (Ohipa 10:39; Philipi 2:8) Teie râ, ua pahono te taiva-ore-raa o Iesu e tae roa ˈtu i te pohe, ei “Arenio a te Atua” faatusiahia, i te pariraa a Satani, te Enemi tahito o te Atua—oia hoi, aita e taata i nia i te fenua nei e nehenehe e tapea i to ˈna haapao maitai i te Atua ia roo-anaˈe-hia i te hoê tamataraa ino. (Ioane 1:29, 36; Ioba 1:9-12; 27:5) Noa ˈtu râ e ua roohia ratou i te huru taata tia ore no ǒ mai ia Adamu, e rave rahi mirioni taata e mǎtaˈu ra i te Atua, tei pee i te mau taahiraa avae o Iesu na roto i te tapearaa i to ratou haapao maitai i mua i te mau aroraa a Satani.—Petero 1, 1:18, 19; 2:19, 21.
21. Ia au i te Ohipa 17:29-31, eaha te tauaparauhia i mua nei?
21 I teie nei, ua tae mai te mahana i reira o Iehova e haamauruuru ai i te feia haapao maitai e e haava ˈi i te mau enemi atoa o te parau mau e o te parau-tia. (Ohipa 17:29-31) Nafea te reira e tupu ai? Na ta tatou tumu parau ïa i mua nei e faaite mai.
Ei faahaamanaˈoraa
◻ No te aha Iehova i piihia ˈi ma te tia roa ‘te Arii mure ore’?
◻ Nafea i itehia ˈi te paari rahi o Iehova i roto i te mau mea ta ˈna i poiete?
◻ I roto i teihea mau huru i riro ai te huitaata ei poieteraa maitai roa?
◻ No teihea mau ohipa e himenehia ˈi ‘te himene a Mose e a te Arenio’?
[Tumu parau tarenihia i te api 12]
Te paari rahi o Iehova
Te itehia ra te paari o te Arii mure ore i roto e rave rahi huru i roto i ta ˈna mau ohipa i nia i te fenua nei. A tapao na i te mau parau a Agura: “Maitai to te mau parau atoa a te Atua ra; e paruru oia no te feia e tiaturi ia ˈna ra.” (Maseli 30:5) I muri aˈe, te faahiti ra o Agura e rave rahi mau poieteraa oraora a te Atua, te mea rahi e te mea nainai. Ei hiˈoraa, i roto i te mau irava 24 e tae atu i te 28, te faataa ra oia e “e maha eie mea rii haihai e vai i nia i te fenua nei, te rahi nei râ to ratou paari.” O te ro, te saphana, te arabe, e te moo, taua mau mea ra.
“Te rahi nei râ to ratou paari”—oia mau, mea na reira te mau animala i te hamaniraahia. Aita ratou e feruri ra i te mau mea mai ta te mau taata e rave ra, te tiaturi nei râ ratou i nia i te paari i haamau-ê-na-hia. Aita anei outou i maere aˈenei i te reira? Ua riro hoi ratou ei poieteraa nahonaho maitai! Ei hiˈoraa, ua faanahohia te mau ro ei pǔpǔ, te vai ra te arii ufa, te mau ro rave ohipa, e te mau oni. I roto i te tahi mau huru, e haaputu te mau ro rave ohipa i te mau hê i roto i te mau ofaaraa ro o ta ratou i hamani. I reira, e faaamu ratou i te mau hê, area te mau ro paruru, e tiahi ïa ratou i te mau enemi atoa e haere mai. Ua horoahia te faaararaa i roto i te Maseli 6:6: “A haere na e hiˈo i te ro, e tena na taata taooto; a haamanaˈo i ta ˈna ravea, ia paari oe.” Eita anei teie mau huru hiˈoraa e turai ia tatou te mau taata, “ia rahi â te rave i te ohipa a te Fatu”?—Korinetia 1, 15:58.
Na te taata i hamani i te mau manureva rarahi. Ua hau atu râ te mama o te mau manu, mai te manu nainai roa piihia colibri, e 30 tarama noa to ˈna teiaha! E tia i te manureva Boeing 747 ia faaîhia 180 000 litera mori, e faaohipahia e te feia rave ohipa i faaineinehia, e te faaohipa ra oia i te mau faanahoraa fifi no te tere atu i te tahi aˈe pae o te moana. Teie râ, te faaohipa nei te colibri nainai roa i te toru ahururaa o te tarama o te meˈi ei mori no te maurere i te atearaa mai Marite Apatoerau mai e na nia ˈtu i te Ooa o Mexico, e na roto atu ia Marite Apatoa. Aita e teiaharaa i te mori, aita e faaineineraa no te tere na te reva, aita e hohoˈa o te reva aore ra e roro uira, mea ohipa rahi roa ia faaohipa! Mea tupu noa anei teie ravea? E ere roa ˈtu! Mea paari mau teie manu nainai roa, mea na reira hoi to ˈna tino i te hamaniraahia e to ˈna Poiete, te Atua ra o Iehova.
[Hohoˈa i te api 10]
Te faateitei nei te mau mea huru rau poietehia e ‘te Arii mure ore’ i to ˈna hanahana
[Hohoˈa i te api 15]
Mai ia Mose e ia Iseraela taatoa i arue i te upootiaraa a Iehova i te Miti Uteute, e tupu atoa te oaoa rahi i muri aˈe ia Aramagedo