Ia faaturahia te mau tiaraa o te feia maˈi

‘Eita vau e nehenehe e tâpû ia oe mai te peu e aita e toto. Mai te peu e te hinaaro ra oe ia tâpûhia oe, e farii oe i ta ˈu ravea rapaauraa. Ia ore anaˈe, a imi ïa i te tahi atu taote.’

AITA roa ˈtu te mau parau a te taote i faaaueue i te faaroo o Cheng Sae Joo, te hoê Ite no Iehova e ora ra i Thaïlande. I te iteraahia te hoê puu i nia i to ˈna roro [méningiome], ua hinaaro ru o Cheng ia tâpûhia o ˈna. Tera râ, ua faaoti papu oia e auraro i te faaueraa a te Bibilia: “Eiaha outou e amu i . . . te toto.”—Ohipa 15:28, 29.

Ua haere o Cheng i roto e piti fare maˈi ê atu, no to ˈna hinaaro e ia rapaauhia o ˈna i roto i to ˈna iho fenua mai te peu e e nehenehe. Ua peapea roa o ˈna, ua patoi atoa te mau taote i reira e tâpû ia ˈna ma te ore e faaohipa i te toto. I te pae hopea, ua ô oia i roto i te Pu maimiraa no nia i te roro i te Fare haapiiraa rapaauraa i te mau vahine i Tokyo maoti te Pu haamaramaramaraa i te pae rapaauraa (SIH) i Thaïlande. Ua rapaau na teie fare maˈi hau atu i te 200 taata maˈi e e puu to nia i to ratou roro ma te faaohipa i te mau hihi gamma, te hoê ravea rapaauraa apî roa maoti te hihi.

Ua ravehia te mau faanahoraa ia nehenehe o Cheng e faaea i pihai iho i te mau Ite no Tapone i pihai iho i te fare maˈi. Ua farerei te hoê pǔpǔ ia ˈna i te tauraa manureva, e piti Ite no Iehova to rotopu ia ratou o te paraparau i te reo Thaï e te hoê tia no te SIH. I muri iho e hoê hebedoma hiˈopoaraa, ua tapeahia o Cheng i te fare maˈi i reira to ˈna rapaauraahia maoti te mau hihi gamma. Hoê hora noa te maoro te raveraa. Ua matara mai oia mai te fare maˈi mai i te mahana i muri iho, e ua hoˈi o Cheng i Thaïlande i te mahana i muri iho.

“Aita vau i manaˈo noa ˈˈe e e tauturu-rahi-hia mai au maoti teie faanahoraa,” o ta Cheng ïa i parau. “Ua putapû mau â vau i te here e te ohipa-amui-raa mai te mau pǔpǔ e rave rahi i roto i teie huru tupuraa.”

Ma te faahiti i teie tumu parau apî, teie ta te vea tapone ra Mainichi Shimbun i parau: “Tae mai i teie mahana, ua haafaufaahia na te mau tumu i te pae faaroo ia patoi i te pâmuraa toto. Tera râ, ua itehia te mau faahopearaa iino o te mau pâmuraa toto mai te maˈi SIDA, te mau maˈi haape atâta faatupuhia e te hoê tirotiro mai te maˈi o te upaa C, e te mau maˈi tatiraa. No teie tumu te tahi feia maˈi e patoi ai i te mau pâmuraa toto e ere râ no ta ratou tiaturiraa i te pae faaroo.”

Ua na ô faahou te vea e: “E rave rahi feia maˈi tei patoi i te mau pâmuraa toto, o tei faahepohia ia taui i te fare maˈi, te titauhia nei râ i te mau pu maimiraa i te pae rapaauraa i te hoê tauiraa ia faatura ratou i te hinaaro o te taata maˈi. Te fariiraa maramarama, feruri-maitai-hia (oia hoi te fanaˈoraa te hoê taata maˈi i te mau haamaramaramaraa atoa no nia i te mau mea e titauhia ra e te fariiraa o ˈna i te ravea rapaauraa) o te ohipa ïa e titauhia, e no nia atoa i te mau pâmuraa toto. E tia ia fariihia e e ere teie vea no te tahi noa haapaoraa.”

Mai ia Cheng Sae Joo, e rave rahi o tei maiti i te hoê ravea rapaauraa ma te ore e faaohipa i te toto, tei titauhia ia taui i te mau fare maˈi. Noa ˈtu râ, te haafaufaa nei ratou i te mau tutavaraa a te mau taote tei ineine no te faatura i te mau tiaraa o ta ratou mau taata maˈi.

Ua haamauhia te Pu haamaramaramaraa i te pae rapaauraa e te mau Ite no Iehova i roto i te mau amaa a te Taiete Watch Tower no te imi i te tauturu a te mau taote o te faatura ra i ta ratou mau tiaturiraa. Ati aˈe te ao nei, te turu nei te SIH i te mau taairaa amui e te mau fare maˈi, te mau taote, te mau tuati, te mau auvaha ture, e te mau haava.