Te titau ra tatou i te mau hoa mau

TE TAUAPARAU ra o Jenny e o Sue ma te oraora. Te paho nei raua i te ata, te anaana ra to raua mata—te faaite ra to raua huru atoa i te anaanatae rahi i ta te tahi atu hoa e parau ra. Noa ˈtu to raua ihotumu taa ê, papu maitai e hoê â to raua mau pu anaanatae e rave rahi e te faatura rahi nei raua i te tahi e te tahi.

I te tahi atu vahi, te ohipa amui ra o Eric e o Dennis i nia i te hoê opuaraa, te hoê o te mau opuaraa e rave rahi o ta raua i rave i te roaraa o te mau matahiti. Mea tapitapi ore raua, e te ata ohie nei raua. A tauaparau ai raua no nia i te mau tumu parau faufaa roa, e horoa raua i to raua mau manaˈo ma te haavare ore. Te faatura nei raua i te tahi e te tahi. Mai ia Jenny e o Sue, e mau hoa mau o Eric e o Dennis.

Te haaputapû ra paha teie mau faataaraa i to outou mafatu, ma te haaferuri ia outou no nia i to outou iho mau hoa. I te tahi aˈe pae, te faahinaaro atoa ra paha outou i teie huru auhoaraa. E nehenehe atoa e noaa ia outou i te reira!

No te aha tatou e titau ai i te mau hoa mau

Mea faufaa te auhoaraa papu no to tatou vai-maitai-raa i te pae feruriraa e i te pae tino. Ia moemoe anaˈe râ tatou, e ere ïa te auraa e te vai ra te tahi hapa i nia ia tatou. Te parau nei vetahi feia maimi e ua riro te moemoe ei hiaai, ei tapao natura e te titau ra tatou i te tahi amuimuiraa. Noa ˈtu râ, mai te maa o te faaiti aore ra o te faaore roa i te poiâ, e nehenehe te auhoaraa maitai e faaiti i te moemoe aore ra e faaore roa atoa i te reira. Hau atu, e nehenehe mau e itea i te mau hoa maitatai o te haafaufaa ia tatou.

Ua poietehia te mau taata e te hiaai i te amuimuiraa. (Genese 2:18) Te parau ra te Bibilia e te hoê hoa mau, aore ra te hoê taua, “i fanau mai râ . . . no te anotau e ati ai ra.” (Maseli 17:17) No reira, ia nehenehe te mau hoa mau e ani i te tauturu i te tahi e te tahi ia titau-anaˈe-hia e tia ˈi. Ua hau atu â râ te auhoaraa i te fanaˈo-noa-raa i te hoê taata i nia oia e fariu atu ai aore ra i te riro-noa-raa ei taua no te ohipa aore ra no te hauti. E haafaufaa te mau hoa maitatai i te mau huru maitatai roa ˈˈe i roto i te tahi e te tahi. Te parau ra te Maseli 27:17 e: “Na te auri i faaanaana i te auri; e na te taata i faaanaana i te mata o to ˈna taua.” Mai te hoê tuhaa auri e faaohipahia no te faaanaana i te hoê reta e hoê â huru auri, e nehenehe te hoê hoa e faaanaana i te huru i te pae feruriraa e i te pae varua o te tahi atu taata. Ia faaahoaho te mau inoinoraa ia tatou, e nehenehe mau â te tâuˈa-maitai-raa mai te hoê hoa e te faaitoitoraa a te mau Papai e haamaitai.

I roto i te Bibilia, ua taaihia te auhoaraa e te here, te matau-maitai-raa, te tapea-huna-raa i te parau, e te amuimuiraa. E tupu paha te auhoaraa i rotopu i te feia tapiri, te mau hoa rave ohipa, e te vai atu â. Te faariro atoa râ vetahi pae i te tahi mau fetii mai to ratou mau hoa piri roa ˈˈe. No te rahiraa râ i teie mahana, mea fifi roa ia itea e ia tapea noa i te mau hoa mau. No te aha? E nehenehe anei outou e fanaˈo i te auhoaraa mau e o te vai maoro?