Mau uiraa a te feia taio

Te parau ra te Ephesia 3:14, 15 e no te Atua “no ˈna hoi te iˈoa i mairihia i te fetii atoa, to te raˈi, e to te ao atoa nei.” Te vai ra anei te mau utuafare fetii i nia i te raˈi, e te horoahia ra anei te iˈoa o te utuafare taata tataitahi e Iehova?

Aita e utuafare i nia i te raˈi mai te vai ra i nia i te fenua nei, oia hoi te hoê metua tane, te hoê metua vahine, e te mau tamarii—e fetii anaˈe ratou i te pae tino. (Luka 24:39; Korinetia 1, 15:50) Ua faataa maitai o Iesu e eita te mau melahi e faaipoipo, e aita roa ˈtu e haapapuraa e e huaaihia ratou.—Mataio 22:30.

Teie nei râ, te faataipe ra te Bibilia i te Atua ra o Iehova mai te mea ra e ua faaipoipohia i ta ˈna faanahonahoraa i nia i te raˈi; ua faaipoipohia o ˈna i te pae varua. (Isaia 54:5) E huaai ta teie faanahonahoraa i nia i te raˈi, mai te mau melahi. (Ioba 1:6; 2:1; 38:4-7) I roto i teie auraa, te vai ra ïa te hoê utuafare faahiahia mau i te pae varua i nia i te raˈi.

Hau atu, te haamauhia ra te hoê utuafare taipe apî i nia i te raˈi, o Iesu Mesia e ta ˈna vahine faaipoipo te amuiraa o te mau 144 000. (Korinetia 2, 11:2) Ua pohe aˈena te rahiraa o teie feia faatavaihia, no te ora i nia i te raˈi. Te ora noa ra vetahi i nia i te fenua nei. Te tiatonu maite ra te taatoaraa i to ratou mata i nia i te “faaipoiporaa a te Arenio.” Te faaau ra te Bibilia i taua faaipoiporaa ra i te taime o te ati rahi e fatata maira—te haamouraa o Babulonia Rahi, e i muri iho te haamouraa o te toea o te faanahoraa a Satani.—Apokalupo 18:2-5; 19:2, 7, 11-21; Mataio 24:21.

No nia i te mau utuafare i nia i te fenua nei, aita te aposetolo Paulo e parau ra i roto i te Ephesia 3:15 e na Iehova roa e horoa i te iˈoa o te mau pǔpǔ fetii atoa. Te manaˈo nei râ o Paulo i te mau opu fetii aano o te faaherehere i te hoê iˈoa. Te horoa ra te Iosua 7:16-19 i te hoê hiˈoraa. Te haamahora ra Iehova i ǒ nei i te hara a Akana. Na mua roa, ua tuuhia te hapa i nia aore ra ua taotiahia i te opu Iuda. I muri iho ua taotiahia te reira i te utuafare o te mau ati Zera. I te pae hopea, ua faaite-tahaa-hia te utuafare o Akana. Ua faarirohia, aore ra ua faahitihia, o Akana e tae noa ˈtu i ta ˈna vahine e ta ˈna mau tamarii ei tuhaa no te utuafare (aore ra fetii) o Zabadi, te metua tane tupuna o Akana. I to ˈna aˈe pae, o teie utuafare te pǔpǔ aano o tei faaherehere i te iˈoa o to ratou tupuna ra o Zera.

I rotopu i te mau taata no Hebera, mea faufaa roa taua mau opu fetii ra, ua faahitihia te rahiraa i roto i te Bibilia. Ua turu te Atua i to ratou faaherehereraa na roto i te raveraa i te faanahoraa, ia titau-anaˈe-hia, ia mairihia te feia aiˈa i te iˈoa o te utuafare na roto i te faaipoiporaa e te fetii, aore ra e te fetii hoovai.—Genese 38:8, 9; Deuteronomi 25:5, 6.

Te tahi atu hiˈoraa o taua mau utuafare rarahi aore ra aano ra, a hiˈo na ia Iesu ei tamaiti na Davida. Ma te papu maitai e ere oia i te huaai piri roa a te Arii ra o Davida, aita oia i fanauhia mai e tae roa ˈtu i te mau senekele i muri aˈe i te poheraa o Davida. Te hoê râ tapao e itehia ˈi te Mesia no roto mai oia i te utuafare o Davida, mai ta te mau ati Iuda i te pae rahi i ite. (Mataio 22:42) No roto o Iesu i te opu fetii o Davida na roto i to ˈna metua vahine e to ˈna metua tane faaamu.—Mataio 1:1; Luka 2:4.

Mea nafea râ te iˈoa o teie mau utuafare i te mairiraahia e Iehova? I te tupuraa mau mea varavara roa—mai ta te hiˈoraa o Aberahama e o Isaaka e faaite ra—i to Iehova horoaraa i te iˈoa o te upoo o te utuafare. (Genese 17:5, 19) E tupuraa taa ê teie. I te rahiraa o te taime, aita Iehova e horoa ra i te iˈoa no te utuafare tataitahi e o ta te mau tamarii e fanaˈo atu.

O Iehova râ te tumu o te tahoêraa utuafare fetii i to ˈna faaueraa ia Adamu raua o Eva ia ‘fanau e ia rahi roa e ia faaî i te fenua nei.’ (Genese 1:28) E ua faatia o Iehova i nau taata hara ra o Adamu raua o Eva ia fanau raua, ia faataehia te opuaraa i te mau utuafare taata atoa. (Genese 5:3) Hau atu i te hoê auraa, e nehenehe te Atua e piihia te Tumu o te mau iˈoa o te utuafare.

Aita te rahiraa o te mau ihotumu i teie nei mahana e tiaturi faahou ra i te faufaaraa ia tapea noa i te mau iˈoa o te utuafare i te roaraa o te mau ui. I roto râ i te mau fenua atoa te haamauruuru nei te mau kerisetiano ia Iehova no te faanahoraa utuafare e te faahanahana ra ratou ia ˈna na roto i te rave-puai-raa i te ohipa ia manuïa to ratou tahoêraa utuafare fetii.