Hoê ravea patoiraa e au i te ture
I TE avaˈe eperera o te matahiti 1995, ua upootia mai te hoê haavaraa faufaa mau. Ua haamata te reira i te 28 no tenuare 1992, i te fariiraahia o Luz Nereida Acevedo Quiles, 24, i te Fare maˈi no El Buen Pastor i Puerto Rico no te tahi rapaauraa faahepo-ore-hia. I to ˈna ôraa ˈtu, ua faataa o ˈna ma te parau roa ˈtu e ma te papai e ei Ite no Iehova, eita o ˈna e farii i te hoê pâmuraa toto. (Ohipa 15:28, 29) Ua taa maitai te feia rapaau o te fare maˈi, e tae noa ˈtu te taote o tei haapao ia ˈna, i to ˈna mau hinaaro.
E piti mahana i muri aˈe i ta ˈna tâpûraa, ua pau rahi te toto o Luz e ua roohia oia i te maˈi anemia uˈana no to ˈna tapahiraa. Ua tiaturi te taote haapao, o José Rodríguez Rodríguez, e te ravea otahi no te tauturu ia ˈna o te pâmuraa toto ïa. No reira, ma te ore e faaite aore ra e ani i te parau faatia a Luz, ua titau o ˈna i te hoê faaueraa a te tiribuna ia pâmuhia o Luz i te toto.
Noa ˈtu e ua ite maitai o Luz i te haapaoraa e ua nehenehe o ˈna iho e paraparau, ua onoono te taote ra o Rodríguez Rodríguez e no te mea e mea ru, aita e taime no te tiai i te parau faatia a te hoê taata. Ua tarima te auvaha paruru mataeinaa, o Eduardo Pérez Soto i te aniraa, e ua horoa te haava mataeinaa, te taata Hanahana ra o Ángel Luis Rodríguez Ramos, i te hoê faaueraa a te tiribuna no te pâmu i te toto.
No reira, i te 31 no tenuare 1992, ua afaihia o Luz i te piha tâpûraa, i reira oia i te pâmuraahia i te toto. I to ˈna pâmuraahia, ua faaroo o ˈna i to te tahi mau rave ohipa o te fare maˈi ataraa. Ua tamaˈi vetahi ia ˈna, ma te parau atu e no to ˈna iho maitai te ohipa e ravehia ra. Ua rave o ˈna i te mau tutavaraa atoa no te patoi atu—ma te faufaa ore râ. I te hopea o te mahana, ua pâmuhia o Luz e e maha farii toto.
E ere te tupuraa o Luz i te hiˈoraa matamua e te hopea no nia i te mau pâmuraa toto e te mau Ite no Iehova i Puerto Rico. Na mua ˈˈe i to ˈna tupuraa, ua horoahia e 15 faaueraa a te tiribuna no te mau pâmuraa toto o tei patoi i te mau hinaaro a te mau Ite no Iehova paari, e e rave rahi atu â o tei horoahia mai reira mai â. Ma te peapea, i roto i te hoê tupuraa ua horoahia te hoê faaueraa a te tiribuna, e ua faahepohia te hoê pâmuraa toto i nia i te hoê vahine maˈi aita hoi o ˈna i ite i te haapaoraa.
Aita râ te aroraa a Luz i faaea noa i roto i te piha tâpûraa. I te avaˈe atopa 1993 ua faatupuhia te hoê haavaraa ei patoiraa i te Hau no Puerto Rico. Ua faaroohia te haavaraa e te Tiribuna Teitei, e i te 18 no eperera 1995, ua ravehia te hoê faaotiraa o tei turu ia ˈna. Ua faataa te tiribuna e te faaueraa e pâmu i te toto “aita ïa e tuati ra i te ture e ua tatara oia i te tiamâraa o te taata patoi ia faaohipa i ta ˈna haapaoraa, to ˈna iho oraraa e to ˈna iho manaˈo papu ma te titau ore i te ture.”
Mea faufaa roa teie faaotiraa, i te mea e a tahi ra te hoê tiribuna no Puerto Rico e ohipa ˈi no te turu i te mau Ite no Iehova no nia i te pâmuraa toto. Ua faatupu te haavaraa i te hoê ohipa faahiahia mau. Ua faatupuhia te hoê apooraa i te pae haapurororaa parau apî, ua tae mai atoa te mau papai vea rahi no te neneiraa, te radio, e te afata teata.
I taua noâ po ra ua haapuroro te hoê porotarama radio i te hoê uiuiraa manaˈo e te hoê o te mau auvaha paruru a Luz. Ua titauhia te feia e faaroo ra ia taniuniu e ia tuu i te mau uiraa. Ua taniuniu e rave rahi mau taote e mau auvaha ture e ua faaite ratou i to ratou turu-maite-raa i te tupuraa. Ua parau te hoê taata tei taniuniu e: “Aita te ite aivanaa i haapapu e e faaora te pâmuraa toto i te mau taata, e mea hape mau ia manaˈo mai te reira.” Ua faataa atoa o ˈna e: “Fatata roa, e faatiahia te mau pâmuraa toto i roto i te aamu mai te hoê o te mau ohipa maamaa e o te mau hape rahi roa ˈˈe o te rapaauraa maˈi o teie nei tau.”
Ua taniuniu te hoê orometua haapii i te ture faatura-rahi-hia i muri iho i te amaa a te Taiete Watch Tower e ua faaite oia i to ˈna oaoa rahi mai ta ˈna e faahiti ra “te hoê upootiaraa tuiroo.” Ua parau faahou o ˈna e ua turu te faaotiraa a te tiribuna i te mau tiaraa i te pae o te ture, eiaha noa o te mau Ite no Iehova, o te huiraatira atoa râ no Puerto Rico.