A haamori ia Iehova ma te rima viivii ore

MA TE faauruahia, ua himene te papai salamo ra o Davida e: “E horoi au i o ˈu pue rima i te hapa ore, a haaati atu ai au i to fata, e Iehova!”—Salamo 26:6.

I to ˈna faahitiraa i teie mau parau, ua faahaamanaˈo paha o Davida i te peu a te mau tahuˈa ati Levi no Iseraela ia paiuma ratou i nia i te fata e ia tuu ratou i ta ratou mau tusia i nia i te auahi. Na mua ˈˈe râ ratou a faatupu ai i teie ohipa haamoriraa, e titauhia i te mau tahuˈa ia horoi i to ratou rima e to ratou avae. E ere teie i te hoê tuhaa faufaa ore. Ia ore anaˈe e ravehia i teie taahiraa avae faufaa mau e nehenehe te hoê tahuˈa e haapohehia!—Exodo 30:18-21.

Te horoiraa taipe o te viivii ore ïa i te pae varua e i te pae morare. (Isaia 1:16; Ephesia 5:26) Te hinaaro ra o Iehova e ia ‘haaati tatou i ta ˈna fata’ i teie nei mahana ma te tavini ia ˈna. Te titau maira râ o ˈna e ia rave tatou i te reira ma te rima viivii ore—mai ta Davida i rave, ua horoihia to ˈna nau rima ma “te hapa ore.” E ere i te hoê titauraa faufaa ore, i te mea e e ore te feia ohipa viivii e parahi i te Basileia o te Atua. (Galatia 5:19-21) Aita te hoê oraraa i roto i te mau ohipa paieti e faatia ra i te rave i te haerea tia ore i te pae morare. No reira ua papai te aposetolo Paulo e: “Te moto nei râ vau i tau tino ia vi; o te riro noa ˈtu hoi au o tei aˈo ia vetahi ê ra, ei taata ite-ore-hia mai.”—Korinetia 1, 9:27.

E tia i te feia e imi ra i te farii maitai o te Atua e te oaoa mau ia tavini ia Iehova ma te rima viivii ore. Mai ia Davida, te haere nei ratou “ma te haapao maitai o te [mafatu], e ma te parau-tia.”—Te mau arii 1, 9:4.