Te faatia ra te feia poro i te Basileia

‘E rave i te ohipa a te poro evanelia’

EAHA te auraa o te riroraa mai ei poro evanelia? Ua hurihia te taˈo na roto i te parau heleni ra eu·ag·ge·li·stesʹ, tei taai-piri-hia e te taˈo eu·ag·geʹli·on, oia hoi “parau apî maitai.” No reira, e taata poro, aore taata afai parau, i te parau apî maitai te hoê poro evanelia.

E feia poro evanelia anaˈe te mau kerisetiano mau atoa no te mea te poro ra ratou i te parau apî maitai o te Basileia o te Atua. Ma te tano, ua aˈo te aposetolo Paulo ia Timoteo e ia ‘rave i te ohipa a te poro evanelia.’ Ua tia ia Timoteo ia haapao maitai i taua ohipa ra. Ua aˈo atu o Paulo ia ˈna e ia ‘faaitoito i te mau mea atoa’ e ia ‘rave faahope roa i ta ˈna taviniraa.’—Timoteo 2, 4:5.

Ei feia poro evanelia e haapao maitai atoa tatou i ta tatou taviniraa e ‘e faaitoito tatou i ta tatou mau mea atoa,’ aore ra e ara noa tatou no te faaite i te parau apî maitai i te mau taime atoa. E rave rahi ïa tei ite ia Iehova e ta ˈna mau parau tǎpǔ i muri aˈe i to ratou farereiraahia e te mau Ite no Iehova i roto i te hoê faaiteraa faanaho-ore-hia. O te ohipa ïa i tupu i nia ia Seymore, hoê taata no Barbades.

E orometua haapii o Seymore i roto i te hoê fare haapiiraa a te hau. E taata poro evanelia o Charles, hoê orometua haapii afa taime i roto i taua fare haapiiraa ra e e Ite no Iehova oia. E tavini ma te taime taatoa, aore ra pionie, oia e ua faaohipa i te mau taime atoa no te faaite i te parau apî maitai ia vetahi ê. Mea na roto i te faaiteraa faanaho-ore-hia a Charles to Seymore faarooraa i te poroi o te Basileia no te taime matamua.

Aita i maoro ua papu atoa ia Seymore e e faaite oia i te mau parau mau o te Bibilia i te mau taime atoa e nehenehe ai. No reira ua haamata oia i te tauaparau ma te faanaho-ore-hia e te mau taata o ta ˈna vahi raveraa ohipa, i ta ˈna mau tamarii haere haapiiraa iho â râ. Noa ˈtu e i roto i te tahi mau fenua eita e tia ia haapii no nia i te haapaoraa i te mau fare haapiiraa a te hau, ua faauehia i teie taata ia haapii no nia i te mau faufaa i te pae haapaoraa e i te pae morare. I teie nei râ ua monohia te mau manaˈo tahito o Seymore no nia i te reira e to ˈna ite apî no nia i te Bibilia. I te mau tau faafaaearaa haapiiraa, ua tauaparau oia e ta ˈna mau tamarii haere haapiiraa no nia i te parau tǎpǔ a te Atua o te hoê ao apî e te tiaturiraa o te ora mure ore.

Mea nafea te mau tamarii i te ohiparaa? Ua faaite e rave rahi i te anaanatae mau i roto i te parau apî maitai o te Basileia o Iehova. I te taime au, ua haamata o Seymore i te faatere i te mau haapiiraa bibilia e 13 o ta ˈna mau tamarii haere haapiiraa. No te rahi o to ratou anaanatae ua faanaho ratou e ia haapii ratou i te Bibilia e piti taime i te hebedoma. Ua haamata ˈtoa te rahiraa o ratou i te haere i te mau putuputuraa kerisetiano i te Piha no te Basileia a te mau Ite no Iehova no taua vahi ra. Tae roa mai i teie nei mahana ua pûpû e iva o ratou ia ratou e ua bapetizohia ei Ite no Iehova. E no Seymore, te faatupu ra oia i teie nei i ta ˈna taviniraa ma te taatoa na roto i te taviniraa ei pionie tamau e ei matahiapo i roto i te hoê o te mau amuiraa a te mau Ite no Iehova i Barbades.

Teie noa te hoê o te mau hiˈoraa e mea nafea te mau Ite no Iehova na te ao atoa nei ‘i te raveraa i te ohipa poro evanelia,’ na roto i te horoaraa i te faaiteraa faanaho-ore-hia. Te pee nei ratou i te aˈoraa a te Bibilia i roto i te Kolosa 4:5, 6, e na ô ra e: “Ei haerea haapao maitai to outou ia ratou i to rapae au ra, ma te faaherehere hoi i te taime. Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.”