Mau uiraa a te feia taio

Eaha ta te pǐpǐ ra o Iakobo i hinaaro e faataa i to ˈna parauraa e: “E au mau taeae e, eiaha ia rahi hua i te faaorometua ia outou iho, ua itea hoi e, o tatou te faahapa-rahi-hia”?—Iakobo 3:1.

Aita roa ˈtu o Iakobo e haaparuparu ra i te mau kerisetiano ia haapii i te parau mau ia vetahi ê. I roto i te Mataio 28:19, 20, ua faaue o Iesu i ta ˈna mau pǐpǐ e “e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta ˈu i parau atu ia outou na.” No reira, e tia i te mau kerisetiano atoa ia riro ei feia haapii. Ua aˈo te aposetolo Paulo i te mau kerisetiano no Hebera no te mea aita ratou i riro atura ei feia haapii. Ua papai oia e: “Ahiri hoi mai teie nei ua riro outou ei orometua ua tia ïa i te maoro, e tena na, ia haapii-faahou-hia outou i te â o te parau a te Atua e tia ˈi.”—Hebera 5:12.

Eaha ïa ta Iakobo e hinaaro ra e parau? Te faahiti ra o ˈna no te feia o tei tufahia te tahi mau hopoia taa ê no te haapii i roto i te amuiraa. I roto i te Ephesia 4:11, te taio ra tatou e: “Ua haapao oia [Iesu Mesia, te Upoo o te amuiraa] i e tahi pae ei aposetolo; e te tahi pae ei peropheta; e te tahi pae ei haapii evanelia; e te tahi pae ei tiai e ei orometua.” Ua haamauhia te tahi mau hopoia taa ê no te haapii i roto i te mau amuiraa o te senekele matamua mai teie atoa mahana. Ei hiˈoraa, te faahohoˈa ra te Tino Aratai i “te tavini haapao maitai e te paari” e e hopoia taa ê ta ˈna no te haapao i te haapiiraa e horoahia i roto i te mau amuiraa na te ao nei. (Mataio 24:45) E mau hopoia taa ê atoa te vai ra i te mau tiaau ratere e i te mau matahiapo o te amuiraa no te haapii.

Te parau ra anei o Iakobo i te mau kerisetiano aravihi e eita e tia ia ratou ia farii i te tiaraa taata haapii no te mǎtaˈu i te haavaraa teiaha aˈe a te Atua? Aita roa ˈtu. Ua riro mau â te tiaraa matahiapo ei haamaitairaa taa ê rahi, mai tei faataahia i roto i te Timoteo 1, 3:1, o te na ô ra e: “Ia hinaaro uˈana te hoê taata i te toroa episekopo ra, ua hinaaro oia i te ohipa maitai.” Hoê o te mau titauraa no te nominoraahia ei matahiapo o te amuiraa oia ïa ia “au hoi [te hoê taata] ia haapii.” (Timoteo 1, 3:2) Aita o Iakobo e faahapa ra i te mau parau faauruahia a Paulo.

Tera râ, e au ra e i te senekele matamua o to tatou nei tau, ua faariro vetahi ia ratou iho ei feia haapii, aita hoi ratou i aravihi e i nominohia. Ua manaˈo atoa ratou e te vai ra te tahi tiaraa teitei i roto i taua tuhaa ra, e ua hinaaro ratou i te hanahana. (A faaau e te Mareko 12:38-40; Timoteo 1, 5:17.) Ua faahiti te aposetolo Ioane ia Dioterephe, ‘o tei au i te parahiraa matamua, aita râ i farii i te tahi aˈe mea no ǒ mai ia Ioane ra ma te faatura.’ (Ioane 3, 9) Te faahiti ra te Timoteo hoê 1:7 i te tahi mau taata o tei “hinaaro e ei haapii ture ratou; aita râ i ite i ta ratou iho e parau ra, e te mau mea i mârôhia e ratou ra.” E tano iho â râ te mau parau a Iakobo 3:1 i nia i te mau tane o te hinaaro nei e riro ei taata haapii, turaihia iho â râ e te hoê hinaaro ino. E nehenehe teie mau taata e faaino roa i te nǎnǎ e e roohia ratou i te hoê haavaraa teiaha aˈe.—Roma 2:17-21; 14:12.

Ua riro atoa te Iakobo 3:1 ei faahaamanaˈoraa maitai no te feia o tei aravihi e o te tavini ra ei taata haapii. I te mea e ua tufa-rahi-hia na ratou, e titau-rahi-hia ia ratou. (Luka 12:48) Ua parau o Iesu e: “E e haavahia te taata i te mau parau faufaa ore atoa ta ratou e parau ra ia tae i te mahana haavaraa.” (Mataio 12:36) E tano iho â râ te reira i nia i te feia e mana rahi ta ratou mau parau, oia hoi te mau matahiapo nominohia.

E faahapahia te mau matahiapo no ta ratou huru raveraa i te mau mamoe a Iehova. (Hebera 13:17) E ohipa ta ratou mau parau i nia i te mau oraraa. No reira, e tia i te hoê matahiapo ia ara maite e ia ore oia e horoa i to ˈna iho mau manaˈo aore ra e hamani ino i te mau mamoe mai ta te mau Pharisea i rave na. E tia ia ˈna ia tutava no te faaite i te hoê â huru here hohonu i faaitehia e Iesu. I roto i te mau huru haapiiraa atoa, e ia tuatapapahia iho â râ te mau ohipa aˈoraa, e tia i te hoê matahiapo ia faito i ta ˈna mau parau, ma te faahiti ore i te mau parau teimaha aore ra i to ˈna iho mau manaˈo. Na roto i to ˈna turuiraa ˈtu i nia ia Iehova, i nia i ta ˈna Parau, e i ta ˈna mau aratairaa na roto i ta ˈna faanahonahoraa, e fanaˈo te tiai mamoe i te haamaitairaa rahi no ǒ mai i te Atua ra, eiaha râ te ‘haavaraa teiaha aˈe.’