Hoê peu tutuu aita e auraa tia?

UA FAATUPUHIA te oroa moˈa o te faˈiraa hara e te mau katolika e rave rahi senekele te maoro. Tera râ, ua riro te reira ei peu matauhia faufaa ore no te rahiraa. Ma te feruri i to ˈna apîraa, te parau ra te hoê taata rahi o te fare haapiiraa tuarua, o Bob e: “I to ˈu taurearearaa, aita vau i haafaufaa aˈe i te reira.” No te aha? Ia au i to ˈna manaˈo, ua riro te faˈiraa hara ei peu tutuu aita e auraa tia. Te faataa ra o ˈna e: “E au te faˈiraa hara i te afairaa i ta outou mau afata atoa tei î i te hara i te mutoi otia fenua ra i te tauraa manureva. E ani o ˈna ia outou i te tahi mau uiraa no nia i ta outou mau hara e i muri iho e vaiiho o ˈna ia outou ia haere i muri aˈe i to outou aufauraa i te tahi mea no te mau tauihaa moni roa o ta outou i hoo i te roaraa o to outou tere.”

Oia atoa, te faataa ra o Frank Wessling, ma te papai i roto i te U.S. Catholic, i te oroa faˈiraa hara ei “aratai faaohie-roa-hia e te rave-maine-hia, o te haamata e te faaoreraa i te mau hara matauhia na roto i te pure tamau-aau-hia o te tatarahaparaa e o te hope e te peu tutuu faaiteraa i te tatarahapa.” Eaha ta Wessling faaotiraa? “Te tiaturi papu nei au e mea maitai te Faˈiraa hara no te nephe,” ta ˈna e parau ra. “Ua riro râ te huru raveraa a te mau katolika ei fifi.”

Te faataa ra te Bibilia i te faˈiraa hara ma te taa ê roa. Te mea faufaa roa ˈˈe o te faˈiraa ïa i te hara i mua i te Atua. (Salamo 32:1-5) E ua papai te pǐpǐ kerisetiano ra o Iakobo e: “Te pohe ra anei te hoê o outou i te maˈi? e tii oia i te mau peresibutero o te ekalesia ra, e na ratou e pure ia ˈna, ma te faatahinu ia ˈna i te monoˈi i te iˈoa o [Iehova] ra. E faˈi i ta outou mau hapa, te tahi i te tahi, e pure hoi te tahi i te tahi, ia faaorahia outou.”—Iakobo 5:14, 16.

E nehenehe te hoê kerisetiano o tei faateimahahia e te hara e tii i te mau tiaau o te amuiraa, o te nehenehe e horoa ˈtu i te aˈoraa ohie no roto mai i te Bibilia no te tauturu i te taata rave hara ia faarue i to ˈna haerea ino. E nehenehe te mau tiaau e horoa i te faaitoitoraa tano ia hiˈopoa ratou i te haereraa i mua o te hoê taata tei paruparu i te pae varua. Auê ïa taa-ê-raa e te peu tutuu o te faˈiraa hara faatupuhia e te mau ekalesia i teie nei mahana! Haapaarihia e te tauturu a te mau matahiapo o te amuiraa, e nehenehe te feia rave hara i tatarahapa e fanaˈo i te tamǎrûraa o ta Davida i fanaˈo, mai ta ˈna i faaite i roto i te hoê salamo: “E maoro aˈera, ua faˈi atura vau i tau hara ia oe; e aore au i huna i to ˈu nei piˈo: i na ô aˈera hoi au e, E faˈi au i tau hara ia Iehova ra; e ua faaore mai oe i te ino o taua hara na ˈu ra.”—Salamo 32:5.