Te faatere ra anei te Atua i te ao nei?

E MAHANA sabati poipoi teie. E tia e rave rahi mau taata i nia, e oomo i te ahu, e tamaa, e e haavitiviti ratou no te haere i te pureraa. I reira te faaroo nei ratou i te hoê oreroraa parau e mea nafea te Atua e faatere ai ma te mana rahi i nia i te fenua, aita te tahi atu mana faatere i aifaito ia ˈna. Te haapiihia ra ratou e te tapitapi hohonu ra oia no nia i te mau taata. Te faahiti-atoa-hia ra i te parau no Iesu Mesia. Te faaroo nei ratou e o ˈna te Arii o te mau arii, i mua ia ˈna te mau taata atoa e tuturi ai no te auraro atu.

Ia tapae ratou i te fare mai te pureraa mai, e pata teie nei mau taata i te pitopito o te afata teata e e hiˈo atu ai i te mau parau apî. I teie nei te faaroo nei ratou i te parau o te oˈe, te taparahiraa taata, te rave-hua-raa i te raau taero, te veve. E te ite nei ratou i te mau hohoˈa haaputapû mau no nia i te maˈi e te pohe.

E haamata teie mau taata i te aniani no nia i te mau mea ta ratou i faaroo i te fare pureraa e no nia iho â râ i te mau ohipa o tei ore i faataahia aˈenei i reira. Ahiri e e Atua here e te puai hope oia, no te aha te mau ohipa ino mau e tupu ai? E eaha ïa no Iesu Mesia? Papu maitai, e rave rahi taata o te ore e auraro nei ia ˈna.

[Hohoˈa i te api 3]

Mai te peu e te faatere ra te Atua i te ao nei, no te aha e itehia ˈi te mauiui e te arepurepu?

[Faaiteraa i te fatu o te hohoˈa i te api 2]

Api matamua: Hohoˈa a te NASA