Mau uiraa a te feia taio
Ua hiˈo anei te Atua i te huru o te taata i to ˈna maitiraa i te mau taata no te tino aratai matamua hoê â anei iri e hoê â anei aiˈa to ratou—e ati Iuda anaˈe ratou paatoa?
Aita, papu maitai e e ere roa ˈtu ïa to ˈna huru. E ati Iuda anaˈe te feia ta Iesu i pii matamua ei mau pǐpǐ na ˈna. I muri iho, i te Penetekose o te matahiti 33 o to tatou nei tau, o te mau ati Iuda e te feia i farii i te haapaoraa ati Iuda tei peritomehia, te feia matamua o tei faatavaihia e te varua moˈa e o tei faaî i te mau titauraa no te faatere e te Mesia i nia i te raˈi. I muri aˈe noa to te mau ati Samaria e te mau Etene peritome-ore-hia tei taui i te faaroo faaôraahia i roto. No reira, te taahia ra e e ati Iuda anaˈe, ‘e mau aposetolo e e mau matahiapo no Ierusalema,’ te tino aratai i taua tau ra, mai tei faahitihia i roto i te Ohipa 15:2. Ua riro ratou ei mau taata e ite hohonu to ratou no nia i te mau Papai e e feia e aravihi rahi to ratou i roto i te haamoriraa mau, e ua hau aˈe to ratou taime no te faaaravihi ia ratou ei mau matahiapo kerisetiano paari.—A faaau e te Roma 3:1, 2.
Mai te taime mai â i putuputu ai te tino aratai faahitihia i roto i te Ohipa pene 15, e rave rahi mau Etene o tei riro mai ei kerisetiano. Te vai ra te feia no Afirika, no Europa, e no te tahi atu mau vahi. Tera râ, aita e haapapuraa e ua amuihia ˈtu te hoê noa ˈˈe o taua mau Etene ra i roto i te tino aratai no te aratai mai te feia e ere i te ati Iuda i te kerisetianoraa. A riro ai taua mau kerisetiano Etene ra tei taui apî i te faaroo ei mau melo hoê â tiaraa e ‘te Iseraela a te Atua,’ ua faatura ratou i te tiaraa paari e te aravihi rahi aˈe o te mau kerisetiano ati Iuda, mai te mau aposetolo, te mau melo o te tino aratai i tahito ra. (Galatia 6:16) A tapao na i roto i te Ohipa 1:21, 22 i te faufaa rahi o taua tupuraa ra.—Hebera 2:3; Petero 2, 1:18; Ioane 1, 1:1-3.
E rave rahi senekele te maoro ua ohipa taa ê te Atua e te nunaa o Iseraela, no roto mai to Iesu maitiraa i ta ˈna mau aposetolo. E ere i te hoê hape aore ra i te hoê ohipa tia ore i te mea e aita e aposetolo no te mau fenua piihia i teie mahana e Marite Apatoa, Afirika aore ra te pae Hiti Hitia o te râ. I te taime au, e nehenehe te mau tane e te mau vahine no taua mau vahi ra e fanaˈo i te mau haamaitairaa taa ê rahi aˈe i te riro-noa-raa ei aposetolo i nia i te fenua, ei melo no te tino aratai o te senekele matamua, aore ra te tahi atu nominoraa i ropu i te nunaa a te Atua i teie nei mahana.—Galatia 3:27-29.
Ua turaihia te hoê aposetolo ia parau e “e ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Oia mau, no te taatoaraa te mau haamaitairaa o te hoo o te Mesia, ma te maiti ore i te huru o te taata. E e faaôhia te mau taata no te mau opu atoa e no te mau reo atoa e no te mau nunaa atoa i roto i te Basileia o te raˈi e i roto i te feia rahi roa o te ora e a muri noa ˈtu i nia i te fenua nei.
Te huru ê nei e rave rahi no nia i te iri, te reo, aore ra te aiˈa o te hoê taata. Ua faahohoˈahia te reira i roto i te Ohipa 6:1 no nia i te hoê tumu parau o tei faatupu i te ohumu i rotopu i te mau kerisetiano e paraparau ra i te reo Heleni e te feia e paraparau ra i te reo Hebera. Ua ora noa na paha tatou i roto aore ra ua faatupu na paha tatou i te tahi manaˈo huru ê no nia i te reo, te iri, te nunaa, aore ra te melo taati o te taata. I mua i taua tupuraa papu ra, mea maitai no tatou ia tutava ia arataihia to tatou mau manaˈo e to tatou mau haerea e te manaˈo o te Atua, oia hoi hoê â faito to te mau taata atoa i mua i to ˈna aro, noa ˈtu eaha to ˈna huru rapaeau. I to te Atua horoaraa i te mau titauraa no te mau matahiapo e te mau tavini tauturu, aita oia i faahiti i te huru o te iri e o te aiˈa. Aita, ua huti oia i te ara-maite-raa i nia i te mau aravihi i te pae varua o te feia e nehenehe e tavini. E tano ïa te reira no te mau matahiapo, te mau tiaau ratere, e te feia rave ohipa i te amaa i teie nei mahana, mai tei ite-atoa-hia na i roto i te tino aratai i te senekele matamua ra.