“Ua hau aˈe i te mau otia o te feruriraa tia”
“I TE mea e ua haamata te mau tamaˈi i roto i te feruriraa o te taata nei, e tia ˈtura ia faatiahia te mau patu faaetaeta no te hau i roto i te feruriraa o te taata nei.” (Haapueraa ture o te Faanahonahoraa a te mau Nunaa Amui i te pae Haapiiraa, Ite aivanaa, e Ihotumu) Ma teie faataaraa i roto i te feruriraa, i te matahiti 1993 ua tuatapapa hau atu i te 500 feia aravihi o tei haaputuputu i te hoê apooraa a te mau Nunaa Amui no nia i te faaoreraa i te mauhaa tamaˈi, i te tuhaa a te haapaoraa i roto i te faatiaraa i taua mau patu faaetaeta ra.
Ua peretiteni o Jonathan Granoff, tia no te Faufaa a te mau Auvaha ture no te Hau o te ao, i te apooraa. Ua tapao o ˈna e: “Ua hau aˈe te aano o te aroraa i te pae faaroo e i te pae o te mau pǔpǔ taata hoê â reo aore ra peu e itehia ra i teie nei mahana, i te mau otia o te haerea tura, peneiaˈe ua hau aˈe i te mau otia o te feruriraa tia.” Ua faahiti-papu-hia te mau parau a John Kenneth Galbraith i te roaraa o te apooraa: “Ua pohe te rahiraa o te mau taata i te iˈoa o te haapaoraa ia faaauhia i te taatoaraa o tei pohe i roto i te mau tamaˈi e te mau ati natura atoa.”
Ua parau te orometua haapii ra o Seshagiri Rao e: “E tia i te mau taote ia faaora eiaha râ ia haaparare i te mau maˈi. Eita e tia i te mau tutuu faaroo ia haaparare i te feii e te aroraa uˈana i te tahi e te tahi. E riro ratou ei mau puai no te faahau. I roto râ i te tupuraa mau, ua ohipa pinepine ratou e te ohipa noa nei â ratou ei mau puai no te faaamaha.”
Tau matahiti i teie nei, ua tatara te vea Catholic Herald no Lonedona e e nehenehe te hau e haamauhia “mai te peu e e rave amui te mau ekalesia no teie tau i te hoê faaotiraa no te faautua i te tamaˈi.” Tera râ, ua na ô faahou te vea e: “Ua ite matou e eita roa ˈtu te reira e tupu.” Ua parau te hoê paretenia katolika i te hoê taime e: “Auê te ao nei i te taa ê e ahiri e e tia tatou paatoa i nia i te hoê poipoi ma te faaotiraa papu e e ore e rave faahou i te mauhaa tamaˈi, . . . mai te mau Ite no Iehova!”
[Faaiteraa i te fatu o te hohoˈa i te api 32]
Tom Haley/Sipa Press