Te paiumaraa i te hoê mouˈa teitei aˈe i te mouˈa Himalaya

TE MOUˈA Himalaya! Eaha ta teie mau parau e faatupu ra i roto i to outou feruriraa? Te mǎtaˈu, te mau tupuai mouˈa e te mau mataˈi rahi puai mau? Te rurutaina o te teitei, te tiaraa i nia i te mouˈa teitei roa ˈˈe o te fenua? No te rahiraa o tatou, eita e nehenehe e paiuma i nia i te Mouˈa Everest, i nia i te mau Mouˈa Himalaya i te fenua Nepal. Teie râ, e rave rahi taata no te fenua Nepal teie e paiuma nei i te hoê mouˈa teitei aˈe i te mouˈa Himalaya! Na mua ˈˈe e faatia ˈi i taua mahana ra i te mouˈa rahi ra, e hiˈopoa rii tatou i te Basileia nainai e te nehenehe râ o te fenua Nepal.

Nepal—Te Basileia o te mouˈa

Mea otahi roa te Basileia o te fenua Nepal no te mea o te hoê ïa o te mau faatereraa hui arii e toe ra i roto i te ao nei e no te mea atoa e ere oia i te faatereraa a te nunaa, e faatereraa i te pae faaroo râ. O Nepal anaˈe te oire hindou i roto i te ao atoa nei. E mau hindou te rahiraa o to ˈna mau 20 mirioni huiraatira. E rave rahi râ nunaa huru rau i rotopu i to ˈna mau taata. Te feia e ora ra i te pae apatoerau o te tuhaa mouˈa e feia ïa no Tibet-Burma, area râ te feia i te mau vahi papu no apatoa, te rahiraa o te mau taata no te vahi Indo-Aryan ïa. O te Nepali te reo fariihia e te ture o te fenua e te reo tumu no te 60 i nia i te hanere o te mau taata. Te toea râ te paraparau nei hau atu i te 18 reo ěê.

E hohoˈa oeha to te fenua Nepal, e 880 kilometera mai te pae hitia o te râ e tae atu i te pae tooa o te râ e 200 kilometera mai te pae apatoerau e tae atu i te pae apatoa. Te vai ra i roto i te mouˈa Himalaya riaria mau, o te faatupu i te otia i te pae apatoerau, i te Mouˈa Everest, te tupuai mouˈa teitei roa ˈˈe o te ao nei e 8 848 metera, e e vau tupuai mouˈa taa ê tei hau atu i te 8 000 metera. I Nepal no ropu, te vai ra te mau mouˈa haehaa aˈe e te mau tairoto e te mau afaa. I te pae apatoa atea rii, i pihai iho i te fenua Inidia, te tarava ra te Tarai hotu mau, e tuhaa fenua matamua no te faaapu.

Kathmandu, te oire pu, e vai ra i te tuhaa ropu, e vahi maitai roa no te feia ratere. Te pûpû nei i te mau maurereraa na nia i te manureva i nia mai i te mau mouˈa haviti rahi mau, te mau tere i roto i te mau aua hautiraa, e e rave rahi mau vahi no te mataitai i taua fenua ra. I te tahi taime e piihia o Nepal e afaa o te mau atua no te mea e mana rahi to te haapaoraa i roto i te oraraa o to ˈna mau taata. O te haapaoraa atoa te tumu te tahi tau mirioni taata na te ao nei e haere ai e mataitai i te “mouˈa” teitei roa ˈˈe i te mouˈa Himalaya.

A 2 700 matahiti i teie nei, ua faauruahia te peropheta hebera ra o Isaia ia tohu e “i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa . . . E rave rahi te taata e haere ma te parau e, E haere mai, e haere tatou i nia i te mouˈa o Iehova . . . e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” (Isaia 2:2, 3) I ǒ nei ua faaauhia te haamoriraa viivii ore a Iehova, te Poiete e te Arii Mana hope o te ao atoa nei, i te hoê mouˈa, tei faateiteihia i nia i te huru haamoriraa atoa mai te mouˈa ra te huru. E tumu parau te reira e horoahia na te ao atoa nei no te tauturu i te mau taata e poiâ ra i te parau mau ia haapii i te mau eˈa o Iehova. Mea nafea teie ohipa i te haamataraa i te fenua Nepal?

Te mau haamataraa iti

Ua imi na te hoê faehau no te Nuu Beretane i te Piti o te Tamaˈi Rahi i te haapaoraa mau. Ua riro mai hoi to ˈna mau metua no te fenua Nepal e e haapaoraa hindou hoi ta raua ei mau katolika. A paari noa ˈi oia, ua ite oia i te maamaa o te haamoriraa idolo, ua patoi atu oia i te mau haapiiraa mai te po auahi, e ua haamata aˈera i te tuatapapa i te mau tiaturiraa a te mau ekalesia porotetani. Aita râ to ˈna hiaai i mahâ.

Ua haruhia oia e ua tapeahia e te mau Tapone i te fenua e piihia i teie nei Rangoon, Burma, ua pure teie faehau e e tia ia ˈna ia ora mai i te mau ohipa teimaha o te aua no te tamau â i ta ˈna maimiraa no nia i te haamoriraa mau. I muri iho, ua opua aˈera oia e horo ê i te feia e tapea ra ia ˈna e ua tauturuhia oia e te hoê orometua haapii e i roto i to ˈna fare oia i ite ai i te buka ra Where Are the Dead?, i papaihia e J. F. Rutherford. Ma te taa i te taˈiraa o te parau mau, ua farii aˈera oia ma te ore e haamarirau e haapii i to te mau Ite no Iehova farereiraa ia ˈna i Rangoon i te matahiti 1947. Tau avaˈe noa i muri iho, ua bapetizohia ihora oia, e aita i maoro i muri iho ua bapetizohia ta ˈna vahine apî. Ua opua aˈera raua e hoˈi i Inidia, ma te haere e ora i to raua oire tumu o Kalimpong, i te pae mouˈa apatoerau hitia o te râ. I reira ta raua na tamarii e piti i te fanauraahia e te haapiiraahia. I te avaˈe mati o te matahiti 1970, ua haere ratou e ora i Kathmandu.

Ua opani te Pǎpǎ ture no Nepal i te ohipa haaparareraa i te faaroo. E tuuhia i roto i te fare tapearaa e hitu matahiti i te taata e itehia e haaparare ra i te hoê faaroo ê, e te hoê taata o te apiti atu i taua faaroo ra e horoahia ïa e toru matahiti tapearaa e te tahi utua teimaha mau. No reira e tia ia ravehia i te ohipa pororaa ma te haapao maitai. Te taviniraa na te mau fare oia hoi te auraa te piiraa i te hoê fare, e i muri iho e haere atu i te tahi vahi e e tuô atu i reira. Ma te taa maitai, ua hauti mau te ohipa pororaa faanaho-ore-hia i te hoê tuhaa faufaa mau i roto i te haaparareraa i te parau apî maitai.

Ua tere mǎrû noa te mau haereraa i mua. E te hoê huiraatira e fatata e ahuru mirioni taata, e au ra e e faataupupu te ohipa i roto i te aua. Ua ueuehia te mau huero o te parau mau mai teie noa te huru, te mau utuafare e poro i te mau hoa, i te feia i matauhia, te mau paoti ohipa, e te mau hoa rave ohipa. Ua faatupu raua i te mau putuputuraa tamau i roto i to raua fare e ua titau i te feia e anaanatae ra ia apiti atu ia ratou ra. I te pae hopea, i te avaˈe mati 1974, i muri aˈe e maha matahiti tanuraa e te pîpîraa tamau, ua tupu mai te hotu matamua o te fenua Nepal—e te reira no roto ïa i te hoê pu manaˈo-ore-hia!

I to ˈna piiraa i te hoê fare, ua paraparau te taata poro i te hoê taata taoˈa rahi e papai parau no te hoê melo o te utuafare a te arii. “A paraparau atu i ta ˈu tamaiti,” ta te taata i parau atu. Ua farii te tamaiti i te hoê haapiiraa bibilia. Tau taime i muri iho, ua taui oia i ta ˈna ohipa, i te mea e te ohipa ra oia i roto i te hoê fare pereraa moni. Ua patoi aˈera to ˈna metua tane ia ˈna, e hindou haapao i ta ˈna faaroo. Teie nei râ, ua rave teie taurearea i te tiaraa papu no Iehova. Eaha ïa te faahopearaa? Ua faaea aˈera to ˈna metua tane i te patoi atu ia ˈna, e ua haamata te hoê pǔpǔ fetii piri roa i te farii i te parau mau o te Bibilia. Te tavini nei oia i teie nei mahana ei matahiapo i roto i te amuiraa kerisetiano.

No te vai itoito noa i te pae varua e no te haapao i te faaueraa a te mau Papai eiaha e faarue i te haaputuputuraa ratou paatoa, te faatupu nei te pǔpǔ iti no Kathmandu i te mau putuputuraa tamau i roto i te fare o te hoê taata. No te faaaano atu â râ, aita te mau taeae i nehenehe e faatupu i te mau haaputuputuraa rahi aˈe. Te feia e ravea to ratou no te ratere i te fenua Inidia no te mau tairururaa—te hoê tere roa e te moni hoi na roto i te mau anairaa mouˈa.

Auê hoi taime oaoa mau ia faatupuhia i te taatoaraa o te porotarama o te tairururaa mataeinaa i roto i te fare ratou e faatere ai i ta ratou mau putuputuraa! A feruri na e maha taeae, te vai ra atoa te hoê melo o te amaa no Inidia, e horoa nei i te taatoaraa o te porotarama! Ua faanaho-atoa-hia te darama bibilia. Nafea? Ua ravehia i te mau hohoˈa i te taime o te faanahoraa hopea i Inidia. I te fenua Nepal, e patahia taua mau hohoˈa ra i nia i te hoê paruai, tei apeehia e te hoê ripene i haruharuhia. Ua au roa te feia i putuputu mai i te reira. Ehia rahiraa taata o tei putuputu mai? Vau ahuru taata!

Ua taotiahia te tauturu a te mau Ite no te mau fenua ěê i roto i te ohipa pororaa. Eita te ohipa mitionare e nehenehe e faatupuhia, e e ere i te mea ohie no te feia ěê ia roaa i te ohipa. Ua itehia na te ohipa e e piti Ite no Inidia i te fenua Nepal i te mau taime taa ê, ma te faaea e rave rahi matahiti i Kathmandu e ua tauturu raua no te haapaari i te amuiraa tei faaineine-apî-hia. Mai te matahiti 1976 mai â e 17 noa feia poro i te Basileia i Kathmandu. I te matahiti 1985 ua patu te mau taeae i ta ratou iho Piha no te Basileia. I to ˈna otiraa, ua faatupu-tamau-hia te mau tairururaa mataeinaa, tae noa ˈtu te tahi atu mau rururaa, i te mau matahiti atoa i reira. Ua riro mau â te piha ei pu o te haamoriraa mau i roto i taua tuhaa fenua atea e e rave rahi mouˈa.

Te parareraa noa ˈtu te mau fifi

I te haamataraa te ohipa faaiteraa i Nepal, te ohipa pororaa, ua ravehia ma te haapao rahi, aita roa i huti noa ˈˈe i te ara-maite-raa o te feia mana. Fatata râ i te hopea te matahiti 1984, ua haamata aˈera te mau opaniraa i te faahepohia. Ua tapeahia te hoê taeae e e toru tuahine e ua uiuihia e maha mahana i muri aˈe ratou i tuuhia ˈi e te hoê faaararaa eiaha e tamau noa i te faatupu i ta ratou ohipa. I roto i te hoê mataeinaa, ua tapeahia e iva taata a faatupu ai ratou i te haapiiraa bibilia i roto i to ratou fare. Ua tuuhia e ono i roto i te fare tapearaa e 43 mahana. Ua tupu e rave rahi mau tapearaa, aita râ i horohia i mua i te ture.

Aita i maoro aˈenei i te matahiti 1989, ua tapeahia te taatoaraa o te mau taeae e mau tuahine no te hoê Haapiiraa buka a te amuiraa, e toru mahana, e ua tuuhia ratou. I te tahi taime, e anihia ratou ia tarima i te hoê parau e faaite ra e eita ratou e poro faahou. Ua patoi ratou. Ua tuuhia vetahi i muri aˈe noa ratou e tarima ˈi i te hoê parau papai e te hinaaro nei ratou e faaruru i te mau faahopearaa mai te peu e e itehia ratou ia poro faahou.

Noa ˈtu taua mau fifi ra, ua tamau noa te mau taeae ma te itoito i te poro i te parau apî maitai o te Basileia. Ei hiˈoraa, i te matahiti 1985, te matahiti i muri aˈe a haamata ˈi te hau faatere i te ohipa, ua itehia te hoê maraaraa e 21 i nia i te hanere o te feia poro. Ua rohi te mau 35 feia poro te hoê faito au noa e 20 hora te avaˈe hoê i te tauaparauraa e o vetahi no nia i te haamoriraa mau.

A mahaere noa ˈi te tau, ua haamata te mataˈi politita i te taui mai i te fenua Nepal. Ua taa i te feia faatere e e ere te mau Ite no Iehova i te hoê haamǎtaˈuraa. Oia mau, te faatupu nei ta ratou ohipa haapiiraa i te Bibilia i te faahopearaa maitai e te faaitoito i te mau taata, ma te faariro ia ratou ei huiraatira maitai aˈe. Ua ite te feia faatere i te ohipa tia e te rohiraa ma te puai, e te haerea teitei i te pae morare ua riro ei titauraa matamua no te feia e haamori ra ia Iehova.

Ua horoahia i te hoê faaiteraa maitai roa i to te hoê vahine e hindou paieti rahi i mutaa ihora riroraa mai ei Ite e to ˈna patoiraa i te pâmuraa toto. Ua maere roa te mau taote i ta ˈna faaotiraa, to ˈna tiaraa papu maitai. Ua tauturuhia taua vahine ra ia taa i te parau mau e te tauturu o te vea iti ra E oaoa oe i te fenua e a muri noa ˈtu! Noa ˈtu te patoiraa e te mau faaoooraa a to ˈna utuafare, ua bapetizohia oia i te matahiti 1990 a piri ai oia i te 70raa o to ˈna matahiti. I muri iho ua fati to ˈna avae e ua mauiui oia i te tahi atu mau haafifiraa, e ua tia atoa e ia faaruru i te hoê tâpûraa rahi. E piti hebedoma, ua faaruru oia i te faaheporaa a te mau taote e te mau fetii no te farii i te toto. I te pae hopea, ua manuïa mai te pǔpǔ i tâpû ia ˈna ma te ore e faaohipa i te toto. Noa ˈtu e i teie nei eita ta ˈna e nehenehe faahou e haere, e parahi teie tuahine i te mau poipoi atoa i roto i ta ˈna aua e e titau oia i te feia e haere ra na reira ia parahi mai i pihai iho ia ˈna e ia faaroo i te tahi mau parau apî maitai faahiahia mau.

Te fenua Nepal i teie nei mahana

Eaha te itehia ra i te fenua Nepal i teie nei mahana? Te fanaˈo nei te mau Ite no Iehova i te hoê faito tiamâraa rahi mau i te pae o te haamoriraa mai to ratou mau taeae na te ao atoa nei. Mai te taime a haamata ˈi hoê aore e piti taata paiuma mouˈa taipe i te apiti e te feia e paiuma ra i nia i te mouˈa o te haamoriraa mau, ua parau te te tahi mau taata o te maraa noa ˈtura e, ‘A haere mai, e paiuma tatou i nia i te mouˈa ra o Iehova.’ Mai te matahiti 1989 mai â, te vai ra te hoê faito e 43 taata o te haere i te mau avaˈe atoa i roto i te ohipa pororaa, e e 204 taata tei putuputu mai i te oroa Haamanaˈoraa o te pohe o te Mesia i taua matahiti ra.

I teie nei, mai tei tǎpǔhia, ua haamata o Iehova i te faaoioi i te haaputuputuraa i te feia e imi ra i te parau mau i roto i to ˈna fare. (Isaia 60:22) Aita i maoro i muri iho, ua matara mai te piti o te amuiraa i Kathmandu, e te vai ra i teie nei i reira e piti pǔpǔ taa ê i rapaeau mai i te oire pu. I te avaˈe eperera 1994, ua faahoˈi mai e 153 kerisetiano i ta ratou tabula ohipa pororaa—te hoê maraaraa e 350 i nia i te hanere hau atu i roto noa i na pae matahiti i mairi aˈenei! Ua faatere ratou e 386 haapiiraa bibilia i te fare o te mau taata e anaanatae ra. I te oroa Haamanaˈoraa i te matahiti 1994, ua itehia i te hoê haaputuputuraa putapû mau e 580 taata. No te hoê mahana tairururaa taa ê, ua î te piha e e 635 taata, e e 20 tei pûpû ia ratou no te bapetizo. No reira te maraaraa rahi ta te mau Ite no Iehova e fanaˈo nei na te ao atoa nei, te ite-atoa-hia ra i te fenua Nepal.

I teie mau matahiti hopea nei ua maraa rahi mai te mau buka i hurihia na roto i reo Nepali, ma te tauturu i te feia haehaa ia rave i te hoê tiaraa papu no te parau mau. Ua faaineinehia te mau taata huri parau i te amaa no Inidia i roto i te mau ravea huriraa e te faaohiparaa i te mau matini roro uira, te tavini nei ratou i tei nei ma te taime taatoa i Kathmandu. E te mau mauhaa no te faaruru i te maraaraa, te tamau noa nei te feia o te mau mouˈa teotaratia no te fenua Nepal i te haere i mua!

Te paiumaraa i te mouˈa teitei aˈe i te mouˈa Himalaya

O outou atoa e nehenehe outou e fanaˈo i te paiumaraa i nia i te mouˈa teitei aˈe i te mouˈa Himalaya. Ma te rave i te reira, e apiti outou eiaha noa i te feia no Nepal, i te mau mirioni atoa râ “no te mau fenua atoa, e te mau opu atoa, e te mau nunaa atoa, e te mau reo atoa.” (Apokalupo 7:9) Na muri ia ratou, e fanaˈo outou i te haapiiraa a te Poiete i te mau mouˈa teitei mai te mau mouˈa e vai ra i te fenua Nepal. E ite outou i te Poiete ia ‘faatitiaifaro i te mau ohipa atoa,’ e e faatiahia outou ia ora e a muri noa ˈtu i nia i te hoê fenua viivii ore e te haviti.—Isaia 2:4.

[Hohoˈa fenua i te api 24]

Kathmandu

Mouˈa Everest

[Hohoˈa i te api 25]

I rapaeau mai i te Piha no te Basileia i Kathmandu

[Hohoˈa i te api 26]

Te fanaˈo nei e rave rahi feia no Nepal i te mau haapiiraa bibilia