Te faaoromai—No te aha te reira i varavara roa ˈi?

TEI roto o Emilio i te hopea o te 60raa o to ˈna matahiti.a No Oahu mai o ˈna i te haereraa mai no te hoê ohipa peapea mau—te hunaraa o ta ˈna tamaiti matahiapo. A haere noa ˈi o ˈna na te hoê aroâ i nia i te aivi aita i rahi te pereoo e a paraparau noa ˈi o ˈna e te tahi mau hoa, ua hitimahuta o Emilio i te hoê pereoo faahoro-puai-hia i nia i te purumu tomoraa i te hoê fare. Ua fatata roa te pereoo i te û atu i nia ia ˈna, e no to ˈna riri e te ereraahia i te faaoromai, ua tuô o Emilio i nia i te taata faahoro pereoo e ua tairi oia i te muriraa o te pereoo i to ˈna rima. Ua tupu i muri iho te hoê tatamaˈiraa. E au ra e ua turai te taata faahoro pereoo ia Emilio, o tei topa e ua tairi to ˈna upoo i nia i te tima. Tau mahana i muri iho, ua pohe o Emilio no to ˈna pepe i nia i te upoo. Auê hoi faahopearaa peapea mau e!

Te ora nei tatou i roto i te hoê ao e mea varavara roa te faaoromai. Te rahi noa ˈtura te feia e faahoro puai nei i te pereoo. E tapiri roa vetahi i te mau pereoo i mua mai ia ratou e tere nei ia au i te faito puai fariihia e te ture. Area vetahi pae ra, e na roto atu ïa ratou i tera area e tera area haereraa pereoo no te mea eita ratou e nehenehe e faaea noa i muri mai i te tahi atu pereoo. I te fare, te riri uˈana nei te mau melo o te utuafare e e riro roa ratou i te ino mau. E nehenehe atoa vetahi mau kerisetiano e riri roa no te mau hapa aore ra hape a to ratou mau taeae i te pae varua.

No te aha te faaoromai e varavara roa ˈi? Mai te reira noa anei oia? No te aha e mea fifi roa ia faaoromai i to tatou nei tau?

Te mau hiˈoraa o te faaoromai

Te faahiti ra te Bibilia i te hoê vahine o tei ore i ani na mua i ta ˈna tane hou a rave ai i te hoê faaotiraa fifi mau. O Eva to ˈna iˈoa. Ma te tiai ore ia Adamu, peneiaˈe no to ˈna ereraahia i te faaoromai, ua amu oia i te maa hotu opanihia. (Genese 3:1-6) Eaha ïa no ta ˈna tane? Ua ere-atoa-hia o ˈna i te faaoromai i to ˈna peeraa ia Eva i roto i te hara ma te ore e ani na mua i to ˈna Metua i nia i te raˈi, o Iehova, e ia tauturu aore ra ia aratai ia ˈna. Ua horoa mai to raua nounou, eita e ore amuihia e te ereraahia i te faaoromai o tei aratai ia rave i te hara, i te mau faahopearaa peapea mau no tatou paatoa. Na roto ia raua ua faaô-atoa-hia i roto ia tatou te hinaaro e rave i te hara, tae noa ˈtu i te teoteo e te ereraahia i te faaoromai.—Roma 5:12.

Tau 2 500 matahiti i muri aˈe i te hara a to tatou mau metua matamua, ua erehia te nunaa maitihia e te Atua, te mau ati Iseraela, i te faaroo hohonu e te tamau, e ua erehia ratou i te faaoromai. Noa ˈtu e no faaora semeio noa ˈtura o Iehova ia ratou mai te faatîtîraa mai i Aiphiti ra, ua “moe vave atura ia ratou ta ˈna i rave” e “aore i tiai i tana aˈoraa.” (Salamo 106:7-14) Ua rave pinepine ratou i te hara rahi no te mea ua erehia ratou i te faaoromai. Ua hamani ratou i te hoê kafa auro e ua haamori atu i te reira; ua amuamu ratou i te faanahoraa i te pae materia no te mâna ta Iehova i faafanaˈo ia ratou; e ua orure hau atoa e rave rahi o ratou i te tia maitihia e te Atua ra o Iehova, oia hoi o Mose. Oia mau, ua aratai to ratou ereraahia i te faaoromai i te mauiui e te ati.

Ua erehia te arii matamua o Iseraela, o Saula, i te ravea ia riro ta ˈna mau tamaiti ei mau arii mono ia ˈna. No te aha? No te mea aita o ˈna i tiai i te peropheta Samuela, o tei tia hoi ia pûpû i te hoê tusia na Iehova. Ua turai te mǎtaˈu taata ia Saula ia ore e tiai ia Samuela no te pûpû i te tusia. A feruri na e eaha to ˈna huru i to Samuela haereraa mai i muri noa ˈˈe i to Saula faaotiraa i te oroa! Ahiri noa e ua tiai o ˈna maa minuti noa!—Samuela 1, 13:6-14.

Ahiri noa e ua tiai o Eva ia Adamu maoti i te rave ma te feruri ore i te maa hotu! Ahiri noa e ua haamanaˈo te mau ati Iseraela e tiai i te aˈoraa a Iehova! E, ua nehenehe hoi te faaoromai e faaora ia ratou e ia tatou i te oto e te mauiui.

Te mau tumu o te ereraahia i te faaoromai

Te tauturu maira te Bibilia ia taa tatou i te hoê tumu matamua o te ereraahia i te faaoromai i teie nei mahana. Te faataa ra te Timoteo Piti pene 3 i to tatou nei ui o te ora ra i roto i “te ati rahi.” Te parauhia ra e e riro te mau taata “ei miimii, e nounou moni, e faaahaaha, e teoteo . . . e haapao ore, e iria, e te au ore i te taata maitatai ra.” (Mau irava 2, 3) Te vai ra taua huru nounou ra e te haapaoraa ia ˈna iho i roto i te mafatu e te feruriraa o e rave rahi mau taata, o te haafifi nei i te taatoaraa, i te mau kerisetiano mau atoa, ia faatupu i te faaoromai. Ia ite tatou i te mau taata na te ao nei e faahoro puai roa i te pereoo aore ra e tâpû taue noa i te area tereraa pereoo aore ra e parau ino ra ia tatou, e tamata-rahi-hia to tatou faaoromai. E turaihia ïa tatou ia pee ia ratou aore ra ia tahoo atu, ia pee roa ˈtu ïa i to ratou teoteo miimii mau.

I te tahi taime na ta tatou iho mau faaotiraa hape e rave e ia erehia tatou i te faaoromai. A tapao na i te paari mau o te Arii Solomona i to ˈna faataaraa i te taairaa i rotopu i te haaferuriraa rave-oioi-hia e te hape e te ereraahia i te faaoromai e te riri: “E mea maitai te taata aau faaoromai i te taata aau faateitei ra. Eiaha ia ru noa to aau i te riri, tei te opu o te maamaa ra te riri i te vai-maite-raa.” (Koheleta 7:8, 9) Mai te peu e e rave tatou i te taime ia noaa mai ia tatou te hoê haapapuraa taatoa e te tano o te hoê tupuraa hou a rave ai i te hoê ohipa, e riro to tatou manaˈo i te papu roa ˈtu, i te maitai mai, e i te faaoromai hau atu ia vetahi. I te tahi aˈe pae, e faariro te hoê feruriraa teoteo e te haapaoraa ia ˈna iho ia tatou mai te hoê taata feruriraa etaeta, tei erehia i te faaoromai, e te ino, mai te mau ati Iseraela amuamu e te aau etaeta, o tei faaahoaho ia Mose.—Numera 20:2-5, 10.

Te tahi atu tumu o te ereraahia teie nei ao i te faaoromai o te rahi noa ˈtura, o to ˈna ïa tiaturi-ore-raa, no to ˈna faataa-ê-raa ia Iehova. Ua faaite o Davida i te hinaaro o te taata nei ia tiaturi ia Iehova: “E tau varua, o te Atua anaˈe ra ta oe e tiai: tei ia ˈna hoi tau manaˈoraa.” (Salamo 62:5) E rave rahi mau taata o tei ore i ite ia Iehova, mea taotiahia e mea peapea mau to ratou huru hiˈoraa, no reira te tamata nei ratou i te haapao i te mau taime atoa ratou e navenave ai hou ratou a pohe ai. Mai to ratou metua i te pae varua, te Diabolo ra o Satani, mea pinepine aita ratou e haapao nei e te haamauiui anei râ ta ratou mau ohipa ia vetahi ê.—Ioane 8:44; Ioane 1, 5:19.

Eita ïa e maerehia e mea varavara roa te faaoromai i teie nei mahana. Te haafifi nei teie nei faanahoraa o te mau mea ino, to ˈna atua o Satani, e te mau hinaaro e rave i te hape o to tatou nei tino hara i te taata tataitahi, i te feia haavare ore atoa, ia faaite i te faaoromai. Teie nei râ, te aˈo ra te Bibilia ia tatou e ia “faaoromai,” no nia iho â râ i te ohiparaa i te mau opuaraa a te Atua. (Iakobo 5:8) No te aha e mea faufaa roa te faaoromai? Eaha te mau haamaitairaa ta te reira e nehenehe e haafanaˈo?

Te faaoromai—No te aha e mea faufaa roa

“Te tavini atoa nei ratou i te feia e faaoromai ra e e tiai ra.” Ua faahitihia teie mau parau e te rohipehe no Beretane ra o John Milton ua hau atu i te toru hanere matahiti i teie nei i roto i ta ˈna papai rohipehe “I to ˈna vai-matapo-raa.” I roto i te tuhaa matamua o te papai rohipehe, ua faaite oia i to ˈna inoino e to ˈna taiâ no te mea eita o ˈna e nehenehe e tavini ma te taatoa i te Atua i te mea e ua matapohia o ˈna i te hopea o te 40raa o to ˈna matahiti. Tera râ, mai te itehia ra i roto i te reni hopea o te papai rohipehe faahitihia i nia nei, ua taa ia ˈna e e nehenehe te hoê taata e haamori i te Atua na roto i te faaoromairaa i te ati e te imiraa ma te hau i te mau taime tano no te taviniraa. Ua ite o Milton i te faufaaraa ia tiaturi ma te faaoromai i te Atua.

E huru hiˈoraa maitai paha to te rahiraa o tatou nei, tera râ, e otia to tatou paatoa o te nehenehe e faatupu i te riri aore ra i te taiâ. Nafea ia noaa e ia faatupu i te faaoromai?

Te mau hiˈoraa o te faaitoito

Te horoa maira te Bibilia e rave rahi mau hiˈoraa maitatai no nia i te faaoromai. Maoti te faaoromai o Iehova e nehenehe ai te mau mirioni taata eita e pau ia taio e fanaˈo te ora mure ore. (Petero 2, 3:9, 15) I roto i ta ˈna titauraa maitai mau oia hoi ia rave tatou i ta ˈna zugo e “e noaa hoi te ora i to [tatou nephe],” te faaite ra o Iesu ma te tia roa i te faaoromai faahiahia mau o to ˈna Metua. (Mataio 11:28-30) E nehenehe te feruri-hohonu-raa i nia i te mau hiˈoraa o Iehova e o Iesu e tauturu ia tatou ia faaite hau atu â i te faaoromai.

Hoê taata e au ra e e riri tia to ˈna, o tei mauiui e o tei tia i te tahooraa, o Iosepha ïa te tamaiti a Iakoba ra. Ua hamani ino to ˈna mau taeae ia ˈna ma te tia ore, ua opua ratou e haapohe ia ˈna e i te pae hopea ua hoo ratou ia ˈna ei tîtî. I Aiphiti, noa ˈtu ta ˈna taviniraa haapao maitai e te taiva ore ia Potiphara, ua pari-haavare-hia o Iosepha e ua tuuhia o ˈna i roto i te fare auri. Ua faaoromai o ˈna i te mau ati atoa ta ˈna i farerei, peneiaˈe ua taa ia ˈna e te faatupu ra taua mau tamataraa i te mau opuaraa a Iehova. (Genese 45:5) No te mea ua faatupu o ˈna i te faaroo e te tiaturiraa i roto ia Iehova amuihia e te haehaa e te manaˈo tae, ua nehenehe atoa o Iosepha e faaoromai i te mau huru tupuraa fifi mau.

Te tahi atu tauturu faufaa roa o te varua moˈa ïa o Iehova. Ei hiˈoraa, mai te peu e e iriâ vave noa tatou e e arero faaino to tatou, e nehenehe tatou e pure ia tauturu mai te varua moˈa e ia nehenehe tatou e faatupu i ta ˈna mau hotu. E tauturu te feruri-hohonu-raa i nia i taua mau hotu tataitahi ra, mai te faaoromai e te hitahita ore, ia taa tatou e ua taai-hohonu-hia te reira i te faaoromai.—Galatia 5:22, 23.

Te mau haamaitairaa o te faaoromai

E nehenehe te faaoromai e horoa mai e rave rahi mau haamaitairaa. E haapuai te reira i to tatou huru e e paruru ia tatou i te rave i te mau ohipa feruri-ore-hia e te maamaa. O vai i rotopu ia tatou nei o tei ore i rave i te mau hape mauiui mau no te mea ua ohipa vave noa tatou i mua i te mau huru tupuraa fifi aore ra hepohepo mau? Ua faahiti paha tatou i te tahi parau tano ore aore ra ua ohipa tatou ma te ino. Ua vaiiho paha tatou ia tupu te hoê aroraa ma te ore e hinaaro e tuu e te hoê taata herehia e tatou. I muri aˈe i te riri rahi, te inoino, e te mauiui, e manaˈo paha tatou ma te tatarahapa e, ‘Ahiri noa e ua rahi atu to ˈu faaoromai.’ E nehenehe te faaoromairaa e paruru ia tatou i te mau huru mauiui atoa. E nehenehe te reira anaˈe e horoa hau mai i te hau, te aifaito e te mauruuru i to tatou oraraa.—Philipi 4:5-7.

E nehenehe atoa te faaoromai e tauturu ia tatou ia faatupu i te hoê mafatu mǎrû e te î i te tiaturiraa. E nehenehe te reira e haamaitai â i to tatou oraora-maitai-raa i te pae tino, i te pae no te mau manaˈo hohonu, e i te pae varua. (Maseli 14:30) Mai te peu e eita te riri e haavîhia, e nehenehe tatou e roohia i te maˈi rahi i te pae no te mau manaˈo hohonu e i te pae tino e te pohe atoa. I te tahi aˈe pae, ia faaoromai anaˈe tatou e nehenehe tatou e faatupu i te hoê haerea maitai aˈe i mua ia vetahi, i to tatou iho â râ mau taeae i te pae varua e te mau melo o te utuafare. E ru aˈe ïa tatou i te faaite i te hamani maitai e i te tauturu maoti i te riri atu e te faaino atu. I te tahi atu pae, mea ohie aˈe no vetahi e mea au aˈe na ratou e apiti mai ia tatou.

E tia iho â râ i te mau matahiapo i roto i te amuiraa kerisetiano ia faaoromai. I te tahi taime, e haafatata ˈtu te mau hoa kerisetiano ia ratou no te tufa ˈtu i to ratou mau fifi rahi. E haama paha taua feia haavare ore ra, e horuhoru, aore ra e hepohepo ratou, area te mau matahiapo ra, ua rohirohi paha ratou aore ra ua faaahoaho to ratou iho mau fifi aore ra to to ratou utuafare ia ratou. Teie nei râ, auê i te mea faufaa mau e ia faaoromai te mau matahiapo i taua mau huru tupuraa ra! Ia na reira ratou e nehenehe ratou e haapii ma te “mǎrû” e “e faaherehere i te nǎnǎ.” (Timoteo 2, 2:24, 25; Ohipa 20:28, 29) To mua te mau oraraa faufaa rahi i te ati. E riro mau â te mau matahiapo maitai, here, e te faaoromai ei haamaitairaa no te amuiraa!

E tia i te mau upoo o te utuafare ia faaoromai, ia taa i te manaˈo, e ia faaite i te hamani maitai i to ratou mau utuafare. E tia atoa ia ratou ia titau e ia faaitoito i te mau melo atoa o te utuafare ia faatupu i taua mau huru maitatai ra. (Mataio 7:12) E turu rahi te reira i te here e te hau i roto i te fare.

E tauturu te faaoromai i roto i te taviniraa i te mau tavini kerisetiano ia haafaufaa hau atu â i taua taviniraa ra. E hau atu â to ratou aravihi no te faaoromai i te tâuˈa-ore-raa e te patoiraa o ta ratou e farerei. Maoti i te aimârô atu e te mau fatu fare o tei riri, e nehenehe te mau tavini faaoromai e horoa i te hoê pahonoraa mǎrû aore ra e vaiiho ia ratou ma te hau, no te tapea ïa i te hau e te oaoa. (Mataio 10:12, 13) Hau atu, ia faaoromai e ia faaite te mau kerisetiano i te hamani maitai i te mau taata atoa, e umehia te feia e au i te mamoe i te poroi o te Basileia ra. Ua haamaitai Iehova i te mau tutavaraa tei ravehia ma te faaoromai na te ao atoa nei, a haaputuputu ai oia i te mau hanere tausani feia mǎrû e imi ra i te parau mau i roto i te amuiraa here mau a Iehova i te mau matahiti atoa.

Oia mau, e horoa mai te faaoromai i te mau haamaitairaa maitatai. E ape tatou e rave rahi mau ati e mau fifi no to tatou ohipa-vave-raa aore ra no to tatou faaohipa-oioi-raa i to tatou arero. E oaoa hau aˈe, e mǎrû hau aˈe, e e oraora hau aˈe tatou. E fanaˈo tatou i te oaoa e te hau rahi aˈe i roto i ta tatou taviniraa, i roto i te amuiraa, e i te fare. Te mea faufaa roa ˈˈe râ, e fanaˈo tatou i te mau taairaa piri roa ˈˈe e te Atua. No reira a tiai ia Iehova. A faaoromai!

[Nota i raro i te api]

[Hohoˈa i te api 10]

Eaha te faito o to outou faaoromai i roto i te oraraa o te mau mahana atoa?