Te faatia ra te feia poro i te Basileia
Te faaite ra te mau taurearea i te parau apî maitai i Afirika
I MURI iti noa ˈˈe i te tia-faahou-raa o Iesu, ua haere te hoê taata no Afirika e mataitai ia Ierusalema. Aita te Bibilia e faahiti ra i to ˈna iˈoa. Ua matau-noa-hia o ˈna mai te hoê “taata mana i ǒ Kaneda i te arii vahine o Etiopia ra, oia te tiai i te mau taoˈa na ˈna ra.” No te aha o ˈna i faahitihia ˈi i roto i te Bibilia? No te mea ua faaue te hoê melahi i te poro evanelia kerisetiano ra o Philipa ia faaite atu ia ˈna “te parau [apî maitai] no Iesu.” O teie taata no Etiopia te taata matamua no Afirika i roto i te aamu o tei riro mai ei melo o te amuiraa kerisetiano.—Ohipa 8:26-39.
I teie nei mahana, te vai ra tau hanere tausani Ite no Iehova i Afirika. Te rave nei ratou i te mau taime atoa e tia ia ratou no te tufa atu e o vetahi te parau apî maitai no nia ia Iesu. Te faaite ra te mau tupuraa i muri nei e e tuhaa atoa ta te mau taurearea i Afirika i roto i taua ohipa ra.
◻ Mea fatata noa te fare o Sandy e to Priya, e piti na tamahine 11 matahiti no Nairobi, i Kenya. Mea au na raua e hauti e e tauiui i te mau buka aamu. Ua haamata te mau metua o Priya i te haapii i te Bibilia e te mau Ite no Iehova. I teie nei e anairaa buka apî ta Priya no te amui atu i roto i ta ˈna haapueraa tahito, te hoê iho â râ buka ta ˈna i au roa ˈˈe, Faaroo i te Orometua Rahi, neneihia e te Watchtower Bible and Tract Society. Ua tufa o ˈna i ta ˈna buka Orometua Rahi na to ˈna hoa o Sandy, e ua haamata aˈera na tamahine toopiti i te haapii i te reira ma te tamau.
Teie nei râ, te pee nei te metua vahine o Sandy, o Una, i te Ekalesia Beretane e aita o ˈna i hinaaro e ia taio ta ˈna tamahine i te mau buka a te mau Ite no Iehova. Noa ˈtu te opaniraa a to ˈna metua vahine, ua faatere-noa-hia te haapiiraa. I te hoê mahana ua taparu o Sandy i to ˈna mama ia faaroo i ta raua tauaparauraa hoê noa ˈˈe taime. Te pene ta te mau tamahine i taio i taua mahana ra teie ïa te upoo parau “Na taata toopiti tei faatupu i te oroa fanauraa.” Ua faaroo o Una e ua maere roa o ˈna. Ua haere oioi o ˈna e farerei i te metua vahine o Priya ma te faahiti e rave rahi mau uiraa bibilia.
Ua faanaho te metua vahine o Priya e ia faatere te hoê Ite i te haapiiraa bibilia e o Una. Aita i maoro roa ua tufa o Una iho i te mea ta ˈna i haapii i ta ˈna hoa rave ohipa o Dolly. I roto i taua area taime ra, ua tamau noa o Priya, 11 matahiti, i te haere i mua e ua faaoti o ˈna e pûpû ia ˈna iho no te Atua ra o Iehova na roto i te bapetizoraa i roto i te pape i te hoê tairururaa mataeinaa a te mau Ite no Iehova. I taua tairururaa ra, i te oaoa rahi o Priya, ua bapetizo-atoa-hia o Una e o Dolly!
◻ Te vai ra te tahi mau tuhaa fenua i Afirika aita te ohipa a te mau Ite no Iehova i haamanahia. I roto i te hoê o taua mau tuhaa fenua ra, te farii-rahi-hia ra te mau ohipa faaroo e te mau tiaturiraa a te mau Ite. I roto i te hoê fare haapiiraa i roto i taua fenua ra, ua fariihia i te hoê tamaroa e hitu matahiti to ˈna e to ˈna taeae e ono matahiti to ˈna—mau tamarii a te mau Ite—e ia ore e apiti atu i roto i te mau pure faaroo.
I te hoê mahana ua ani te hoê orometua haapii apî e ia apiti mai na toopiti tamaroa i roto i te pure e te tahi atu mau tamarii. Ua patoi te tahi atu tamaroa e ua taparahihia o ˈna na te orometua haapii. Ua mârô noa to ˈna taeae apî aˈe ia ˈna, o Shadrack e ono matahiti to ˈna, e haere e farerei i te faatere o te fare haapiiraa i roto i ta ˈna piha ohipa. Ua ani te faatere o te fare haapiiraa e te orometua haapii apî ia ˈna e no te aha aita o ˈna i hinaaro e apiti atu i te tahi atu mau tamarii. Ua ani raua ia ˈna e mai te peu e te mǎtaˈu ra o ˈna e ia taparahihia o ˈna e to ˈna mau metua. Ua pahono oia na roto i te reo Arabia tano roa e: “Eita, e ere te Atua o ta ˈu e haamori ra i te hoê Atua no te anoi noa no te nahonaho râ. Eita vau e nehenehe e riro ei Ite no Iehova i te fare e i te fare haapiiraa e faaroo ê ïa ta ˈu!” Ei faahopearaa, ua fariihia o ˈna ia haapae i te reira.
I muri aˈe i te bapetizoraahia te taata no Etiopia faahitihia i roto i te buka a te mau Ohipa, “haere atura oia i to ˈna haerea ma te oaoa.” (Ohipa 8:39) Oia atoa i teie nei mahana, te oaoa nei te feia poro i te Basileia i roto i te tuhaa fenua rahi no Afirika i ta ratou haamaitairaa taa ê e ‘faaite haere i te parau apî maitai no nia ia Iesu.’—Ohipa 8:35.