Eaha te maororaa e tia i te feia veve ia tiai?

“Mai te peu e eita te hoê totaiete tiamâ e nehenehe e tauturu i te rahiraa feia veve, eita oia e nehenehe e faaora i te pǔpǔ iti hoona.”—John F. Kennedy.

“TE ORARAA no a muri aˈe ta ˈu e hinaaro nei no te taata tataitahi—aita e veve, aita e taata taoto haere i roto i te aua rahi, o te hoê ïa paradaiso!” Teie ta te hoê tamaroa no São Paulo, i Beresilia, 12 matahiti to ˈna i parau. E nehenehe anei râ e faaore i te veve? Eaha te maororaa e tia i te feia veve ia tiai?

Te faariro nei vetahi ia ratou iho ei taata veve no te mea eita ratou e nehenehe e hoo mai i te tahi mau mea o ta ratou e hinaaro ra. Teie nei râ, a feruri na i te huru tupuraa ino o te feia veve mau. E nehenehe anei outou e feruri i te faateimaharaa e te oaoa ore o teie mau taata? E tia i te tahi pae ia taputo e te mau otaha e te mau iore, a paheru noa ˈi ratou i te maa i roto i te mau faarueraa pehu opanihia! Eaha te maororaa teie huru veveraa e haapeapea ˈi i te huitaata nei? Mea tano roa te piiraa a Federico Mayor, faatere rahi o te UNESCO (Faanahonahoraa a te mau Nunaa Amui no te haapiiraa, te ite aravihi e te ihotumu): “E faarue anaˈe na tatou i taua ohipa feaa fariihia ra o te faatia ia tatou ia farii i te ohipa o te ore e tia ia farii—te veve, te pohe poia e te mauiui o te mau mirioni taata.”

E tupu anei te moemoeâ o te vai-maitai-raa na te ao atoa nei? Eaha te tiaturiraa no te feia veve?

Eaha te mau tiaturiraa no te feia veve?

Te horoa nei te mau faatere manaˈo maitai i te mau ohipa hau atu â, te mau moni ohipa maitai aˈe, te mau porotarama totiale haamaitaihia, e te tufaraa no te faanaho-faahou-raa i te pae faaapu. E nehenehe ratou e farii mai te peretiteni tahito no Marite o John F. Kennedy: “Mai te peu e eita te hoê totaiete tiamâ e nehenehe e tauturu i te rahiraa feia veve, eita oia e nehenehe e faaora i te pǔpǔ iti hoona.” Eita hoi e navai noa te mau manaˈo maitatai no te faaore i te veve. Ei hiˈoraa, e tauturu anei te maraaraa i te pae faanavairaa faufaa i te feia veve i te pae rahi? Eita. Ua faataa te faatere tahito inidia o Jawaharlal Nehru e: “Mai te peu e e vaiiho-noa-hia e ia ore te mau puai o te hoê totaiete ona tiamâ ia hiˈopoahia, e faahoona atu â te reira i te taata hoona e e haaveve atu â te reira i te taata veve.” Teie râ, hau atu i te faateimaharaa e te ereraa, e faarahi atu â te haafaufaa-ore-raa ia ˈna iho i te hopoia a te taata veve. E nehenehe anei te mau faatere taata e tauturu i te taata veve ia faaruru i te mau manaˈo tauturu ore e tiaturiraa ore?

Inaha, ua haapii e rave rahi taata veve aore e tiaturiraa ia faaruru i te veve e i te mau manaˈo faatura ia ˈna iho i mua i te mau fifi rarahi, mai te maraaraa rahi o te hoo e te ereraa i te ohipa. Hau atu, e faaore-roa-hia te oˈe, te ereraa i te nohoraa, e te veve. Te haamaere ra anei te reira ia outou? Te titau manihini nei matou ia outou ia taio i te tumu parau i muri iho: “Fatata roa, aore e taata veve faahou!”