“Aita vau i ite aˈenei i te hoê mea mai te reira!”

I TE matahiti 1993 ua titau-manihini-hia te amaa a te Taiete Watch Tower i Raparata ia tono hoê tausani tia i Santiago, Tireni, no na maha mahana tairururaa mataeinaa “Te haapiiraa no ǒ mai i te Atua ra” a te mau Ite no Iehova. A tahi ra te mau Ite no Raparata i titau-manihini-hia ˈi no te ratere atu ei pǔpǔ rahi mau i te hoê tairururaa i te fenua ěê.a Eaha te pahonoraa? Ua hau atu i te 8 500 parau titauraa, mai roto mai, ua maitihia 1 039 tia.

Ua tarahuhia e 14 pereoo faauta taata no teie tere e 1 400 kilometera te atea mai Buenos Aires mai i Santiago. Ua haafaahiahia te natura haviti i rapae mai i te tere e 26 hora te maoro. Ma te tere atu na te mau Mouˈa Andes, ua haere te mau tia na pihai iho ia Aconcagua, e 6 960 metera te teitei, te mouˈa teitei roa ˈˈe ïa o te Afa Tooa o te râ. E haamanaˈo-taa-ê-hia te faataumaraa, no te pou atu i Tireni. Ua haapopou-rahi-hia te feia faahoro no to ratou aravihi ia faahoro i te mau pereoo faauta taata na taua mau eˈa fifi mau ra!

Teie râ, te hiˈoraa nehenehe roa ˈˈe, o te tapaeraa ïa i te tairururaa. I roto i te hoê ao no te mau feiiraa nunaa e te amaharaa i te pae o te iri, auê i te haumǎrû ia ite i te hoê nahoa tahoê tau 80 000 feia no 24 fenua mai i putuputu mai—te hoê autaeaeraa o te ao taatoa mau â! Ma te ite roa i te tahoêraa i rotopu i te feia i ruru mai, ua faaite vetahi o te feia faahoro i te anaanatae ia haapii hau atu â no nia i te mau Ite no Iehova. “Aita vau i ite aˈenei te hoê mea mai te reira!” ta te hoê o ratou i parau.

[Nota i raro i te api]