Te faatia ra te feia poro i te Basileia

Mea puai aˈe Iehova i to ˈna mau enemi

UA TAMATA maoro te Diabolo e ta ˈna mau demoni i te faataupupu i te pororaa o te parau apî maitai na te arai o te haapaoraa hape e te ohipa hiˈohiˈo. Te faahiti ra te Bibilia i te tutavaraa ino a Satani i roto i te Korinetia 2, 4:4 i reira te faataaraahia e “oia te feia i haapourihia to ratou aau faaroo ore e te atua o teie nei ao ra, ia ore te maramarama o te evanelia hanahana o te Mesia, o te hohoˈa o te Atua ra, ia anaana mai i roto ia ratou.”

Mea puai aˈe râ te Atua ra o Iehova ia Satani. Aita hoê aˈe mea ta te mau enemi a Iehova e nehenehe e rave no te tapea i te faatupuraa o te hinaaro a te Atua, oia hoi “o tei hinaaro i te taata atoa ia ora, e ia noaa te ite i te parau mau.” (Timoteo 1, 2:4) Te haamatara ra te mau faatiaraa i muri mai a te feia poro no Auteralia i te reira.

◻ I muri aˈe tau 20 matahiti faataa-ê-raa e te haapaoraa, ua haamata te hoê vahine faaipoipo i te taio faahou i te Bibilia. Ua faaara teie anaanatae faaapîhia o te Bibilia i roto ia ˈna e rave rahi mau uiraa, ua pure ïa oia i te Atua no te tauturu ia ˈna ia ite i te mau pahonoraa. Ua hinaaro oia e maimi i te parau mau, ua ite râ oia e eita te hoˈi-faahou-raa i roto i ta ˈna haapaoraa tahito e faatitiaifaro i to ˈna fifi. Maoti râ, ua haamata oia i ta ˈna maimiraa ma te haere i te hoê hoohooraa buka e ua ani atu e e buka anei ta ratou no nia i te haapaoraa.

Ua haamanaˈo te vahine fatu o te faretoa e e buka faaroo ta ˈna, eiaha i te faretoa, i te fare râ. Teie ïa te upoo parau o te buka E nehenehe oe e ora e a muri noa ˈtu i roto i te paradaiso i nia i te fenua nei, neneihia e te mau Ite no Iehova. Ua taio te vahine ma te anaanatae rahi i te buka e ua ite oia i te mau pahonoraa i ta ˈna mau uiraa bibilia e rave rahi. I muri aˈe i te maimiraa i te mau Ite no Iehova i roto i te buka numera niuniu, ua farerei oia ia ratou i te pae hopea e ua haamata oia i te hoê haapiiraa bibilia tamau.

◻ Ua aufau te hoê taurearea vahine faaea taa noa i te hoê vea no to ˈna vahi ia faatianiani i te hooraa o te hoê taritoa. Mai teie ïa te parau faatianianiraa: te hoê ‘taritoa no te Anotau no Ropu e mea puai mau â.’ Ua tapao te hoê Ite no Iehova i te reira. Ua faaoti oia e niuniu i te numera i horoahia e ua paraparau oia e te vahine no nia i te pu o te puai o te taritoa mai te parauhia ra. Ua tauaparau ihora i muri iho no nia i te manaˈo o te Bibilia i nia i te ohipa demoni. Ua faaite te taurearea vahine apî e te taritoa e inanahi noâ, ua pure oia i te Atua ia tauturu ia ˈna i roto i to ˈna mau fifi e te mau demoni. Ua rave te Ite i te tahi mau faanahoraa no te tahi atu tauaparauraa na roto i te niuniu paraparau.

I to ˈna niuniuraa, aita te taurearea vahine i te fare. Ua pahono te metua vahine i te niuniu paraparau e ua parau oia e: “Aita vau i ite eaha ta oe i haapii i ta ˈu tamahine, te ohipa râ i tupu e semeio mau ïa!” Ua faatia oia e i muri aˈe i te niuniuraa matamua, ua taue ta ˈna tamahine i ta ˈna mau hohoˈa e mau buka satani atoa e ua haamata oia i te taio i te Bibilia.

I muri iho noa mai, ua ravehia te tahi mau faanahoraa no te haere roa e farerei i te taurearea vahine. Ua farii oioi oia i te hoê haapiiraa bibilia tamau e te mau Ite no Iehova. Ua haamata atoa oia i te apiti i te mau Ite ma te haere i ta ratou mau putuputuraa kerisetiano. Faahou â, ua manuïa Iehova i nia i te mau demoni na roto i te faaanaanaraa i te ite papu o te Bibilia.