‘E apee ta ˈna mau ohipa ia ˈna’

I TE hora 8:50 i te poipoi i te mahana maha 28 no tiurai 1994, ua hope te hororaa a George D. Gangas i nia i te fenua nei. E 98 to ˈna matahiti. Tei rotopu oia i te hoê o te mau taata i faatavaihia, ua riro o George Gangas ei melo no te Tino aratai a te mau Ite no Iehova mai te 15 no atopa o te matahiti 1971 mai â.

Ua ite te feia atoa o tei matau i te taeae Gangas i to ˈna here i te parau-tia e to ˈna riri i te ino. Te haamanaˈo noa ra ratou ia faataa anaˈe oia ia Satani mai te haavare rahi, taehae, ino, faufau, vahavaha. I te tahi râ pae, e faataa oia ia Iehova mai te hoê Metua here, maitai, aroha, mǎrû, e te haapao maitai. Te haamanaˈo atoa ra e rave rahi i to ˈna au rahi e horoa i te mau uiraa bibilia. I roto i te mau aparauraa atoa, e horoa oia i te mau uiraa e eita e pau—mea ohie roa vetahi, vetahi râ mea fifi rii ïa. Oia mau, mea au roa na ˈna i te parau mau o te bibilia.

Ua bapetizohia te taeae Gangas i te 15 no tiurai 1921. Ua haamata oia i ta ˈna ohipa i roto i te taviniraa taime taatoa (pionie) i te avaˈe mati 1928. Mai taua mahana ra, ua vai oia e 66 matahiti i roto i te taviniraa taime taatoa. Ua riro mai oia ei melo i te pu faatere i Brooklyn no te Watch Tower Bible and Tract Society i te 31 no atopa o te matahiti 1928.

Te faataahia ra te aamu o to ˈna oraraa i roto i Te Pare Tiairaa o te 15 no atopa o te matahiti 1966. Te faataahia ra oia mai te hoê taata na te Atua itoito mau i te pae varua. I roto i taua tumu parau ra, teie te parau mahanahana mau no te mafatu o ta ˈna i faahiti: “Mea au roa na ˈu te oraraa e te hinaaro nei au e ia roaa i to ˈu mau taeae i te ora. Te feruri nei au mai te aposetolo Paulo, ‘e mea faufaa ore atoa te mau mea atoa nei na ˈu, i te maitai rahi ra i te ite i te Mesia i tau Fatu ra ia Iesu.’”—Philipi 3:8.

Ua faaite o taeae Gangas na roto i ta ˈna mau ohipa i rave e te here mau ra oia i te ora, e ua opere oia ma te itoito i to ˈna “ite no nia ia Iesu Mesia” na vetahi ê. E moemoehia oia, tera râ te oaoa nei tatou e ua roaa ia ˈna ta ˈna haamaitairaa no te ora i nia i te raˈi! I teie nei, ‘ua faaea oia i te rave i ta ˈna ohipa, e ua pee hoi ta ˈna mau ohipa ia ˈna.’—Apokalupo 14:13.

[Hohoˈa i te api 31]