Te parahiraa mau o te haamoriraa a Iehova i roto i to tatou oraraa
“E haamaitai â vau ia oe, e tau Atua, e te Arii; e haamaitai â vau i to oe ra iˈoa e a muri noa ˈtu.”—SALAMO 145:2.
1. Eaha ta Iehova e titau ra i te pae no te haamoriraa?
“E ATUA [titau] hoi au o te Atua no oe nei o Iehova [e ia haamori outou ia ˈu anaˈe ra].” (Exodo 20:5) Ua faaroo o Mose i teie nei mau parau no ǒ mai ia Iehova ra, e ua faahiti faahou atu oia i te reira ia ˈna i tia ˈtu i mua i te nunaa o Iseraela. (Deuteronomi 5:9) Aita e feaaraa i roto i te feruriraa o Mose e te titau maira te Atua o Iehova i Ta ˈna mau tavini, ia haamori ratou ia ˈna anaˈe ra e tia ˈi.
2, 3. (a) Na te aha i haapapu i te mau ati Iseraela e e ohipa faahiahia mau tei tupu i pihai iho i te Mouˈa ra i Sinai? (b) Eaha te mau uiraa ta tatou e tuatapapa no nia i te haamoriraa a te mau ati Iseraela e a te mau tavini a te Atua i teie nei mahana?
2 Ia ratou i puhapa i pihai iho i te Mouˈa ra i Sinai, ua ite atu te mau ati Iseraela e te “taata ěê atoa e rave rahi i te anoi-atoa-raa” tei faarue atu i te fenua Aiphiti, i te tahi ohipa mǎtau-ore-hia. (Exodo 12:38) Aita to te reira e tuatiraa e te haamoriraa a te mau atua no Aiphiti, i faahaehaa-roa-hia e na ati hoê ahuru. A faaite noa mai ai o Iehova ia ˈna i mua i te aro o Mose, ua tupu aˈera te hoê ohipa rahi riaria mau: te haruru patiri, e te anaparaa uira, e te taˈi teiaha mau o te hoê pû tei faaaueue i te taatoaraa o te puhapa. I muri iho, ua tupu ihora te auahi e te au auahi a aueue noa ˈi te mouˈa taatoa. (Exodo 19:16-20; Hebera 12:18-21) Mai te peu e e hinaaro te hoê ati Iseraela i te tahi haapapuraa e e ohipa faahiahia mau tei tupu, ua fatata ïa te reira i te tupu. E ite atu hoi oia i te haapapuraa ia pou mai o Mose mai te mouˈa mai i muri aˈe te piti o te mau anairaa ture a te Atua e horoahia mai ai ia ˈna ra. Ia au i te aamu faauruahia, “inaha, te anaana maira to ˈna [to Mose] ra iri mata; mǎtaˈu aˈera ratou [te nunaa] ia haafatata ˈtu ia ˈna.” Papu maitai, eita roa ˈtu teie ohipa i tupu, tei hau aˈe hoi i te mana taata nei, e moehia!—Exodo 34:30.
3 No taua nunaa o te Atua ra, aita e feaaraa no nia i te parahiraa e mauhia ra e te haamoriraa a Iehova. O ˈna to ratou Faaora. Ua pûpû ratou i to ratou oraraa taatoa no ˈna. O ˈna atoa to ratou iriti Ture. Tera râ, ua vaiiho anei ratou i te haamoriraa a Iehova i nia i te parahiraa matamua? E eaha te nehenehe e parau no nia i te mau tavini a te Atua no teie nei tau? Eaha te parahiraa o te haamoriraa a Iehova i roto i to ratou oraraa?—Roma 15:4.
Te haamoriraa a Iseraela ia Iehova
4. Mai te aha te huru faanahoraa o te tiahapa o Iseraela i roto i to ratou tere i te medebara, e eaha to ropu i te tiahapa?
4 Mai te peu e na nia ˈtu outou i te hiˈo i te nunaa o Iseraela e puhapa ra i roto i te medebera, eaha ïa ta outou e ite atu? O te hoê ïa anairaa tiahapa nahonaho maitai e eita e ore e toru milioni aore ra hau atu taata e ora ra i roto, e tei tapǔpǔhia ia au i na opu e toru no te pae apatoerau, apatoa, hitia o te râ e tooa o te râ. Ia haafatata roa ˈtu outou i te hiˈo, e ite atoa ˈtu ïa outou i te tahi pǔpǔ e noho ra i pihai noa ˈtu i te ropuraa o te puhapa. O te mau fetii o te opu o Levi ïa te faaea ra i roto i na anairaa tiahapa nainai aˈe, e maha. I ropu maitai i te puhapa, i roto i te vahi e faataa-ê-hia ra e te hoê paruai, te vai ra te hoê faanahoraa otahi roa. O te “tiahapa amuiraa” ïa aore ra fata, ta te mau ati Iseraela “aau paari” i patu ia au i te hohoˈa i haapaohia e Iehova.—Numera 1:52, 53; 2:3, 10, 17, 18, 25; Exodo 35:10.
5. Eaha te faufaaraa o te sekene i Iseraela?
5 I roto i ta ratou mau patiaraa tiahapa tataitahi e 40 i roto i to ratou mau tere na te medebara, ua faatia o Iseraela i te sekene, e ua riro hoi te reira ei pǔ no to ratou puhapa. (Numera, pene 33) Ma te tano maitai, te parau ra te Bibilia e te parahi ra o Iehova i roto i to ˈna nunaa i ropu maitai i to ratou puhapa. Ua poˈi roa hoi te sekene i to ˈna ra hanahana. (Exodo 29:43-46; 40:34; Numera 5:3; 11:20; 16:3) Teie ta te buka Our Living Bible e parau ra: “Mea faufaa roa taua sekene afaifai ra, inaha e faatupu oia i te hoê pǔ farereiraa faaroo no te mau opu fetii. No reira e tahoê atura hoi oia ia ratou i roto i te mau roaraa matahiti o to ratou hahaere-noa-raa na te medebara.” Hau atu i te reira, ua riro te sekene ei faahaamanaˈoraa tamau e mea faufaa roa te haamoriraa a te mau Iseraela i to ratou Poiete, no to ratou oraraa.
6, 7. Eaha te faanahoraa i te pae no te haamoriraa tei mono i te sekene, e mea nafea to ˈna taviniraa i te nunaa Iseraela?
6 I muri aˈe te mau ati Iseraela e tapae atu ai i te Fenua i Tapǔhia, ua tamau noâ te sekene i te riro ei pǔ no te haamoriraa a Iseraela. (Iosua 18:1; Samuela 1, 1:3) Ia tae i te hoê tau, ua faaau aˈera te arii ra o Davida e patu i te hoê fare e vai tamau mai. O te hiero hoi taua fare ra, i patuhia i muri aˈe e ta ˈna tamaiti o Solomona. (Samuela 2, 7:1-10) I to ˈna avariraahia, ua pou maira te hoê ata ei haapapuraa e te farii maira o Iehova i taua paturaa ra. “Ua faatia vau i te tahi fare parahiraa no oe,” o ta Solomona ïa pure “ei parahiraa mau no oe e a muri noa ˈtu.” (Te mau arii 1, 8:12, 13; Paraleipomeno 2, 6:2) Ua riro maira ïa te hiero i patu-apî-hia ei pǔ no te mau ohipa haamoriraa a te nunaa.
7 E toru taime i te matahiti, e haere na te mau ati Iseraela tane i Ierusalema no te apiti atu i roto i te mau oroa oaoa mau e tupu i te hiero ei faaiteraa i to ratou mauruuru i te haamaitairaa a Iehova. Ma te tano maitai, e parauhia na taua mau haaputuputuraa ra “te mau [oroa a Iehova e haapaohia] i to ratou taime mau,” e haamau i te feruriraa i nia i te haamoriraa a Iehova. (Levitiko 23:2, 4) E amui atoa ˈtu na te mau vahine paieti e te tahi atu mau melo o te utuafare.—Samuela 1, 1:3-7; Luka 2:41-44.
8. Mea nafea te Salamo 84:1-12 haapapuraa i te faufaaraa o te haamoriraa a Iehova?
8 Te faataa papu maitai ra te mau papai salamo faauruahia i te faufaa rahi o te haamoriraa, i roto i to ratou oraraa. “E mea popou o to oe ra mau tiahapa, e Iehova sabaota.” ta te mau tamarii ïa a Kora i himene. Papu maitai aita ratou i himene no te hoê noa fare. Ua faateitei râ ratou i to ratou reo ei faahanahanaraa i te Atua ra o Iehova, i te na ôraa e: “Te oaoa nei tau aau e tau tino atoa i te Atua ora ra!” E faatupu hoi te taviniraa a te mau ati Levi i te oaoa rahi i roto ia ratou. “E ao to te feia i parahi i to oe ra fare!” o ta ratou ïa i parau. “E ore ratou e tuu i te haamaitai ia oe.” Inaha, ua nehenehe o Iseraela taatoa e himene e: “E ao to te feia o oe to ratou etaeta ra; te manaˈo ra ratou i te mau eˈatia ra. . . . E haere â hoi ratou ma te etaeta e ia noaa ˈtu â te etaeta e tae noa ˈtu ratou atoa ra i te aro o te Atua i Ziona.” Noa ˈtu te maoro e te rohirohi o te tere o te hoê ati Iseraela i Ierusalema, e faaapî-faahou-hia na to ˈna puai ia tapae atu oia i te oire pǔ. E oaoa roa to ˈna mafatu ia haafaufaa oia i ta ˈna haamaitairaa i te haamoriraa ia Iehova: “E maitai rahi to te mahana hoê i roto i te mau hezere no oe ra, i te mahana atoa e tausani noa ˈtu i te tahi vahi ê. E hinaaro rahi to ˈu i te tiai i te uputa i te fare o tau Atua, i te parahi i te mau tiahapa o te paieti ore. . . . E Iehova sabaota e, e ao to te taata i tiaturi ia oe ra.” Te haapapu ra teie mau parau i te faufaa rahi ta taua mau Iseraela ra i horoa no te haamoriraa a Iehova.—Salamo 84:1-12.
9. Eaha te ohipa i tupu i nia i te nunaa o Iseraela i te oreraa oia e tuu i te haamoriraa a Iehova i mua?
9 Tera râ hoi ma te peapea mau, aita to Iseraela i tuu i te haamoriraa mau i mua. Ua vaiiho ratou i te haamoriraa a te mau atua haavare ia faaino i to ratou itoito no Iehova. E te faahopearaa, ua tuu atura o Iehova ia ratou i roto i te rima o to ratou mau enemi, ma te faatia e ia hopoi-tîtî-hia ratou i Babulonia. Ia faahoˈihia mai ratou i to ratou ra fenua i muri aˈe e 70 matahiti te maoro, ua horoa maira Iehova na Iseraela i te mau aˈoraa puai na roto i te mau peropheta haapao maitai ra o Hagai, Zekaria, e o Malaki. Ua aratai aˈera hoi te tahuˈa ra o Ezera raua te tavana o Nehemia i te nunaa o te Atua, no te patu faahou i te hiero e no te haamau faahou i te haamoriraa mau i reira. Tera râ, a mairi noa ˈi te mau senekele, ua riro faahou aˈera te haamoriraa mau ei tuhaa haihai roa i roto i te nunaa.
Te itoito no te haamoriraa mau i te senekele matamua
10, 11. Eaha te parahiraa o te haamoriraa a Iehova i roto i te oraraa o te mau tavini haapao maitai, ia Iesu i parahi mai i te fenua nei?
10 I te tau i haapaohia e Iehova, ua fa maira te Mesia. Te tiaturi ra hoi te mau taata haapao maitai i te faaoraraa a Iehova. (Luka 2:25; 3:15) Te faataa ra te aamu o te Evanelia a Luka i te parau no te vahine ivi e 84 matahiti ra o Ana “aore roa oia i faarue i te hiero, e tia râ i te haamoriraa i te Atua ma te pure e te haapaeraa maa i te rui e te ao.”—Luka 2:37.
11 Te na ô ra o Iesu e “teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” (Ioane 4:34) A haamanaˈo na i te huru o Iesu ia ˈna i faaruru i te feia taui moni i roto i te hiero. Ua faatiopa aˈera hoi oia i te mau iri e oia atoa i te mau parahiraa a te feia hoo uuairao ra. Te faatia ra o Mareko e: “E aore roa [Iesu] i tuu i te taata ia hopoi i te farii taoˈa na roto i te hiero ra. E ua haapii atura hoi oia ia ratou, na ô atura, E ere anei ua papaihia, E parauhia to ˈu nei fare e fare pureraa no te mau fenua atoa, riro noa iho nei râ ia outou ei ana eiâ.” (Mareko 11:15-17) Oia mau, aita o Iesu i faatia i te hoê noa ˈˈe taata ia rave i te hoê eˈa na roto i te aua o te hiero ia hopoi oia i te mau taoˈa i te tahi atu pae o te oire. Ua haapapu â te mau ohipa a Iesu i te aˈoraa o ta ˈna i horoa na mua ˈtu: “E mata na râ outou i te imi i te basileia o te Atua, e te parau-tia na ˈna.” (Mataio 6:33) Ua vaiiho mai Iesu i te hoê hiˈoraa faahiahia mau na roto i te haamoriraa oia ia Iehova anaˈe ra. Ua faaohipa papu oia i te mau mea ta ˈna i poro.—Petero 1, 2:21.
12. Mea nafea te mau pǐpǐ a Iesu i te faaiteraa e ua tuu ratou i te haamoriraa a Iehova i nia i te parahiraa matamua?
12 Ua vaiiho atoa mai Iesu i te hoê hiˈoraa te tia i ta ˈna mau pǐpǐ ia pee mai ta ˈna i faatupu i ta ˈna ohipa e faaora i te mau ati Iuda faaroo e vai ra i raro aˈe i te faaheporaa e i te mau faateimaharaa a te mau peu faaroo hape. (Luka 4:18) No te auraro i te faaueraa a Iesu e haere e faariro i te mau taata ei pǐpǐ e e bapetizo atu ia ratou, ua faaite te mau kerisetiano matamua ma te itoito, i te hinaaro o Iehova i raro aˈe i te aratairaa a to ratou Fatu i faatiahia mai te pohe maira. Mea oaoa roa na Iehova ia tuu ratou i Ta ˈna haamoriraa i mua. No reira, ua faaora aˈera te melahi iho a te Atua na roto i te hoê semeio, i te mau aposetolo Petero raua o Ioane mai te tapearaa e ua faaue maira ia raua: “A haere i roto i te hiero tia ˈi, a parau atu ai i te taata i te mau parau atoa o teie nei ora.” Ma te itoito faahou, ua auraro aˈera hoi raua. I te mau mahana atoa, ua haere aˈera raua toopiti atoa ra i roto i te hiero i Ierusalema e i tera fare i tera fare “aore e mahana tuua ia ratou i te aˈo, e te haapii atu i te taata, e o Iesu â te Mesia.”—Ohipa 1:8; 4:29, 30; 5:20, 42; Mataio 28:19, 20.
13, 14. (a) Mai te tau mai â o te mau kerisetiano matamua, eaha ta Satani i tamata i te rave i nia i te mau tavini a te Atua? (b) Eaha ta te mau tavini haapao maitai a te Atua i tamau â i te rave?
13 E a uˈana noa ˈi te patoiraa i ta ratou ohipa pororaa, ua aratai aˈera te Atua i ta ˈna mau tavini haapao maitai no te papai i te aˈoraa tano maitai. “E huri i to outou ahoaho atoa i nia ia ˈna; oia hoi te tiai mai ia outou,” o ta Petero ïa i papai i muri noa ˈˈe i te matahiti 62 o to tatou nei tau. “E haapao maitai, e faaitoito, te hahaere nei hoi to outou enemi o te diabolo mai te liona uuru ra, i te imiraa i te taata e pau ia ˈna ra: o te patoi atu ïa ma te faaroo turori ore, ua ite hoi outou e, tei to outou mau taeae atoa i te ao nei taua mau pohe ra.” Papu maitai, ua itoito roa te mau kerisetiano matamua i taua mau parau nei. Ua ite ratou e ia oti ratou i te mauiui maa taime iti, e faaoti roa te Atua i te faaineine ia ratou. (Petero 1, 5:7-10) I taua mau mahana hopea o te amuiraa o te mau mea ati iuda ra, ua faateitei atu â te mau kerisetiano mau i te haamoriraa here a Iehova.—Kolosa 1:23.
14 Mai ta te aposetolo Paulo i tohu mai, ua tupu aˈera te apotata, oia hoi te hoê ravea no te haafariu ê i te taata i te haamoriraa mau. (Ohipa 20:29, 30; Tesalonia 2, 2:3) Mea rahi te mau haapapuraa no nia i te reira, i itehia i te mau matahiti hopea o te senekele matamua. (Ioane 1, 2:18, 19) Ua ueue o Satani ma te manuïa hoi, i te mau kerisetiano haavare i rotopu i te mau kerisetiano mau, e fifi roa ˈtura ïa ia faataa i teie mau “aihere ino” i te mau kerisetiano i faaauhia i te sitona. Tera râ, a mairi noa ˈi te mau senekele, ua tuu vetahi mau taata i te haamoriraa a te Atua i mua, noa ˈtu te pohe. Tera râ, e ere i te mau matahiti fatata mai i “to te Etene anotau” to te Atua haaputu-faahou-raa i ta ˈna mau tavini no te faateitei i te haamoriraa mau.—Mataio 13:24-30, 36-43; Luka 21:24.
Ua faateiteihia te haamoriraa a Iehova i to tatou nei tau
15. Mai te matahiti 1919 mai, mea nafea te mau parau tohu a Isaia 2:2-4 e Mika 4:1-4 i te tupuraa?
15 I te matahiti 1919, ua tuu maira o Iehova i roto i te toea faatavaihia, i te mana no te faatupu i te ohipa pororaa itoito mau i roto i te ao taatoa nei, tei faateitei i te haamoriraa a te Atua mau ra. Na roto i te tae-rahi-raa mai te “mau mamoe [taipe] ê atu” i te matahiti 1935 ra e tae roa mai i teie mahana, ua rahi noa ˈtu â te taata i te paiuma, i te pae varua, i “te mouˈa o Iehova, i te fare o te Atua”. I te roaraa o te matahiti taviniraa 1993, 4 709 889 rahiraa Ite no Iehova tei faahanahana ia ˈna na roto i te titauraa i te tahi pae ia amui atoa mai i roto i ta ˈna haamoriraa teitei mau ra. Auê ïa taa-ê-raa rahi e te veve mau o te mau “mouˈa” o te mau pǔpǔ faaroo a te hau emepera o te haapaoraa hape o te ao nei e, i roto iho â râ i te amuiraa faaroo kerisetiano!—Ioane 10:16; Isaia 2:2-4; Mika 4:1-4.
16. Eaha te tia i te taatoaraa o te mau tavini a te Atua ia rave ia au i tei tohuhia mai e Isaia 2:10-22?
16 Te faariro nei te mau melo o te haapaoraa hape i ta ratou mau fare pure, e oia hoi i ta ratou mau fare pure rarahi, e oia atoa i to ratou mau upoo faatere haapaoraa, ei mau mea “teitei,” ma te horoa no ratou i te mau tiaraa teitei roa. Tera râ, a tapao na eaha ta Isaia i tohu: “Te mata teitei o te taata nei, e faahaehaahia ïa, e te teitei o te taata nei, e tuuhia ïa i raro; e o Iehova anaˈe ra te faateiteihia i tei reira mahana.” Afea hoi te reira e tupu ai? I te tau ïa o te ati rahi e fatata roa maira ia “[moe roa] te mau idolo ra.” I te mea hoi e te fatata roa maira taua taime riaria mau ra, e tia ïa i te mau tavini atoa a te Atua ia hiˈo maite eaha mau na te parahiraa o te haamoriraa a Iehova i roto i to ratou oraraa.—Isaia 2:10-22.
17. Mea nafea te mau tavini a Iehova i te faaiteraa e ua tuu mau â ratou i te haamoriraa a Iehova i nia i te parahiraa matamua?
17 Mai te hoê fetii autaeae i roto i te ao nei, ua ite-maitai-hia te mau Ite no Iehova no to ratou itoito i roto i te ohipa pororaa i te Basileia. E ere ta ratou haamoriraa i te hoê noa haapaoraa paruparu, i haapaohia no te hoê hora aore ra fatata hoê hora i te hebedoma. E ere, o to ratou râ huru oraraa taatoa. (Salamo 145:2) Inaha, i te matahiti i mairi aˈenei hau atu i te 620 000 mau Ite tei faanaho i ta ratou mau ohipa no te taviniraa kerisetiano ma te taime taatoa. Papu maitai, aita te toea faatavaihia i haafaufaa ore i te haamoriraa a Iehova. E itehia te reira i roto i ta ratou mau tauaparauraa i te mau mahana atoa e i ta ratou ohipa pororaa i te vahi taata, ia titau iho â râ te mau haamâuˈaraa a te utuafare e ia rave puai ratou i te ohipa i roto i ta ratou mau ohipa i te pae tino.
18, 19. A horoa mai na i te tahi mau hiˈoraa tei faaitoito paha ia outou, ia outou i taio i te mau aamu no nia i te oraraa o te mau Ite.
18 Te faaite ra te mau aamu no nia i te oraraa o te mau Ite i neneihia i roto i Te Pare Tiairaa, mea nafea te mau taeae e te mau tuahine i te tuuraa i te haamoriraa a Iehova i nia i te parahiraa matamua i roto i to ratou oraraa. Ua haamau te hoê tuahine apî roa tei pûpû i to ˈna oraraa no Iehova i te onoraa o to ˈna matahiti, i te taviniraa mitionare ei tapao na ˈna. E te mau taeae e te mau tuahine taurearea, eaha te tapao ta outou e nehenehe e maiti o te tauturu ia outou ia tuu i te haamoriraa a Iehova i mua roa i roto i to outou oraraa?—A hiˈo i te tumu parau “Te tapaparaa i te hoê tapao mai te onoraa o to ˈu matahiti,” i roto i Te Pare Tiairaa o te 1 no mati 1992, api 26-30.
19 Te horoa atoa ra te hoê tuahine ivi ruhiruhia i te tahi hiˈoraa maitai roa no nia i te tuuraa i te haamoriraa a Iehova i nia i to ˈna parahiraa mau. Ua horoa oia i te hoê faaitoitoraa rahi mau i te pae no te mau-maite-raa, i te feia o ta ˈna i tauturu i roto i te haapiiraa i te parau mau. O ratou hoi to ˈna “fetii.” (Mareko 3:31-35) Mai te peu e mauiui outou i te poheraa o te hoê taata tei herehia e outou na, e farii anei outou i te turu e te tauturu a te feia apî aˈe i roto i te amuiraa? (A tapao na mea nafea to Tuahine Winifred Remmie faaiteraa i to ˈna manaˈo i roto i te tumu parau ra “Ua apiti atu vau i te tau auhune,” i neneihia i roto i Te Pare Tiairaa o te 1 no tiurai 1992, api 21-3.) Outou e te mau tavini e tavini ra ma te taime taatoa, a faaite e tei nia mau â te haamoriraa a Iehova i te parahiraa matamua i roto i to outou oraraa, na roto i te taviniraa ma te haehaa i te vahi i haapaohia na outou, e ma te auraro papu i te aratairaa teotaratia. (A tapao na i te hiˈoraa o Taeae Roy Ryan, i faatiahia i roto i te tumu parau ra “Ia ati maite outou i te faanahonahoraa a te Atua” i roto i Te Pare Tiairaa o te 1 no titema 1991, api 24-7, reo farani.) Ia haamanaˈo na tatou e ia tuu tatou i te haamoriraa a Iehova i nia i te parahiraa matamua, e nehenehe tatou e papu e e haapao mai oia ia tatou. Eita tatou e hepohepo no nia i te mau taoˈa materia e hinaarohia i roto i to tatou oraraa. Te faaite maira te ohipa i orahia mai e te mau Tuahine Olive raua o Sonia Springate i te reira.—A hiˈo i te tumu parau ra “Ua imi na mua mâua i te Basileia” i roto i Te Pare Tiairaa o te 1 no febuare 1994, api 20-5.
20. Eaha te mau uiraa faufaa roa ta tatou e nehenehe e ui i teie nei?
20 No reira tatou tataitahi, eita anei e tia ia tatou ia ui i te tahi mau uiraa faufaa mau? Eaha te parahiraa o te haamoriraa a Iehova i roto i to ˈu nei oraraa? Te faatupu mau ra anei au i te parau no te pûpûraa vau ia ˈu iho e rave i te hinaaro o te Atua ia au i te aravihi maitai roa ˈˈe e vai nei ia ˈu nei? Eaha te mau tuhaa ta ˈu e nehenehe e haamaitai i roto i to ˈu oraraa? E horoa mai te tuatapapa-maite-raa tatou i te tumu parau i mua nei i te ravea e faaite mai e nafea tatou ia faaohipa i ta tatou mau taoˈa ia au i te mau mea matamua ta tatou i maiti i roto i te oraraa—te haamoriraa i te Fatu Mana hope ra o Iehova, to tatou Metua here.—Koheleta 12:13; Korinetia 2, 13:5.
Hiˈo-faahou-raa
◻ Eaha ta Iehova e titau ra i te pae no te haamoriraa?
◻ Ua riro te sekene ei ravea haamanaˈoraa i te aha?
◻ I te senekele matamua o to tatou nei tau, o vai ma te mau hiˈoraa i te pae no te itoito no te haamoriraa mau, e mea nafea to ratou faaiteraa i te reira?
◻ Mai te matahiti 1919 mai, mea nafea te haamoriraa a Iehova i te faateiteiraahia?