Te faaroo itoito o to tatou mau taeae no Rwanda

I TE omuaraa o te matahiti 1994, ua hitimahuta te ao i te faatiaraa o te taparahiraa taata i nia i te hoê faito teitei i te fenua no Afirika ra o Rwanda. Ua haamata taue te hoê tamaˈi tivila—te haaputuraa i te hoê au ore ehia senekele te roaraa.

I mua i te toparaa taatoa o te ture e te faanahoraa, ua faahepohia na 2 000 e hau atu mau Ite no Iehova i Rwanda ia horo ê no te ora. Fatata e 1 300 tei ite mai i te hoê haapuraa e te parururaa i roto i te aua i pihai iho i te fenua no Zaire e no Tanzania, aita râ vetahi i nehenehe e horo i te taime au. Te peapea nei matou i te faaite e fatata 400 o to tatou mau taeae e tuahine—te taata paari e te mau tamarii, e feia tivila ratou paatoa hoi—ua pohe ïa ratou i roto i te haavîraa puai ino mau. Te taˈi nei te mau kerisetiano ati aˈe te ao nei i te pohe o teie mau taata o tei tapea i to ratou haapao maitai e te ite nei ratou i te tamahanahanaraa i roto i te parau tǎpǔ a te Bibilia no nia i te tia-faahou-raa.—Ioane 11:25.

Eaha te huru o te mau taeae e te mau tuahine no Rwanda? Ua tonohia te mau matahiapo i roto e rave rahi oire no te hiˈo e eaha te ohipa matamua te tia ia rave. Te faaite nei te hoê faatiaraa e te faaruru nei te mau taeae no Rwanda i te huru tupuraa “ma te tura rahi e te itoito.” Ei hiˈoraa, te mau mea matamua o ta te mau taeae i ani mai o te mau buka ïa e te mau vea no nia i te Bibilia. ‘E au ra e te haapeapea rahi aˈe ra ratou i te noaaraa ta ratou maa i te pae varua i te tauturu i te pae materia, noa ˈtu te ere nei ratou e rave rahi ohipa,’ mea na reira te faatiaraa i te faahoperaahia. E ere i te mea maitai te oraraa i roto i te aua, ‘te tuhaa e orahia ra e to tatou mau taeae o te vahi mâ roa ˈˈe.’

Ua haaputu mai te Taiete Watch Tower i te moni no te hoo i te maa, te ahu taoto, te ahu, te tiaa, e te raau. Ua faaite atoa to tatou mau taeae no te fenua Farani i te huru horoa maitai, e i te omuaraa o te avae tiunu, ua afaihia fatata e piti tane taoˈa tauturu na to tatou mau taeae no Rwanda e hiaai rahi ra.

Ma te maere ore, ua hope teie huru tupuraa i nia i te hoê faaiteraa nehenehe mau. Ua putapû roa te feia e mataitai ra i te mea e ua noaa i to tatou mau taeae no Rwanda i taua huru tauturu e te turu no ǒ mai i to ratou mau hoa Ite, e ua nehenehe e opere i taua mau tauturu na vetahi ê atoa. Ua faatia atoa vetahi e o te mau Ite no Iehova anaˈe i roto i te aua tei haerehia mai e farerei e te mau melo o ta ratou haapaoraa!

Te faahaamanaˈo maira te ati e farereihia nei e to tatou mau taeae no Rwanda e i teie “tau hopea,” e riro te mau taata i te “iria” e te “haavî.” (Timoteo 2, 3:1-5; Today’s English Version) E noa ˈtu e aita o Iehova i tǎpǔ i te hoê paruru semeio i mua i te ati i te pae tino no ta ˈna mau tavini, ua tǎpǔ oia e e haapao i to ratou maitai i te pae varua e to ratou mau taairaa e o ˈna e, i te roaraa o te faatereraa Tausani matahiti a te Mesia, e faatia oia i te feia i pohe i teie nei. (Salamo 91:1-10) Ia pûpû noa tatou ma te tamau i ta tatou mau pure no te ani ia Iehova ia turu e ia tauturu i to tatou mau taeae no Rwanda e ora nei i teie tau tamataraa no te haamaitai atu ia ratou.—Salamo 46:1.