Ei hamani maitai rahi to outou e tia ˈi
“E tena na, ei faaau aroha noa, e te hamani maitai, e te haehaa, e te mǎrû.”—KOLOSA 3:12.
1. No te aha e hinaaro-rahi-hia te hamani maitai i teie mahana?
AITA aˈenei i itehia i roto i te aamu i te taata e rave rahi i te hinaaroraa i te paruru a te hamani maitai. I mua i te maˈi, te poia, te ohipa ore, te ohipa taparahi taata, te mau tamaˈi, te huenane, e te mau ati natura, e rave rahi milioni taata teie e hinaaro nei i te tauturu. Te vai ra râ te hoê fifi ino roa ˈtu â, e o te huru peapea mau hoi o te huitaata nei i te pae varua. “[Te haavare nei o Satani],” tei ite e e maa taime poto to ˈna e toe nei “i to te ao atoa nei.” (Apokalupo 12:9, 12) No reira, te feia iho â râ i rapae mai i te amuiraa kerisetiano mau, e nehenehe ratou e erehia i to ratou ora, e aita te ture a te Bibilia e faahiti ra i te parau no te hoê tia-faahou-raa no te feia e haamouhia i te mahana haavaraa a te Atua i mua nei.—Mataio 25:31-33, 41, 46; Tesalonia 2, 1:6-9.
2. No te aha o Iehova i ore ai e haamou i te feia paieti ore?
2 Inaha, e tae roa ˈtu i te tuhaa hopea o te mau mahana hopea nei, e tamau â te Atua o Iehova i te faaoromai e i te faaite i to ˈna hamani maitai i te feia mauruuru ore e i te feia paieti ore. (Mataio 5:45; Luka 6:35, 36) Ua na reira o ˈna mai ta ˈna i horoa i te hoê taime hou oia e faautua ˈtu ai i te nunaa faaroo ore ra o Iseraela. “Te na ô maira te Fatu ra o Iehova, Te ora nei au ra, aore roa o ˈu e mauruururaa i te pohe o te taata ino ra; ia fariu mairâ te taata i ta ˈna parau ino ia ora: e fariu mai outou, e fariu mai outou, i ta outou mau parau ino ra; eaha hoi outou i hinaaro ai i te pohe, e te utuafare o Iseraela e?”—Ezekiela 33:11.
3. Eaha te hiˈoraa e vai nei ia tatou nei no nia i te hamani maitai o Iehova i nia i te feia e ere i te taata no ˈna, e eaha ta tatou e haapii mai i te reira?
3 Ua faaaano atoa o Iehova i to ˈna hamani maitai i nia i te mau ati Nineve paieti ore. Ua tono o Iehova i ta ˈna peropheta ia Iona no te faaara ˈtu ia ratou no nia i te haamouraa e fatata roa maira. Ua farii maitai ratou i te pororaa a Iona e ua tatarahapa. Na te reira i tapea i te Atua hamani maitai o Iehova eiaha e haamou i te oire i taua tau ra. (Iona 3:10; 4:11) Mai te peu e ua faaite te Atua i to ˈna hamani maitai i nia i te mau ati Nineve, o te riro i te fanaˈo i te tia-faahou-raa, eaha ˈtu â ïa to ˈna hamani maitai i te feia e faaruru ra i teie mahana i te hoê haamouraa mure ore!—Luka 11:32.
Te hoê ohipa hamani maitai aita e faaauraa
4. Mea nafea o Iehova ia faaite mai i to ˈna hamani maitai i nia i te mau taata i teie mahana?
4 Ia au i to ˈna huru hamani maitai, ua haamana o Iehova i ta ˈna mau Ite no te haere e faaite i to ratou mau taata-tupu i te “evanelia o te basileia nei.” (Mataio 24:14) E ia pahono te taata ma te mauuruuru i teie nei ohipa faaoraraa, e haamahora o Iehova i to ratou mau mafatu ia mau ratou i te poroi o te Basileia. (Mataio 11:25; Ohipa 16:14) Mai to ratou Atua, te faaite nei te mau kerisetiano mau i te hamani maitai rahi na roto i te hoˈi-faahou-raa e farerei i te feia i anaanatae mai, ma te tauturu ia ratou, i te vahi e nehenehe, na roto i te hoê haapiiraa bibilia. No reira, i te matahiti 1993, hau atu i te maha milioni e te afa mau Ite no Iehova, i roto e 231 fenua, tei horoa hau atu i te hoê miria hora i roto i te ohipa pororaa i tera fare i tera fare e i te haapiiraa i te Bibilia e to ratou mau taata-tupu. E i to ratou aˈe pae, e nehenehe teie mau taata i anaanatae apî e pûpû i to ratou oraraa no Iehova e e apiti mai i roto i te mau anairaa o ta ˈna mau Ite bapetizohia. No reira, e rave atoa ïa ratou iho i te hopoia o teie ohipa hamani maitai aita e faaauraa no te tauturu i te mau taata e nehenehe e riro mai ei pǐpǐ e mau nei â i roto ao a Satani i haapaohia no te pohe.—Mataio 28:19, 20; Ioane 14:12.
5. Ia tapae te hamani maitai o te Atua i nia i to ˈna otia, eaha te ohipa e tupu i nia i te haapaoraa tei ore i faahanahana i te Atua?
5 Fatata roa o Iehova i te haa mai “[te taata] i te tamaˈi ra.” (Exodo 15:3) No to ˈna hamani maitai rahi i to ˈna iˈoa e i to ˈna nunaa, e haamou roa oia i te feia paieti ore e e haamau i te hoê ao apî parau-tia. (Petero 2, 3:13) Te mau tuhaa matamua e tamata i te mahana e riri ai o Iehova, o te mau ekalesia ïa a te amuiraa faaroo kerisetiano. Mai ta te Atua i ore i faaora i to ˈna iho hiero i Ierusalema mai roto mai i te rima o te arii no Babulonia, eita atoa oia e faaora i te mau faanahonahoraa faaroo tei faaino ia ˈna. E tuu te Atua i roto i te mafatu o te mau melo o te mau Hau amui i te manaˈo e faaano roa i te amuiraa faaroo kerisetino i te mau huru haapaoraa hape atoa. (Apokalupo 17:16, 17) “E teie nei o vau nei,” o ta Iehova ïa e parau ra, “e ore ta ˈu mata e faaherehere, e ore hoi au e aroha, e tahoo râ vau i ta ratou parau i nia i to ratou iho upoo.”—Ezekiela 9:5, 10.
6. E faaite te mau Ite no Iehova i te hamani maitai i roto i teihea tuhaa?
6 Oi vai aˈe te taime, e tamau â te mau Ite o Iehova i te faaite i to ratou hamani maitai i to ratou mau taata-tupu na roto i te faaitoitoraa i te poro i te poroi faaoraraa a te Atua. E oia hoi, mai te peu e e nehenehe, e tauturu atoa ratou i te mau taata e hinaaro mau ra ia tauturuhia i te paeau materia. E i roto i taua tuhaa ra, ta ratou hopoia matamua te haapaoraa ïa i te mau hinaaro o te mau melo o to ratou utuafare piri roa e o te feia piri roa ia ratou i roto i te faaroo. (Galatia 6:10; Timoteo 1, 5:4, 8) Ua riro mau â te mau ohipa tamahanahanaraa i ravehia e te mau Ite no Iehova no te mau hoa faaroo i mauiui e rave rahi mau ati, ei mau hiˈoraa faahiahia mau no te hamani maitai. Tera râ, eita te mau kerisetiano e tiai ia tupu te hoê ati i reira ratou e faaite ai i to ratou hamani maitai mau. E oioi noa ratou i te faaohipa i taua huru nei i te mau huru taime atoa o to tatou nei oraraa.
Ua riro te hamani maitai ei tuhaa no te huru taata apî
7. (a) I roto i te Kolosa 3:8-13, mea nafea te hamani maitai i te faatuatiraahia i te huru taata apî? (b) E faaohie aˈe te hamani maitai rahi i te mau kerisetiano ia rave i te aha?
7 Parau mau, e riro to tatou naturaraa taata hara e te faaohiparaa ino a te ao a Satani ei mau fifi no to tatou manaˈo hamani maitai. No reira te Bibilia e ru mai ai ia tatou ia haapae roa i te “riri, te tairoiro, te feii, te faaino, e te parau tiaâ i to outou vaha.” Te aˈohia mai nei râ tatou e ‘faaahu ia tatou i te huru taata apî’—te hoê huru e au i to te Atua huru. Na mua roa ˈˈe, te faauehia mai nei tatou e “faaau aroha noa, e te hamani maitai, e te haehaa, te mǎrû, e te faaoromai rahi.” I muri iho, te faaite maira te Bibilia e nafea râ tatou ia faaite i taua mau huru nei. “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai te Mesia atoa i faaore i ta outou na, e na reira atoa outou.” E ohie aˈe tatou i te faaore i ta vetahi ê ra hara mai te peu ua atuatu tatou i te ‘hamani maitai mau’ no to tatou mau taeae.—Kolosa 3:8-13.
8. No te aha e mea faufaa roa ia faatupu i te huru feruriraa e faaore i ta vetahi ê hara?
8 I te tahi aˈe pae, ia ore tatou e faaite i te hamani maitai na roto i te faaoreraa i ta vetahi ê ra hara, e riro ïa to tatou taairaa e o Iehova i te fifi. Ua haapapu-maitai-hia te reira e Iesu i roto i ta ˈna parabole no nia i te tavini i ore i faaore i ta vetahi ê ra hara, e tei tuuhia i roto i te tapearaa “e ia hoona roa ta ˈna tarahu ra ia ˈna.” Ua tupu teie fifi i nia i te tavini no te mea aita roa ˈtu o ˈna i hamani maitai i to ˈna hoa tavini tei taparu e faaore mai i ta ˈna hara. Ua faaoti o Iesu i te parabole i te na ôraa e: “E na reira atoa mai tau Metua i te ao ra ia outou atoa na, ia ore outou ia faaore ma te aau atoa i te hapa a to [outou] taeae.”—Mataio 18:34, 35.
9. Mea nafea te hamani maitai rahi i te faaiteraahia i roto i te tuhaa faufaa roa o te huru taata apî?
9 Te faaiteraa i te aau hamani maitai, e tuhaa faufaa roa ïa no te aroha. E ua riro hoi te aroha ei tapao no te haapaoraa kerisetiano mau. (Ioane 13:35) No reira, te faaoti ra ïa te faataaraa a te Bibilia no nia te huru taata apî e: “E ei nia roa iho i taua mau mea atoa nei, o te aroha o taua tatua nehenehe roa ra ïa.”—Kolosa 3:14.
Te nounou—Te hoê fifi no te hamani maitai
10. (a) Na te aha e rave e ia mau roa te pohehae i roto i to tatou mafatu? (b) Eaha te mau faahopearaa iino e nehenehe e tupu mai na roto i te pohehae?
10 No to tatou nei huru naturaraa taata hara, e ohie roa te mau manaˈo nounou i te mau roa i roto i to tatou mafatu. E riro paha te hoê taeae aore ra te hoê tuahine i te fanaˈo i to ˈna mau huru aravihi aore ra i te mau taoˈa materia aita ta tatou. Aore ra ra e riro paha e e mau haamaitairaa e e mau faufaa i te pae varua tei horoahia na te hoê taata. Mai te peu e e faahinaaro tatou i te reira, e nehenehe anei ta tatou e hamani maitai ia ratou? Papu maitai eita roa ˈtu. Inaha, e riro te mau manaˈo pohehae i te turai ia tatou ia faaino aore ra ia rave i te tahi mau ohipa au ore, ia au i ta Iesu i parau no nia i te taata: “No te î hoi o te aau i parau ai te vaha.” (Luka 6:45) E nehenehe vetahi pae e amui mai i roto i taua huru faaino ra. No reira e riro atura ïa te hau i roto i te hoê utuafare aore ra i te hoê amuiraa i te ore.
11. Mea nafea na taeae hoê ahuru o Iosepha i te oreraa e vaiiho i te tahi parahiraa no te hamani maitai i roto i to ratou mafatu, e eaha ihora hoi te faahopearaa?
11 A hiˈo na eaha te ohipa i tupu i roto i te hoê utuafare fetii rahi. Ua rahi roa te pohehae o na tamarii tamaroa hoê ahuru a Iakoba i to ratou taeae iti apî roa o Iosepha no te mea o ˈna ta to ratou metua tane tamaiti here-roa-hia. E te faahopearaa, “ua feii mai ra ratou ia ˈna, e aore i tia ia parau mǎrû mai ia ˈna.” I muri aˈe, ua fanaˈo o Iosepha i te mau moemoeâ no ǒ mai i te Atua, inaha te haapapu maira hoi te reira e te haamaitaihia maira oia e Iehova. “Rahi maira to [to ˈna mau taeae] riri ia ˈna.” I te mea hoi e aita ratou i iriti roa i te pohehae i roto i to ratou mafatu, aita ˈtura ïa to te hamani maitai e parahiraa faahou e ua aratai aˈera hoi te reira ia ratou ia rave i te hara.—Genese 37:4, 5, 11.
12, 13. Eaha ta tatou e rave ia ô mai te mau manaˈo pohehae i roto i to tatou mafatu?
12 Ma te ino mau, ua hoo atura ratou ia Iosepha ei tîtî. E no te huna i ta ratou ohipa hape, ua rave aˈera ratou e ia tiaturi to ratou metua tane e ua pohe o Iosepha i te hoê animala oviri. Tau matahiti i muri aˈe, ua itehia aˈera ta ratou hara i rave ia faahepo te oˈe ia ratou e haere i Aipiti e hoo mai i te maa. Ua faahapa maira te taata haapao maa, ta ratou hoi i ore i ite e o Iosepha, ia ratou i te ohipa hiˈo e ua parau atura ia ratou eiaha e haere faahou mai e ani i ta ˈna tauturu e tae noa ˈtu i te taime ratou e aratai mai ai i to ratou taeae apî roa o Beniamina. E i taua mau taime ra, o Beniamina ta to ratou metua tane tamarii here roa ˈˈe, e ua ite ratou e eita o Iakoba e hinaaro e tuu ia ˈna.
13 E a tia noa ˈi ratou i mua ia Iosepha, ua turai aˈera to ratou mau haava manaˈo ia ratou ia farii e: “Ua hara mau tatou i to tatou iho taeae [Iosepha] ra; ua ite hoi tatou i to ˈna mauiui aau, a taparu mai ai oia ia tatou ra, e aore tatou i faaroo atu; i roohia mai ai tatou i teie nei ati.” (Genese 42:21) Na roto i to ˈna mau huru hamani maitai papu mau, ua tauturu atura o Iosepha i to ˈna mau taeae ia faaite mai ratou e ua tatarahapa mau anei ratou. E i muri iho ua faaite atura oia ia ratou o vai mau na oia e ua faaore atura i ta ratou hara ma te aau mahora. Ua tupu faahou atura hoi te autahoêraa o te utuafare. (Genese 45:4-8) Tatou te mau kerisetiano, e haapiiraa ta tatou e huti mai i teie ohipa i tupu. Ma te ite i te mau faahopearaa iino o te nounou, e pure tatou ia Iehova e tauturu mai ia tatou ia taui i te mau manaˈo pohehae ei mau manaˈo ‘hamani maitai rahi.’
Te tahi atu mau haafifiraa i te hamani maitai
14. No te aha tatou e ape ai i te tuu ia tatou i mua i te haavîraa uˈana?
14 Te tahi atu ohipa e haafifi ia tatou ia riro ei taata hamani maitai, e nehenehe ïa e tupu ia tuu faufaa ore noa tatou ia tatou i mua i te haavîraa uˈana. Te mau ohipa tuaro e te mau peu faaanaanataeraa manaˈo e faaitoito nei i te hinaaro puai i te haavîraa uˈana ei ravea e noaa ˈi te anaanatae. I te mau tau bibilia, e mataitai tamau na te mau etene i te mau aroraa i rotopu i te mau aito e te tahi atu mau huru hamani-ino-raa taata i roto i te mau arena a te hau emepera roma. Ia au i te hoê taata tuatapapa aamu, e “faaino roa [teie huru peu faaanaanataeraa manaˈo] i te mau manaˈo maitai e e faatupu hoi i te mauiui e faataa ê i te taata i te mau animala.” Hoê â faahopearaa to te mau peu faaanaanataeraa manaˈo i roto i te ao o teie nei tau. E tia i te mau kerisetiano, e faaitoito nei i te riro ei mau taata hamani maitai, ia maiti maitai i ta ratou mau buka e taio, i te mau hohoˈa ta ratou e mataitai, e i ta ratou mau porotarama afata teata. Ma te paari, e tapea ratou i roto i to ratou feruriraa i te mau parau a te Salamo 11:5: “Area . . . te rave parau ino ra, ua riri roa [Iehova] ia ˈna.”
15. (a) Nafea te hoê taata e nehenehe ai e faaite e te ere-mau-hia ra o ˈna i te hamani maitai? (b) Mea nafea to te mau kerisetiano mau pahonoraa i te mau hinaaro o te mau hoa faaroo e o to ratou mau taata-tupu?
15 E riro atoa te hoê taata e haapao noa ia ˈna anaˈe ra i te erehia i te hamani maitai. Mea faufaa roa te reira, mai ta te aposetolo Ioane e faataa ra: “O te taata râ tei ia ˈna te taoˈa o teie nei ao, e ite atura oia i tana taeae i te atiraa, pipiri atura to ˈna aau ia ˈna, teihea te hinaaro o te Atua i te parahiraa i roto ia ˈna?” (Ioane 1, 3:17) Ua faaite-atoa-hia te parau no te ereraahia i teie huru hamani maitai na te tahuˈa faahua parau-tia e te ati Levi o te parabole a Iesu no nia i te taata samaria ra. I te iteraa ˈtu raua i te huru o to ratou taeae ati Iuda e fatata ˈtura i te pohe, ua faahahau ê atura raua, na te tahi pae eˈa ˈtura i te haere. (Luka 10:31, 32) Area te mau kerisetiano hamani maitai, ua pahono oioi ratou i te mau hinaaro materia e varua o to ratou mau taeae. E mai taua taata Samaria o te parabole a Iesu, mea anaanatae atoa na ratou i te mau hinaaro o te feia ěê. No reira, e horoa ratou ma te oaoa i to ratou taime, i to ratou puai, e i ta ratou mau taoˈa materia no te faahaere i te ohipa faariroraa i te mau taata ei pǐpǐ, i mua. Ia na reira ratou, te turu ra ïa ratou i te ohipa faaoraraa i te mau milioni taata.—Timoteo 1, 4:16.
Hamani maitai i te feia maˈi
16. Eaha te mau otia ta tatou e farerei i te pae no te maˈi?
16 Ua riro te maˈi ei tuhaa no te huitaata tia ore e pohe atura. E aita te mau kerisetiano i erehia i te reira, e e ere te rahiraa o ratou i te mau tino rave ohipa i te pae no te utuuturaa maˈi, e eita atoa ta ratou e nehenehe e faatupu i te mau semeio mai ta te tahi mau kerisetiano matamua tei horoahia mai i taua mana ra e te Mesia e ta ˈna mau aposetolo, i faatupu. E i te poheraa te mau aposetolo a te Mesia e tei apiti mai ia ratou i muri iho, ua ore taua mau mana semeio ra. No reira, ua taotiahia ïa to tatou aravihi no te tauturu i te feia e mauiui nei i te pae tino, e tae noa ˈtu te feia aita te roro e ohipa maitai ra e e ite nei i te tahi mau ohipa huru ê o te maˈi te tumu.—Ohipa 8:13, 18; Korinetia 1, 13:8.
17. Eaha te haapiiraa ta tatou e haapii mai i te pae no te huru i faaitehia i nia i te taata maˈi e te taata e oto ra o Ioba?
17 E pinepine te manaˈo taiâ i te apee i te maˈi. Ei hiˈoraa, ua taiâ roa te taata mǎtaˈu i te Atua ra o Ioba no te maˈi ino e te mau fifi ta Satani i tuu mai i nia ia ˈna. (Ioba 1:18, 19; 2:7; 3:3, 11-13) Ua hinaaro hoi o ˈna i te mau hoa o te hamani maitai mai ia ˈna e o te “haamahanahana i te aau taiâ.” (Tesalonia 1, 5:14) Maoti te reira, ua haere maira e toru na taata faahua tamahanahana e farerei ia ˈna e ua rave oioi aˈera i te tahi mau faaotiraa. Ua faaino roa ratou i te huru taiâ o Ioba na roto i te parauraa ˈtu e te tumu o to ˈna mau fifi o te tahi ïa ohipa hape i ravehia e ana. No te faaite i to ratou hamani maitai, e haapae te mau kerisetiano i te topa i roto i teie huru herepata ia roohia te mau hoa faaroo i te maˈi aore ra ia roohia ratou i te manaˈo taiâ. I te tahi taime, te ohipa matamua e hinaarohia e teie mau huru taata, o te mau farereiraa hamani maitai ïa a te mau matahiapo aore ra a te tahi atu mau kerisetiano paari e faaroo mai ma te hamani maitai, e e taa eaha to ratou mau hinaaro, e o te horoa ˈtu hoi i te aˈoraa here mau no roto mai i te mau Papai.—Roma 12:15; Iakobo 1:19.
Hamani maitai i te feia paruparu
18, 19. (a) Eaha te huru o te mau matahiapo i nia i te feia paruparu aore ra i nia te feia i tiavaruhia? (b) E noa ˈtu â ïa e e titauhia e faatupu i te hoê tomite haava, no te aha e mea faufaa roa ia hamani maitai te mau matahiapo i te feia i rave i te hara?
18 E tia i te mau matahiapo ia faaite i to ratou hamani maitai. (Ohipa 20:29, 35) “O tatou o te itoito nei, e faaoromai i te mau paruparu o te itoito ore e tia ˈi,” o ta te Bibilia ïa e faaue maira. (Roma 15:1) I te mea hoi e e mau taata tia ore tatou, te hapa nei ïa tatou paatoa. (Iakobo 3:2) E titauhia te mǎrû i nia i te taata “i roohia i te hapa.” (Galatia 6:1) Eita roa ˈtu te mau matahiapo e hinaaro e riro mai te mau Pharisea faahua parau-tia tei ore i faaite i te manaˈo tano i roto i ta ratou huru faaohiparaa i te Ture a te Atua.
19 E pee râ te mau matahiapo i te mau hiˈoraa here mau o te Atua o Iehova e o Iesu Mesia. Ta ratou ohipa matamua, te faaamuraa ïa, te faaitoitoraa, e te faahaumǎrûraa i te nǎnǎ a te Atua. (Isaia 32:1, 2) Maoti hoi i te tamata i te faatere i te mau ohipa na roto i te haamauraa i te mau ture e rave rahi, e rave ratou i te mau faaueraa tumu maitai i roto i te Parau a te Atua. No reira, te tiaraa o te mau matahiapo, te paturaa ïa, te faatupuraa i te oaoa e te mauruuru no te maitai o Iehova, i roto i te mafatu o to ratou mau taeae. Ia rave te hoê hoa faaroo i te tahi hape iti haihai, e ape te hoê matahiapo i te aˈo ia ˈna i te hoê vahi e faaroohia mai ai raua. Mai te peu e e tia ia paraparauhia no te taatoaraa, e turai te mau manaˈo mahanahana hamani maitai i te matahiapo, ia rave mai ia ˈna i te hiti e ia paraparau no nia i te fifi ma te ore e faaroohia mai. (A faaau e te Mataio 18:15.) Papu maitai, e ere i te mea ohie, e tia i te matahiapo ia faaoromai e ia riro mau ei tauturu. Eita roa ˈtu o ˈna e hinaaro e imi i te mau hororaa no te tiavaru i te hoê taata mai roto atu i te amuiraa. E noa ˈtu e titauhia e faatupu i te hoê tomite haava, e faaite te mau matahiapo i te hamani maitai rahi, ia tuatapapa ratou i te parau no te taata i rave i te hoê ohipa hape. E nehenehe to ratou maitai e tauturu i te hoê taata ia tatarahapa.—Timoteo 2, 2:24-26.
20. Afea te mau manaˈo hamani maitai e ore ai e tano, e no te aha?
20 Te vai ra râ te tahi mau taime i reira te hoê tavini o Iehova e ore ai e nehenehe e faaite i te hamani maitai. (A faaau e te Deuteronomi 13:6-9.) No te hoê kerisetiano “te amuimuiraa ˈtu” i roto i te hoê hoa aore ra i te hoê fetii piri roa tei tiavaruhia, e nehenehe ïa e riro ei tamataraa mau. I roto i taua tuhaa ra, mea faufaa roa ia ore e faaite i te mau manaˈo hamani maitai. (Korinetia 1, 5:11-13) E nehenehe te mau-papu-raa tatou mai te reira te huru e faaitoito i te taata i tiavaruhia ia tatarahapa. Hau atu, i te pae no te amuimuiraa ˈtu e te hoê vahine aore ra tane, e tia i te mau kerisetiano ia ape i te faaite i te mau huru hamani maitai e nehenehe e aratai i te peu tia ore i te pae taatiraa.
21. I roto i teihea ˈtu â mau tuhaa tatou e hinaaro ai e faaite i te hamani maitai rahi, e eaha te mau haamaitairaa?
21 Eita e navai i te parau no te tauaparau no nia i te mau tuhaa e rave rahi e nehenehe ai e faaite i te hamani maitai rahi—i te pae no te feia ruhiruhia, te feia e oto ra, te feia e hamani-ino-hia e to ratou mau hoa faaipoipo. E tia atoa ia tatou ia hamani maitai i te mau matahiapo e haa puai nei i te ohipa. (Timoteo 1, 5:17) A faatura ia ratou e a tauturu ia ratou. (Hebera 13:7, 17) “Ei aau [hamani maitai to outou],” ta te aposetolo Petero ïa i papai. (Petero 1, 3:8) Ia ohipa tatou mai te reira te huru i roto i te mau huru tupuraa atoa, e haafaufaa ïa tatou i te autahoê e te oaoa i roto i te amuiraa e e aratai mai hoi i te feia i rapae i roto i te parau mau. Hau atu i te mau mea atoa, te faahanahana ra tatou i to tatou Metua hamani maitai rahi ra o Iehova.
Te mau uiraa e hiˈopoa-faahou-hia
◻ Mea nafea to Iehova faaiteraa i te hamani maitai i nia i te huitaata hara nei?
◻ No te aha mea faufaa roa ia riro ei taata hamani maitai?
◻ Eaha vetahi mau ohipa e nehenehe e haafifi i to tatou hamani maitai rahi?
◻ Eaha to tatou huru i nia i te feia maˈi e tei taiâ?
◻ O vai mau na te tia ia riro ei feia hamani maitai, e no te aha?
[Tumu parau tarenihia i te api 19]
TE MAU PHARISEA AROHA ORE
E FAARIROHIA na te mahana faafaaearaa o te sabati ei haamaitairaa i te pae varua e i te pae tino no te nunaa o te Atua. Ua haamau râ hoi te mau aratai faaroo ati iuda e rave rahi mau ture tei ore e faahanahana i te ture a te Atua no nia i te sabati e ua faariro i te reira ei hopoia teimaha na te nunaa. Ei hiˈoraa, ia roohia te hoê taata i te ati aore ra ia maˈihia oia, eita o ˈna e nehenehe e tauturuhia i te mahana sabati mai te peu e aita o ˈna e pohe atura.
No te etaeta te hoê fare haapiiraa a te mau Pharisea i roto i ta ˈna faaohiparaa i te parau no te ture no nia i te sabati i parauhia ˈi e: “Eiaha te taata e tamahanahana i te feia e oto ra, eiaha atoa oia e haere e farerei i te mau taata maˈi i te mahana sabati.” Te haapapu atoa ra te tahi atu mau aratai haapaoraa e faatia i teie mau huru farereiraa i te mahana sabati e: “E opani-roa-hia ia taˈi.”
No reira, ua faautua aˈera Iesu ma te tano i te mau aratai haapaoraa ati iuda tei ore i haapao i te mau titauraa faufaa roa a te Ture mai te parau-tia, te here, e te aroha faito ore. Eita ïa e maerehia ia parau atu oia i te mau Pharisea e: “Ua haapae hoi outou i te parau a te Atua, e te tapea nei i tei tuuhia mai e te taata”!—Mareko 7:8, 13; Mataio 23:23; Luka 11:42.
[Hohoˈa i te api 17]
I roto e 231 mau fenua, te hopoi nei te mau Ite no Iehova i te hoê ohipa hamani maitai aita e faaauraa i roto i te mau utuafare o te taata, na roto i te mau aroâ, e tae roa ˈtu i roto i te mau fare tapearaa
[Hohoˈa i te api 18]
E riro te tuuraa tatou ia tatou i mua i te haavîraa uˈana, mai roto i te afata teata, i te faaino i to tatou hamani maitai