Ua nehenehe anei Iesu e faatupu i te faaroo i roto i te Atua?

Te hoê fifi no te feia turu i te Toru Tahi

“NAFEA Iesu i nehenehe ai e faatupu i te faaroo? O o ˈna te Atua; ua taa e ua ite oia i te mau mea atoa ma te titau ore i te turui i nia i te tahi atu taata. Inaha te auraa taa maitai o te faaroo oia ïa te tiaturiraa i nia i te tahi e te fariiraa i te mea itea-ore-hia; te mea e ua nehenehe o Iesu-Atua e faatupu i te faaroo, eita roa ˈtu ïa e nehenehe.”

Ia au i te taata tuatapapa faaroo farani ra o Jacques Guillet, o te manaˈo rahi roa ˈˈe ïa i roto i te haapaoraa katolika. Te haamaere ra anei teie tatararaa ia outou? Ua manaˈo paha outou e i te mea e ua riro o Iesu ei hiˈoraa no te mau kerisetiano i roto i te mau tuhaa atoa, e tia atoa oia ia riro ei hiˈoraa i te pae o te faaroo. Mai te peu e ua manaˈo outou mai te reira, aita ïa outou i tiaturi i nia i te tooma o te Toru Tahi a te amuiraa faaroo kerisetiano.

Ua riro mau te tumu parau no nia i te faaroo o Iesu ei mea fifi roa ia tatara no te feia tuatapapa faaroo katolika, porotetani, e orthodoxe o te tiaturi ra i te Toru Tahi mai “te miterio pu o te faaroo e te oraraa kerisetiano.”a Teie râ, aita te taatoaraa e patoi ra i te faaroo o Iesu. Te haapapu ra o Jacques Guillet e “eita e nehenehe e ore e farii e ua faatupu o Iesu i te faaroo,” noa ˈtu e te faarii ra o Guillet i te reira, i te pae o te haapiiraa faaroo o te Toru Tahi, ua riro te reira ei “tiaturiraa huru ê.”

Mea papu maitai te parau a te jésuite farani ra o Jean Galot, e mai ia ˈna te rahiraa o te feia tuatapapa faaroo, o te na ô ra e i te mea e ua riro oia “e Atua mau e e taata mau, . . . eita te Mesia e nehenehe e tiaturi ia ˈna iho.” “Te auraa o te faaroo oia hoi te tiaturiraa i te tahi ê, eiaha te tiaturiraa ia ˈna iho,” ta te vea La Civiltà Cattolica ïa e tapao ra. Inaha, te haafifiraa no te farii i te faaroo o Iesu o te tooma ïa o te Toru Tahi, i te mea e te patoi ra na toopiti tiaturiraa i te tahi e te tahi.

“Aita te mau Evanelia i faahiti aˈenei i te faaroo o Iesu,” ta te feia tuatapapa faaroo ïa e parau ra. Oia mau, te faahoro ra i te pae rahi te mau parau pi·steuʹo (tiaturi, faatupu i te faaroo) e piʹstis (faaroo) faaohipahia i roto i te mau Papai Heleni Kerisetiano i te faaroo o te mau pǐpǐ i roto i te Atua aore ra i te Mesia, maoti te faaroo o Iesu i roto i to ˈna Metua i te raˈi ra. E tia râ anei ia tatou ia faaoti e aita te Tamaiti a te Atua i faatupu i te faaroo? Eaha ta tatou e nehenehe e taa no nia i te parau e te ohipa ta ˈna i rave? Eaha ta te mau Papai e parau ra?

Te mau pure maoti te faaroo?

E taata pure roa o Iesu. Ua pure oia i te mau taime atoa—i to ˈna bapetizoraahia (Luka 3:21); te po taatoa na mua ˈˈe a maiti ai i ta ˈna mau 12 aposetolo (Luka 6:12, 13); e na mua ˈˈe to ˈna faahuru-ê-raahia ma te semeio i nia i te mouˈa, i mua i te mau aposetolo Petero, Ioane, e Iakobo. (Luka 9:28, 29) Ua pure oia i to te hoê o te mau pǐpǐ aniraa ia ˈna e: “A haapii mai ia matou i te pure,” ua haapii atura oia ia ratou i te Pure a te Fatu (“To matou Metua”). (Luka 11:1-4; Mataio 6:9-13) Ua pure uˈana oia o ˈna anaˈe iho i te aahiata roa (Mareko 1:35-39); i te po, i nia i te hoê mouˈa, i muri aˈe i te tiahiraa i ta ˈna mau pǐpǐ (Mareko 6:45, 46); ma te amui e ta ˈna mau pǐpǐ e no ta ˈna mau pǐpǐ. (Luka 22:32; Ioane 17:1-26) Oia mau, ua riro te pure ei tuhaa faufaa roa o te oraraa o Iesu.

Ua pure oia na mua a faatupu ai i te mau semeio, ei hiˈoraa, na mua a faatia faahou ai i to ˈna hoa ra o Lazaro: “E tau Metua, e haamaitai au ia oe, o oe i faaroo mai ia ˈu nei. Area vau ua ite au e e faaroo mai â oe ia ˈu, no teie nei râ mau taata e haaati mai ia ˈu nei i parau atu ai au, ia faaroo ratou e na oe au i tono mai.” (Ioane 11:41, 42) Te faaite ra te papuraa e e pahono to ˈna Metua i teie pure i te puai o to ˈna faaroo. Mea papu maitai te taairaa i rotopu i te pureraa i te Atua e te faatupuraa i te faaroo i roto Ia ˈna i to te Mesia parauraa i te mau pǐpǐ e: “Te mau mea atoa ta outou e ani ia pure ra, a manaˈo ai, e noaa taua mau mea ra, e noaa ïa ia outou.”—Mareko 11:24.

Mai te peu e aita to Iesu e faaroo, no te aha oia i pure ai i te Atua? Te haapouri ra te haapiiraa o te Toru Tahi a te amuiraa faaroo kerisetiano e ere no roto mai i te mau Papai, oia hoi ua riro o Iesu ei taata e ei Atua i te hoê â taime, i te poroi o te Bibilia. Te haafifi ra te reira i te mau taata ia taa i te ohieraa e te mana o te Bibilia. O vai ta te taata ra o Iesu i tiaoro atu? O o ˈna iho anei? Eita anei ta ˈna e nehenehe i te mea e o o ˈna te Atua? E mai te peu e o o ˈna te Atua e ua ite oia i te reira, no te aha oia i pure ai?

Te ite hohonu nei tatou i roto i te mau pure a Iesu i te mahana hopea o to ˈna oraraa i nia i te fenua i to ˈna faaroo papu i roto i to ˈna Metua i te raˈi ra. Ma te faatupu i te tiaturiraa e te tiairaa papu, ua ani oia e: “E teie nei, e tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao ra.”—Ioane 17:5.

Ma te ite e ua fatata roa to ˈna mau tamataraa fifi roa ˈˈe e to ˈna pohe, te po i vai ai i roto i te aua no Getesemane i nia i te Mouˈa Oliveta, “vehia ihora oia i te oto,” e ua parau oia e: “Ua ati roa tau [nephe] i te mauiui rahi pohe.” (Mataio 26:36-38) I muri iho ua tuturi e ua pure oia e: “E tau Metua, ia tia ia oe ra, e hopoi ê atu i teie nei aˈua; ia tupu râ to oe hinaaro eiaha to ˈu.” Inaha “ua fa maira te hoê melahi no te raˈi mai, ua faaitoito maira ia ˈna.” Ua faaroo te Atua i ta ˈna pure. No te rahi o to ˈna mau manaˈo hohonu e te uˈana o te tamataraa, “mai te toto putua ra to ˈna hou i te mairiraa i raro i te repo ra.”—Luka 22:42-44.

Eaha ta te mau mauiui, to ˈna hinaaro ia faaitoitohia, e ta ˈna mau tiaororaa e faaite ra? “Mea papu maitai te hoê mea,” ta Jacques Guillet ïa e papai ra, “ua pure o Iesu, e ua riro te pure ei tuhaa faufaa roa o to ˈna oraraa e o ta ˈna mau ohipa. Ua pure oia mai ta te hoê taata e pure ra, e ua pure no te mau taata. Tera râ, eita e nehenehe e itehia te mau pure a te mau taata maoti te faaroo. E nehenehe anei e ite i te mau pure a Iesu maoti te faaroo?”

Patitihia i nia i te pou haamauiuiraa i muri iti noa ˈˈe o to ˈna poheraa, ua tuô o Iesu ma te hoê reo puai, ma te faahiti i te hoê salamo a Davida. I muri iho, ma te faaroo, e te hoê reo puai, ua tuô oia i te hoê tiaororaa hopea: “E tau Metua, te tuu atu nei au i tau varua i to rima na.” (Luka 23:46; Mataio 27:46) Te parau ra te hoê tatararaa Italia a te mau faaroo huru rau, Parola del Signore, e ‘ua pûpû’ o Iesu ‘i to ˈna oraraa’ no te Metua.

Te tatara ra o Jacques Guillet e: “Na roto i te faataaraa ia tatou no nia i te faasatauroraahia te Mesia, i te tuôraa i to ˈna Metua ma te faahiti i te mau salamo a Iseraela, te haapapu ra te mau papai o te Evanelia ia tatou e ua riro taua tuô ra, te tuô o te Tamaiti fanau tahi, te hoê tuô hepohepo taatoa, te hoê tuô tiaturiraa taatoa, ei tuô o te faaroo, te tuô o te hoê taata pohe i roto i te faaroo.”

I mua i teie haapapuraa maramarama e te rahi o te faaroo, te tamata ra vetahi feia tuatapapa faaroo i te haamau i te hoê taa-ê-raa i rotopu i te faaroo e te “tiaturiraa.” Teie râ, aita teie huru taa-ê-raa i niuhia i nia i te mau Papai.

Eaha mau râ ta te mau tamataraa uˈana ta ˈna i faaoromai e faaite ra no nia i te faaroo o Iesu?

Te ‘Taata tei faatia roa i to tatou faaroo’ i faatia-roa-hia

I roto i te pene 11 o ta ˈna rata i to Hebera, te faahiti ra te aposetolo Paulo i te nahoa rahi o te mau taata e mau vahine haapao maitai na mua ˈtu i te mau tau kerisetiano. Te faaoti ra oia, ma te tuu i te tapao i nia i te hiˈoraa rahi roa ˈˈe e te tia roa o te faaroo e: “Ma te tiatonu maite to tatou mata ia Iesu, i te tumu [tei faatia roa] i to tatou faaroo; o tei faaoromai i te satauro [pou haamauiuiraa], aore i haapao i te haama . . . E haamanaˈo maite hoi ia ˈna, o tei faaoromai i te reira huru faaino a te feia rave hara ia ˈna ihora, ia ore hoi outou ia toaruaru, ia ore ia taiâ to outou aau.”—Hebera 12:1-3.

Te parau ra te rahiraa o te feia tuatapapa faaroo e aita teie irava e faahiti ra i te “faaroo iho o Iesu” maoti râ, o o ˈna te “tumu aore ra te taata haamau o te faaroo.” Te faahoro ra te parau heleni ra te·lei·o·teś itehia i roto i teie pereota i te hoê taata o te faatia roa, o te faatupu aore ra o te faaoti i te hoê mea. Ei ‘Taata tei faatia roa,’ ua faaoti Iesu i te faatupu i te faaroo oia hoi te auraa e ua faatupu to ˈna haereraa mai i nia i te fenua i te mau parau tohu o te Bibilia e ua haamau ïa oia i te hoê niu paari aˈe no te faaroo. Te auraa râ anei e aita oia i faatupu i te faaroo?

Aita e feaaraa i roto i te mau irava no roto mai i te rata i to Hebera o ta outou e nehenehe e ite i roto i te tumu parau tarenihia i te api 15. Ua faatia-roa-hia o Iesu na roto i ta ˈna mau mauiui e to ˈna auraroraa. Noa ˈtu e mea tia roa aˈena oia, ua faariro te mau tupuraa ta ˈna i faaruru ia ˈna, ei taata tia roa e te taatoa i roto i te mau tuhaa atoa, i te pae atoa o te faaroo, ia aravihi roa oia no te riroraa ei Tahuˈa Rahi no te faaora i te mau kerisetiano mau. Ua tiaoro oia i to ˈna Metua “ma te oto rahi e te roimata,” ua “haapao maitai” oia i te Atua, e e ‘mǎtaˈu paieti’ to ˈna. (Hebera 3:1, 2; 5:7-9) Ua ‘ati hoi oia i te mau mea atoa mai ia tatou atoa nei,’ ta te Hebera 4:15 ïa e parau ra, oia hoi, mai te kerisetiano haapao maitai atoa ua roohia to ˈna faaroo i ‘te mau tamataraa e rave rahi te huru.’ (Iakobo 1:2, 3) Mea tano anei ia tiaturi e ua tamatahia Iesu “mai” ta ˈna atoa mau pǐpǐ maoti to ˈna faaroo i te tamatahia mai ia ratou atoa na?

Te haapapu ra te mau tiaororaa, te auraroraa, te mauiui, te mau tamataraa, te haapao maitai, e te mǎtaˈu paieti i te faaroo taatoa o Iesu. Te faaite ra te reira e ua riro oia ei ‘Taata tei faatia roa i to tatou faaroo’ i muri aˈe noa i te faatia-roa-raahia i roto i to ˈna iho faaroo. Ma te papu maitai, e ere oia te Atua Tamaiti, mai ta te haapiiraa faaroo o te Toru Tahi e turu ra.—Ioane 1, 5:5.

Aita anei oia i tiaturi i te Parau a te Atua?

Te mana ra ïa te haapiiraa faaroo o te Toru Tahi i nia i te manaˈo o te feia tuatapapa faaroo tei haere roa i te turu e eita ta Iesu e “nehenehe e tiaturi i te Parau a te Atua e i to ˈna poroi” i te mea e “o o ˈna mau te Parau a te Atua, o o ˈna anaˈe o te nehenehe e faaite i taua parau ra.”—Angelo Amato, Gesù il Signore, e te parau faatia ekalesiatiko no te neneiraa.

Teie râ, eaha ta te mau faahororaa tamau a Iesu i roto i te mau Papai e faaite mau ra? A tamatahia ˈi oia, ua faahiti oia i te mau Papai e toru taime. Ua haapii te toru o ta ˈna pahonoraa ia Satani e o te Atua noa ta Iesu i haamori. (Mataio 4:4, 7, 10) I roto e rave rau mau taime ua faahiti Iesu i te mau parau tohu no nia ia ˈna iho, ma te faaite i te faaroo i roto i to ratou tupuraa. (Mareko 14:21, 27; Luka 18:31-33; 22:37; a faaau e te Luka 9:22; 24:44-46.) I roto i teie hiˈopoaraa e tia ia tatou ia faaoti e ua ite o Iesu i te mau Papai faauruahia e to ˈna Metua, ua hiˈopoa oia i te reira ma te faaroo, e ua tiaturi taatoa oia i te tupuraa o te mau parau tohu o tei faaite atea i to ˈna mau tamataraa, to ˈna mauiui, to ˈna pohe e to ˈna faatia-faahou-raa.

Iesu, te hiˈoraa o te faaroo te tia ia pee

Ua tia ia Iesu ia aro i te tamaˈi o te faaroo tae roa ˈtu i te hopea no te tapea noa i te taiva-ore-raa i to ˈna Metua e ia ‘riro te re o teie nei ao ia ˈna.’ (Ioane 16:33) Maoti te faaroo, eita roa ˈtu e nehenehe e noaa mai i teie upootiaraa. (Hebera 11:6; Ioane 1, 5:4) I te pae o teie faaroo o tei upootia, ua riro oia ei hiˈoraa no ta ˈna mau pǐpǐ haapao maitai. Ma te papu maitai ua faatupu oia i te faaroo i roto i te Atua mau.

[Nota i raro i te api]

[Tumu parau tarenihia i te api 15]

Iesu, te ‘Taata tei faatia roa,’ i faatia-roa-hia

Hebera 2:10: “E mea au hoi ia ˈna no ˈna te mau mea atoa nei, e na ˈna te mau mea atoa nei i hamani, i te aratairaa i te tamarii e rave rahi i te ao ra, ia faariro oia i te tumu o to ratou ora ei [tia roa na roto i te mau mauiui].”

Hebera 2:17, 18: “I tia ˈi ia ˈna ia faarirohia mai tana mau taeae te huru i te mau mea atoa ra, ia riro oia ei tahuˈa rahi parau mau e te aroha noa i te mau mea a te Atua ra, ia tatara oia i te hara a te taata nei. E oia iho hoi i pohe i te mea i roohia i te ati, e tia hoi ia ˈna ia turu mai i te feia i roto i te ati ra.”

Hebera 3:2: “O tei haapao maitai atu ia ˈna i tei faataa mai ia ˈna ra, mai ia Mose atoa i haapao maitai i te fare atoa o te Atua ra.”

Hebera 4:15: “E ere hoi to tatou i te tahuˈa rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara.”

Hebera 5:7-9: “Ua pûpû hoi oia i te pure i tana oraraa ra, i te aniraa ˈtu ia ˈna ma te oto rahi e te roimata, i tei tia ia faaora ia ˈna mai te pohe maira, ei faaroohia oia i ta ˈna i mǎtaˈu ra: e tamaiti noâ iho hoi oia, i ite oia i te auraro i to ˈna ra mau pohe. E no te mea ua [faatia]-roa-hia oia, riro atura oia ei tumu no te ora mure ore.”