Eiaha e vaiiho ia faaino te moemoe i to outou oraraa

E NEHENEHE te moemoe e faaino i te oraraa o te feia ruhiruhia e o te feia apî. Ua parau te vahine papai ra o Judith Viorst i roto i te vea ra Redbook e: “E faateimaha te moemoe mai te hoê ofai i nia i te mafatu. . . . E faatupu te moemoe i te manaˈo e mea faufaa ore tatou e aita e ravea faahou. E faatupu te moemoe i te manaˈo e ua riro tatou mai te hoê vahine tei ore i fanau i te tamarii, mai te hoê mamoe tei moe, mea nainai roa hoi e ua moe oia i roto i te hoê ao rarahi e te haapao ore.”—Avaˈe setepa 1991.

E nehenehe te faataa-ê-raa i te mau hoa, te mau vahi matau-ore-hia, te faataaraa, te otoraa i te hoê tei pohe, aore ra te faaearaa i te faatupu i te taairaa—te mau huru mea atoa e haamoemoe ia outou. Noa ˈtu e te haaatihia ra ratou e te tahi atu mau taata, e ite vetahi i te moemoe rahi.

Eaha ta outou e nehenehe e rave?

Mai te peu e e roohia outou i te moemoe, e tia anei ia outou ia riro noa mai te hoê taata puai ore? E nehenehe anei ta outou e rave i te tahi mea eiaha te moemoe ia faaore riirii aore ra ia haaparuparu i to outou hinaaro i te ora? Oia mau e nehenehe ta outou. Te vai nei e rave rahi aˈoraa faufaa. E te horoahia ra e rave rahi aˈoraa maitai i roto i te Parau faauruahia a te Atua, te Bibilia. Teie paha te huru faaitoitoraa ta outou e titau ra no te arai i te moemoe.—Mataio 11:28, 29.

Ei hiˈoraa, e ite paha outou e mea faaitoito ia taio i te aamu o Ruta, te hoê vahine apî tei ora na i Hitia o te râ no Ropu a 3 000 matahiti i teie nei. O ˈna paha te vahine matamua tei roohia i te moemoe. I te poheraa o ta ˈna tane, ua haere oia e to ˈna metua hoovai vahine e ora i te hoê vahi apî i Iseraela. (Ruta 2:11) Noa ˈtu e ua erehia oia i to ˈna fetii e mau hoa tahito e ua riro oia ei vahine ěê i roto i te hoê fenua matau-ore-hia, aita e haapapuraa i roto i te Bibilia e ua vaiiho oia i te moemoe ia ǒ mai i roto ia ˈna. E nehenehe outou e taio i to ˈna aamu i roto i te buka bibilia o Ruta.

Mai ia Ruta, a tapea maite i te hoê feruriraa maitai. E nehenehe ta outou huru feruriraa no nia i te mau ohipa e te mau huru tupuraa e faatupu i te moemoe. Te haapapu ra o Anne i te reira, ua haapao hoi o ˈna i to ˈna metua tane tei roohia i te tahi maˈi haaparuparu e maha matahiti te maororaa. I to ˈna poheraa, ua vai mai oia ma te moemoe rahi. “Mai te huru ra e tei roto vau i te hoê aore, aita roa e faufaa faahou—e au ra e aita hoê aˈe taata e hinaaro faahou ra ia ˈu,” ta ˈna e parau ra. “Ua feruri râ vau e, i teie nei, ua taui to ˈu oraraa, e ua taa ihora ia ˈu e no te arai i to ˈu moemoe, e tia ia ˈu ia faaohipa i te huru tupuraa maitai aˈe e vai ra ia ˈu ra.” I te tahi taime eita outou e nehenehe e taui i te mau huru tupuraa, mea papu râ e e nehenehe outou e taui i to outou haerea no nia i te reira.

Te rave-tamau-raa i te hoê ohipa o te haamauruuru ia outou, e ere te reira anaˈe te pahonoraa no te arai i te moemoe, noa ˈtu e e tauturu oia ia outou. Ua ite o Irene e e parau mau te reira inaha ua pohe ta ˈna tane i muri noa ˈˈe e ono avaˈe faaipoiporaa. “Ua ite aˈera vau e e rahi roa te moemoe mai te peu e aita vau e rave rahi ra i te ohipa,” ta ˈna e parau ra, “no reira vau i feruri hohonu ai no te haapao ia vetahi ê e no te tauturu ia ratou ia tatara i to ratou mau fifi.” E horoa mai te tautururaa ia vetahi ê i te oaoa, e e ite paha te mau kerisetiano moemoe i te rahiraa o te haaraa i roto i te ohipa a te Fatu.—Ohipa 20:35; Korinetia 1, 15:58.

A vaiiho i te mau hoa ia tauturu

Te faaite ra te vea The New York Times Magazine e e au ra e ua mauiui te tamarii moemoe i “te mauiui no te moemoeraa.” (28 no eperera, matahiti 1991) Te vai noa nei e rave rahi feia moemoe, te feia apî e te feia paari, ma te hoa ore. Tera râ, e maitai mau, ia roaa te auhoaraa mau ta te amuiraa kerisetiano e horoa ra. A haa ia rahi to outou mau hoa i roto i te amuiraa, e a vaiiho ia ratou ia tauturu ia outou noa ˈtu e eaha te huru ta ratou e nehenehe e rave. Tera te hoê ohipa ta te mau hoa e rave—te horoaraa i te tauturu i te taime hepohepo.—Maseli 17:17; 18:24.

A ara râ e no to outou mauiui hohonu i te pae feruriraa, e nehenehe mau â outou e haafifi atu â ia tauturu mai to outou mau hoa ia outou. Nafea? Te faataa ra te taata papai o Jeffrey Young e: “E patoi te tahi mau taata moemoe . . . i te mau hoa papu, ma te hinaaro e o ratou anaˈe te paraparau aore ra ma te parau i te mau mea faufau aore ra tia ore. Noa ˈtu e eaha te huru, e faaino te taata e moemoe maoro i te mau taairaa piri roa.”—U.S.News & World Report, 17 no setepa, matahiti 1984.

I te tahi taime, e rave paha outou i te mau ohipa ino roa ˈtu â ma te faataaraa ia outou i te tahi atu mau taata. Ua na reira o Petero, te hoê taata e 50 to ˈna matahiti. I muri aˈe i te poheraa o ta ˈna vahine, ua ite oia e te faaatea ra oia ia vetahi ê, noa ˈtu e i roto i to ˈna mau manaˈo hohonu roa, ua hinaaro oia i ta ratou tauturu. “I te tahi mau mahana,” ta ˈna e parau ra, “Eita vau e nehenehe e faaoromai ia vetahi ê, e i te taime tano ua ite ihora vau e te faaatea ra vau ia ˈu iho e te mau taata.” E nehenehe te reira e riro ei ohipa atâta. Mea faufaa te faataa-ê-raa i te tahi area taime, area te faataa-ê-noa-raa ia vetahi ê mea ino ïa. (Maseli 18:1) Ua ite o Petero i te reira. Te parau ra oia e: “Ua feruri vau i taua manaˈo ra, ma te faaruru i to ˈu fifi, e na roto i te tauturu a to ˈu mau hoa, ua nehenehe ihora vau e patu faahou i to ˈu oraraa.”

Eiaha râ e manaˈo e, e tia ia vetahi ia tauturu. A tamata eiaha ia riro ei taata faahepo. Ma te oaoa, a farii i te huru maitai atoa e faaitehia ˈtu, e a faaite i te mauruuru. A haamanaˈo atoa râ i teie aˈoraa maitai i itehia i roto i te Maseli 25:17: “Eiaha e haere pinepine i te utuafare o to taata tupu ra, o te fiu hoi oia ia oe, e ua riri ihora ia oe.” Ua ite o Frances e mea faufaa teie huru faaararaa, ua faaruru oia i te moemoe rahi i te poheraa o ta ˈna tane i muri aˈe e 35 matahiti faaipoiporaa. “Ia vai au noa to outou feruriraa i nia i te mea o ta outou e tiai ra,” ta ˈna e parau ra, “e eiaha e titau rahi ia vetahi ê. Eiaha e haere pinepine i te fare o te taata no te ani i te tauturu.”

Te haapao ra o Iehova

Noa ˈtu e aita te mau hoa taata e haapao ra ia outou i te tahi taime, e riro noâ iho â te Atua ra o Iehova ei Hoa no outou. Ia papu outou e te haapao ra oia ia outou. A tapea maite i to outou tiaturiraa puai i nia ia ˈna, e a imi tamau i ta ˈna parururaa. (Salamo 27:10; 91:1, 2; Maseli 3:5, 6) Ua na reira te vahine ati Moabi ra o Ruta e ua haamaitai-rahi-hia oia. No te aha, ua riro atoa oia ei tupuna no Iesu Mesia!—Ruta 2:12; 4:17; Mataio 1:5, 16.

A pure tamau ia Iehova. (Salamo 34:4; 62:7, 8) Ua ite o Margaret e e riro te pure ei pu o te puai rahi no te faaruru i te moemoe. Ua apiti oia e ta ˈna tane i roto i te taviniraa ma te taime taatoa e tae roa i te poheraa o ta ˈna tane te vai apî noâ ra oia. “Ua ite iho â vau e mea maitai ia pure ia Iehova ma te reo puai e ia parau i te mau mea atoa ia Iehova, to ˈu mau mǎtaˈu e ta ˈu mau haapeapearaa atoa,” ta ˈna e parau ra. “E tauturu te reira ia ˈu ia rave i te mau ohipa ia roohia vau i te moemoe. E e roaa mai te tiaturiraa inaha fatata roa Iehova i te pahono i taua mau pure ra.” Ua haamaitai-rahi-hia oia i to ˈna peeraa i te aˈoraa a te aposetolo Petero: “E tena na, e faahaehaa ia outou iho i raro aˈe i te rima mana o te Atua, ia faateitei oia ia outou i te tau mau ra. E huri i to outou ahoaho atoa i nia ia ˈna; oia hoi te tiai mai ia outou.”—Petero 1, 5:6, 7; Salamo 55:22.

E tauturu te taairaa maitai e o Iehova, ia outou, ia faaherehere i te tahi mea o te ere-pinepine-hia ra e te taata moemoe—te haafaufaaraa ia ˈna na iho. I te poheraa o ta ˈna tane i te mariri ai taata, ua papai te vahine papai vea ra o Jeannette Kupfermann no nia i te “mau manaˈo o te itiraa i te haafaufaa ia ˈna iho e te itiraa o to ˈna faufaa. Ua parau oia e: “Na teie manaˈo e ua iti to ratou faufaa e faatupu i te hepohepo e aratai ra e rave rahi feia ivi ia hinaaro e haapohe ia ratou.”

A haamanaˈo e i mua i te aro o Iehova e faufaa rahi to outou. Aita oia e manaˈo ra e aita to outou e faufaa. (Ioane 3:16) E tauturu te Atua ia outou mai ta ˈna i tauturu i to ˈna nunaa te mau ati Iseraela i te tau tahito ra. Ua parau oia ia ratou e: “E ore hoi [au] e faarue ia oe. Eiaha e mǎtaˈu, tei pihai-atoa-iho vau ia oe; eiaha e taiâ, o vau hoi to Atua. E faaetaeta vau ia oe, e tauturu vau ia oe i tau rima atau parau-tia ra.”—Isaia 41:9, 10.

Eiaha e faahapa i te Atua

Te mea faufaa roa ˈˈe, eiaha e faahapa i te Atua no to outou moemoe. Aita o Iehova i hape. Ua hinaaro noa na oia ia fanaˈo outou, e te huitaata atoa, i te auhoaraa maitai e o te haamâha ia outou. I to te Atua poieteraa ia Adamu, ua parau oia e: “E ere ïa i te mea maitai ia parahi noa Adamu oia anaˈe ra; e hamani au i te tahi tauturu au na ˈna ra.” (Genese 2:18) E o ta te Atua ïa i rave i to ˈna poieteraa ia Eva, te vahine matamua. Ahiri e aita te orureraa a Satani i tupu, eita roa te tane e te vahine e te mau fetii ta raua e fanau e roohia i te moemoe.

Parau mau, te faatiaraa o Iehova ia tupu te ino i te tahi area taime noa, ua faatia oia ia rahi te moemoe e ia tupu te tahi atu mauiui. Tera râ, a haamanaˈo maitai e no te hoê noa area taime. E au ra e mea iti roa te mau tamataraa o te moemoe ia ferurihia e eaha ta te Atua e rave no outou i roto i to ˈna ao apî. I teie nei râ, e tauturu e e tamahanahana oia ia outou.—Salamo 18:2; Philipi 4:6, 7.

E nehenehe te iteraa i te reira e haapuai ia outou. I to Frances (tei faahitihia i te omuaraa) riroraa ei vahine ivi, ua ite oia i te tamahanahana rahi i roto i te mau parau a te Salamo 4:8, i te po iho â râ: “E tiraha vau i raro ma te ora, e e taoto hoi; na oe anaˈe ra, e Iehova, i parahi ai au ma te ora.” A feruri hohonu i nia i te mau huru manaˈo mai tei itehia i roto i te buka a te mau Salamo. A feruri e nafea te Atua e haapao ai ia outou, mai tei faaitehia i roto i te Salamo 23:1-3.

Nafea te taata moemoe e nehenehe ai e tauturuhia?

Te ravea maitai aˈe no te tauturu i te feia moemoe, o te faaiteraa ïa ia ratou i te here. I te mau taime atoa, te faaitoito ra te Bibilia i te nunaa a te Atua ia faaite i te here te tahi i te tahi, i te taime tamataraa iho â râ. “Ei atiraa aroha mau to outou ia outou iho, i te aroha taeae ra,” ta te aposetolo Paulo i papai. (Roma 12:10) Oia mau, te na ô ra te Parau faauruahia a te Atua e: “E ore roa te aroha e mou.” (Korinetia 1, 13:8) Nafea outou e faaite ai i te here i te feia moemoe?

Maoti i te ore e farii aore ra i te ore e tǎuˈa i te feia moemoe, e nehenehe te mau taata e faaite i to ratou aroha rahi na roto i te tautururaa ia ratou ma te faaoromai maite i te mau taime atoa e nehenehe ai e ravehia. E riro paha ratou mai ia Ioba, tei parau e: “Ua faaora hoi au i te taata rii ia tiaoro mai; te otare hoi e te taata tauturu ore ra. . . . e ua pii noa te aau o te vahine ivi ra ia ˈu i te oaoa.” (Ioba 29:12, 13) E nehenehe te mau matahiapo i nominohia i roto i te amuiraa e te mau hoa e faaite ra i te aroha e faaohipa i teie huru ravea maitai, ma te haamâha i te mau hinaaro tumu o te taata no nia i te ite-maite-raa, te haapopou, e te tamahanahana. E nehenehe ratou e faaite e te taa ra ia ratou te fifi, e i te tahi taime te hinaaro atoa ra ratou e faaite i to ratou mau manaˈo hohonu.—Petero 1, 3:8.

Mea pinepine, mea faufaa roa te mau ohipa iti ta te mau hoa e rave ra no te feia moemoe. Ei hiˈoraa, ia pohe anaˈe te hoê melo o te hoê hoa faaroo, e nehenehe e ravehia e rave rahi maitai na roto i te mau ohipa maitai o te auhoaraa mau. Eiaha e faaiti i te tahi ohipa maitai, mai te titau-manihini-raa no te tamaa, te faarooraa ia vetahi ê ma te aroha, aore ra te faaitoitoraa i te aparauraa. E faatupu teie mau ohipa i te faahopearaa faufaa ma te tauturu i te hoê taata ia arai i te moemoe.—Hebera 13:16.

Peneiaˈe e roohia te taatoaraa o tatou i te moemoe ia tae i te tahi taime. Tera râ, aita e faufaa ia riro te moemoe ei otoraa. A faaî i to outou oraraa i te mau ohipa maitatai e te faufaa. A farii mai te peu e e tauturu te mau hoa i te taime e nehenehe ai ratou. A tiaturi i te Atua ra ia Iehova. A haamanaˈo i te parau tǎpǔ faaitoito i papaihia i roto i te Salamo 34:19: “E ati rahi to te taata parau-tia ra; e faaorahia râ oia e Iehova i taua mau ati atoa ra.” A imi i te tauturu o Iehova, e eiaha e vaiiho ia faaino te moemoe i to outou oraraa.

[Tumu parau tarenihia i te api 24]

TE TAHI MAU RAVEA NO TE ARO I TE MOEMOE

▪ A faatupu i te taairaa piri roa e o Iehova

▪ A imi i te tamahanahanaraa na roto i te taioraa i te Bibilia

▪ A tapea maite i te hoê feruriraa kerisetiano maitai

▪ A haa i roto i te ohipa faufaa

▪ A faarahi i to outou mau hoa

▪ A faaohie i te tauturu o te mau hoa mai te peu e e tauturu mai te mau hoa

▪ Eiaha e faataa ê ia outou, a atuatu râ i te here i nia i te taatoaraa

▪ A tiaturi e te haapao ra Iehova ia outou

[Tumu parau tarenihia i te api 24]

NAFEA OUTOU IA TAUTURU I TE FEIA MOEMOE

▪ A horoa i te ite, te haapopou, e te tamahana- hanaraa

▪ A haamâha i te hiaai e tauaparau e te hoê hoa piri

▪ A tamau maite i te rave i te mau ohipa rii o te tauturu

[Hohoˈa i te api 23]

Noa ˈtu te mau huru tupuraa fifi, aita e haapapuraa e ua vaiiho o Ruta i te moemoe ia faaino i to ˈna oraraa