Te faatia ra te feia poro i te Basileia
“E patoi atu i te diabolo, e na ˈna e maue ê atu”
I TE senekele matamua, ua pahono te hoê pǔpǔ “feia peu huru ê” faaroo no Ephesia i te poroi kerisetiano ma te tutui i ta ratou mau buka tahutahu i mua i te aro o te taata atoa. (Ohipa 19:19) Te faito moni o taua mau buka ra e 50 000 moni ario. Mai te peu e e faaauhia te aamu o te Bibilia i te moni veo, hoê moni ario roma, e 37 000 ïa dala marite!
I teie mahana, e rave rahi mau taata e buka tahutahu ta ratou na mua ˈˈe, o tei faaite râ i te hoê â faaotiraa e to te feia no Ephesia no mutaa ihora. E hiˈopoa mai tatou i te aamu i muri nei no Kanada mai.
Fatata e pae matahiti i teie nei, a poro noa ˈi te hoê Ite no Iehova i tera e tera fare, e i te hoê uputa ua farii mai te hoê vahine o Nora te iˈoa ma te anaanatae roa ia ˈna i roto i to ˈna fare. Tau matahiti tuatapaparaa i te pae varua, ua haaputu mai o Nora tau hanere mau buka faaroo e te hiˈohiˈo, ua hinaaro râ oia e ite eaha ta te Bibilia e parau ra no nia i te tiaturiraa o te taata pohe. Ua pûpû te Ite na ˈna i te hoê api parau iti Eaha te tiaturiraa no te feia herehia e tatou tei pohe? Ua pahonohia te mau uiraa a Nora, e ua farii oia i te tamatahitiraa i Te Pare Tiairaa e te A ara mai na!
I muri iho, ua taui oia i te faaearaa e aita oia i farerei faahou i te mau Ite no Iehova. Ua tae noa râ ta ˈna mau vea na roto i te afata rata i to ˈna vahi nohoraa apî. Ua ani atoa oia i te mau buka niuhia i nia i te Bibilia faahitihia i roto i te mau vea. Tau taime i muri iho, ua patoto te hoê Ite no Iehova i to ˈna uputa. No te maere e ua faaohipa oioi te Ite i te Bibilia no te pahono i ta ˈna mau uiraa, ua farii popou o Nora ia ˈna e ua titau manihini ia ˈna ia hoˈi mai no te tahi atu mau aparauraa.
Ua fifihia râ te Ite no te farerei ia Nora. E rave rahi mau taime ê i roto i te mahana e te hebedoma tei ravehia no te farerei faahou ia ˈna ma te manuïa ore. I te taime au râ, ua haamauruuruhia to ˈna onoonoraa, e ua ooti oia i te mau faahopearaa maitatai. Ua haamatahia te hoê haapiiraa tamau o te Bibilia, e na roto i te mârôraa a Nora ua faaterehia ïa e toru taime i te hebedoma. Ua turai te mau ohipa ta ˈna i haapii ia ˈna ia tauaparau e to ˈna mau hoa e mau melo o te utuafare, e i te pae hopea, e toru o ratou tei ani i te haapiiraa o te Bibilia e te mau Ite no Iehova.
Na roto i ta ˈna haapiiraa, ua taa ia Nora e rave rahi mau haapaoraa hape e mau peropheta haavare, hoê anaˈe râ eˈa o te aratai i te ora. E rave rahi matahiti to ˈna imi-noa-raa i te mau pahonoraa i ta ˈna mau uiraa no nia i te mau haapaoraa hape, i muri iho râ to ˈna iteraa eaha ta te Bibilia e parau ra no nia i te mau demoni, ua pee atoa oia i te mau taata no Ephesia no tahito ra faahitihia i roto i te Ohipa 19:19. Ua tamâ oia i ta ˈna vairaa buka e, ua tutui oia e rave rahi mahana te maoro, hau atu e hoê tausani buka tahutahu e mau haapiiraa faaroo hape. I roto i te mau buka tei tutuihia, hau atu e 800 dala marite te moni e maha buka tahoêhia!
E parau mau, no te mauruuru ore i te mau ohipa a Nora, ua haapeapea te mau demoni ia ˈna e piti hebedoma te maoro. Aita râ teie mau varua iino i manuïa i te faafariu ê ia ˈna i ta ˈna haapiiraa o te Bibilia e to ˈna apitiraa i roto i te faanahonahoraa a Iehova no teie mahana.
Te faaite maitai ra teie mau aamu i te tanoraa o te mau parau a te Bibilia e: “E tena na, e auraro atu outou i te Atua. E patoi atu i te diabolo, e na ˈna e maue ê atu.”—Iakobo 4:7.