Te tairururaa “Te haapiiraa no ǒ mai i te Atua ra” i Etiopia—Te hoê taime oaoa taa ê mau

E ERE oia i te tairururaa mataeinaa matamua i itehia i Etiopia mai to ˈna â tiamâraa mai, e mea taa ê mau na râ oia. Mai te taime i haamanahia i mua i te ture i te 11 no novema 1991, ua putuputu te mau Ite no Iehova no te toruraa o te taime i roto i te tahua taaro rahi roa ˈˈe o taua vahi ra, oia hoi te City Stadium, i Addis Ababa iho. I te mea e eita te tahua e vata no te sabati e aita te tahi vahi rahi atu i itehia, ua ravehia ïa te porotarama i roto e toru mahana noa, mai te mahana maha 13 tae atu i te mahana maa 15 no tenuare 1994.

Aita taua na mahana e toru ra i tupu noa i raro aˈe i te hoê mahana nehenehe e te haumǎrû e te hoê raˈi ninamu, i roto atoa râ i te maramarama i te pae varua e te mana rahi o “Te haapiiraa no ǒ mai i te Atua ra.” I rotopu i te hoê faaneheneheraa e te mau tiare haviti mau o tei haaati i te tahua, ua faatia-hua-hia te mau leta o te upoo parau na roto i te papai amharique.

No te aha i riro ai oia ei tairururaa taa ê? I te roaraa o te porotarama faufaa rahi ra, ua hutihia te feruriraa e te mau manaˈo hohonu o te mau taata tataitahi i nia i to tatou autaeaeraa here na te ao atoa nei e te mau ohipa ite-papu-hia o te haamaitairaa a te Atua i nia i to ˈna nunaa ia au i te huru tupuraa o te Basileia. E vai na tau 270 tia ěê i amui mai no na fenua 16, tei roto oia atoa o Djibouti e Yemen. Ua faarue hau atu te afaraa o te mau tia i te tau toetoe no Europa e no Marite Apatoerau. Ua amui atoa mai e piti na melo o te Tino Aratai a te mau Ite no Iehova, o Lloyd Barry e o Daniel Sydlik i rotopu i te mau ratere.

Ua faatupu te farii-popou-raa matauhia a to Etiopia amuihia e te here hohonu no to ratou mau taeae ěê i te hoê oaoa rahi o tei faaore i te mau fifi i te pae o te reo. E ere i te aroharaa rima noa, e mau tauahiraa roa râ e e mau aparaa, e tae roa ˈtu i te mau aroharaa tataiono! Ua taio e rave rahi mau taata tei ratere mai i te ohipa o te Basileia i Etiopia e ua ite ratou e ua tamatahia te taiva-ore-raa o to ratou mau taeae Etiopia o tei faaoromai tamau noa ˈtu te tapearaahia i roto i te fare auri e vetahi atu â mau hamani-ino-raa.a Ua maere râ te mau tia i ratere mai i te iteraa e e rave rahi feia apî o tei faaite i te hoê hohoˈa mata oaoa e te peu maitai o tei iti hoi i roto i te rahiraa o te mau fenua i teie mahana. Ua ahu e rave rahi mau tuahine Etiopia i ta ratou nei mau ahu uouo, nira-maite-hia, o tei turu i te hoê huru oroa mau i te pae varua.

Mea putapû mau na te taime bapetizoraa i te mahana pae. Ua faanahohia te hoê reni roa mau o na 530 feia pûpû-apî-hia, mai te 10 matahiti tae atu i te 80 matahiti, i nia i te afaraa o te aua taaroraa o te tahua. Ua hau oia i tei manaˈohia—hau atu i te 1 no te mau 7 Ite atoa o taua fenua ra. Auê ïa haapapuraa o te haamaitairaa o Iehova i nia i to ˈna nunaa i taua fenua ra! Ua taˈi e rave rahi i te oaoa i te iteraa i te reira, o tei faarahihia na roto i te himeneraa nehenehe a nau hau atu 40 tia Italia. Ua haamanaˈo e rave rahi i te mau parau tohu a te Isaia 60:5: “Ei reira oe e ite ai, e rahi roa te oaoa; e horuhoru hoi to aau, e horahorahia; ia hopoihia mai te mau taoˈa no te moana ia oe ra; e ia tae mai te mau taoˈa no te mau fenua ia oe ra.”

Te mau tumu taa ê o te oaoaraa

Ua haapapu-hau-atu-hia te haamaitairaa a Iehova i te mahana pae, i te haamanaˈo-faahou-raahia te haamataraa haihai o te ohipa o te Basileia i Etiopia na roto i te tahi mau uiuiraa manaˈo. Ua arataihia te reira e te hoê pǔpǔ mitionare matamua o tei tavini i reira i te mau matahiti 1950 e te mau matahiti 1970. Ua hau atu i te 8 000 taata tei faaroo ia Ray Casson, John Kamphuis, e Haywood Ward i te faataaraa i ta ratou ohipa haapiiraa i te Bibilia, o tei haamata i te 14 no setepa 1950, i to ratou tapaeraa i Addis Ababa. Ua titau te hau faatere o taua tau ra ia haa ratou i roto i te haapiiraa i te pae rahi. Ua haamau ïa ratou i te hoê fare haapiiraa i te oire iho, ma te vauvau e rave rau mau tumu parau. I roto râ i te mau taime i faaea ˈi ratou i te haapii atu, ua imi teie nau mitionare i te faahaere i mua te haapiiraa niuhia i nia i te haapiiraa no ǒ mai i te Atua ra. E tia na ia ratou ia faaitoito i te haapii i te reo amharique, te hoê reo fifi mau no na 250 leta o te piapa. Ua mairi paha hoê afa matahiti na mua ˈˈe ratou a manuïa ˈi i te faatere i ta ratou haapiiraa bibilia matamua i te fare o te taata. E tau 43 matahiti i muri iho, ua farerei ratou i te tahi mau taata i roto i te oire o tei haamanaˈo i teie mau taata haapii tahito. I te tairururaa, ua oaoa ïa ratou i te amuiraa ˈtu i tau ahuru mau taata haapii bibilia tahito o tei itoito i roto i te faaroo, e o tei aratai ia ratou e ta ratou iho mau tamarii e mau mootua i te pae varua.—Tesalonia 1, 2:19, 20.

Ua popo maoro te feia oaoa e te faaroo maitai i haaputuputu mai eiaha noa i te mau uiuiraa manaˈo a te mau mitionare tahito, i te mau tabula e te mau tapao aroha atoa râ no te mau fenua Beretane, Kanada, Helemani, Iseraela, Italia, Kenya, Holane, e te mau Hau Amui no Marite—afaihia mai e te mau tia ěê. Ua haapapu faahou te reira i te autaeaeraa here na te ao atoa nei o te nunaa a te Atua. Ua haaputapû hohonu atoa te mau oreroraa parau tumu vauvauhia e te mau taeae faatavaihia o te Tino Aratai, mai ta ratou atoa mau pure hohonu, i te feia i haaputuputu mai. Ua nehenehe te feia apî i nia i te tahua ia faaau ia ratou iho i te mau taata hauti i roto i te darama no nia i te mau taurearea o tei haamanaˈo i to ratou Poiete. Ua hautihia te darama ma te hoê huru natura mau e te oraora maitai. Ei apitiraa i te matararaa o te mau buka apî na roto i te reo beretane, ua faatupu na toru buka apî na roto i te reo amharique i te oaoa rahi.b

I te mau taime faafaaearaa e vetahi atu â mau taime, e mau taime tano maitai na ïa no te haamatau e te mau taata faufaa mau e rave rahi. Ei hiˈoraa, i roto i te anairaa taata i mua roa, ua parahi te taata poro paari roa ˈˈe no Etiopia, oia hoi o Tulu Mekuria, e ta ˈna too hamanihia e te rima taata nei. I te matahiti i mairi aˈenei, i te 113raa o to ˈna matahiti, ua bapetizohia o ˈna ei Ite no Iehova. I teie tairururaa, ua oaoa o ˈna i te iteraa i ta ˈna vahine e 80 matahiti oia i te peeraa i to ˈna hiˈoraa, ma te riro mai ei tuahine no ˈna i te pae varua atoa. Ua riro to ˈna taeraa mai i te porotarama taatoa ei hiˈoraa maitai roa no te mau taurearea. Te hoê o ratou oia hoi o Yohanes Gorems, e 16 matahiti to ˈna a haere noa ˈi oia i te haapiiraa ua tavini oia i te roaraa e maha matahiti ei pionie tamau. Ua haapii o ˈna e vetahi atu â mau pionie haere haapiiraa noâ i te faaherehere i te taime, mai te poro-oioi-raa i te poipoi ia haere ratou i te fare haapiiraa aore ra te faaohiparaa i te mau taime faafaaearaa e te mau taime i muri iho i te haapiiraa.

Auê ïa mau hiˈoraa no te taiva-ore-raa e!

Ua faaruru e tau hanere taata no rotopu i te feia i haaputuputu mai, i te fare tapearaa e te haamauiuiraa a te mau hau faatere na mua ˈtu. Ua tapeahia o Mandefro Yifru e pae matahiti i roto i te fare auri, te oaoa nei râ o ˈna i teie nei i te taviniraa i Addis Ababa i roto i te amaa patu-apî-hia, i reira e faaohipahia ˈi te huriraa parau, te neneiraa, e te haponoraa. Aita te tahi atu taata apî e tavini ra e o ˈna, o Zecarias Eshetu, i faarue i to ˈna taiva-ore-raa e vau matahiti i teie nei, i te taparahi-pohe-raahia to ˈna metua tane no to ˈna tapearaa i to ˈna tiaraa kerisetiano taiva ore i roto i na area matahiti e toru i roto i te fare auri. E pae matahiti to Zecarias, te hoê o ta ˈna toopae tamarii, i te tapearaahia to ˈna metua tane i roto i te fare auri. Te haamanaˈo ra o Meswat Girma e to ˈna tuahine, o Yoalan, e tau ahuru matahiti to raua i teie nei e te haere noa ra i te haapiiraa, i to raua metua tane i roto noa i te mau hohoˈa, i te mea e mea nainai roa raua i te haapohe-taue-raahia oia no to ˈna tapearaa i to ˈna tiaraa taiva ore. Ua haaputapû to ˈna taiva-ore-raa ia raua, e te tavini nei raua ei mau pionie tamau, mai ta to raua metua tane i rave na i te taime i pohe ai.

Te tahi atu tavini taiva ore o Tamirat Yadette ïa, o te tavini ra i teie nei ei pionie taa ê i roto i te hoê vahi nehenehe o te Rift Valley. No to ˈna tiaraa amui ore kerisetiano, ua tapeahia o ˈna e toru matahiti i roto e hitu fare auri taa ê, i te tahi mau taime ma te taamuhia e te mau fifi e ma te taparahi-ino-hia. Teie râ, ua tauturu oia i roto i te fare auri tau ahuru taata ia rave ratou i to ratou tiaraa no te Basileia o te Atua.

Ua tapeahia o Tesfu Temelso, o te tavini ra i teie nei ei tiaau haaati, e 17 taime i te mau matahiti a pionie taa ê ai o ˈna. Te vai ra i nia ia ˈna i te mau rifa no te mau ruturaa, te oaoa nei râ o ˈna i te iteraa e e mau amuiraa to teie nei i roto i te mau vahi i tonohia na oia. Ua faaruru ma te mauiui tau ahuru taeae e tuahine o te amuiraa no Akaki i te tapearaa i roto i te fare auri e te hamani-ino-raa rahi, ua maraa râ te amuiraa i nia i te faito hau atu i te hoê hanere taata poro. Ua patu ratou i te Piha no te Basileia a te mau Ite no Iehova matamua i Etiopia. Ua haere mai e pae taata no Dese mai, te hoê oire nehenehe mau e 300 kilometera i te pae apatoerau o te oire pu, o tei faaruru i te pohe e o tei ite mata i te poheraa o te hoê taeae no taua vahi ra i te haamauiuiraa. Ua faataa te hoê matahiapo i rotopu ia ratou e, o Maseresha Kasa, ua faaoromai tamau o ˈna i te tapearaa e ono matahiti i roto i te fare auri, eiaha no te mea e mea taa ê o ˈna i roto i te hoê tuhaa, no te mea râ ua haapii o ˈna ia turui i nia ia Iehova.—Roma 8:35-39; faaau e te Ohipa 8:1.

Aita atoa i maoro aˈenei, ua faaite vetahi atu i to ratou haapao maitai i raro aˈe i te tamataraa. Ua haere mai e rave rahi mau taata i te tairururaa mai te hoê fenua tapiri mai i reira, no to ratou tiaraa amui ore, aita te mau Ite e fanaˈo ra i te parururaa a te mau mutoi, i te mau parau ratere, mau parau faaipoiporaa, mau rapaauraa, e te ohipa. To te tamaˈi uˈanaraa i pihai iho ia Mesewa, te hoê uahu no Erythrée o te Miti Uteute, ua ora te taatoaraa o te amuiraa, e 39 rahiraa ratou, tae noa ˈtu te mau tamarii, e tau maha avaˈe oraraa i raro aˈe i te hoê eˈa turu e ere i te mea teitei i roto i te medebara no te ape i te topitaraahia o to ratou mau fare na te hau faatere tahito. I roto i teie vahi veavea rahi e te veve, ua horoa ta ratou mau tauaparauraa i nia i te irava mahana e te tahi atu mau putuputuraa i te puai rahi e te ati-maite-raa ˈtu ia Iehova mai tei ravehia i nia ia vetahi ê atu. Ua faaruru e piti tuahine pionie taa ê e tavini ra i pihai iho i te tahora pape o Blue Nile i te mau haamǎtaˈuraa uˈana o te nahoa e te hamani-ino-raa faataehia e te Ekalesia orthodoxe, ua faaoromai tamau râ raua e ua ite raua e rave rahi mau taata haapii bibilia o tei pûpû ia ratou na roto i te bapetizoraa i teie tairururaa.

Ua faatia-maitai-hia te hoê taeae i ta ˈna ohipa i raro aˈe i te faateimaharaa i te mea e o ˈna anaˈe i te hoê vahi pâpâmǎrô i Ogaden, e ere i te mea atea roa ia Somalia. Ua faaora o ˈna ia ˈna iho i te pae varua na roto i te pororaa e te faatupuraa i te mau putuputuraa e te feia anaanatae, tae noa ˈtu te mau taote, o tei faufaahia i te haapiiraa no ǒ mai i te Atua ra e te haapii nei ratou i teie nei ia vetahi ê. Te tahi atu hiˈoraa maitai i te pae o te tapea-noa-raa i te taiva-ore-raa, o te hoê ïa pionie taa ê i Addis Ababa o tei taparahi-ino-hia, i te matahiti 1992, e tei vaiihohia ia pohe na te hoê nahoa taata turaihia e te mau perepitero orthodoxe. Ma te oaoa, ua ora mai o ˈna e te tamau nei oia i te tavini i roto i teie noâ tuhaa fenua. Te faaite ra to ˈna mata ataata oraora maitai e aita to ˈna e tapao inoinoraa. No ˈna, mai te feia atoa i tamata-tahito-hia e tamata-apî-hia, ua riro teie tairururaa “Te haapiiraa no ǒ mai i te Atua ra” ei oroa oaoa mau.

Ua tere maitai te faanahonahoraa o te tairururaa, ma te haaferuri i te feia i ratere mai e e rave rahi matahiti aravihiraa to teie mau rima tauturu. Inaha, ua haere oioi ratou i mua i nau matahiti e piti i mairi aˈenei. Ua faaoti oioi noa na mahana tairururaa ra e toru. E 9 556 rahiraa taata i te mahana maa. Ua faaite te afata teata o te fenua, te radio, e te mau vea i te reira ma te hoê hiˈoraa maitai. Ua nehenehe te taatoaraa e ite e te faahoona ra o Iehova i to ˈna nunaa i te pae varua. Te vai ra i rotopu i te feia i haaputuputu mai e tau tausani taata anaanatae mau o te tutava ra ia noaa mai ia ratou i te maitai o “Te haapiiraa no ǒ mai i te Atua ra.” Te matara nei te hoê aua rahi no te mau Ite no Iehova i roto i teie fenua e tau 50 mirioni taata, e ua haapuai te tairururaa i te taatoaraa i roto i ta ratou hinaaro papu e faaohipa i te taime e toe ra i roto i teie faanahonahoraa o te mau mea no te tauturu i te feia aau tae mau ia faufaahia ratou i te haapiiraa no ǒ mai i te Atua ra.

[Nota i raro i te api]

[Hohoˈa i te api 23]

Addis Ababa, 13-15 no tenuare 1994

[Hohoˈa i te api 24]

Te hoê pǔpǔ pionie i Addis Ababa (i te pae atau); feia taiva ore tei tapea-paatoa-hia i roto i te fare auri (i raro); te hoê Ite e 113 matahiti to ˈna e ta ˈna vahine