Mau parau apî maitatai no Malawi mai!
I TE 15 no novema 1993, ua tapao e ua haamanahia i mua i te Ture te Watch Tower Bible and Tract Society no Pennsylvania i te fenua Malawi no Afirika Apatoa hitia o te râ. Ua fariihia e te ture e e tiamâraa to te mau Ite no Iehova no te poro i te parau mau o te Bibilia i te mau taata no Malawi.
I te matahiti 1948 ra, ua haamauhia te amaa a te Taiete Watch Tower i Malawi no te faanaho i te ohipa a te mau Ite no Iehova i taua fenua ra. I te 8 no tenuare 1957, ua haamanahia te Taiete Watch Tower i reira no te taime matamua. E rave rahi mau matahiti i teie nei, ua maraa oioi noa te mau Ite no Iehova. Ua tupu mai râ te hamani-ino-raa uˈana i te matahiti 1964. No te aha?
No te auraro i te Atua, aita te mau Ite no Iehova i anoi atu i roto i te mau ohipa politita. (Ioane 17:16) E mea papu, aita vetahi i taa maitai i teie tiaraa bibilia e ua faaau-hape-hia te mau Ite i te hoê haapaoraa etaeta e mai te mau taata orure hau. No reira, ua manaˈo vetahi e ua tano ratou i te hamani ino i taua mau kerisetiano i au i te hau. E rave rahi mau Ite tei tihatihia i ta ratou mau ohipa, tei taparahihia, e te faahaamahia. Ua faataa-ê-hia vetahi ma te faahepo e ta ratou mau tamarii.
I te matahiti 1972, ua hau atu i te 30 000 mau Ite e vetahi atu tei haapii i te Bibilia e o ratou tei titauhia ia faarue i to ratou fenua ma te haamǎtaˈuhia i te pohe. Tau tausani tei horo atu i te mau puhaparaa no te taata tei horo i to ratou fenua i Mozambique. I te matahiti 1975 râ, ua faahoˈihia teie mau taata tei horo i Malawi, i reira ratou i te faarururaa i te hamani-ino-raa rahi. E rave rahi tei tuuhia i roto i te mau aua haavîraa. I roto i teie arepurepuraa rahi, ua tatarahia te Taiete Watch Tower i te tabula haamanahia o te mau faanahonahoraa fariihia e te ture i Malawi. Mai reira mai, ua opanihia te mau Ite no Iehova e ta ratou mau faanahonahoraa itehia i roto i taua fenua ra.
Noa ˈtu teie mau tupuraa atoa, aita roa ˈtu te mau Ite i tahoo. Aita roa ˈtu ratou i faanaho i te tahi pǔpǔ taata no te faahuehue aore ra no te orure ma te patoi i te faatereraa. Maoti râ, ua tapea ratou i to ratou tiaraa kerisetiano na roto i te pure no te faaite i te tura e te auraro tano no te “mana toroa” a te Hau faatere. (Roma 13:1-7; Timoteo 1, 2:1, 2) Ua turu atoa te mau Ite i te mau faaueraa tumu teitei o te oraraa kerisetiano faataahia i roto i te Bibilia, e i te na reiraraa, ua horoa ratou i te hoê hiˈoraa faahiahia i roto i to ratou haerea.
I to ratou faatiamâraahia aita i maoro aˈenei, ua faaoti te mau Ite no Iehova e tamau noa i te poro i te mau parau mau a te Bibilia ma te ru, “i te hora au” ra.—Timoteo 2, 4:2.
[Hohoˈa i te api 31]
M. G. Henschel e te utuafare o te Betela i Malawi i te matahiti 1960