“Ua paruru te mau Ite no Iehova ia ˈu!”

I TEIE mau mahana hopea, e rave rahi mau taata o te faaite ra i to ratou “iria, e te au ore i te taata maitatai ra.” (Timoteo 2, 3:1, 3) E ua haapapu o Isaac, te hoê tavini i te amaa a te Taiete Watch Tower i te fenua Afirika Tooa o te râ, i te reira. Te faatia ra oia e:

“I te avaˈe tenuare 1992, tei roto vau i te hoê pereoo faauta taata i nia iho i te hoê purumu ateatea roa e e pae taata ê atu. Ua tauaparau vau e te hoê vahine i pihai iho noa ia ˈu, e ua farii oia ma te oaoa i te hoê vea iti niuhia i nia i te Bibilia.

“I te hora maha i te ahiahi, ua tâpû tauê maira te hoê pereoo apî aita e numera e ua faaea maira i mua ia matou, e ua tapea tauê noa to matou pereoo. E toru taata rarahi, e pupuhi ta ratou tataitahi, tei ouˈa mai te tahi atu pereoo e ua tatara maira i to matou opani pereoo. ‘I rapae, outou pauroa,’ o ta te hoê i parau mai ma te iria.

“Ua haru maira te tahi taata i ta ˈu pute. I to ˈna iteraa e mau buka bibilia anaˈe to roto, ua taue aˈera oia i te pute. ‘Eaha ˈtu â ta oe?’ o ta ˈna ïa i ani, ma te faatano i ta ˈna pupuhi i nia ia ˈu. Ua horoa oioi atura vau ia ˈna ra te moni i roto i ta ˈu pute. ‘Te reira anaˈe?’ o ta ˈna ïa i ani mai. Ua parau atura vau ia ˈna e e Ite no Iehova vau e aita te mau Ite e haavare. Ua haru maira i ta ˈu pute moni, ite atura oia i ta ˈu parau tiaraa Watch Tower e ua parau maira e, ‘Na reira ia, Watchtower. A tiai noa i ǒ nei.’

“I muri iho, huri atura oia i te vahine ta ˈu i tauaparau i roto i te pereoo. Ua tatara oioi atura oia i to ˈna fifi arapoa e ua horoa atura i te moni i roto i ta ˈna pute. I to te taata eiâ iteraa i te vea iti i roto i to ˈna rima e ruru noa ra, ua manaˈo oia e o mâua to mâua tere, e ua parau oia ia ˈna ia faaea mai i pihai iho ia ˈu.

“I te reira taime atoa, ua haamata na toopiti taata eiâ ra i te hamani ino ma te iria rahi i to mâua mau hoa ratere. Ua tairi e ua eiâ ratou i te taata faahoro e te tahi atu taata tei ratere e o mâua. Ua haru te tahi atu taata eiâ i te fifi arapoa o te piti o te vahine. I to ˈna patoiraa, ua tairi puai ratou ia ˈna i nia i te upoo e te ouma e te pupuhi e pohe noa ˈtura o ˈna. E ua huti mai ratou i te toru o te vahine i rapae au i te pereoo e ua pupuhi i to ˈna ouma. Ua pohe atoa oia ma te peapea roa. O vau e te vahine apî anaˈe tei vaiihohia mai ma te pepe ore.

“I to mâua raveraahia i muri iho e te hoê taata e pereoo to ˈna, ua tamau noa te vahine tei riaria roa i te parau e, ‘Ua paruru te mau Ite no Iehova ia ˈu!’”