O te tataˈuraa anei te taviri o te manuïaraa?

“AITA ˈtu mea faufaa roa ˈˈe maoti râ te upootiaraa.” I teie mahana, e rave rahi mau taata o te ora nei ia au i teie mau parau, tei parau-pinepine-hia e na te hoê taata Marite faaineine i te hautiraa popo, o Vince Lombardi, i faahiti. I teie nei, ua apiti atoa mai te mau fenua tei raro aˈe ratou na mua ˈˈe i te faatereraa communiste i roto i te faahanahanaraa i te parau no te tataˈuraa. Te parauhia ra e o te faaôraa i te tataˈuraa i roto i ta ratou mau ohipa tapihooraa, te ravea e monihia ˈi ratou. I te pae Hitia o te râ, e rave rahi mau metua o te turai nei i ta ratou mau tamarii ia aa ˈtu e vetahi atu mau tamarii e o te afai nei ia ratou i te mau fare haapiiraa faaaravihiraa taa ê o te haapii nei ia ratou i te mau ravea no te manuïa i te mau hiˈopoaraa tomoraa i te tahi fare haapiiraa. Te tiaturi nei te mau metua e haapeapea nei no te reira e ua riro te ôraa ˈtu i roto i te hoê haapiiraa tuiroo ei taviri e noaa mai ai a muri aˈe te ruperuperaa materia.

E rave rahi o te tiaturi papu nei e o te tataˈuraa te taviri o te manuïaraa. Ia au i ta ratou e tiaturi ra, ua haere te mau taata i mua maoti te tataˈuraa ˈtu i te tahi e te tahi. “Ua riro te tataˈuraa ia noaa mai te hoê tiaraa teitei aˈe ei tumu no te itoito o te mau taiete Tapone,” o ta e 65,9 i nia i te hanere o te mau tia o te mau taiete rarahi i uiuihia e te Pu a te mau faanahonahoraa faanavairaa faufaa no Tapone i parau. E e au ra e ua manuïa te mau taiete Tapone i te tahi tau taime. Teie râ, o te tataˈuraa mau anei te taviri o te manuïaraa?

E mea hoona mau anei?

Te faaite nei te feia o te tataˈu ra e o vetahi ê i te hoê haerea miimii, e te haerea ra o vau na mua. E oaoa ratou ia fifihia vetahi ê, ma te manaˈo e e haafaahiahia te reira i ta ratou iho ohipa. No to ratou hinaaro miimii e ia apî ratou, e faaohipa ratou i te mau ravea o te haamauiui ia vetahi ê. E aratai tia ˈtu teie huru tapaparaa i te manuïaraa na roto i te tataˈuraa ihea? Te haamanaˈo ra o Yasuo, o tei haa puai ia riro mai oia ei taata rahi i roto i ta ˈna taiete, i to ˈna haerea na mua ˈˈe e te na ô ra oia e: “Ma te î i te feruriraa tataˈu e te manaˈo haru tiaraa, ua faaau vau ia ˈu iho e o vetahi pae e ua manaˈo vau e e mea faahiahia aˈe au ia ratou. I te taime a tuuhia ˈi taua mau taata ra i nia ˈˈe ia ˈu, ua peapea roa vau e ua amuamu vau i te mau mahana atoa no nia i te faanahoraa a te taiete i te feia rave ohipa. Aita to ˈu e hoa i roto i te auraa mau o teie parau.”

E nehenehe atoa te feruriraa tataˈu e aratai i te pohe-oioi-raa. Nafea? Te faatuati ra te vea Mainichi Daily News no Tapone i te karoshi, oia hoi te poheraa i muri aˈe i te rave-rahi-roa-raa i te ohipa, i te hoê haerea parauhia huru-A. E faaohipahia te parau huru-A no te faataa i te hoê haerea o te faaruru i te hepohepo rahi na roto i te rave-ru-raa i te ohipa, te tataˈuraa, e te au-ore-raa ia vetahi ê. Te faatuati nei te mau taote rapaau mafatu marite ra o Friedman raua o Rosenman i te haerea huru-A i te maˈi o te haafifi i te tereraa o te toto na roto i te mafatu. Oia mau, e nehenehe e pohe i te hoê feruriraa tataˈu.

E nehenehe te tataˈuraa i te vahi raveraa ohipa e aratai i te tahi atu mau fifi i te pae tino e i te pae feruriraa atoa. Teie te hiˈoraa o Keinosuke, e taata hoo aravihi no te hoê o te mau pu hoo pereoo rarahi roa ˈˈe no Tapone. Ua naeahia ia ˈna i te hoê faito teitei roa na roto i te hooraa i te taatoaraa e 1 250 pereoo. Ua tahiˈohia to ˈna hohoˈa e ua tuuhia i roto i te piha faaohipahia e te mau raatira i te fare rahi a te taiete. Noa ˈtu e e mea au ore roa na ˈna ia faaohipa i to ˈna mau hoa ohipa ei mau taahiraa ia noaa mai te mau tiaraa teitei aˈe, ua turai te taiete ia ˈna ia tataˈu. Ei faahopearaa, i roto i te area hoê matahiti, ua roohia oia i te maˈi o te vairaa maa e te aau. Taua matahiti atoa ra, e 15 tia i roto i ta ˈna taiete o tei mau i te fare maˈi, e hoê o tei haapohe ia ˈna.

I te fare, te aratai nei te hinaaro e tapapa ia vera ma, i te taata ia faaiteite i ta ratou mau faufaa na roto i te hoê faatitiauaraa hopea ore. (Ioane 1, 2:16) O te mau pu hooraa taoˈa anaˈe te apî, inaha te tuuhia ra te moni i roto i te rima o te feia hoo taoˈa o te fenua nei.—A faaau e te Apokalupo 18:11.

Noa ˈtu e e nehenehe te faatitiauaraa e te feruriraa tataˈu e faarahi i te puairaa i te vahi raveraa ohipa, eita e maerehia e ua parau te Arii ra o Solomona e: “Ua hiˈo ihora vau i te mau mea i ravehia, e te mau ohipa tia ra; ua feii-atoa-hia hoi te reira e te taata tupu nei. E mea faufaa ore atoa te reira e te amu i te mataˈi.” (Koheleta 4:4) Nafea ïa tatou e nehenehe ai e tapea i te hau o te feruriraa a ora noa ˈi tatou i roto i te hoê totaiete tataˈu? No te ite i te pahonoraa, e hiˈo na mua tatou ihea roa te manaˈo no te tataˈuraa i te haamataraa.