E tiaturi ia Iehova!

‘E tiaturi ia Iehova ma to mafatu atoa ra.’—MASELI 3:5.

1. Mea nafea te Maseli 3:5 i te haaputapûraa i te hoê taurearea, e maoti teihea mau faahopearaa a muri aˈe?

UA PAPAI te hoê taata mea maoro to ˈna riroraa ei mitionare e: “‘A TIATURI I TE FATU MA TO MAFATU ATOA; E EIAHA E TIATURI I TO OE IHO PAARI.’ Ua huti teie mau parau no roto mai i te Bibilia, tei tahiˈohia e tei patitihia i nia i te hoê pǎpai o te hoê fare o ta ˈu i haere atu, i to ˈu ara-maite-raa. I te toea o taua mahana ra, ua feruri hohonu vau i taua mau parau nei. Ua aniani ihora vau e, E nehenehe anei ta ˈu e tiaturi i te Atua ma to ˈu mafatu atoa?” E 21 matahiti to teie taata i taua tau ra. I te 90raa o to ˈna matahiti e a tavini ai oia ma te haapao maitai ei matahiapo i Perth, i Auteralia, e nehenehe oia e hiˈo i muri i to ˈna oraraa tei faufaahia i te mau hotu o to ˈna tiaturiraa ma to ˈna mafatu atoa ia Iehova, maoti e 26 matahiti fifi mau to ˈna taviniraa ei pionie i roto i te mau aua mitionare apî i Ceylan (o Sri Lanka i teie nei), Burma (o Myanmar i teie nei), Malaisie, Thaïlande, Inidia, e Pakistan.a

2. Eaha te tiaturiraa ta te Maseli 3:5 e patu i roto ia tatou?

² “E tiaturi ia Iehova ma to mafatu atoa ra”—e tia i teie mau parau a te Maseli 3:5, ia au i te huriraa a te Tatararaa a te ao apî, ia turai ia tatou paatoa ia tamau â i te pûpû i to tatou oraraa ma to tatou mafatu atoa no Iehova, ma te tiaturi e e nehenehe ta ˈna e haapuai i to tatou faaroo, e tae noa ˈtu i te faito e haapaiuma ˈi tatou i te mau haafifiraa mai te mau mouˈa ra te huru. (Mataio 17:20) E hiˈopoa anaˈe na tatou i teie nei i te mau irava e haaati ra i te Maseli 3:5.

E faaueraa metua tane

3. (a) Eaha te faaitoitoraa e itehia i roto i na pene matamua e iva o te buka Maseli? (b) No te aha tatou e hiˈopoa maite ai i te Maseli 3:1, 2?

³ Te vauvau nei na pene faaomuaraa e iva o te buka bibilia a te mau Maseli i te mau faaueraa metua tane, te mau aˈoraa paari no ǒ mai ia Iehova ra no te feia atoa e hinaaro ra e fanaˈo i te tiaraa tamaiti i nia i te raˈi aore ra “te tiamâ maitai o te tamarii a te Atua ra” i roto i te hoê paradaiso i nia i te fenua. (Roma 8:18-21, 23) E aˈoraa paari te reira ta te mau metua e nehenehe e faaohipa no te haapii i ta ratou mau tamarii tamaroa e mau tamarii tamahine. Mea faahiahia mau te aˈoraa i roto i te Maseli pene 3, o te haamata ra na roto i teie faaararaa: “E tau tamaiti, eiaha e haamoe i ta ˈu nei aˈo; ia haapao maite to aau i ta ˈu nei ture.” A fatata ˈi te mau mahana hopea o te ao ino a Satani i te hopea, ia ara maite tatou e tia ˈi, i te mau faahaamanaˈoraa a Iehova. Peneiaˈe mea roa te eˈa i haerehia mai, teie râ te parau i tǎpǔhia i te feia atoa o te faaoromai, “e maoro hoi to oe ra mau matahiti, e te ora hoi e te hau ta te reira e amui atoa mai ia oe ra”—oia hoi te ora mure ore i roto i te faanahoraa apî a Iehova.—Maseli 3:1, 2.

4, 5. (a) Eaha te taairaa oaoa e faataahia ra i roto i te Ioane 5:19, 20? (b) Mea nafea te aˈoraa i roto i te Deuteronomi 11:18-21 e tano ai no to tatou nei tau?

⁴ E mea faufaa roa te hoê taairaa oaoa i rotopu i te hoê metua tane e ta ˈna tamaiti. Ua faanaho to tatou Poiete, te Atua ra o Iehova, e ia tupu iho â te reira. Ua parau o Iesu Mesia no nia i to ˈna iho mau taairaa piri roa e o Iehova e: “Eita e tia ta te Tamaiti ia rave oia anaˈe ihora, maori râ o ta ˈna i ite i te Metua i te raveraa ra; te mau mea atoa ta ˈna e rave ra, oia atoa ta te Tamaiti e rave. E here â hoi te Metua i te Tamaiti, e faaite mai â hoi ia ˈna i te mau mea atoa ta ˈna iho e rave ra.” (Ioane 5:19, 20) Ua opua o Iehova e ia tupu teie huru taairaa piri i rotopu ia ˈna iho e to ˈna utuafare fetii atoa i nia i te fenua nei, e tae noa ˈtu i rotopu i te mau metua tane taata e ta ratou mau tamarii.

⁵ Ua faaitoitohia e ia tupu te mau taairaa tiaturi i roto i te mau utuafare i Iseraela tahito ra. Ua faaue atu o Iehova i te mau metua tane ra: “E teie nei, e vaiiho outou i taua mau parau na ˈu nei i roto i to outou aau, e i roto i to outou varua, e taamu hoi i nia iho i to outou rima ei tapao; e ia riro hoi mai te haamanaˈoraa i mua mau i to outou na mata. E haapii hoi outou i ta outou mau tamarii i teie nei mau parau, i te paraparauraa i te reira ia parahi noa oe i roto i to fare, e ia haere noa oe na te eˈatia; e ia taoto oe i raro, e ia tia hoi oe i nia. E papai hoi oe i te reira i nia iho i te mau pou opani no oe ra, e i nia iho i te mau uputa o te mau oire. Ia faarahihia to outou pue mahana, e te mau mahana atoa o ta outou mau tamarii i nia i te fenua ta Iehova i tǎpǔ atu i to outou mau metua ra e e horoa oia no ratou ra; mai te mau mahana o te raˈi i nia i te fenua nei.” (Deuteronomi 11:18-21) E nehenehe mau â te Parau faauruahia a to tatou Orometua Rahi, te Atua ra o Iehova, e faaohipahia no te taai maite atu ia ˈna e te mau metua e ta ratou mau tamarii, e tae noa ˈtu e te feia atoa e tavini ra ia ˈna i roto i te amuiraa kerisetiano.—Isaia 30:20, 21.

6. Nafea tatou e fanaˈo ai i te farii maitai o te Atua e te taata?

⁶ Te faahiti-faahou-hia ra te mau aˈoraa metua tane no te nunaa o te Atua, te feia paari e te feia apî, i roto i te mau irava 3 e te 4 o te Maseli pene 3: “Eiaha roa te aroha e te parau mau ia taa ê ia oe ra, e taamu-hua-hia ïa i nia i to aˈî na; e papai hoi i te reira i nia i te pǎpǎ ra o to oe ra aau: e noaa ia oe te itehia mai i reira e te au-rahi-hia mai, i te aro o te Atua e te taata atoa nei.” Mea aravihi roa te Atua ra o Iehova i te faaiteraa i te hamani maitai e te parau mau. Mai ta te Salamo 25:10 e faaite ra, “te mau haerea a Iehova ra, o te [hamani maitai] ïa e te parau mau.” Ma te pee i te hiˈoraa o Iehova, e tia ia tatou ia haafaufaa i teie mau huru maitatai e to ratou mana paruru, mai ta tatou e poihere i te hoê fǐfǐ arapoa faufaa rahi e e papai roa ia ore e mâ faahou i nia i to tatou mafatu. E nehenehe ïa tatou e pure ma te aau rotahi e: “E Iehova e; na to hamani maitai e to parau mau e tiai mai ia ˈu.”—Salamo 40:11.

Te hoê tiaturi auraro

7. Mea nafea to Iehova faaiteraa e e nehenehe oia e tiaturihia?

⁷ I roto i te hoê titionare (Webster’s Ninth New Collegiate Dictionary), te tatarahia ra te parau tiaturi mai “te tiaturiraa papu i nia i te huru, te aravihi, te puai, aore ra te parau mau o te hoê taata aore ra o te hoê mea.” Ua niu-papu-hia te huru o Iehova i roto i to ˈna hamani maitai. E e nehenehe tatou e horoa i to tatou tiaturi taatoa i roto i to ˈna aravihi no te rave i te mea o ta ˈna i tǎpǔ, inaha te haapapu ra to ˈna iˈoa iho, o Iehova, e o ˈna te Taata opua rahi. (Exodo 3:14; 6:2-8) Ei Poiete, o ˈna te Pu o te puai e te ito ohipa. (Isaia 40:26, 29) O ˈna te hiˈoraa hau roa ˈˈe o te parau mau, inaha e “ore e tia i te Atua ia haavare.” (Hebera 6:18) No reira, te faaitoitohia ra tatou ia tuu i to tatou tiaturiraa taatoa i roto ia Iehova, to tatou Atua, te Pu rahi o te parau mau atoa, tei ia ˈna ra te mana hope no te paruru i te feia e tiaturi ra ia ˈna e no te haamanuïa ma te hanahana i ta ˈna mau opuaraa rahi atoa.—Salamo 91:1, 2; Isaia 55:8-11.

8, 9. No te aha e erehia ˈi te tiaturi i roto i teie nei ao, e mea nafea te nunaa o Iehova e taa ê roa ˈi?

⁸ I roto i te ao ino e haaati ra ia tatou, mea peapea hoi ia ite e te erehia ra te tiaturi. Maoti râ, te ite nei tatou i te nounou e te peu tia ore na te mau vahi atoa. Ua papaihia te api rapaeau o te vea World Press Review no me 1993 e te poroi ra: “MARAARAA TAUE O TE PEU TIA ORE—Moni repo i roto i te faanahoraa o te ao apî. Te parare roa nei te mau peu tia ore mai Beresilia tae atu i Helemani, mai te mau Hau amui no Marite tae atu i Raparata, mai Paniora tae atu i Peru, mai Italia tae atu i Mexico, mai Vaticana tae atu i Rusia.” Niuhia i nia i te riri, te nounou, e te tiaturi ore, aita ˈtu mea e ootihia e te faanahoraa o te ao apî a te taata nei maoti râ te maraaraa o te mau ati no te huitaata nei.

⁹ Taa ê atu e te mau nunaa politita, te oaoa nei te mau Ite no Iehova i te riroraa ei “[nunaa] o Iehova to ratou Atua.” O ratou anaˈe te nehenehe e tiaoro ma te parau mau e, “Te Atua ta matou e tiaturi” (e parau teie i papaihia i nia i te moni marite). E nehenehe ta ratou tataitahi e tuô ma te oaoa e: “E haamaitai au i te Atua i ta ˈna ra parau; . . . E tiaturi au i te Atua, e ore [au] e mǎtaˈu.”—Salamo 33:12; 56:4, 11.

10. Eaha tei haapaari e rave rahi mau taurearea kerisetiano ia tapea i to ratou taiva ore?

¹⁰ I roto i te hoê fenua no Asia i reira e mau tausani taurearea Ite no Iehova o tei rutuhia ma te ino e o tei tuuhia i roto i te fare tapearaa, maoti te tiaturi ia Iehova, ua nehenehe te pae rahi o ratou e faaoromai. I te hoê po i roto i te fare tapearaa, ua manaˈo te hoê taurearea Ite o tei faaruru i te mau haamauiuiraa riaria mau e eita ta ˈna e nehenehe faahou e faaoromai. Tera râ, ua haere omoe maira te tahi atu taurearea e farerei ia ˈna na roto i te poiri. Ua omuhumuhu maira oia: “Eiaha e faarue. Ua ofati vau i to ˈu faaroo e mai reira mai, aita to ˈu feruriraa i hau faahou.” Ua faaapî faahou aˈera te taurearea matamua i to ˈna hinaaro papu e tapea maite. E nehenehe tatou e tiaturi taatoa ia Iehova e e tauturu mai oia ia tatou ia faaruru i te mau huru tutavaraa atoa a Satani no te faaere ia tatou i to tatou taiva ore.—Ieremia 7:3-7; 17:1-8; 38:6-13, 15-17.

11. Nafea to tatou faaitoitoraahia ia tiaturi ia Iehova?

¹¹ Te na ô ra te hoê tuhaa o te faaueraa matamua e: “E [here] oe i to Atua ia Iehova ma to [mafatu] atoa.” (Mareko 12:30) Ia feruri maite tatou i nia i te Parau a te Atua, e ô hohonu roa te mau parau mau rahi o ta tatou e haapii ra i roto i to tatou mafatu ia turaihia tatou ia horoa ia tatou taatoa i roto i te taviniraa o to tatou Atua faahiahia mau, te Fatu Mana Hope ra o Iehova. Mea na roto i te hoê mafatu o tei putapû roa i te mauruuru no ˈna—no te mau mea atoa o ta ˈna i haapii mai, i rave, e e rave â no tatou—tatou e faaitoitohia ˈi ia tiaturi taatoa i ta ˈna faaoraraa.—Isaia 12:2.

12. I roto i te roaraa o te mau matahiti, mea nafea to e rave rahi mau kerisetiano faaiteraa i to ratou tiaturi i roto ia Iehova?

¹² E nehenehe teie tiaturi e atuatuhia i roto i te roaraa o te mau matahiti. Ua papai te hoê Ite no Iehova haehaa o tei tavini ma te haapao maitai hau atu i te 50 matahiti i te pu rahi a te Taiete Watch Tower i Brooklyn, mai te avaˈe eperera 1927 mai â, e: “I te hopearaa o taua avaˈe ra, ua tae mai te tino moni e 5 dala marite i roto i te hoê vehî rata e te hoê hohoˈa nehenehe roa tei papaihia i nia iho te irava bibilia o te Maseli 3:5, 6 . . . E mau tumu papu anaˈe no te tiaturi ia Iehova, no te mea i te pu rahi, ua noaa mai ia ˈu te papuraa e te vai ra ta Iehova te hoê ‘tavini haapao maitai e te paari’ o te aupuru ra ma te taiva ore i te mau faufaa atoa o te Basileia i ǒ nei i nia i te fenua.—Mataio 24:45-47.”b Ua haamauhia te mafatu o teie kerisetiano, eiaha i nia i te hereraa i te moni, i nia râ i te noaaraa mai i ‘te taoˈa pau ore i te raˈi ra.’ Oia atoa i teie nei tau, te na reira nei te mau tausani taata e tavini nei i te mau Betela a te Taiete Watch Tower na te ao nei maoti te hoê euhe o te veve tei haamanahia e te ture. Te tiaturi nei ratou e na Iehova e haapao i te mau mea ta ratou e hinaaro ra i te mau mahana atoa.—Luka 12:29-31, 33, 34.

A turui atu i nia ia Iehova

13, 14. (a) Ihea noa e itehia ˈi te mau aˈoraa paari? (b) Eaha te tia ia apehia no te ora i te hamani-ino-raa?

¹³ Te faaue maira to tatou Metua i te raˈi ra e: ‘Eiaha e tiaturi i to oe iho maramarama.’ (Maseli 3:5) Eita te mau taata aˈo e te mau taote i te pae feruriraa no teie nei ao e nehenehe e tiaturi e e naeahia ia ratou te paari e te maramarama ta Iehova e faaite ra. “To ˈna ite e mea itea ore ia imi.” (Salamo 147:5) Maoti i te tiaturi i te paari o te feia teitei o te ao nei aore ra i nia i to tatou iho mau manaˈo papu ore, e tia ia tatou ia fariu i nia ia Iehova, ta ˈna parau, e te mau matahiapo a te amuiraa kerisetiano ia noaa mai te mau aˈoraa paari.—Salamo 55:22; Korinetia 1, 2:5.

¹⁴ Eita roa te paari taata nei aore ra te tiaraa teitei e aratai ia tatou i te vahi papu i te mahana e fatata oioi maira o te tamataraa rahi. (Isaia 29:14; Korinetia 1, 2:14) I te fenua Tapone, i te Piti o te Tamaˈi Rahi, ua maiti te hoê tiai mamoe aravihi, te teoteo atoa râ, o te nunaa a te Atua i te turui i nia i to ˈna iho maramarama. I raro aˈe i te faateimaharaa, ua riro maira oia ei apotata, e ua faaea atoa te rahiraa o te nǎnǎ i te ohipa i raro aˈe i te hamani-ino-raa. Ua faaite te hoê tuahine Tapone taiva ore, o tei ora mai ma te itoito i te hamani-ino-raa riaria i roto i te mau piha tapearaa hairiiri, e: “E ere te feia o tei tapea i to ratou haapao maitai i te feia e aravihi taa ê aore ra e tiaraa to ratou. E tia mau â ia tatou paatoa ia tiaturi noa ia Iehova ma to tatou mafatu atoa.”c

15. Eaha te huru maitai te titauhia ia faaoaoa tatou ia Iehova?

¹⁵ E titau te tiaturiraa ia Iehova, maoti i to tatou iho maramarama, i te haehaa. E mea faufaa mau â teie huru maitai no te feia atoa e hinaaro ra e ia mauruuru o Iehova! Inaha, te faaite atoa nei to tatou Atua, noa ˈtu e o ˈna te Fatu Mana Hope o te ao atoa nei, i te haehaa i roto i ta ˈna mau taairaa e ta ˈna poieteraa maramarama. E nehenehe tatou e maruuuru i te reira. “Te tuu haehaa nei râ oia i te hiˈoraa mai i raro i nia i te mau raˈi, e i nia atoa i te fenua. Te faateitei nei oia i tei haehaa ra no raro mai i te repo ra.” (Salamo 113:6, 7) Maoti to ˈna aroha rahi, te faaore nei oia i ta tatou mau hapa na nia i te niu o ta ˈna ô rahi roa ˈˈe na te huitaata nei, te tusia faufaa rahi o te hoo a ta ˈna Tamaiti herehia, o Iesu Mesia. Auê tatou i te mauruuru no to ˈna hamani maitai rahi e!

16. Mea nafea te mau taeae ia titau i te mau hopoia taa ê i roto i te amuiraa?

¹⁶ Te faahaamanaˈo maira o Iesu iho e: “Te faateitei ia ˈna ihora, e faahaehaahia ïa; e o te faahaehaa ia ˈna ihora, e faateiteihia ïa.” (Mataio 23:12) Ma te haehaa, e tia i te mau taeae bapetizohia ia titau i te mau hopoia i roto i te amuiraa kerisetiano. Teie râ, e tia i te mau tiaau ia faariro i ta ratou toroa, eiaha mai te hoê tiaraa teitei, tera râ, mai te hoê ravea no te rave i te hoê ohipa, ma te haehaa, te mauruuru, te aau ru, mai ta Iesu i rave, e ua parau hoi oia e: “Te ohipa noa nei â tau Metua, e ohipa atoa hoi au.”—Ioane 5:17; Petero 1, 5:2, 3.

17. Eaha te tia ia tatou paatoa ia taa, e e aratai te reira i tehea ohipa?

¹⁷ Ia papu maitai ia tatou ma te haehaa e na roto i te pure e e au tatou i te repo i mua i te aro o Iehova. Auê tatou i te oaoa e i te mea e “te aroha o Iehova mai tahito mai ïa e a muri noa ˈtu, i te feia i mǎtaˈu ia ˈna ra, e ta ˈna ra parau-tia i te tamarii a ta ratou ra mau tamarii”! (Salamo 103:14, 17) E tia ïa ia tatou paatoa ia riro ei mau taata tuatapapa maite i te Parau a te Atua. E tia i te taime faataahia no te haapiiraa tataitahi e te haapiiraa fetii, e i roto i te mau putuputuraa a te amuiraa, ia riro ei mau hora faufaa roa ˈˈe no tatou i te mau hebedoma atoa. Mea na reira ïa tatou e patu ai i te ‘ite o te Atua Moˈa.’ “O te ite ïa” te reira.—Maseli 9:10.

“I to oe atoa ra mau haerea . . .”

18, 19. Nafea tatou ia faaohipa i te Maseli 3:6 i roto i to tatou nei oraraa, e eaha te faahopearaa?

¹⁸ Ma te haafariu ia tatou i nia ia Iehova, te Atua tei riro ei Pu no te maramarama, te na ô râ te Maseli 3:6 e: “Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.” Te oreraa e haamoe ia Iehova, te auraa ra, te haafatataraa ˈtu ïa ia ˈna na roto i te pure. Noa ˈtu e teihea roa tatou e eaha te tupuraa e farereihia, e nehenehe tatou e paraparau atu ia ˈna i te reira iho taime na roto i te pure. Ia rave tatou i ta tatou mau ohipa mahana, ia faaineine tatou no te taviniraa, ia haere tatou na te mau fare no te poro haere i to ˈna Basileia, e nehenehe tatou e pure tamau e ia haamaitai mai oia i ta tatou mau ohipa. No reira, e nehenehe tatou e fanaˈo i te haamaitairaa faito ore e te oaoa i te ‘haereraa e te Atua,’ ma te tiaturi e e ‘faaafaro oia i to tatou mau haerea,’ mai ta ˈna i rave no te feia mǎtaˈu i te Atua ra, oia hoi o Enoha, Noa, e te mau ati Iseraela taiva ore, mai ia Iosua e o Daniela.—Genese 5:22; 6:9; Deuteronomi 8:6; Iosua 22:5; Daniela 6:23; hiˈo atoa Iakobo 4:8, 10.

¹⁹ Ia faaite anaˈe tatou i ta tatou mau aniraa i te Atua, e nehenehe tatou e tiaturi e ‘e paruru te hau a te Atua o tei hau aˈe i te mau manaˈo atoa i to tatou mafatu e to tatou feruriraa na roto i te arai o Iesu Mesia.’ (Philipi 4:7) E nehenehe teie hau a te Atua, e itehia na roto i te hoê huru oaoa, e turu i ta tatou poroi i mua i te mau taata o ta tatou e farerei i roto i ta tatou pororaa. (Kolosa 4:5, 6) E nehenehe atoa e faaitoito i te feia o tei roohia i te mau hepohepo aore ra te mau ohipa tia ore o tei riro ei peu matauhia i roto i te ao nei i teie mahana, ia au i ta te aamu i muri nei e faaite ra.d

20, 21. (a) I te tau riaria Nazi, mea nafea te taiva ore o te mau Ite no Iehova e faaitoito ai ia vetahi ê? (b) Eaha te opuaraa te tia i te reo o Iehova ia faaitoito ia tatou ia rave?

²⁰ Ua faatia o Max Liebster, te hoê ati Iuda o tei ora mai i te Taparahiraa i te mau ati Iuda na roto i te hoê tupuraa e au i te semeio ra, i to ˈna tere no te haere i te hoê aua haapoheraa Nazi: “Ua opanihia matou i roto i te mau pereoo auahi o tei vahihia na roto e rave rahi mau piha iti nainai no e piti taata. Ua tuehia vau i roto i te hoê o teie mau piha, e ua ite atura vau i te hoê taata mau auri e hohoˈa mata hau to ˈna. Tei ǒ nei o ˈna no to ˈna faatura i te ture a te Atua, e ua maiti oia i te fare tapearaa e peneiaˈe te pohe maoti i te haamanii i te toto o te tahi atu mau taata. E Ite no Iehova oia. Ua afai-ê-hia ta ˈna mau tamarii, e ua haapohehia ta ˈna vahine. E te tiai ra oia e ia haapohe-atoa-hia oia. Ua horoa mai teie tere e 14 mahana i te pahonoraa i ta ˈu mau pure, no te mea i roto i taua tere no te pohe ra, ua itehia mai ia ˈu te tiaturiraa no te ora mure ore.”

²¹ I muri aˈe i to ˈna faatiamâraahia i te aua tapearaa no Auschwitz “te apoo liona” ia au i ta ˈna piiraa, e to ˈna bapetizoraa, ua faaipoipo teie taeae i te hoê vahine Ite no Iehova o tei tapea-atoa-hia e ua faaoromai atoa to ˈna metua tane i roto i te aua tapearaa no Dachau. I to ˈna tapearaahia i reira, ua faaroo to ˈna metua tane e ua tapea-atoa-hia ta ˈna vahine e ta ˈna tamahine apî. Ua faatia oia i to ˈna huru: “Ua haapeapea roa vau. I te hoê mahana, te tia ra vau i roto i te hoê reni taata no te hopu i te pape, ua faaroo atura vau i te hoê reo i te faahitiraa i te Maseli 3:5, 6 . . . Ua taˈi to ˈna vevo mai te hoê reo no te raˈi maira. Tera mau ta ˈu e titau ra ia noaa faahou mai to ˈu aifaito.” Inaha, o te reo o te tahi atu mau auri tei faahiti i teie irava, tera râ, te haapapu ra teie ohipa i te puai ta te Parau a te Atua e nehenehe e faaohipa i nia ia tatou. (Hebera 4:12) Ia paraparau mai te reo o Iehova ma te puai ia tatou i teie mahana na roto i te mau parau o ta tatou irava no te matahiti 1994: ‘E tiaturi ia Iehova ma to mafatu atoa ra’!

[Nota i raro i te api]

Ei haapotoraa

◻ Eaha te mau aˈoraa e vauvauhia ra i roto i te buka Maseli?

◻ Mea nafea tatou e maitaihia ˈi i te tiaturi ia Iehova?

◻ Eaha te tiaturihia ra no te turui i nia ia Iehova?

◻ No te aha tatou e haapao ai ia Iehova i roto i to tatou mau haerea atoa?

◻ Mea nafea Iehova ia faaafaro i to tatou mau haerea?

[Hohoˈa i te api 15]

E haaputapû te poroi oaoa a te Basileia i te feia mafatu tia