Mau uiraa a te feia taio

I roto i te Roma 9:3, ua papai te aposetolo Paulo e: “E tia hoi ia ˈu ia anatemahia vau e taa ê atu vau i te Mesia ra, i tau mau taeae, to ˈu ra fetii i te haapaoraa i te tino nei.” Te auraa anei e e faatusia oia i to ˈna ora no te faaora i te tahi atu mau ati Iuda?

Ua vaiiho mai o Iesu i te hiˈoraa rahi roa ˈˈe no te here. Ua farii oia i te horoa i to ˈna nephe, oia hoi to ˈna ora, no te huitaata hara nei. I roto i ta ˈna taviniraa i mua i te taata, ua horoa oia ia ˈna iho no te feia o to ˈna ra fenua—te mau ati Iuda—ia nehenehe te mau taata e rave rahi ia ô i roto i te feia o te maitaihia i ta ˈna ra tusia o te hoo. (Mareko 6:30-34) Aita to ratou farii ore e to ratou patoiraa i te poroi faaora i haaparuparu i te tapitapiraa aroha o Iesu no te nunaa ati Iuda. (Mataio 23:37) E ua vaiiho mai oia i te hoê ‘hohoˈa ia pee tatou i to ˈna mau taahiraa avaˈe.’—Petero 1, 2:21.

E nehenehe anei te mau taata tia ore e pee i te hiˈoraa o Iesu i te pae no te here? E, e teie te tahi faahiˈoraa i roto i te aposetolo Paulo. No to ˈna tapitapi rahi no te tahi atu mau ati Iuda, e no to ˈna aroha ia ratou, ua parau oia e e mea au aˈe na ˈna e “ia anatemahia [oia] e taa ê atu i te Mesia ra” no ratou.

Te faaohipa ra o Paulo i ǒ nei i te tahi parau faarahihia no te haamatara i to ˈna manaˈo. Ua faaohipa o Iesu i teie atoa huru faarahiraa parau i roto i te Mataio 5:18, ia ˈna i parau e: “E mou aˈe te raˈi e te fenua atoa, i te hoê iota e te hoê vahi iti o te ture nei, eita ïa e mou e ia hope roa i te tupu.” Ua ite o Iesu e eita te raˈi e te fenua e mou. Eita atoa hoi o Paulo e anatemahia, e eita atoa te mau ati Iuda atoa e farii i te kerisetianoraa. Teie râ, te manaˈo o Paulo, oia hoi e rave oia i te mau mea atoa no te tauturu i te mau ati Iuda ia farii i te ravea faaoraraa a te Atua na roto ia Iesu Mesia. Eita ïa e maerehia e ua faaitoito te aposetolo i te mau kerisetiano e: “Ei pee mai outou ia ˈu mai ia ˈu atoa e pee i te Mesia nei.”—Korinetia 1, 11:1.

I teie mahana, e tia i te mau kerisetiano ia faatupu i te hoê â tapitapiraa e to Iesu e to Paulo no te feia tiaturi ore. Eiaha tatou e vaiiho i te anaanatae ore aore ra te patoiraa uˈana a te taata o ta tatou tuhaa fenua pororaa ia haaparuparu i to tatou here no to tatou mau taata-tupu e to tatou itoito no te tautururaa ˈtu ia ratou ia haapii i te eˈa o te faaoraraa.—Mataio 22:39.