Mai te vivi ra te huru

UA HAERE ê na anei outou e ori haere na roto i te uru aihere i te tau veavea a ite ai i te mau rahiraa vivi o te peepee haere na mua mai i to outou mau taahiraa avae? E au ra e tei te mau vahi atoa ratou, noa ˈtu e aita paha outou i tâuˈa noa ˈˈe. Inaha, e au ra e mea haihai ratou e te faufaa ore.

Teie râ, na roto i to ratou faufaa ore, e tano maitai te mau vivi no te faahohoˈa i te huitaata nei. Noa ˈtu e te faariro nei vetahi mau taata tiaraa teitei ia ratou ei feia faufaa roa, e manaˈo ê to to tatou Poiete. Ua parau ta ˈna peropheta ra o Isaia e: “E na ˈna, na te parahi i nia i te hugo o te fenua nei, e ua riro to te ao nei mai te vivi ia ˈna.”—Isaia 40:22.

Te faateitei nei te rahi, te puai, e te paari o te Atua ra o Iehova ia ˈna i nia roa ˈˈe i te ao o te mau taata, mai te taata o tei teitei aˈe i te vivi i te pae no te maramarama e te puai. Teie râ, o te here te huru hau aˈe o te Atua. E te turai nei to ˈna here faito ore ia ˈna ia haapao, ia tauturu, e ia faaora mai ia tatou—mai te peu e e here e e auraro tatou ia ˈna. Te ohipa nei Iehova e o tatou ma te here, noa ˈtu e e au tatou i te mau vivi faufaa ore ra. Ua parau te papai salamo e: “O vai tei au i to tatou Atua ia Iehova? o tei teitei e ua parahi i te raˈi teitei. Te tuu haehaa nei râ oia i te hiˈoraa mai i raro i nia i te mau raˈi, e i nia atoa i te fenua.”—Salamo 113:5-7.

Mai ta teie salamo e faaite ra, te faatae nei Iehova ma te here i te tauturu i te taata haehaa. Oia mau, te tauturu nei Oia i te feia atoa o te ‘imi i te Atua e itea ˈtu ai’ ma te haehaa. (Ohipa 17:27) E riro atoa mai te feia o tei itea i te Atua—e o te tavini ia ˈna—ei taoˈa faufaa i mua i to ˈna aro. (A faaau e te Isaia 43:4, 10.) E riro ïa te vivi haehaa ra i te faahaamanaˈo ia tatou i to tatou iho faufaa ore e i te here o to tatou Poiete mana hope ra, o te horoa mai na te feia auraro i to ˈna auhoaraa e te hamani maitai faito ore. Te faaite ra anei outou i te mauruuru no te here o te Atua?