Hohoˈa no te Fenua i tǎpǔhia mai

Gileada—Fenua o te hoê nunaa itoito

NA MUA iti noa ˈˈe o Iseraela i haere ai na roto ia Ioridana no te tomo atu i roto i te Fenua i tǎpǔhia mai, ua faaue aˈera o Mose ia ratou e: “Faaetaeta e ia itoito roa, . . . te haere atoa nei hoi to Atua o Iehova iho i pihai iho ia oe.”—Deuteronomi 31:6.

Ua amuihia mai na opu o Reubena e o Gada e te afaraa o te opu o Manase i roto i te aˈoraa a Mose. Ua ite ratou ‘e te fenua ra o Gileada, e vahi maitai ïa no te nǎnǎ,’ no reira, ua ani atura ratou e ia tufahia ia faaea ratou i te fenua o Gileada ra.—Numera 32:1-40.

Tei te tahi aˈe pae o Gileada, te pae hitia o te râ, o Ioridana. Oia hoi te taatoaraa o te pae hitia o te râ, mai te hopea apatoerau o te Miti Pohe e tae atu i te Miti no Galilea. Ua tia mai taua fenua ra mai te Peho no Ioridana e tae atu i te mau mahora teitei pîpî-maitai-hia e te pape e te mau aivi menemene. No reira, e fenua maitai roa o Gileada no te faaapuraa i te sitona e no te faaamuraa i te mau nǎnǎ animala. Te horoa ra te hohoˈa i nia nei i te hoê hiˈoraa o te fenua ra o Gileada. Teie râ, no te aha te itoito e taaihia ˈi e teie fenua au mau?

Aita te mau opu o tei maiti e faaea i Gileada i na reira no to ratou mehameha. A haamanaˈo na e ua farii ratou i te haere na roto ia Ioridana no te aro atu i te mau enemi i te Fenua i tǎpǔhia mai. E i to ratou hoˈiraa ˈtu i Gileada, ua titau ratou i te itoito hau atu. No te aha? Inaha, tei nia ratou i te otia, e tei mua ratou i te aroraa a to Amona i te pae apatoa hitia o te râ e a to Suria i te pae apatoerau. E ua arohia mai iho â ratou.—Iosua 22:9; Tavana 10:7, 8; Samuela 1, 11:1; Arii 2, 8:28; 9:14; 10:32, 33.

Ua riro teie mau tamaˈi ei mau taime taa ê i reira te itoito e titauhia ˈi. Ei hiˈoraa, i muri aˈe i to Iehova vaiihoraa i te mau ati Amona ia faatîtî ia Gileada, ua tatarahapa aˈera te nunaa o te Atua e ua fariu ihora i nia i ‘te taata itoito e te aito’ no te aratai ia ratou, o Gileada atoa te iˈoa o to ˈna metua tane. Taua taata itoito ra, o Iepheta ïa. Ua matau-maitai-hia o ˈna no te euhe o tei faaite e, noa ˈtu e e taata itoito oia, ua imi oia i te aratairaa e te turu a te Atua. Ua horeo o Iepheta e mai te peu e e tauturu mai te Atua ia ˈna ia upootia i nia i te mau ati Amona faatîtî ra, te taata matamua e haere mai i rapae i to ˈna ra fare no te farerei ia ˈna, e ‘hopoihia e ana ei tusia taauahi,’ aore ra e faatusiahia oia, na te Atua.a E o te tamarii otahi ïa a Iepheta, ta ˈna tamahine, o tei haere atu i muri iho e tavini i te vahi moˈa o te Atua. Ua faaite mau â o Iepheta e, na roto i te tahi atu ravea, ta ˈna tamahine, i te itoito.—Tavana 11:1, 4-40.

Ua tupu te hoê faaiteraa i te itoito o tei ore i matau-maitai-hia i te tau o Saula. Ia taa ia outou i te huru tupuraa, a haamanaˈo na e i to Saula riroraa mai ei arii, ua haamǎtaˈu te mau ati Amona e ohiti i te mata atau o te mau taata no Iabesa-gileada, e oire e vai na paha i te hoê pape e tahe ra na roto i te mau aivi o Ioridana. Ua haaputu oioi noa ihora o Saula i te hoê nuu no te haapuai ia Iabesa. (Samuela 1, 11:1-11) Maoti teie huru tupuraa i roto i to outou feruriraa, e haere anaˈe na tatou i te hopea o te faatereraa a Saula e ite ai tatou e nafea te itoito i te faaiteraahia.

Te haamanaˈo ra paha outou e ua pohe o Saula e e toru o ta ˈna mau tamaiti i roto i te hoê tamaˈi e te mau ati Philiseti. Ua tâpû teie mau enemi i te upoo o Saula e ua patiti ihora ma te manaˈo upootia i te mau tino o Saula e ta ˈna mau tamaiti i nia i te patu o Bete-sana. (Samuela 1, 31:1-10; i te pae atau, te ite ra outou i te pueraa ofai i heruhia o Bete-sana.) Ua faaroohia atura teie parau i Iabesa, i te mau aivi no Gileada na roto ia Ioridana. Eaha ta te mau ati Gileada e rave i mua i te hoê enemi mai teie te puai o tei upootia i nia i te arii o Iseraela?

A hiˈo na i te hohoˈa fenua. “Ua tia aˈera te mau taata mataitai atoa, haere anaˈe ihora o ao noa ˈˈe, ua rave maira i te tino o Saula, e na tino o na tamarii, no nia i te patu ra o Bete-sana, e ua haere mai ra i Iabesa, e ua tutui i te auahi.” (Samuela 1, 31:12) E, ua rave ratou i te hoê tere i te po i roto i te vahi puai o te enemi. Te taa ra ïa ia outou e no te aha te Bibilia e parau ai ia ratou e feia itoito.

I muri iho, ua amaha aˈera na opu hoê ahuru no te haamau i te basileia apatoerau no Iseraela, e tei roto atoa o Gileada. Ua haamata ihora te mau nunaa haaati, na mua to Suria e i muri iho to Asura, i te haru mai i te tahi mau tuhaa o taua fenua ra i te pae hitia o te râ o Ioridana. No reira, noa ˈtu te mau faaiteraa itoito no mutaa ihora, ua aufau te nunaa o Gileada i te hoo no to ratou parahiraa i te hoê fenua otia.—Arii 1, 22:1-3; Arii 2, 15:29.

[Nota i raro i te api]

[Faaiteraa i te fatu o te hohoˈa i te api 8]

Pictorial Archive (Near Eastern History) Est.

[Faaiteraa i te fatu o te hohoˈa i te api 9]

Pictorial Archive (Near Eastern History) Est.

[Hohoˈa fenua i te api 8]

MITI NO GALILEA

MITI POHE

Anavai Ioridana

Bete-sana

Ramota-gileada

Iabesa

GILEADA

[Faaiteraa i te tumu]

Ia au i te hoê hohoˈa fenua fatuhia e te Pictorial Archive (Near Eastern History) Est. and Survey of Israel.