Mau uiraa a te feia taio

I te mea hoi e eita te mau kerisetiano e parie i te moni, e farii anei ratou i te tahi mau titeti aore ra e apiti atu anei ratou i roto i te mau taviriraa i reira te tahi mau re e noaa mai ia ratou?

Ua ui-ê-hia aˈenei teie nei uiraa, no reira ua tuatapapa-ê-na-hia i roto i ta matou mau buka. Na roto i te tahi atu mau reo, ua faatupu matou i te mau buka faahororaa o ta matou mau vea aore ra buka, mai te mau Watch Tower Publications Index 1930-1985 (e te tahi atoa mai te matahiti 1986-1990). Mai te peu e te vai ra ta te hoê kerisetiano teie mau huru buka faahororaa na roto i to ˈna reo, e riro ïa oia i te faufaahia i te mea e e ite-oioi-hia mai ia ˈna i te mau pahonoraa.

Ua riro te uiraa i uihia i nia nei ei hiˈoraa. Ia hiˈo tatou i roto i te Index mai te matahiti 1930-1985 (farani) i raro aˈe i te upoo parau ra “Mau uiraa na te feia taio,” e ite ïa tatou i te upoo parau iti ra “‘taviriraa,’ e nehenehe anei ta te kerisetiano e farii i te titeti?” Ua faahorohia te taata taio i nia i te tuhaa parau ra “Mau uiraa na te feia taio” i roto i Te Pare Tiairaa o te 15 no febuare 1973, api 127 (farani). E rave rahi mau Ite te vai ra ta ratou te buka tahoêhia o te mau vea (aore ra te mau vea tataitahi) o Te Pare Tiairaa o te matahiti 1973, aore ra e haere atu e hiˈo i roto i te vahi vairaa buka a te mau Piha o te Basileia e rave rahi.

Te tuatapaparaa i neneihia i te matahiti 1973 ra, te faataa ra ïa i te parau ra e e tia i te mau kerisetiano ia ape roa i te mau huru pere moni atoa aore ra taviriraa e titau e ia hoohia te parau no te fanaˈo (mai te mau titeti tombola) aore ra te tuuraa i te moni e nehenehe atu ai e noaa mai te tahi re. Ma te papu maitai, e ape tatou i te ohipa pere, o tei riro ei tapao no te nounou.—Korinetia 1, 5:11; 6:10; Ephesia 4:19; 5:3, 5.

E riro paha te hoê fare toa aore ra te hoê fare tapi hooraa taoˈa i te faaohipa i te tahi mau titeti taviriraa ei peu faaanaanataeraa manaˈo na ratou. Te ohipa noa ta te hoê taata e rave, te tapaoraa ïa i to ˈna iˈoa aore ra te tuuraa ˈtu i te titeti, ma te ore roa ˈtu e hoo mai i te tahi taoˈa. Ua riro te taviriraa ei tuhaa no te faanahoraa i te peu faaanaanataeraa manaˈo; te parauhia ra e e ravea paetahi ore te reira i te pae no te opuaraa e e horoahia ˈtu te re aore ra te mau re na vai. E riro paha vetahi mau keriseitano i te manaˈo e e nehenehe ta ratou e farii i te re i roto i te hoê taviriraa aita e titau ra i te ohipa pere moni, mai ta ratou e farii i te tahi mau hohoˈa taoˈa aore ra i te tahi mau taoˈa horoa ta te hoê fare tapihooraa taoˈa aore ra ta te hoê fare toa e faaohipa i roto i ta ˈna porotarama faaanaanataeraa manaˈo.

Te ape nei râ hoi vetahi mau kerisetiano i te mau ohipa mai teie te huru, no te mea aita ratou e hinaaro ra e faaturori i te manaˈo o vetahi pae e te faaitoito nei ratou e faaatea ê roa mai ia ratou i te mau mea atoa e huti i to ratou tiaturiraa i nia i teie vahine parauhia te Vahine o te Fanaˈo. Mai ta Isaia 65:11 e faaite ra, eita te mau tavini o te Atua e faaau ia ratou ia “Gada [te atua o te Fanaˈo]” aore ra ia “Meni [te atua no te oraraa i faataahia].” E riro atoa ratou i te manaˈo e eita ratou e hinaaro e amui atu i roto i te tahi noa ˈˈe parau faatianiraa e titauhia i te feia e tano. Te feia mai teie to ratou huru manaˈo, papu maitai iho â ïa e eita ratou e faahapa i te hoê kerisetiano aore ra i te mau kerisetiano o te riro hoi to ratou haava manaˈo, i te faatia ia ratou ia faaô atu i roto i teie mau huru ohipa taviriraa.—A faaau e te Roma 14:1-4.