E nehenehe anei outou e tiaturi i te Bibilia?
MAI te peu e rave mai outou i te hoê Bibilia, ia manaˈo outou e noaa mai te tahi moni ia outou? Eaha ïa te nehenehe e parau no nia i taua moni ario tahito ra?
E rave rahi teie e faariro nei i te Bibilia mai te hoê buka e pûpû mai nei e rave rahi mau aamu huru ê roa e mau huru morare faahiahia mau. Inaha, aita hoi ratou e tiaturi nei e e mau aamu mau ta te Bibilia e faatia ra, e aita ˈtura hoi e farii ra e e Parau na te Atua. Noa ˈtu â ïa e mea rahi te mau haapapuraa e e parau mau ta te Bibilia. Ua riro teie nei moni (i faarahihia te hohoˈa) ei hiˈoraa maitai roa. Eaha ta te papai e parau ra?
Ua hamanihia teie moni i Tareso, te hoê oire i te pae apatoa-hitia o te râ oia hoi te fenua Turetia i teie mahana. Ua hamanihia teie moni i raro aˈe i te faatereraa a te tavana rahi no Peresia ra o Mazaeus i te senekele maha hou to tatou nei tau. Te haapapu ra hoi teie moni e o ˈna te tavana no te mataeinaa “o teie nei pae pape,” oia hoi te anavai no Eupharate. Teie râ, no te aha hoi teie nei pereota e riro ai ei mea faufaa roa?
No te mea e ite atu outou i teie nei â parau i roto i ta outou Bibilia. Te faatia ra o Ezera 5:6–6:13 i te auraa i rotopu i te arii no Peresia ra oia hoi o Dariu e te tavana ra o Tatanai te iˈoa. E te faahopearaa, ua patu faahou te mau ati Iuda i to ratou hiero i Ierusalema. E taata papai aravihi o Ezera no te Ture a te Atua, e e titau iho â ïa outou e ia papu maitai ta ˈna mau mea e papai. E ite outou i roto i te Ezera 5:6 e 6:13 e te faahiti ra o ˈna i te parau no Tatanai mai “te tavana no teie nei pae pape.”
Ua papai o Ezera i te reira i te area o te matahiti 460 hou to tatou nei tau, oia hoi te tahi tau 100 matahiti na mua ˈˈe teie moni e tupaihia ˈi. E riro paha te tahi mau taata i te manaˈo e e parau rii haihai roa te faahitiraa i te parau no te hoê ofitie tahito a te hau. Tera râ, mai te peu e e nehenehe ta outou e faatuati ia outou i nia i te feia papai i te Bibilia noa ˈtu no nia i te mau parau rii haihai roa, eita anei te reira e faarahi atu â i to outou tiaturiraa i nia i te tahi atu mau mea ta ratou i papai?
I roto i na tumu parau matamua e piti o teie nei vea, e ite ïa outou i te tahi â mau tumu outou e nehenehe ai e tiaturi.
[Faaiteraa i te fatu o te hohoˈa i te api 32]
Mau taoˈa i faahereherehia no te mau tauihaa tahito no Iseraela i faaiteitehia e i patahia te hohoˈa i te Fare vairaa tauihaa tahito no Iseraela