No te aha e tia ˈi ia outou ia tae atu

E FANAˈO outou e maha mahana hoona i te pae no te haapiiraa pae varua i te tairururaa mataeinaa “Te haapiiraa no ǒ mai i te Atua ra,” o te haamata i teie tau veavea i roto i te mau oire o te ao nei. I te mau Hau amui no Marite anaˈe, hau atu i te 150 o teie mau haaputuputuraa o te faatupuhia i roto i te mau avaˈe tiunu, tiurai, e atete. I te rahiraa o te mau tupuraa, e haamata te porotarama i te mahana maha i te hora 1 mairi i te 20 minuti i te avatea e e hope i te sabati i te hora 4 mairi i te 15 minuti. Te hoê tuhaa taa ê o vetahi mau tairururaa, o te mau faatiaraa ïa a te mau mitionare, o tei tauturuhia ia hoˈi atu i to ratou fenua tumu no teie ohipa oaoa.

Noa ˈtu e e taata paari outou aore ra e taurearea—e tane, e vahine, e metua tane, e metua vahine, e taurearea, aore ra e tamarii—e fanaˈo outou i te haapiiraa e vauvauhia ma te maramarama e te anaanatae e hoona ˈi outou. Ei hiˈoraa, e rave rahi teie e ani nei i teie mahana e, Eaha te tumu o te oraraa? I te poipoi mahana pae, e oaoa outou i te faarooraa i teie uiraa ia tuatapapahia e e mauruuru outou i te mea e noaa mai ia outou no te tauturu ia vetahi ê ia taa i teie tumu parau.

I te mahana pae i te avatea, e faataa mai te porotarama i te mau tuhaa ra “Te faariroraa i te faaipoiporaa ei taairaa e vai maoro,” “A rohi ia ora to outou utuafare,” e “E te mau metua—Te titau nei ta outou mau tamarii i te ara-maite-raa taa ê.” I muri noa iho, e tuuhia te tapao taa ê i nia i te mau fifi ta te feia apî e farerei nei e nafea ratou ia faaruru i te reira. E riro ratou i te faaitoitohia e te darama no teie nei tau oia hoi Te mau taurearea o te haamanaˈo i to ratou Poiete i teie nei.

I te mahana maa, e vauvau mai te porotarama i te parau tohu a Iesu no nia i te mau mahana hopea e teie iho â râ mau parau ta ˈna: “I muri iho â i taua anotau pohe ra, e haapourihia te mahana.” (Mataio 24:29) E hinaaro outou e faaroo i te tuatapaparaa e afea teie ati e tupu ai. E hiˈopoa atoa te porotarama no te mahana maa, i te aamu a te mau Ite no Iehova i te mau tau apî e e faaite mai oia e eaha ta ratou i rave aˈenei.

I te sabati, e faataa mai te tahi atu darama Eiaha e vare aore ra e faaooo atu i te Atua, i te tamataraa i te taiva ore kerisetiano na roto i te mau ripene video e te upaupa no teie nei mahana. E vauvau mai te oreroraa parau huiraatira i te avatea i te upoo parau “Te haapiiraa tei riro ei tauturu i to tatou nei tau ati rahi.” E hope te porotarama na roto i te faaitoitoraa “A tapea maite i te haapiiraa no ǒ mai i te Atua ra.”

Oia mau, e faufaahia outou na roto i te taeraa ˈtu i na mahana e maha atoa ra! Te titau-manihini-hia ˈtu nei outou ia tae atu. No te ite i te vahi fatata roa ˈˈe i to outou vahi nohoraa, a ani atu i te Piha no te Basileia a te mau Ite no Iehova aore ra a papai i te feia nenei i teie vea.