Te haapiiraa no Gileada—E 50 matahiti e teie e ruperupe nei â!

“MEA rahi te mau vahi aitâ te parau no nia i te Basileia i parare atura,” ta N. H. Knorr ïa i parau i te pǔpǔ matamua no Gileada i te 1 no febuare 1943, oia hoi i te mahana te haapiiraa e matara ˈi. Te na ô faahou ra oia e: “E nehenehe te tahi tau hanere e tau tausani â taata e porohia mai te peu e rahi te rave ohipa i roto i te aua. Maoti râ te aroha faito ore o te Fatu, e rahi â te rave ohipa.”

E ua itehia e rave rahi â mau rave ohipa—tau milioni rahiraa! Ua maraa te faito o te feia poro o te Basileia mai te 129 070 i roto e 54 fenua i te matahiti 1943 ra i nia i te 4 472 787 i roto e 229 fenua i te matahiti 1992 ra! Ua riro mau â te Haapiiraa no Gileada ei turu i roto i te parau no te pororaa, e te faahopearaa o taua ïa maraaraa nei. I muri aˈe e 50 matahiti, te tamau nei â oia i te faatupu i te hoê tiaraa faufaa roa i te pae no te faaineineraa i te mau rave ohipa mitionare, no te haere atu e tavini i te vahi e hinaarohia ra i roto i te aua o teie nei ao.

I te 7 no Mati 1993, e 4 798 mau taata i titau-manihini-hia e mau melo o te fetii o te Betela no Marite, tei putuputu i te Piha Tairururaa o te Oire no Jersey, i New Jersey, no te horoaraa i te mau parau tuite na te pǔpǔ 94. Ua riro mau â taua taime taa ê ra ei ravea no te hiˈo â i muri, i nia i na matahiti e 50 o te Haapiiraa no Gileada. E hinaaro anei outou e ite i te tahi tuhaa o te porotarama?

I muri aˈe i te hoê himene haamataraa, ua pure o George D. Gangas no te Tino Aratai a te Taiete i te hoê pure paieti rahi mau. E, i muri aˈe i te mau parau omuaraa a te peretiteni o Carey W. Barber, ua faaroo maite aˈera te feia e faatuitehia—e te mau taata atoa i tae mai—e rave rahi mau oreroraa parau poto noa.

O Robert W. Wallen na mua tei paraparau mai, i nia i te tumu parau ra “Eita roa ˈtu outou e vai outou anaˈe ra.” Na roto i te hoê taˈiraa reo mahanahana mau, teie ta ˈna i parau: ‘I te mau tau i mua nei, e tupu te tahi mau huru tupuraa i roto i to outou oraraa, i reira outou e manaˈo ai e Auê hoi vau i te moemoe, i te atea i te fetii e i te mau hoa e.’ Eaha ïa te nehenehe e parauhia, “Eita roa ˈtu outou e vai o outou anaˈe ra?” Te faataa ra oia e: ‘No te mea te vai ra i roto ia outou tataitahi te ravea e nehenehe ai outou e paraparau oioi atu i te Atua ra o Iehova.’ Ua faaitoito aˈera oia i te feia i faatuitehia ia aupuru i te faufaa o te pure e ia faaohipa i te reira i te mau mahana atoa. E oia hoi, mai ia Iesu, e riro ïa ratou i te parau e “e ere râ o vau anaˈe ra.” (Ioane 16:32) Auê hoi teie mau parau i te faaitoito i te feia i faatuitehia e!

Ma te tatara mai i te tumu parau “Ia papu outou i to outou tiaturiraa” (niuhia i nia i te tumu parau o te mahana o te 7 no mati), ua faahiti o Lyman A. Swingle, melo no te Tino Aratai, i te parau no nia i te faufaaraa o na huru e piti—te mau-papu-raa e te tiaturiraa. ‘Te faaino, te au ore, te riri uˈana, te fare tapearaa, e oia hoi te pohe, e mau tumu anaˈe teie e tia ˈi te mau kerisetiano ia mau papu,’ o ta ˈna ïa i parau. ‘Aita e otia to te puai tei hau aˈe i te puai taata nei ta te mau Ite no Iehova e nehenehe e huti mai i te mau taime e hinaarohia. E riro mau â te reira i te tamǎrû i te feruriraa, no outou iho â râ te feia i faatuitehia.’ Eaha ihora ïa no nia i te tiaturiraa? ‘Mea faufaa roa te tiaturiraa,’ o ta ˈna ïa i faataa mai. ‘Mai te hoê faaupoo e paruru i te upoo o te hoê taata, na reira atoa te tiaturiraa no te ora, i te faaherehere e i te paruru i te feruriraa o te kerisetiano, e nehenehe atu ai oia e tapea i to ˈna haapao maitai.’—Tesalonia 1, 5:8.

Ua tapao mai to muri iho taata orero, oia hoi o Ralph E. Walls i te hoê tumu parau huru ê mau oia hoi, “Nafea tatou e nehenehe ai e matara ˈtu i roto i te huru ino ore o te hoê ‘piha aano mau’?” Eaha mau na hoi teie “piha aano mau”? (Salamo 18:19) “O te hoê ïa huru tiamâraa e faatupu i te hau o te feruriraa e te ino ore o te mafatu,” ta te taata orero ïa i faataa mai. Te hinaaro ra tatou e tiamâ mai i te aha? ‘Ia tatou iho—i to tatou iho mau paruparu.’ Te na ô faahou ra oia e: ‘Te auraa atoa, e hinaaro tatou e tiamâ mai i te mau huru tupuraa i rapae ta Satani e manii mai nei.’ (Salamo 118:5) Nafea hoi tatou e nehenehe ai e matara ˈtu i nia i te huru ino ore o te hoê vahi aano mau? ‘Na roto ïa i te maimiraa i te mau faaueraa a Iehova i roto i te mau mea atoa ta tatou e rave e na roto i te taparuraa ia Iehova ma te paieti no te mau mea atoa e au ia tatou nei.’

“Eaha to mua ia outou?” o te tumu parau ïa i maitihia mai e Don A. Adams. E eaha tei vai na i mua i te mau mitionare apî? O te hoê ïa taime faatitiaifaroraa, o ta ˈna hoi i faataa mai. “Mea rahi roa te mau haamaitairaa i mua ia outou.” Ei hiˈoraa, ua faahiti mai oia i te parau no na mitionare apî toopiti [e nau taata faaipoipo] oia hoi i muri aˈe i to raua faaiteraahia ˈtu i te vahi i haapaohia no raua, tei papai mai e: “Ia manaˈo na outou i te mahana matai roa ˈˈe o ta outou i ite i roto i te taviniraa, inaha mai te reira mau â ïa te huru i te mau mahana atoa. Eita e navai te mau buka e te mau vea ta mâua e hopoi na muri ia mâua, e ani noa mai hoi te taata ia mâua e haapii.” Ua faaitoito atura te taata orero i te fetii e te mau hoa o te feia i faatuitehia i te na ôraa ˈtu e: ‘Aita e faufaa ia outou ia hepohepo no nia i teie feia i faatuitehia. E nehenehe ta outou e tauturu ia ratou i te papairaa mai ia ratou te mau parau faaitoitoraa.’—Maseli 25:25.

O te feia haapii o te haapiiraa tei paraparau mai i muri iho. Ua maiti o Jack D. Redford i te tumu parau ra “Eiaha e tiai i te hoê noa ˈˈe mea i te tahi noa ˈˈe taata.” Te hoê o te mau tautooraa te tia i te feia faatuitehia ia faaruru, te oraraa ïa i roto i te taata, o ta ˈna hoi i faataa mai. Nafea ïa te reira? “Eiaha e haamau i to outou manaˈo i nia i ta ratou mau hapa. Eiaha e tiai rahi atu i te tahi mea no roto mai i te tahi atu mau taata. Eiaha e manaˈo noa e e horoahia mai te mau mea ia au i te faito o ta outou e manaˈo ra e tia ia horoahia mai. Ia na nia ˈˈe na outou i te mau huru paruparu o te tahi atu mau taata, e e riro teie huru hamani maitai i te tauturu ia outou ia haere i mua. To outou aravihi i te ora-maitai-raa e te tahi pae o te riro ei haapapuraa no to outou aravihi.” (Maseli 17:9) Papu maitai, te faaohiparaa i teie nei aˈoraa paari mau no te tauturu i te feia i faatuitehia ia rave i te hoê faatitiaifaro maitai mau no te riro atu ei mau mitionare i roto i te hoê fenua ěê!

“Te farii nei râ matou i taua taoˈa [faufaa] nei i te farii repo nei,” ta te Korinetia 2, 4:7 ïa e parau ra. Ua tatara mai o Ulysses V. Glass, taata haapao i te mau parau tahito faufaa roa a te Haapiiraa no Gileada, i teie irava no te vauvau mai i te tumu parau ra “A tiaturi i to outou mau taeae, tei haapapu mai i to ratou huru haapao maitai.” Eaha mau na taua mau “farii repo nei”? “Te faahiti ra te reira no nia ia tatou nei, ma to tatou tiaraa taata hara,” o ta ˈna ïa i haapapu. Eaha mau na taua “taoˈa [faufaa] nei”? “O ta tatou ïa taviniraa kerisetiano,” o ta ˈna hoi e faataa ra. (Korinetia 2, 4:1) E eaha te tia ia ravehia e taua taoˈa [faufaa] nei? “Te taoˈa [faufaa] ta Iehova i horoa mai ia tatou nei e haapao, eita ïa e tia ia haaputuhia. No reira, outou te mau mitionare apî, a haere e opere i taua faufaa nei i te mau vahi atoa o ta outou e haere atu, e a haapii atu i te mau taata e rave rahi ia opere atoa ˈtu.”

E taime putapû mau te taime o Albert D. Schroeder e haere mai ai i mua, inaha o ˈna te taata haapao i te mau parau tahito a te Haapiiraa no Gileada, i te haamataraa ra. “E 50 matahiti faaineineraa teotaratia” o ta ˈna ïa tumu parau. “Ua ite o Iehova nafea ia pûpû mai i te hoê faaineineraa papu mau, e o ta ˈna mau â hoi i rave,” o ta ˈna ïa i haapapu mai. Nafea hoi? Ua faahiti maira te taeae Schroeder i te parau no te faaineineraa i horoahia ˈtu i na haapiiraa toopiti i haamauhia e 50 matahiti i teie nei—Te Haapiiraa o te Taviniraa Teotaratia e te Haapiiraa no Gileada. Ua faataa maira oia e te hoê mauhaa faufaa roa i te pae no te horoaraa mai i te ite tano maitai o te New World Translation (Tatararaa a te Ao apî) ïa. Ua na ô maira oia i te feia i faatuitehia e: “E nehenehe outou e haere i te mau fenua ěê i haapaohia no outou ma te tiaturi mau e e horoa noa ˈtu â te Taiete na outou i te ite mau no nia i te mau opuaraa a Iehova.”

Ua faahiti mai o Milton G. Henschel, peretiteni o te Watch Tower Bible and Tract Society of Pennsylvania, i te parau no nia i te tumu parau ra “Hau aˈe i te feia i upootia mai.” Ua tatara mai o taeae Henschel i ta ˈna tumu parau i roto i te buka matahiti o te matahiti 1943: “Hau aˈe i te feia i upootia mai maoti tei aroha mai ia tatou nei.” (Romans 8:37, King James Version) E tumu parau matahiti tano maitai teie, o ta ˈna ïa e faataa ra, no te mea i te afaraa o te Piti o te Tamaˈi Rahi, ua faaruru mai to tatou mau taeae i roto e rave rahi mau fenua, i te mau hamani-ino-raa uˈana. Ua taio mai o taeae Henschel i te tahi mau tuhaa parau no roto mai i Te Pare Tiairaa tei tuatapapa i taua tumu parau o te matahiti ra, e ua faataa maira oia e: “Ua tuatapapahia teie tumu parau o Te Pare Tiairaa [15 no tenuare 1943] i te avaˈe febuare, na te pǔpǔ matamua no Gileada, e ua faaineine hoi ia ratou no te mau mea i mua ia ratou.” E rave rahi o te feia i faatuitehia i roto i te roaraa o na matahiti e 50, tei haapapu ê na ia ratou ei mau taata tei upootia, o ta ˈna ïa faataa mai. Eaha ˈtura ïa no te pǔpǔ 94? “A faaea noa i pihai iho ia Iehova, a faaea noa i pihai iho i to ˈna here, e e riro te re i te noaa ia outou.”

I muri aˈe i te mau oreroraa parau poipoi, ua faahiti mai te peretiteni i te tahi mau poroi faatau aroha no te mau fenua e rave rahi mai. E ua tae hoi i te taime e tiai-noa-hia ra e na 48 hoa faaipoipo—te tufaraa i te mau parau tuite. Inaha, i teie nei te faarirohia nei te feia i haapiihia no Gileada ei feia faatuitehia! No e 5 fenua mai ratou, e tonohia râ ratou i roto e 17 fenua, mai ia Hong Kong, Taiwan, Mozambique, e i te mau tuhaa no Europa Hitia o te râ.

I muri aˈe i te hoê taime faafaaearaa, ua haamata te porotarama o te taime avatea na roto i te hoê tuatapaparaa poto noa o te haapiiraa o Te Pare Tiairaa, i arataihia mai e Robert L. Butler. Ua hauti maira te feia i faatuitehia i te tahi mau faanahoraa i fanaˈohia na e ratou ia ratou i poro i pihai atu ia Wallkill, New York. Ua faataa mai te porotarama i te hoê o te mau mea eita e ore tei aratai mai ia ratou i Gileada—oia hoi to ratou here hohonu i te ohipa pororaa.

I muri aˈe i te porotarama a te feia i haapiihia, e rave rahi i roto i te feia i tae mai tei faaite i to ratou manaˈo faahiahia roa i te mea e te horoa mai nei te porotarama i te tahi ohipa taa ê mau no te faahaamanaˈoraa i na matahiti e 50 o te Haapiiraa no Gileada. Ua oaoa roa ratou!—A hiˈo i te tumu parau ra “Na matahiti e 50 o te Haapiiraa no Gileada.”

E pae ahuru matahiti i teie nei, ua faaite o taeae Knorr e e taata faaroo mau â oia e te ite i te mau ohipa e tupu a muri aˈe. Ua haapapuhia mai to ˈna tiaturiraa e e manuïa mau â te Haapiiraa no Gileada i roto i ta ˈna mau parau i faaite atu i te pǔpǔ matamua, ia ˈna i parau e: “Te tiaturi nei matou e, ia au i te auraa mau o to ˈna iˈoa, oia hoi ‘ei ite i teie nei puea’ e parare atu oia mai teie nei vahi atu i roto i te mau tuhaa atoa o teie nei ao e e riro teie nei faaiteraa ei patu mau no te faahanahana i te Atua, o te ore roa ˈtu e parari. O outou, ia au i to outou tiaraa tavini nominohia, ia tuu na outou i to outou tiaturiraa taatoa i nia i te Mana hope ra, ma te papu maitai e e aratai mai oia ia outou i te mau taime atoa outou e hinaaro ai, e e ite mau â hoi outou e o ˈna atoa te Atua no te haamaitairaa.”a

E pae ahuru matahiti i muri aˈe, te puai nei â te haapiiraa no Gileada! I teie nei, ua noaa ïa i te feia faatuitehia o te pǔpǔ 94 i te haamaitairaa oia hoi te apeeraa i te feia i oti i te faatuitehia e o tei hau atu hoi te 6 500, i na mua ˈtu ia ratou. Ia tuu na ratou i to ratou tiaturiraa taatoa i nia i te Mana hope ra a rave noa ˈi ratou i ta ratou tuhaa i roto i te faatupuraa “i te hoê puea ite” o te vai mai ei patu no te faahanahana i te Atua ra o Iehova.

[Nota i raro i te api]

[Tumu parau tarenihia i te api 25]

Tabula a te Pǔpǔ haapii

Taatoaraa o te feia haapii: 48

Rahiraa fenua i amui mai: 5

Rahiraa fenua i tonohia: 17

Faito matahiti au noa: 32

Faito matahiti au noa i roto i te parau mau: 15.3

Faito matahiti au noa i roto i te taviniraa ma te taime taatoa: 9.6

[Tumu parau tarenihia i te api 26, 27]

NA MATAHITI E 50 O TE HAAPIIRAA NO GILEADA

Auê hoi taime faahiahia mau ia hiˈo â i te aamu o Gileada na roto i te feia i ora na i te reira e—oia hoi na roto i te feia matamua i faatuitehia, i te feia haapii, e te tahi atu tei faanaho i taua haapiiraa nei? Ua anaanatae roa te feia i tae mai ia ratou i faaroo i te tuhaa parau ra “Na matahiti e 50 o te Haapiira no Gileada,” i arataihia mai e Theodore Jaracz.

Eaha mau na te mau huru tupuraa tei aratai e ia haamauhia taua haapiiraa nei? Ua faataa mai te taeae Schroeder e ua horoahia ˈtu na ˈna e e piti feia haapii ê atu e maha noa avaˈe no te faanaho i te haapiiraa. “E i te monire o te 1 no febuare 1943, ua ineine roa matou no te tomoraa.”

Eaha ˈtura ïa no te mau mitionare matamua i tonohia? Te haamanaˈo ra o taeae Henschel e: “Tei roto te mau mea atoa a te Taiete, ta te mau mitionare e hinaaro e rave na muri ia ratou, i te hoê afata i hamanihia i te raau, i te vairaa. Ia tae atu te mau afata, e haapao maitai ratou ia tatara mai ratou i te mau mea i roto. E i muri iho, e faaohipa na ratou i te mau afata no te hamani i te tauihaa fare no ratou.” Inaha, o ta ˈna ïa e parau ra, e faanaho na te Taiete e ia noaa te tahi mau tauihaa au noa no te mau fare o te mau mitionare.

I muri aˈe, i roto i te porotarama, e faatia mai vetahi feia i faatuitehia o te mau pǔpǔ matamua no Gileada e tei riro hoi i teie nei ei mau melo no te fetii o te Betela i te mau Hau amui no Marite, i te mau mau mea ta ratou e haamanaˈo ra, i to ratou mau manaˈo hohonu, e te mau taime i orahia mai e ratou. Ua haaputapû mau to ratou mau manaˈo i te mafatu o te feia i tae mai.

“I muri aˈe i to ˈu titauraahia e apiti atu i roto i te pǔpǔ matamua, ua ite aˈera hoi au e e mariri aitaata to to ˈu metua vahine. Tera râ, mai to ˈna mai â raveraa i te taviniraa pionie i te 16raa o to ˈna matahiti, ua faaitoito puai mau â oia ia ˈu e farii i te titauraa. E ma te horuhoru mau to ˈu mafatu e te tiaturi ia Iehova, ua tere maira vau i Lansing Apatoa. Ua oaoa roa vau e ua mauruuru roa vau i te faaineineraa a Gileada. Ua hope te hororaa a to ˈu metua vahine i te fenua nei te tahi noa tau taime i muri aˈe vau e faatuitehia ˈi.”—Charlotte Schroeder, tei tavini i Mexico e i El Salvador.

“Mai reira mai, ua haapao noa o Iehova ia ˈu noa ˈtu eaha te vahi o te fenua nei tei reira vau, no te mea e manaˈo noa na vau e i te mau vahi atoa ta ˈu i haere, o to ˈna noâ ïa fenua, e e haapao mai oia ia ˈu. No reira, ua oaoa roa vau i te fariiraa i te titauraa e apiti atu i roto i te pǔpǔ matamua.”—Julia Wildman, tei tavini i Mexico e i El Salvador.

“E ohipa faahiahia mau te ohipa mitionare! E nehenehe ta tatou e paraparau i te mau uputa atoa. I te avaˈe matamua, ua vaiiho vau 107 buka e ua aratai 19 haapiiraa bibilia. I te piti o te avaˈe, e 28 haapiiraa bibilia ta ˈu. Papu maitai, e tia ia tatou ia haamatau i te tahi mau mea mai te—veavea, te haumi, e te mau manumanu. Tera râ, e haamaitairaa rahi mau â i te taeraa ˈtu i reira. O te hoê te reira mea o ta ˈu e poihere noa.”—Mary Adams, piti o te pǔpǔ, tei tonohia i Cuba.

“Te huru o te mahana o te tahi ïa fifi rahi roa ta matou i aro atu i Alaska. I te pae apatoerau, mea toetoe roa, e te anuvera i faitohia e 60 ïa teteri i raro mai i te aore ia au i te faito Fahrenheit [-50°C.] e mea toetoe roa ˈtu â. E nehenehe noa te mau oire rii inidia e te mau vahi atea roa i te pae apatoa no Alaska e noaahia maoti te poti aore ra te manureva.”—John Errichetti, pǔpǔ toru.

“No ˈu nei, ua riro o Gileada ei titauraa no ǒ mai ia Iehova ra na roto i ta ˈna faanahonahoraa i nia i te fenua nei, no te faaitoito ia tatou i te pae varua e no te faaite mai ia tatou i te hoê tuhaa faahiahia mau o te oraraa.”—Mildred Barr, pǔpǔ 11, tei tavini i Irelane.

Rahi roa ˈtu â te faahiahia te mau uiuiraa manaˈo i muri mai—Lucille Henschel (pǔpǔ 14, tei tavini i Venezuela), Margareta Klein (pǔpǔ 20, tei tavini i Bolivia), Lucille Coultrup (pǔpǔ 24, tei tavini i Peru), Lorraine Wallen (pǔpǔ 27, tei tavini i Beresilia, William e o Sandra Malenfant (pǔpǔ 34, tei tavini i Morocco), Gerrit Lösch (pǔpǔ 41, tei tavini i Auseteria), e o David Splane (pǔpǔ 42, tei tavini i Senegal).

Eaha ˈtura ïa no te mau taeae i tavini ei feia haapii? Ua uiui-atoa-hia te manaˈo o vetahi o ratou—Russell Kurzen, Karl Adams, Harold Jackson, Fred Rusk, Harry Peloyan, Jack Redford, e o Ulysses Glass. Ua faahiti mai ratou i te parau no nia i ta ratou haamaitairaa, ma te faataa mai i te huru o taua haamaitairaa ra i nia ia ratou i teie mahana.

Na Lloyd Barry, tei tavini i te fenua Tapone, i tatara mai i te faaiteraa faahiahia mau no nia i te aravihi o te mau mitionare i faaineinehia i Gileada. I te matahiti 1949 ra, a tonohia ˈtu ai 15 mitionare i reira, te tahi noa tau 10 feia poro i Tapone. E 44 râ matahiti i muri aˈe, ua hau atu i te 175 000 feia poro o te Basileia i taua fenua ra! Ua faahiti mai o Robert Wallen i muri iho i te manuïa rahi i itehia e vetahi mau mitionare i to ratou tautururaa i te mau taata ia haere mai i roto i te parau mau, e tae noa ˈtu hoi i te parau no te hoê tuahine mitionare tei faaea i te fenua Panama hau atu i te 45 matahiti e o tei tauturu 125 taata tei pûpû ia ratou e tei bapetizo.

Ua faaoti te porotarama taatoa a titauhia ˈtu ai te feia atoa i faatuitehia e o te parahi ra i roto i te feia i tae mai, ia paiuma mai i mua. E taime putapû mau â hoi. Te hoê anairaa taeae e tuahine—89 no te fetii o te Betela e amuihia mai te feia faatuitehia i tere mai—tei apapa noa te tahi i muri aˈe i te tahi i roto i te mau area rahi haereraa taata e i nia ˈtu i te mau taahiraa o te tahua i mua. Ua amui atoa mai te mau taeae tei tavini ei feia haapii i roto i te roaraa o te mau matahiti, e i muri iho i te pǔpǔ 94—fatata 160 ratou rahiraa!

“Ua itehia anei te manuïa i roto i te ohipa a te Haapiiraa no Gileada i te pae no te faaineineraa i te mau mitionare e tonohia ˈtu i roto i te mau fenua ěê?” ta te taeae Jaracz ïa i ui mai. “Ua haapapu mau â na matahiti e 50 i mairi, ma te puai mau e e!”

[Hohoˈa i te api 25]

Te pǔpǔ 94 i faatuitehia a te Haapiiraa Bibilia Watchtower no Gileada

I roto i te tabura i muri nei, ua numerahia te mau anairaa taata mai mua mai e haere atu ai i muri, e ua tapaohia te mau iˈoa na te pae aui mai te haamataraa e haere atu ai i te pae atau no te anairaa taitahi.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.