Te po auahi—Haamauiuiraa mure ore aore ra menema matauhia?

UA PARAUHIA mai anei outou e ua turu te mau Metua o te Ekalesia matamua, te feia tuatapapa faaroo o te Anotau no Ropu, e te feia Reforomatio, e mea mure ore te haamauiuiraa o te po auahi? Mai te peu e e, e hitimahuta paha outou i iteraa e te aimârô ra vetahi feia tuatapapa bibilia faatura-rahi-hia i teie manaˈo. I Beretane, te papai ra hoê o ratou, o John R. W. Stott, e “te faataa ra te Papai i te parau no te haamouraa, e ua riro te ‘haamauiuiraa mure ore o te taata ara noa’ ei parau tutuu o te ore e mau i mua i te mana hau aˈe o te mau Papai.”—Essentials—A Liberal-Evangelical Dialogue.

Na te aha i aratai ia ˈna ia faaoti e aita te haamauiuiraa mure ore i niuhia i nia i te Bibilia?

Te tuatapaparaa ia au i te reo

Ta ˈna faataaraa matamua no nia ïa i te reo. Te faataa ra oia e, ia faahiti anaˈe te Bibilia i te parau no te huru hopea o te haavaraa ino (“Gehena”; hiˈo i te tumu parau, api 8), mea pinepine oia i te faaohipa i te mau parau ra “haamouraa,” te “parau haa [Heleni] apollumi (e haamou) e te iˈoa apòleia (haamouraa).” E tano anei teie mau parau no te haamauiuiraa? Te faaite ra o Stott e, ia ravehia te parau haa i roto i to ˈna huru tarame tuati ore, te auraa o te parau “apollumi,” “e haapohe” ïa. (Mataio 2:13; 12:14; 21:41) No reira, i roto i te Mataio 10:28, i reira te Tatararaa a te Arii Iakobo (beretane) e faahiti ai i to te Atua haamouraa “i te [nephe] e te tino atoa i roto i te po auahi,” te manaˈo o teie irava, o te haamouraa ïa i roto i te pohe, eiaha râ te haamauiuiraa mure ore. I roto i te Mataio 7:13, 14, te faataa ê ra o Iesu i “te uputa pirihao . . . e te piri hoi o te eˈa e tae atu ai i te ora” e te ‘uputa atea e te eˈa aano e tae atu ai i te pohe.’ Te faataa ra o Stott e: “Mea ê roa ïa ahiri e, te feia e parauhia ˈtu e e roohia ratou i te haamouraa, inaha eita ïa ratou e haamouhia.” Ma te tano mau, te faaoti ra oia e: “Ia parauhia e haapohe, oia hoi te faaereraa i te tino i te ora, te po auahi, o te faaereraa ïa i te ora pae tino e o te pae varua atoa, oia hoi, te poheraa o te taata iho.”—Essentials, mau api 315-16.

Te tatararaa i te mau faataaraa o te po auahi

Noa ˈtu râ, e rave rahi feia faaroo o te farii i te manaˈo o te peretiteni o te Tairururaa faaroo bapetizo no Apatoa, o Morris H. Chapman, o tei parau e: “Te poro nei au i te po auahi i roto i to ˈna auraa mau.” Ua parau atoa oia e: “Te pii ra te Bibilia ia ˈna e e ‘roto auahi,’ ia manaˈo anaˈe au mea maramarama roa teie faataaraa.”

Parau mau, e nehenehe te faahohoˈaraa o te auahi e faaohipahia ra i roto i te Bibilia e faatupu mai i te manaˈo no te haamauiuiraa. Teie râ, te tapao nei te buka Essentials e: “Mea papu maitai e, i te mea e ua ite paatoa tatou i te mauiui ia papaa anaˈe tatou, e ua taaihia te parau no te auahi i roto i to tatou feruriraa i te ‘mauiui ma te ara noa.’ Teie râ, te tumu matamua o te auahi e ere te haamauiuiraa, maoti râ te haamou-roa-raa i te hoê mea, mai ta te mau vahi tutuiraa o te ao nei e haapapu ra.” (Api 316) Ia haamanaˈo noa tatou i teie faataa-ê-raa faufaa roa, e tauturu te reira ia tatou ia ape i te imi i te hoê auraa aita e faahitihia ra i roto i te mau Papai. Ei hiˈoraa:

No nia i te feia o te taorahia i roto i te Gehena, ua parau o Iesu e “te vahi e ore e pohe to ratou tuˈa, e to ratou auahi e ore e tinaihia.” (Mareko 9:47, 48) Ma te hema i te mau parau a te buka apokiripha a Iudita (“E faatae oia i te auahi e te tuˈa i roto i to ratou iˈo e e oto ratou i te mauiui e a muri noa ˈtu.”—Iudita 16:17, Te Bibilia no Ierusalema [beretane]), te turu nei te mau faataaraa no nia i te Bibilia e te faahiti ra o Iesu i te parau no te haamauiuiraa mure ore. Teie râ, e ere te buka apokiripha a Iudita, tei ore hoi i faauruahia mai e te Atua, i te hoê niu papu no te faataa i te auraa o te mau papai a Mareko. Te na ô ra te Isaia 66:24, te irava ta Iesu i faahiti, e te haamou ra te auahi e te tuˈa i te mau tino pohe (“te mau tino,” ia au ia Isaia) o te mau enemi o te Atua. Aita roa e faahitihia ra te parau no te haamauiuiraa ara noa mure ore i roto anei i te mau parau a Isaia aore ra ta Iesu. Te faataipe ra te hohoˈa o te auahi i te haamouraa taatoa.

Te faahiti ra te Apokalupo 14:9-11 i te parau o te feia “e haamauiuihia . . . i te auahi e te gopheri . . . E e tia te au auahi i mauiui ai ratou ra i te peeraa i nia e a muri noa ˈtu.”a Te haapapu ra anei te reira i te haamauiuiraa ara noa mure ore i roto i te po auahi? I te parau mau, te faaite ra teie mau irava e e haamauiuihia te feia iino, eiaha râ e e haamauiuihia ratou e a muri noa ˈtu. Te faataa ra te irava e o te au auahi—haapapuraa e ua rave te auahi i ta ˈna ohipa haamouraa—o te pee i nia e a muri noa ˈtu, eiaha râ te haamauiuiraa o te auahi.

Te parau ra te Apokalupo 20:10-15 e “i roto i te roto auahi e te gopheri ra, . . . e haamauiuihia ratou i te rui e i te ao, e a muri noa ˈtu.” I te taioraa matamua, e au ra e e haapapuraa teie o te haamauiuiraa ara noa mure ore i roto i te auahi, tera râ, e ere mai te reira te huru. No te aha? I rotopu i te tahi atu mau tumu, e hope “te puaa e te peropheta haavare” e “te apoo e hade” i roto i te vahi e piihia ra i ǒ nei “te roto auahi.” Te taa ohie ra ia outou e, te puaa, te peropheta haavare, te pohe, e o Hade, e ere ïa i te mau taata mau; no reira, eita ratou e nehenehe e roohia i te mauiui ara noa. Maoti râ, te papai ra o G. B. Caird i roto i ta ˈna buka (Commentary on the Revelation of St. John the Divine), te auraa o “te roto auahi” o “te haamouraa e te aramoina-roa-raa.” Mea ohie roa ia taa i te reira, no te mea te faataa ra te Bibilia iho no nia i te roto auahi e: “Te roto auahi. O te piti teie o te pohe.”—Apokalupo 20:14.

E tia ia faataa ê i na haapiiraa faaroo e piti

Noa ˈtu teie mau tatararaa, te onoono nei e rave rahi feia tiaturi e e ere te reira te auraa o te parau “haamouraa,” o te haamauiuiraa mure ore râ. No te aha? Te faahemahia ra to ratou feruriraa e te haapiiraa faaroo tei apitihia e te po auahi—te haapiiraa no nia i te pohe-ore-raa te nephe taata nei. E i te mea e ua paruru ta ratou ekalesia i teie na haapiiraa toopiti i te roaraa o te mau senekele, te manaˈo nei ratou e te auraa o te mau irava e faahiti ra i te haamouraa, o te haamauiuiraa mure ore ïa. Inaha, eita te nephe pohe ore o te taata e nehenehe e haamouhia—ia au i ta te mau taata e rave rahi e feruri nei.

A tapao na râ i te manaˈo i faahitihia e te ekalesiatiko a te Ekalesia no Beretane ra o Philip E. Hughes: “Ia turuhia e o te nephe taata anaˈe o te ore roa e pohe, te turuhia ra ïa te hoê tiaraa o tei ore roa i fariihia i roto i te hoê noa ˈˈe vahi o te haapiiraa a te Papai, inaha, ia au i te hiˈoraa a te Bibilia, i roto i te huru o te taata, ua riro te pae varua e te pae tino ei hoê. . . . Ua faataehia ˈtu te faaararaa a te Atua i te omuaraa ra, no nia i te raau opanihia, ‘I te mahana oe e amu ai ra, e pohe oe,’ i te taata ei poieteraa tino e te nephe taatoa—ia amu noa ˈtu o ˈna, e pohe taatoa ïa o ˈna. Aita e faaitehia ra e te vai ra te hoê tuhaa i roto ia ˈna o te ore e pohe e, o te hoê noa ïa tuhaa o te pohe.”—The True Image—The Origin and Destiny of Man in Christ.

Oia atoa, te tapao ra te taata tuatapapa faaroo ra o Clark Pinnock e: “Ua ohipa teie haapiiraa [e eita te nephe taata e pohe] i nia i te tuapaparaa faaroo i roto i te hoê area tau maoro roa, teie râ, e ere teie haapiiraa no roto i te Bibilia. Aita te Bibilia e haapii ra i te pohe-ore-raa o te nephe.” Te haapapu ra te Ezekiela 18:4, 20 e te Mataio 10:28 i te reira. Hau atu, ua parau o Iesu iho e “ua taoto” to ˈna hoa i pohe ra o Lazaro. Ua parau o Iesu e “te haere nei [oia] e faaara ia ˈna.” (Ioane 11:11-14) No reira ˈtura, ua pohe te taata, oia hoi te nephe taata ra, o Lazaro, teie râ, i muri aˈe i te tahi taime i mairi, ua nehenehe oia e faatiahia mai, e faaora-faahou-hia mai. Te haapapu ra te mau ohipa i tupu i te reira. Ua faatia mai o Iesu ia Lazaro mai te pohe mai.—Ioane 11:17-44.

Mea nafea teie mau manaˈo ia ohipa i nia i te haapiiraa o te haamauiuiraa mure ore? I te senekele 17 ra, ua tapao te taata papai ra o William Temple e: “Te vai ra [te mau irava] o te faahiti nei i te parau no te taoraraahia i roto i te auahi mure ore. Teie râ, mai te peu e e taio tatou i te reira ma te ore e feruri na mua ˈˈe e mea pohe ore te mea e taorahia i reira, e taa ïa ia tatou e e haamouraa te reira, e ere râ te amaraa mure ore.” E parau mau roa teie tatararaa tano, no te mea te reira mau ta te Bibilia e haapii ra.

Oia mau, e mau tumu papu mau â to outou no te uiui no nia i te haamauiuiraa ara noa mure ore i roto i te po auahi. Aore ra, peneiaˈe te hinaaro nei outou e haere atu â i mua e e pee i te aˈoraa no te pae tuatapaparaa faaroo a te orometua Pinnock, o tei parau e: “E tia i te taatoaraa o te mau tiaturiraa no nia i te po auahi, e tae noa ˈtu te haamauiuiraa hopea ore, . . . ia tumâhia ia vai noa mai te haapiiraa e nehenehe e tiaturihia.” Oia mau, te faaue maira te pae morare, te parau-tia, e—te mea faufaa roa ˈtu â—te Parau a te Atua, te Bibilia, ia outou ia na reira.

Ia na reira outou, e ite ïa outou e e nehenehe te huru mau o te po auahi, e tiaturihia. E ite outou i te tahi haamaramaramaraa o te tauturu ia outou i nia i teie tumu parau i roto i te buka E nehenehe oe e ora e a muri noa ˈtu i roto i te paradaiso i nia i te fenua nei.b A ani atu i teie buka ia farerei outou i te mau Ite no Iehova. A taio i te mau pene “Eaha te tupu mai i muri aˈe i te poheraa?” “Te vai mau ra anei “te po auahi”? e “Tia-faahou-raa—no vai e i hea?” E ite ïa outou e e nehenehe te huru mau o te po auahi e tiaturihia hau atu râ, e parau papu atoa râ no a muri aˈe.

[Nota i raro i te api]

[Tumu parau tarenihia i te api 8]

TATARARAA I TE MAU PARAU

I roto i teie tumu parau, e tano te mau parau “po auahi” e “po auahi ura” ia au i tei faaohipahia e te feia tuatapapa faaroo a te amuiraa faaroo kerisetiano, i te parau heleni geʹen·na, e itehia e 12 taime i roto i te “Faufaa Apî.” (Mataio 5:22, 29, 30; 10:28; 18:9; 23:15, 33; Mareko 9:43, 45, 47; Luka 12:5; Iakobo 3:6) A huri ai e rave rahi mau tatararaa a te Bibilia i teie parau Heleni na roto i te parau “po auahi,” te papai nei vetahi “Gehenna.” E tuea teie parau i “te piti o te pohe, te roto auahi,” te hoê taipe o te haamouraa mure ore e itehia ra i roto i te buka hopea a te Bibilia.—Apokalupo 20:14.

No nia i na parau e piti ê atu tei hurihia i te tahi taime na roto i te parau “po auahi,” te tapao ra Te titionare a te Bibilia (1914, beretane), neneihia e William Smith, e: “Po auahi . . . o te parau ïa e faaohipahia ra ma te pinepine e te tano ore e ta tatou mau taata huri parau no te iriti i te parau Hebera ra Sheol. Mea huru maitai aˈe paha ia tapea noa mai i te parau Hebera Sheol, aore ra ia iritihia na roto i te parau ‘te menema’ aore ra ‘te apoo.’ . . . I roto i te F[aufaa] A[pî], te auraa o te parau Hades, mai te Sheol, i te tahi taime, o ‘te menema’ ïa. . . . Teie te auraa e parau ai te tooma no nia i to tatou Fatu e ‘Ua pou oia i roto i te po auahi,’ oia hoi te huru matauhia o te feia pohe.”

Taa ê atu i te Gehena, o te faataipe ra hoi i te haamouraa mure ore, e tano te Sheol e te Hade i te pohe i roto i te menema matauhia e te huitaata nei, ma te tiaturiraa e faatiahia mai no te ora faahou.—Apokalupo 20:13.

[Hohoˈa i te api 9]

Ua faaara mai o Iesu ia Lazaro mai te taoto o te pohe mai